လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ပိုၼ်ၽၢဝ်ႇ ဝၼ်းတီႈ 3/9/2026 ဝႃႈ ၼႂ်းလိူၼ်ဢေႃႊၵတ်ႉသ် ထူၼ်ႈ 8 ၼႆႉလိူၼ်လဵဝ် သိုၵ်းမၢၼ်ႈဢဝ်ႁိူဝ်းမိၼ်ယိုဝ်း၊ တီႉၺွပ်းသူင်ႇတၢင်း၊ ပွႆႇမၢၵ်ႇသႂ်ႇသေလႄႈ ၵူၼ်းမိူင်းလႆႈလူႉတၢႆၵႂႃႇ 200 ပၢႆယဝ်ႉဝႃႈၼႆ။

NUG တႅမ်ႈဢွၵ်ႇဝႆႉဝႃႈ – ၼႂ်းလိူၼ်ဢေႃႊၵတ်ႉသ် လိူၼ်လဵဝ် သိုၵ်းမၢၼ်ႈ ႁဵတ်းလွင်ႈပူၼ်ႉပႅၼ်သုၼ်ႇလႆႈၵူၼ်း 528 ၵမ်း။ ၼႂ်းၼၼ်ႉလွင်ႈၶႃႈႁႅမ်ၵူၼ်းမိူင်းတၢႆ၊ လွင်ႈတီႉၺွပ်းၵူၼ်းမိူင်းလႄႈ လွင်ႈယႃႉၶူဝ်းၶွင်ၵူၼ်းမိူင်းၸိူဝ်းၼႆႉ။ သိုၵ်းမၢၼ်ႈပူၼ်ႉပႅၼ်တီႈၼႂ်းတိူင်းဝဵင်းလိူဝ်ႇ (မၼ်းတလေး) 110 ၵမ်း၊ ၼမ်လိူဝ်ပိူၼ်ႈသုတ်းၼႂ်းမိူင်းႁူမ်ႈတုမ် ဝႃႈၼႆ။

ၼႂ်းသဵၼ်ႈမၢႆၼၼ်ႉပႃးဝႆႉထႅင်ႈဝႃႈ – ဢၼ်သိုၵ်းမၢၼ်ႈၶႃႈႁႅမ်တၢႆပဵၼ်မူႇပဵၼ်ၾုင်ၼၼ်ႉ ၼႂ်း 4 ၸႄႈတွၼ်ႈၼႆႉ ပဵၼ်ၵႂႃႇ 8 ၵမ်း။ ၵူၼ်းမိူင်းတၢႆ 68 ၵေႃႉ။ ၼႂ်းၼၼ်ႉ လုၵ်ႈဢွၼ်ႇ ဢႃယု 18 ၶူပ်ႇ ပႃး 7 ၵေႃႉ ။

ဢၼ်ဢဝ်ႁိူဝ်းမိၼ်သိုၵ်းပွႆႇမၢၵ်ႇသႂ်ႇသမ်ႉပဵၼ် 13 တီႈ တင်းမူတ်း 530 ၵမ်း။ ၵူၼ်းမိူင်းတၢႆ 139 ၵေႃႉ ပႃးလုၵ်ႈဢွၼ်ႇ 18 ၵေႃႉ။

ၼႂ်းၼၼ်ႉ တိူင်းၸႄႈၵႅင်း ၺႃးၼမ်ပိူၼ်ႈသုတ်း ။ ပဵၼ်တီႈဝၢၼ်ႈ သွႆးလႄးဢူဝ်ႇ ၸႄႈဝဵင်းမျွင်ႇ။ မီးၵူၼ်းတၢႆထင်တီႈ 16 ၵေႃႉ။ မၢတ်ႇၸဵပ်းသေလႆႈၵႂႃႇယူတ်းယႃတူဝ် 26 ၵေႃႉ ။ ၵမ်ႈၼမ်ပဵၼ် ယေႃးၵီႇ ၸိူဝ်းမႃးတိုဝ်းၵမ်သိလ်ထမ်း။ တီႈၼႆႈၼႆႉ ႁိူၼ်းယေးၵူၼ်းမိူင်းၵွႆၵႂႃႇ 126 လင်၊ ဝတ်ႉဝႃးၽႃသိူဝ်ႇၵူႈသႃသၼႃ ၵွႆၵႂႃႇ 17 လင်၊ ႁူင်းႁဵၼ်းၵွႆၵႂႃႇ 10 လင်လႄႈ ႁူင်းႁေႃၾၢႆႇယူတ်းယႃလႄႈၾၢႆႇယႃႈယႃ ၵွႆၵႂႃႇ 4 လင် – ဝႃႈၼႆ။

ၼႂ်းမိူင်းတႆးၵေႃႈ ၼႂ်းလိူၼ်ထူၼ်ႈ 8 ၼႆႉ သိုၵ်းမၢၼ်ႈဢဝ်ႁိူဝ်းမိၼ်မႃးပွႆႇမၢၵ်ႇ တီႈမိူင်းမိတ်ႈ လႄႈ တၢင်းမိူင်းပၢႆး ၾၢႆၶုၼ် ၸိုင်ႈတႆးပွတ်းၸၢၼ်း ၸိူဝ်းၼႆႉ။

လွင်ႈၼႆႉ ယူႇတီႈ NUG သေပိုၼ်ၽၢဝ်ႇဝႆႉဝႃႈ – ဢၼ်လႆႈၵဵပ်းသဵၼ်ႈမၢႆလွင်ႈၸုမ်းသိုၵ်းမၢၼ်ႈႁဵတ်းမိူၵ်ႈမႂ်ႈတေႃႇၵူၼ်းမိူင်းၼႆႉ တႃႇပဵၼ်လၵ်းထၢၼ်တႃႇဢဝ်လိူင်ႈ ပၼ်တူတ်ႈတၢမ်ႇသိုၵ်းမၢၼ်ႈ ဢၼ်ႁဵတ်းႁၢႆႉတေႃႇၵူၼ်းမိူင်း၊ တႃႇႁႂ်ႈသိုၵ်းမၢၼ်ႈႁပ်ႉပုၼ်ႈၽွၼ်းၶိုၼ်း။ ယိူင်းဢၢၼ်းတႃႇႁႂ်ႈၵူၼ်းမိူင်းလႆႈလွင်ႈၽဵင်ႇပဵင်း၊ လွင်ႈငမ်းယဵၼ်လႄႈ လွင်ႈပဵၼ်ထမ်းတြႃး – ဝႃႈၼႆ။