ဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၼႆႉ ယၢမ်းလဵဝ်ႈၽူႈလၵ်ႉၸၵ်ႉၶုတ်ႈ လိူင်ႇၼမ်   ၼႂ်လဵဝ်ၵူၺ်း ရူတ်ႉၶိူင်ႈၵူၼ်းမိူင်း ႁၢႆ သွင်လမ်း   ။

မိူဝ်ႈၼႆႉဝၼ်းတီႈ 31/7/2026 ယၢမ်းၵၢင်ၼႂ် 7 မူင်းၶိုင်ႈၼၼ်ႉ မီးၵူၼ်းလၵ်ႉ ရူတ်ႉၶိူင်ႈသီလမ်သွမ် သႅၼ်း Wave 110 ပီ 2026 ဢၼ်ၵိုတ်းဝႆႉတီႈတၢင်းၶဝ်ႈၵၢတ်ႇ  ဝဵင်းမိူင်းသၢတ်ႇ  ၼၼ်ႉလမ်းၼိုင်ႈလႄႈ လၵ်ႉရူတ်ႉၶိူင်ႈၵူၼ်းဝၢၼ်ႈၵၢတ်ႇ သီသွမ်ႇ သႅၼ်း Wave 110 ပီ 2024  ၵႂႃႇလမ်းၼိုင်ႈ  ဝႃႈၼႆ ။  

ၵူၼ်းၸၢႆးယူႇဝဵင်းမိူင်းသၢတ်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ-“ၼႂ်ၼႆႉၵူၺ်းႁၢႆၵႂႃႇသွင်လမ်း ၊ လမ်းၼိုင်ႈၼႆႉ ဝႆႉတီႈၶၢင်ႈၵၢတ်ႇသေႁၢႆၵႂႃႇ တီႈၼၼ်ႈ မီးၵူၼ်းပႂ်ႉၵဵပ်းငိုၼ်းယူႇလႄႈ ၵိုတ်းဝႆႉဢေႃႈ ၊ ၶဝ်ႈၵႂႃႇၼႂ်းၵၢတ်ႇၵမ်ႉ ဢွၵ်ႇမႃးတူၺ်းၶိုၼ်းၵေႃႈဢမ်ႇႁၼ်ယဝ်ႉ ။ လၵ်ႉၵႂႃႇၸိူင်ႉႁိုဝ်ဢမ်ႇႁူႉ ၶဝ်တေၸႂ်ႉၶိူင်ႈမိုဝ်းပႃးၶႃႈၵႂႃႈ ၊ ထႅင်ႈလမ်းၼိုင်ႈပဵၼ်ရူတ်ႉၶိူင်ႈၵူၼ်းဝၢၼ်ႈၵၢတ်ႇဢေႃႈ “- ဝႃႈၼႆ ။ 

ဝၢႆးၼၼ်ႉ ၸဝ်ႈရူတ်ႉ ၵႂႃႇၸႅင်ႈ ၽူႈမီးပုၼ်ႈၽွၼ်းလႄႈ ပလိၵ်ႈသိုၵ်းမၢၼ်ႈဝႆႉယူႇၼႆသေတႃႉ ထိုင်မိူဝ်ႈလဵဝ်  ပႆႇတီႉၺွပ်းလႆႈၵူၼ်းလၵ်ႉ  ။  ၵူၼ်းပိုၼ်ႉတီႈလၢတ်ႈဝႃႈ ၾၢႆႇၽူႈမီးပုၼ်ႈၽွၼ်း  ဢမ်ႇၸွႆႈတူၺ်း ထိုင်ပၼ်လႆႈလွင်ႈႁူမ်ႇလူမ်ႈၵူၼ်းမိူင်းလႄႈ ထိုင်တီႈၵူၼ်းမိူင်း ပေႃးလႆႈၾၢင်ႉသတိ ဢဝ်ႁူမ်ႇလူမ်ႈယူႇၵႂႃႇႁင်းၽႂ်မၼ်း  ဝႃႈၼႆ။  

တီႈဝဵင်းမိူင်းသၢတ်ႇ ယၢမ်းလဵဝ် ႁွင်ႈၵိၼ်ၵျေႃႇမူၼ်ႈသိူဝ်း KTV  လိူင်ႇၼမ် ၊ ပၼ်ႁႃယႃႈမဝ်းၵမ်ဢၼ်မီးဝႆႉၸဵမ်ပိုင်းၵေႃႈ  ယၢမ်းလဵဝ်ယိင်ႈၶႅၼ်းလိူင်ႇၼမ်။ ယႃႈမဝ်းၵမ်ၵေႃႈ သိုဝ်ႉငၢႆႈမႃးလိူဝ်ၵဝ်ႇဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ်ၽဵဝ်ႈလၢင်ႉႁႂ်ႈထိုင်တီႈလႆႈလႄႈၵူၼ်းမိူင်း ပေႃႈမႄႈလုၵ်ႈဢွၼ်ႇဢွၼ်ၵၼ်မႆႈၸႂ်  လွင်ႈယႃႈမဝ်းၵမ် ဢၼ်ႁဵတ်းႁႂ်ႈတၢင်းယၢမ်ႈလုၵ်ႈဢွၼ်ႇလူႉ လႄႈ  ႁဵတ်းႁႂ်ႈ မီးၽူႈလၵ်ႉၸၵ်ႉၶုတ်ႈလိူင်ႇၼမ်မႃးႁႅင်း – ၵူၼ်းပိုၼ်ႉတီႈလၢတ်ႈ ။

မိူင်းသၢတ်ႇၼႆႉ မီးငဝ်ႈငုၼ်းၵုမ်းၵမ်ယၼ်ႇသိုၵ်း  ၸၵၶ 14 ပၵ်းဝႆႉသေ မီးတပ်ႉၶလရ 49 လႄႈ 278  ၶမရ 333 ၊ 527 ဢိၵ်ႇတင်းတပ်ႉတေႃႉသူင်ႇ တပ်ႉၾၢႆႇပွင်ႇၶၢဝ်ႇသိုဝ်ႇသၢၼ်၊ တပ်ႉၾၢႆႇမၢၵ်ႇမိုဝ်ႈၸိုၼ်းယၢမ်း ၸိူဝ်းၼႆႉတင်းမူတ်းမီး 11 တပ်ႉ။ ၼွၵ်ႈလိူဝ်ၼၼ်ႉ မီးႁွင်ႈၵၢၼ်တႂ်ႈ တပ်ႉသိုၵ်းထႅင်ႈ လၢႆလၢႆႁွင်ႈၵၢၼ်။  လႄႈတပ်ႉပႂ်ႉလႅၼ်လိၼ် ဢိၵ်ႇပျီႇတူႉၸိတ်ႉထႅင်ႈ ၼႆယဝ်ႉ ။