တႄႇႁၢင်လိူၼ်ဢေႃးၵၢတ်ႉသ်ၼႆႉမႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ထူဝ်းသိုၵ်းၶဝ်ႈၼႂ်းထုင်ႉၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ၵူဝ်ႁႄ – ဢမ်ႇမီးလွင်ႈႁူမ်ႇလူမ်ႈၼႆယဝ်ႉ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ၶဝ်(သိုၵ်းမၢၼ်ႈ) ထူဝ်းသိုၵ်းၶဝ်ႈ ၵႆႉတီႉၺွပ်းလႄႈ လႆႈၾၢင်ႉယူႇၾၢင်ႉၵိၼ်ဝႆႉဢေႃႈ ၊ ၶဝ်ၵူတ်ႇထတ်းပႃးၸွမ်းၵဵတ်ႉလၢၼ်ႇ ၵူၼ်းၵႂႃႇမႃးႁၢဝ်ႈႁႅင်းဝႆႉ ၊ ၵူၼ်းမိူင်းပိုၼ်ႉတီႈ ဢမ်ၸၢင်ႈၵႂႃႇမႃးလွတ်ႈလႅဝ်း ”– ဝႃႈၼႆ ။
ယၢမ်းလဵဝ် ဝၢၼ်ႈဢၼ်သိုၵ်းမၢၼ်ႈထူဝ်းသိုၵ်းၶဝ်ႈၼႆႉပဵၼ်တၢင်းဝၢၼ်ႈ ဢိၼ်းတဵင်ႇ (အင်းတိန်) ၊ လႄႈ ဝၢၼ်ႈတိၼ်လွႆ (တောင်ခြေရွာ )ၸိူဝ်းၼၼ်ႉဝႆႉ ။ လိူဝ်ၼၼ်ႉ ပေႃးထိုင်ၶၢဝ်းၵၢင်ၶမ်ႈ ၵၢင်ၶိုၼ်း သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ပႂ်ႉၸွမ်းသဵၼ်ႈတႃႈ သၢႆတၢင်းသေ တီႉၺွပ်းဢဝ် ၵူၼ်းၸိူဝ်းဢွၵ်ႇႁိူၼ်း ဢွၵ်ႇဝၢၼ်ႈ ဝႃႈၼႆ။
မိူဝ်ႈႁူဝ်လိူၼ်ဢေႃးၵၢတ်ႉသ်ၼႆႉ ၸုမ်းသိုၵ်းမၢၼ်ႈယိုတ်းမိူင်း တီႉၺွပ်းဢဝ်ၵႂႃႇ ၵူၼ်းၸၢႆး သွင်ၵေႃႉ ဢၼ်လုၵ်ႉတၢင်ႇဝၢၼ်ႈတၢင်ႇဝဵင်း မႃးဢႅဝ်ႇ ၼႂ်းဝဵင်းယွင်ႁူၺ်ႈၵႂႃႇ ၽွင်းၵၢင်ၼႂ်ၸဝ်ႉၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။
လိူဝ်ၼၼ်ႉဢမ်ႇၵႃး သိုၵ်းမၢၼ်ႈ လႄႇလမ်းႁႃသွၵ်ႈတဝ် တီႉၺွပ်းၵူၼ်းႁဵတ်းၵၢၼ်တူင်ႇဝူင်းၵူၼ်း ၼႂ်းၸႄႈဝဵင်းယွင်ႁူၺ်ႈႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းႁဵတ်းၵၢၼ်တူင်ႇဝူင်ႉ လႆႈၵိုတ်းၵၢၼ်ငၢၼ်း ဝႆႉၼႆယဝ်ႉ ။
မိူဝ်ႈဝၼ်းတီႈ 28 လိူၼ်ဢွၵ်ႉထူဝ်ႊပိူဝ်ႊ ပီ 2022 ၼၼ်ႉ သိုၵ်းမၢၼ်ႈပိုၼ်ၽၢဝ်ႇဢွၵ်ႇဝႃႈ ၸုမ်းႁဵတ်းၵၢၼ် တူင်ႇဝူင်း ၵူၼ်း ၸိူဝ်းဢမ်ႇၶဝ်ႈပႃးၼႂ်း ႁွင်ႈၵၢၼ်လူင်ပွင်ၸိုင်ႈၼၼ်ႉ တေလႆႈတၢင်ႇမၢႆၾၢင်တၢင်းသဵင်ႈ ။ သင်ဢမ်ႇမီးမၢႆၾၢင်ပဵၼ်တၢင်းၵၢၼ်ၸိုင် တေၺႃး ဢဝ် လိူင်ႈ ၊ ပေႃးႁဵတ်းၵၢၼ်ၵဵဝ်ႇ ၵွင်ႉၸွမ်း ၸုမ်းႁဵတ်းၵၢၼ်မိူင်းၵေႃႈ တေၺႃးတူတ်ႈတၢမ်ႇ – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