ၸွမ်သိုၵ်း ယႃႇပျေႉ တူဝ်တႅၼ်းသိုၵ်းမၢၼ်ႈ ႁူဝ်ပဝ်ႈၵေႃႇမတီႇ ဢုပ်ႇဢူဝ်းလွင်ႈငမ်းယဵၼ် (NSPNC) ႁွင်ႉဢဝ် ၽူႈၶဝ်ႈၸုမ်းသေ ဢွၵ်ႇၶၢဝ်းတၢင်းၵႂႃႇမိူင်းလႃး တင်း ဝဵင်းပၢင်သၢင်း ႁူပ်ႉထူပ်းၸွမ်း ၽူႈၼမ်းသိုၵ်းဝႃႉ တင်း တပ်ႉသိုၵ်းမိူင်းလႃး ဝႃႈၼႆ။

မိူဝ်ႈဝၼ်းတီႈ 18/6/2026 ၸွမ်သိုၵ်း ယႃႇပျေႉ ႁူပ်ႉထူပ်းၸွမ်း ၽူႈၼမ်းၸုမ်းသိုၵ်းဝႃႉ တီႈဝဵင်းပၢင်သၢင်းသေ ဝၼ်းတီႈ 17 /6/2026 သမ်ႉ ႁူပ်ႉထူပ်းၸွမ်း ၽူႈၼမ်းၸုမ်းသိုၵ်းမိူင်းလႃး တီႈဝဵင်းမိူင်းလႃး ၼႂ်းၼႃႈလိၼ်ၶိုၵ်ႉတွၼ်း မၢႆ (4) တၢမ်တူဝ်ႁူဝ်ပဝ်ႈၵေႃႇမတီႇၶွၼ်ႈတုမ်ၵတ်းယဵၼ် ၸဝ်ႈထဵင်ႇလိုၼ်း ဢွၼ်ႁူဝ် ၽူႈယႂ်ႇၵူၼ်းလူင် ၼႂ်းမုၵ်ႉၸုမ်း ႁပ်ႉတွၼ်ႈဢုပ်ႇဢူဝ်း ၵၼ်ၵႂႃႇ ဝႃႈၼႆ။

ၽွင်းၸတ်းပၢင်ဢုပ်ႇဢူဝ်းလွင်ႈငမ်းယဵၼ် တီႈမိူင်းလႃးၼၼ်ႉၼၼ်ႉ တင်းသွင်ၾၢႆႇလႆႈဢုပ်ႇဢူဝ်းၵၼ်ၵႂႃႇ လွင်ႈၼိမ်တဵင်ႈ ၊ လွင်ႈၵတ်းယဵၼ် ၼႂ်းပိုၼ်ႉတီႈ၊ ၵၢၼ်ႁူမ်ႈမိုဝ်းၵၼ် ယုၵ်ႉမုၼ်း ႁႂ်ႈၵူႈၽႃႇသႃႇၸၢဝ်းၶိူဝ်း မီးလွင်ႈၶိုၼ်ႈယႂ်ႇတိူဝ်းတွၼ်းၵႂႃႇမိူဝ်းၼႃႈ ၸဵမ်ၸိူဝ်းၼႆႉၼႆ ႁွင်ႈၵၢၼ်သိုဝ်ႇ တပ်ႉသိုၵ်းမိူင်းလႃး ႁၢႆးငၢၼ်းဢွၵ်ႇဝႆႉၼင်ႇၼႆ။

ၼႂ်းပၢင်ၽူႈၼမ်းၸုမ်းသိုၵ်းဝႃႉ တင်း သိုၵ်းမၢၼ်ႈ ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းငဝ်ႈငုၼ်း UWSA/UWSP ဝဵင်းပၢင်သၢင်းၼၼ်ႉၵေႃႈ ငူပ်ႉငီႉၵၼ် လွင်ႈၶၵ်ႉၵၢၼ်ငမ်းယဵၼ် လႄႈ ၵၢၼ်ႁူမ်ႈမိုဝ်းၵၼ် ႁဵတ်းသၢင်ႈၽေႃႇၼမ်ႉၼႄတူဝ် လွင်ႈၽွမ်ႉႁူမ်ႈ ၼႂ်းပိုၼ်ႉတီႈၵႂႃႇပဵၼ်ပိူင်ယႂ်ႇ။

