ႁူဝ်ပီ 2026 ၼႆႉ ၵၢၼ်မိူင်းၵၢၼ်သိုၵ်းၼႂ်းမိူင်းႁူမ်ႈတုမ်မၢၼ်ႈ မီးလွင်ႈလႅၵ်ႈလၢႆႈလၢႆပိူင်။ ၼႂ်းမိူင်းတႆးၵေႃႈ ပွတ်းလႂ်မီးၸုမ်းယိပ်းၵွင်ႈၵၢင်ႇၼမ် ပွတ်းၼၼ်ႉ မီးပၼ်ႁႃၼမ် ။ ၵူၼ်းမိူင်းၵေႃႈ ၵိၼ်း ။ ပေႃးတူၺ်း ပွတ်းတၢင်း ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၼႆႉၵေႃႈ ၼႂ်းလိူၼ်ၾႅပ်ႉပိဝ်ႊရီႊၼႆႉ သိုၵ်းဝႃႉလႄႈၸုမ်းပျီႇတူႉၸိတ်ႉလႃးႁူႇ မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် ယွၼ်ႉလုၵ်ႈၸုမ်းပႃႈတႂ်ႈတင်းသွင်ၾၢႆႇမီးလွင်ႈပိုတ်းယိုဝ်းၵၼ် ။ ထိုင်မိူဝ်ႈလဵဝ် ပၼ်ႁႃမၼ်းပႆႇယဝ်ႉ ။ ၼႂ်းၵႄႈၼၼ်ႉ ၵူၼ်းမိူင်းၸိူဝ်းဢမ်ႇၵဵဝ်ႇသင်ၵေႃႈ တိုၵ်ႉလိူတ်ႇမႆႈၸွမ်း ။

ၼႂ်းလိူၼ်ၾႅပ်ႉပိဝ်ႊရီႊ 2026 ၼႆႉ လုၵ်ႈၸုမ်းပျီႇတူႉၸိတ်ႉလႃးႁူႇ တႄႇယိုဝ်းလုၵ်ႈၸုမ်းသိုၵ်းဝႃႉဢွၼ်တၢင်းၼႆသေ ၾၢႆႇတပ်ႉသိုၵ်းဝႃႉ UWSA (ပွတ်းၸၢၼ်း) တႂ်ႈၼႃႈလိၼ်သိုၵ်း 171 တပ်ႉႁူၺ်ႈဢေႃႈ မိူင်းတူၼ် ဢမ်ႇႁၢၼ်ႉၸႂ် ၼႆ ၵူၼ်းပိုၼ်ႉတီႈလၢတ်ႈ။

ၵေႃႉဢၼ်ယိုဝ်းသိုၵ်းဝႃႉ လူႉတၢႆၼႂ်းပၢင်တေႃႇလွင်း တီႈၼႃးၵွင်းမူး ၸႄႈဝဵင်းမိူင်းတူၼ်ၼၼ်ႉ ၵူၼ်းပိုၼ်ႉတီႈလၢတ်ႈဝႃႈ ပဵၼ်ဢႃးတီ ဢႃယု 40 ပၢႆ လုၵ်ႈၸုမ်းပျီႇတူႉၸိတ်ႉလႃးႁူႇတႂ်ႈသိုၵ်းမၢၼ်ႈ ဝႃႈၼႆ ။

ၸွမ်းၼင်ႇ ၵူၼ်းပိုၼ်ႉတီႈလၢတ်ႈတႄႉ – လုၵ်ႈသိုၵ်းဝႃႉလႄႈ ဢႃးတီ ၼၼ်ႉ ၽိတ်းမေႃးၵၼ်ၼႂ်းပၢင်တေႃႇလွင်း သေ ထိုင်ႁူဝ်ၼႂ်ၸဝ်ႉ ဝၼ်းတီႈ 14/02/2026 ၼၼ်ႉ ၾၢႆႇသိုၵ်းဝႃႉသမ်ႉ ၸႂ်ႉဢဵၼ်ႁႅင်းမွၵ်ႈ 3-4 ၵေႃႉၶဝ်ႈတဵၵ်းတီႉၺွပ်း။ ဢႃးတီၵူဝ်ဢမ်ႇသူႈလႆႈလႄႈ ၸင်ႇထူၵ်းၵွင်ႈပွတ်းယိုဝ်း သႂ်ႇသိုၵ်းဝႃႉၸိူဝ်းၼၼ်ႉ ။ မၢတ်ႇတိူဝ်ႉလၢႆၵေႃႉသေ ဢၼ်ၵႂႃႇတၢႆႁိမ်းဝတ်ႉလူင်ၼႃးၵွင်းမူးၼၼ်ႉမီးၵေႃႉၼိုင်ႈ ” – ဝႃႈၼႆ။

