မိူဝ်ႈဝႃး ဝၼ်းတီႈ 14 လိူၼ်ၵျူႊလၢႆႊ တွၵ်ႊတိူဝ်ႊထဵင်ႇလိၼ်းဢူး ၵႅမ်ၽွင်းလူင် လႄႈ ၵႅမ်ၽူႈတၢင်လၢတ်ႈ ၼႂ်းႁွင်ႈၵၢၼ်ၽွင်းလူင်ပၵ်းပိူင်မၢႆမီႈ တၢင်ႇလၢတ်ႈၵႂႃႇၼႂ်းပၢင်ၵုမ်လုမ်းသၽႃးမိူင်းႁူမ်ႈတုမ် တႃႇသိုပ်ႇမၵ်းမၼ်ႈငဝ်းလၢႆးၶိုၵ်ႉၶၵ်ႉ ဢဝ်ပိူင်ၵၢၼ်သိုၵ်းမၢၼ်ႈၽွင်းငမ်းၵႂႃႇထႅင်ႈ 58 ဝဵင်း တႃႇၶၢဝ်းတၢင်း 3 လိူၼ် ၼႆယဝ်ႉ။

ၼင်ႇႁိုဝ် ဝဵင်းၸိူဝ်းဢၼ်မီးၸုမ်းယိပ်းၵွင်ႈၵၢင်ႇၼမ်ၸိူဝ်းၼၼ်ႉ တေမီးငဝ်းလၢႆးၵတ်းယဵၼ်ၼိမ်သဝ်းၼၼ်ႉ ၸင်ႇလႆႈယိုၼ်ႈတၢင်ႇလိူင်ႈ တေတေႃႇဢႃႇယု ပိူင်ၵၢၼ်ၽွင်းငမ်းသိုၵ်း (ငဝ်းလၢႆးၶိုၵ်ႉၶၵ်ႉ) ၵႂႃႇထႅင်ႈ 90 ဝၼ်း သိုၵ်းမၢၼ်ႈလၢတ်ႈၼင်ႇၼႆ။

ပေႃးထိုင်မႃး ဝၼ်းတီႈ 21 လိူၼ်ၵျူႊလၢႆႊၼႆႉ ဝဵင်းၸိူဝ်းဢၼ်သိုၵ်းမၢၼ်ႈပိုၼ်ၽၢဝ်ႇဢွၵ်ႇဝႆႉ ငဝ်းလၢႆးၶိုၵ်ႉၶၵ်ႉ ၸႂ်ႉတိုဝ်းပိူင်ၵၢၼ်သိုၵ်းၽွင်းငမ်းၵႂႃႇ တႄႇမိူဝ်ႈလိူၼ်ဢေႊပရႄႊ 23 ဝၼ်းၼၼ်ႉ တေတဵမ် ၶၢဝ်းတၢင်း 90 ဝၼ်း။

လႆႈႁူႉဝႃႈ လုမ်းသၽႃးမိူင်းႁူမ်ႈတုမ် ႁႂ်ႈတူဝ်တႅၼ်းပႃႇတီႇတင်းသဵင်ႈ ၸိူဝ်းၶႂ်ႈဢုပ်ႇဢူဝ်းလွင်ႈၵၢၼ်တေႃႇဢႃႇယု သိုၵ်းၽွင်းငမ်းဝဵင်းၼၼ်ႉ တၢင်ႇသဵၼ်ႈၸိုဝ်ႈဝႆႉ ဝၼ်းတီႈ 16 လိူၼ် ၵျူႊလၢႆႊပဵၼ်လိုၼ်းသုတ်းသေ တေဢဝ်လိူင်ႈၼႆႉ သိုပ်ႇၵႂႃႇဢုပ်ႇဢူဝ်းၵၼ် ၼႂ်းပၢင်ၵုမ် ဝူင်ႈၼႃႈ ဝၼ်းတီႈ 21 – ၼႆယဝ်ႉ။

ဝဵင်းဢၼ်ၽွင်းလူင် ၼႂ်းႁွင်ႈၵၢၼ်ၽွင်းလူင်ပၵ်းပိူင်မၢႆမီႈ ၶႂ်ႈသိုပ်ႇတေႃႇဢႃႇယု ငဝ်းလၢႆးၶိုၵ်ႉၶၵ်ႉ ဢဝ်ပိူင်သိုၵ်းသိုပ်ႇၽွင်းငမ်းၵႂႃႇထႅင်ႈ 58 ဝဵင်းၼၼ်ႉ ပဵၼ်ၼႂ်းၸႄႈမိူင်းၶၢင် 5 ဝဵင်း၊ ၸႄႈမိူင်းယၢင်းလႅင် 3 ဝဵင်း၊ ၸႄႈမိူင်းယၢင်းၽိူၵ်ႇ 2 ဝဵင်း၊ ၸႄႈမိူင်းၶျၢင်း 5 ဝဵင်း၊ တိူင်းၸႄႈၵႅင်း 8 ဝဵင်း၊ တိူင်းမၵူၺ်း 5 ဝဵင်း၊ တိူင်းမၢၼ်းတလေး 1 ဝဵင်း ၊ ၸႄႈမိူင်းရၶႅင်ႇ 14 ဝဵင်း ၊ မိူင်းတႆးပတ်းပိုၼ်ႉ 15 ၸႄႈဝဵင်း ၼႆယဝ်ႉ။

ၼႂ်းမိူင်းတႆးပတ်းပိုၼ်ႉ 15 ၸႄႈဝဵင်းၼႆႉ ပဵၼ်ၸႄႈဝဵင်းၼမ်ႉတူႈ၊ မၢၼ်ႈပဵင်း၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ ၵၢတ်ႇၵဝ်ႇ (လၢဝ်ႇၵၢႆး) ၊ ၵွင်းၸၢင်ႉ (ၵူင်းၵျၢမ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸဵမ်ၸိူဝ်းၼႆႉ – ဝႃႈၼႆ။