ၾၢႆႇ NSPNC ပဵၼ် ၸွမ်သိုၵ်းယႃႇပျေႉဢွၼ်ႁူဝ် ၊ ၽူႈၼမ်းၼႂ်း ဢူးမိၼ်းၼၢႆႇ၊ ဢူးၶိၼ်ႇၸေႃႇဢူး လႄႈ ဢေးဝိၼ်းၸိူဝ်းၼႆႉဢွၼ်ႁူဝ်မူႇၸုမ်းမႃးႁူပ်ႉထူပ်း။ ၾၢႆႇတၢင်းဝႃႉသမ်ႉပဵၼ် ၵႅမ်ႁူဝ်ပဝ်ႈလႄႈ ၽူႈၼမ်းႁွင်ႈၵၢၼ်ၾၢႆႇၵပ်းသိုပ်ႇၼွၵ်ႈမိူင်း ၵျႅဝ်ၵူဝ်ႇဢၢင်း၊ ၵႅမ်ၽူႈၼမ်းၼႂ်းၵူႈလွင်ႈလွင်ႈ ပဝ်းဢၢႆႈၶမ်း လႄႈၽူႈမီးပုၼ်ႈၽွၼ်း ၼႂ်းၶွမ်ႊမတီႊငဝ်ႈငဝ်းၶဝ်ႈႁူမ်ႈ ၼႆ ႁွင်ႈၵၢၼ်သိုဝ်ႇ တပ်ႉသိုၵ်းဝႃႉ ပိုၼ်ၽၢဝ်ႇႁၢႆးငၢၼ်းဝႆႉၼင်ႇၼႆ။

တပ်ႉသိုၵ်း မိူင်းလႃး တင်း တပ်ႉသိုၵ်းဝႃႉၼႆႉ ပဵၼ်ၽူႈၶဝ်ႈၸုမ်း ၼႂ်းၵေႃႇမတီႇဢုပ်ႇဢူဝ်းငူပ်ႉငီႉ ၵၢၼ်မိူင်းမိူင်းႁူမ်ႈတုမ် (FPNCC) ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်းႁူမ်ႈ ၵၼ်ၶွတ်ႇၽွတ်ႈဝႆႉၼၼ်ႉ။

ၵွၼ်ႇတူဝ်တႅၼ်းသိုၵ်းမၢၼ်ႈ ပႆႇၵႂႃႇႁူပ်ႉဢုပ်ႇတင်း တပ်ႉသိုၵ်းမိူင်းလႃး လႄႈ တပ်ႉသိုၵ်းဝႃႉၼၼ်ႉ တၢမ်တူဝ် ၸွမ်သိုၵ်းယႃႇပျေႉၵူၺ်းၼင်ႇၵဝ်ႇ ႁူပ်ႉဢုပ်ႇဢူဝ်းၸွမ်း ပႃႇတီႇမႂ်ႇသုင် ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ၽူႈၶဝ်ႈၸုမ်း FPNCC တီႈဝဵင်းၼေႇပျီႇတေႃႇလူင်ႈၼႃႈ မိူဝ်ႈဝၼ်းတီႈ 12 လိူၼ်ၵျုၼ်ႊ ပီ 2026 သေ တင်းသွင်ၾၢႆႇ ဢုပ်ႇဢူဝ်းငူပ်ႉငီႉၵၼ်ၵႂႃႇ တင်းသဵင်ႈမီး 13 ၶေႃႈ ၼႆ ႁွင်ႈၵၢၼ်သိုဝ်ႇ SSPP/SSA ႁၢႆးငၢၼ်းဢွၵ်ႇဝႆႉမိူၼ်ၵၼ်။