ဝၢႆးသေ ပိုတ်းယိုဝ်းၵၼ်ၸိူင်ႉၼၼ်ယဝ်ႉ ဢႃးတီ ၸင်ႇလုၵ်ႉတီႈပၢင်တေႃႇလွင်းၼႃးၵွင်းမူးၼၼ်ႉသေ ၼႅတ်ႈ ၶိုၼ်း ပွၵ်ႈၸူးႁိူၼ်း ၊ ၽွင်းၼၼ်ႉ ၾၢႆႇသိုၵ်းဝႃႉ ပွင်ႇၶၢဝ်ႇၸူးၵၼ်သေ ပႂ်ႉတီႉၺွပ်း ဢႃးတီပွတ်းတၢင်း ။ လိူဝ်ၼၼ်ႉ သိုၵ်းဝႃႉ မိူဝ်းတီႉၺွပ်းပႃး မေးၼၢင်းဢႃးတီၼၼ်ႉသေဢမ်ႇၵႃး ယိုတ်းပႃး ၶူဝ်းၶွင်ႁိူၼ်းယေးၸိူဝ်းၼႆႉထႅင်ႈတင်းၼမ် ဝႃႈၼႆ ။

ၼႂ်းလိူၼ်ၾႅပ်ႉပိဝ်ႊရီႊ 2026 ၼႆႉတင်းလိူၼ် တႄႉ သိုၵ်းဝႃႉ UWSA ထႅမ်ႁႅင်းသိုၵ်း ပႂ်ႉၸွမ်းၼႂ်းပွၵ်ႉၼႂ်းၵိဝ်ႇလႄႈ ၵူၼ်းမိူင်းပုင်ႇပႃႇၶႅမ် တေၵႂႃႇႁႆႈၵႂႃႇသူၼ်ပေႃးပဵၼ်ယၢပ်ႇ။
ၽွင်းၼၼ်ႉ ၾၢႆႇပျီႇတူႉၸိတ်ႉလႃးႁူႇလႄႈသိုၵ်းမၢၼ်ႈၵေႃႈ ဢမ်ႇႁၼ်တူင်ႉၼိုင်သင် ။ မီးၶၢဝ်ႇလိုဝ်းၵမ်းၼိုင်ႈဝႃႈ တပ်ႉပိဝ်ႇႁႃႇမၢၼ်ႈ မိူင်းတူၼ် ပူင်ၵႂၢမ်းၼၵ်းဝႆႉတီႈ သိုၵ်းဝႃႉ ႁႂ်ႈထွႆဢွၵ်ႇၸွမ်းပိုၼ်ႉတီႈ ဢၼ်ထႅမ်ႁႅင်းဝႆႉ ၸိူဝ်းၼၼ်ႉ ၽႂ်းၽႂ်း ၼႆယူႇ။

ဝၢႆးၼၼ်ႉ တင်းသွင်ၾၢႆႇမီးလွင်ႈတူၵ်းလူင်းသင်ၵၼ်တႄႉ ဢမ်ႇႁူႉၸွမ်းတႅတ်ႈတေႃးသေတႃႉ သိုၵ်းဝႃႉထွၼ်ၶိုၼ်းဢဵၼ်ႁႅင်းဢၼ်ဢဝ်တီႈယူႇၸွမ်းပွၵ်ႉၸွမ်းယွမ်ႇၸိူဝ်းၼၼ်ႉ ။ ဝႃႈၼၼ်သေတႃႉ ထိုင်မိူဝ်ႈလဵဝ် ၸၢႆးဢႃးတီ လႄႈ တင်းမေးၼၢင်းမၼ်း ပႆႇလွတ်ႈဢွၵ်ႇမႃးၶိုၼ်း ၼႆ ၵူၼ်းပိုၼ်ႉတီႈလၢတ်ႈ ။

ဝၼ်းတီႈ 14 လိူၼ်ၾႅပ်ႊပိဝ်ႊရီႊ 2026 ၼၼ်ႉၵူၺ်းၼင်ႇၵဝ်ႇ ၵူၼ်းၸၢႆးႁဵတ်းၵၢၼ်ရူတ်ႉၶိူင်ႈႁပ်ႉၸၢင်ႈတီႈပုင်ႇပႃႇၶႅမ် ၵေႃႉၼိုင်ႈ ၺႃးမၢပ်ႇၼႄးဝႃႈ တေႃႉၼၢင်းယိင်းၸၢဝ်းဝႃႉ ပၢႆႈၶဝ်ႈမိူင်းထႆးၼႆသေ ၺႃးတီႉၺွပ်းဝႆႉ တေႃႇထိုင်ႁၢၼ်ႉၼႆႉ ။
ၵူၼ်းၵိၼ်ၸၢင်ႈရူတ်ႉႁပ်ႉၸၢင်ႈၼၼ်ႉ ၸိုဝ်ႈ ၸၢႆးလိုၼ်း ဢႃယု 26 ပီ တိုၵ်ႉမီးဝႆႉ လုၵ်ႈဢွၼ်ႇလဵၵ်ႉ 2 ၵေႃႉ ။ ၵူၼ်းႁူမ်ႈႁိူၼ်း ပဵၼ်တၢင်းမႆႈၸႂ်ႁႅင်းသေ ၵႂႃႇထၢမ်တီႈတပ်ႉသိုၵ်းဝႃႉ ပုင်ႇပႃႇၶႅမ်ၸိူဝ်းၼၼ်ႉယူႇသေတႃႉ ၾၢႆႇသိုၵ်းဝႃႉလၢတ်ႈဝႃႈ ဢမ်ႇႁူႉႁၼ်ၸွမ်းလွင်ႈၼႆႉ ၼႆယူႇ။

ၵူၼ်းပိုၼ်ႉတီႈ လၢတ်ႈၼႄပိူင်ပဵၼ်ဝႆႉၼင်ႇၼႆ –

မႃးၺွပ်းဢဝ်ၵႂႃႇၼႂ်းဝၢၼ်ႈၼႂ်းၵႄႈၵၢင်ဝၢၼ်ႈလူင် ၊ တေဝႃႈ ၵူဝ်ပိူၼ်ႈဢမ်ႇႁၼ်ၸွမ်းၵေႃႈ ။ ပေႃးၵႂႃႇထၢမ်ၶဝ်သမ်ႉဝႃႈ ၶဝ်ဢမ်ႇလႆႈၺွပ်းၼႆဝႃႈ ။ ပိူၼ်ႈႁၼ်ယူႇလူး ဝႃႈပဵၼ်ဝႃႉမႃးၺွပ်း ။ ၵူၺ်းၼႃႇမိူဝ်ႈၶဝ်မႃးၺွပ်းၼၼ်ႉ ၶဝ်သမ်ႉဢမ်ႇသႂ်ႇသိူဝ်ႈၶူဝ်းသိုၵ်းဝႃႉမႃး ၶဝ်ၼိုင်ႈၶူဝ်းၵူၼ်းႁိူၼ်း ၼုင်ႈၶူဝ်းယူဝ်းယူဝ်းမႃးၵူၺ်း

ၸၢႆးလိုၼ်းၼႆႉ တိုၼ်းပဵၼ်ၵူၼ်းၵိၼ်ၸၢင်ႈႁပ်ႉတေႃႉသူင်ႇၵူၼ်းယူႇယဝ်ႉလႄႈ ဢမ်ႇဝႃႈတေပဵၼ်ၵူၼ်းတီႈၸမ်တီႈၵႆမႃးၵေႃႈ မၼ်းတေႁပ်ႉသူင်ႇ ။ယွၼ်ႉ ပဵၼ်ၵၢၼ်ႁႃၵိၼ်လဵင်ႉၼႃႈႁိူၼ်း ဝႃႈၼႆ ။

ၼႂ်းဝၼ်းၼၼ်ႉ မီးၵူၼ်းထူဝ်းၾူၼ်းၸူးၸၢႆးလိုၼ်း ႁႂ်ႈၵႂႃႇႁပ်ႉပၼ်ၼၢင်းယိင်းၵေႃႉၼိုင်ႈ ၼႆသေ မႅၼ်ႈမိူဝ်ႈၸၢႆးလိုၼ်းဢွၵ်ႇၵႂႃႇ ယင်းပႆႇတၼ်းလႆႈတၢင်ႇၽႂ် သမ်ႉပေႃးၺႃးၺွပ်းၵႂႃႇၵမ်းလဵဝ် ၼႆ ၵူၼ်းၸိူဝ်းႁူႉႁၼ်ၸွမ်းလၢတ်ႈၼင်ႇၼႆ။

ဢမ်ႇႁူႉငဝ်ႈႁူႉႁၢၵ်ႈသေ မႃးတီႉၺွပ်းၵႂႃႇ ၸိူင်ႉၼႆ ပႆႇသၢင်ႇထုၵ်ႇ ။ သင်ဝႃႈ မီးတၢင်းၽိတ်းၼႆၵေႃႈ ၵိုင်ႇလီ လၢတ်ႈၼႄလွင်ႈတၢင်းမၼ်းသေ ႁဵတ်းၸွမ်းၶွပ်ႇၸွမ်းပိူင်ယူႇ – ၵူၼ်းပိုၼ်ႉတီႈသိုပ်ႇလၢတ်ႈ။