လိူၼ်ၵျုၼ်ႊၼႆႉၵူၺ်း သိုၵ်းမၢၼ်ႈၼႆႉ ႁူပ်ႉထူပ်းဢုပ်ႇဢူဝ်းငူပ်ႉငီႉၸွမ်း ၽူႈၶဝ်ႈၸုမ်း FPNCC ယဝ်ႉတူဝ်ႈၵႂႃႇ 3 ၸုမ်း။ ၽွင်းမိၼ်းဢွင်ႇလၢႆႇ လႆႈၸၼ်ႉၸွမ်ၸိုင်ႈ ပဵၼ်တၢင်းၵၢၼ်ၵႂႃႇယဝ်ႉသေ ၶွတ်ႇၽွတ်ႈၸုမ်းလူင်ပွင်ၸိုင်ႈ ဢၼ်ပႃးၽူႈၼမ်းသိုၵ်းယူႇဝႆႉၼႂ်း ႁွင်ႈၵၢၼ်လူင်ပွင်ၸိုင်ႈၼမ် လိူဝ်ပိူၼ်ႈၼၼ်ႉ တူဝ်တႅၼ်းသိုၵ်းမၢၼ်ႈ တင်း ၸုမ်းသိုၵ်းၶႄႇၵဝ်ႈၵၢင်ႉ၊ သိုၵ်းပလွင်ႈ (တဢၢင်း) ၶဝ်ၵေႃႈ လႆႈႁူပ်ႉထူပ်းဢုပ်ႇဢူဝ်းငူပ်ႉငီႉၵၼ် တီႈၼႂ်းဝဵင်းလႃႈသဵဝ်ႈယူႇ လၢႆပွၵ်ႈလၢႆၵမ်း တူၵ်းလူင်းၵိုတ်းယိုတ်းပၢင်တိုၵ်းၸွမ်းၵၼ်ဝႆႉၸူဝ်ႈၶၢဝ်း – ၼႆယဝ်ႉ။

ယၢမ်းလဵဝ် သိုၵ်းမၢၼ်ႈၼႆႉ ယင်းတိုၵ်ႉပဵၼ်ပၢင်တိုၵ်း ယိုဝ်းၵၼ်တင်း ၸုမ်းသိုၵ်းၶၢင် KIA ယူႇႁၢဝ်ႈႁႅင်း တၢင်းမိူင်းၶၢင်ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇၸၢင်ႈႁူပ်ႉထူပ်း ဢုပ်ႇဢူဝ်း လွင်ႈငမ်းယဵၼ်ၵၼ်လႆႈ။

ၵူၺ်းၵႃႈ မီးၶၢဝ်ႇႁူင်လိုဝ်းဢွၵ်ႇမႃးဝႆႉဝႃႈ သိုၵ်းမၢၼ်ႈ တင်း သိုၵ်းၶၢင် မီးၽႅၼ်ၵၢၼ် တေႁူပ်ႉဢုပ်ႇဢူဝ်းၵၼ တီႈဝဵင်းလူင်ၼေႇပျီႇတေႃႇယူႇၼႆသေတႃႉ ၸဝ်ႈသိုၵ်းလူင် ၼေႃႇပူႇ ၽူႈ ၶၢၼ်ပၢၵ်ႇၶွင် ၸုမ်းသိုၵ်းၶၢင် ယိုၼ်ယၼ်လၢတ်ႈတီႈႁွင်ႈၵၢၼ်သိုဝ်ႇဝႆႉလၢႆတီႈဝႃႈ ဢမ်ႇပႆႇမီးၽႅၼ်ၵၢၼ် တႃႇႁူပ်ႉဢုပ်ႇၵၼ် ဝႃႈၼႆ။