ၾၢႆႇသိုၵ်းဝႃႉ ပွတ်းတၢင်းပုင်ႇပႃႇၶႅမ်ၼႆႉ ၸဵမ်လႂ်မႃးလႂ်ၵေႃႈ ပေႃးဝႃႈ ထၢင်ႇထိူမ်ၵူၼ်းမိူင်းႁဵတ်းလွင်ႈတုမ်ႉတိူဝ်ႉၶဝ်သေပိူင်ပိူင်ၸိုင် တေတီႉၺွပ်းလူၺ်ႈဢမ်ႇတၼ်းႁူႉလွင်ႈႁူႉတၢင်း ၊ ၸုမ်းလႂ်ၵေႃႈ ဢမ်ႇႁတ်းၶတ်းၶၢၼ်ႉႁၢမ်ႈသီးၶဝ် ။ ပေႃးဝႃႈ တၢင်ႇမူႇတၢင်ႇၸုမ်းတီႉၺွပ်းၺႃး ၵူၼ်းဝႃႉဝႆႉတႄႉ တေဢဝ်ႁႅင်းသိုၵ်းဝႅတ်ႉလွမ်ႉသေ ယွၼ်းဢဝ်ၶိုၼ်းၵမ်းလဵဝ်လူးၵွၼ်ႇ ၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ –

ဝၢၼ်ႈမိူင်းၼႆႉ မီးပၵ်းမီးပိူင်ဝႆႉယူႇလူး ၊ ပေႃးဝႃႈ ၵူၼ်းမိူင်းၽိတ်းၵေႃႈ ႁဵတ်းၸွမ်းပၵ်းပိူင်လူးၼေႃႈ ။ ၼႆႉသမ်ႉ ပေႃးပဵၼ်ၵူၼ်းပိူၼ်ႈသမ်ႉ တီႉၺွပ်းဝႆႉသေ ပေႃးပဵၼ်တၢင်ႇၸုမ်းတီႉၺွပ်းၵူၼ်းၸဝ်ႈၵဝ်ႇတႄႉ ဝႅတ်ႉလွမ်ႉ ယွၼ်းဢဝ်ၵမ်းလဵဝ်ႁဵတ်းၼၼ်ၼေႈ ။ တေႃႇမိူဝ်ႈလဵဝ် ၵူၼ်းဢၼ်သိုၵ်းဝႃႉၶဝ်ၺွပ်းၵႂႃႇၼႆႉ ပွႆႇၵေႃႈ ဢမ်ႇပွႆႇ ၊ ၵူၼ်းတၢင်းၼွၵ်ႈၵေႃႈ ဢမ်ႇပၼ်ထူပ်း

တေႃႇထိုင် မိူဝ်ႈလဵဝ် ဢႃးတီဢိၵ်ႇတင်းမေးၼၢင်း လႄႈ ၸၢႆးလိုၼ်းၵူၼ်းႁပ်ႉၸၢင်ႈရူတ်ႉၶိူင်ႈ ၺႃးတီႉၺွပ်းဝႆႉ ၶၢဝ်းတၢင်းလိူၼ်ပၢႆ ပႆႇႁူႉငိူၼ်ႈႁူႉၶႆဝႃႈ တေပွႆႇပၼ်ၶိုၼ်းမိူဝ်ႈလႂ် လႄႈ တီႉၺွပ်းဝႆႉတီႈလႂ် ။

ပွတ်းတၢင်းပုင်ႇပႃႇၶႅမ်ၼႆႉ ပျီႇတူႉၸိတ်ႉလႃးႁူႇ ( တပ်ႉပႂ်ႉလႅၼ်လိၼ် 1007) တႂ်ႈသိုၵ်းမၢၼ်ႈ ၊ လႄႈ သိုၵ်းဝႃႉ UWSA (ပွတ်းၸၢၼ်း) တႂ်ႈၼႃႈလိၼ်သိုၵ်း 171 ၵႆႉမီးလွင်ႈတွၵ်ႉတႅၵ်ႉၵၼ် ။ ပေႃးပဵၼ်ပၼ်ႁႃၵၼ်မႃး ၵူၼ်းပိုၼ်ႉတီႈ ၵႆႉတူၵ်းပဵၼ်တူဝ်ယိူဝ်ႇၸွမ်း ။ သင်ဝႃႈ မီးလွင်ႈတီႉၺွပ်းၵူၼ်းမိူင်းဝႆႉၼႆၵေႃႈ ဢမ်ႇသူႈပိုၼ်ၽၢဝ်ႇလၢတ်ႈၼႄလူင်ႉလႅင်းဝႃႈ တီႉၺွပ်း ပိူဝ်ႈသင်။ ဢမ်ႇပၼ်ၵူၼ်းၼွၵ်ႈႁူႉ လပ်ႉႁူလပ်ႉတႃၵူၼ်းမိူင်းဝႆႉတႃႇသေႇၼႆ ၵူၼ်းမိူင်းလၢတ်ႈဝႆႉၼင်ႇၼႆ။