မိူဝ်ႈဝႃးဝၼ်းတီႈ 1/9/2026 ၼႆႉ သိုၵ်းမၢၼ်ႈယိုတ်းမိူင်း ၵူတ်ႇထတ်းတီႉၺွပ်း ႁွင်ႉဢဝ်ၵႂႃႇၵူၼ်းဝၢၼ်ႈ ယၼႄး (ရနဲ) လႄႈ တွင်ႇဢူး (တောင်ဦး) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း၊ ၵူၼ်းမိူင်းထုၵ်ႇတီႉၺွပ်း ဢမ်ႇယွမ်း 10 ၵေႃႉ ဝႃႈၼႆ။

လွင်ႈၼႆႉ ၵူၼ်းပိုၼ်ႉတီႈၵေႃႉၼိုင်ႈတႄႉလၢတ်ႈဝႃႈ – သိုၵ်းမၢၼ်ႈ တီႉၺွပ်းၵူၼ်းမိူင်းၵႂႃႇ တႃႇႁႂ်ႈတေႃႉပၼ်ၶူဝ်းၶွင်ၶဝ်လႄႈ တႃႇဢဝ်ႁဵတ်းႁူဝ်ႉတၢႆတၢင်ၶဝ် တီႈၼႃႈသိုၵ်း ၽွင်းယိုဝ်းတိုၵ်းၵၼ်တင်း ၸုမ်းလုၵ်ႉၽိုၼ်ႉ ဝႃႈၼႆ။

ယၢမ်းလဵဝ်သိုၵ်းမၢၼ်ႈၵႆႉၵူတ်ႇထတ်းတီႉၺွပ်းၵူၼ်းဝၢၼ်ႈ ႁၢဝ်ႈႁႅင်း ၊ ၵူၼ်းဝၢၼ်ႈဢၼ်ထုၵ်ႇသိုၵ်းမၢၼ်ႈတီႉၺွပ်းၵႂႃႇၼၼ်ႉပဵၼ်ၵူၼ်းဝၢၼ်ႈ သတ်ႉၶျၢၼ်ႇ  (ဆတ်ခြံ) ၊ တွင်ႇဢူး ၊ ထမိၼ်းပွင်း ၊ ၵျွၵ်ႉတေႃး ၊ ငူၺ်ႇတွင်ႇ ၸိူဝ်းၼႆႉဝႆႉၼႆ ၼၢင်းယိင်းၼႂ်းပိုၼ်ႉတီႈလၢတ်ႈ ။

ၵဵဝ်ၵပ်းလွင်ႈၼႆႉၽူႈၶၢၼ်ပၢၵ်ႇ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼု DSNDA လၢတ်ႈၽူႈတွႆႇႁွၵ်ႈဝႃႈ -“ၶဝ်တီႉၼမ်ၼႃႇ ဢမ်ႇပႆႇလႆႈႁူႉႁူဝ်ယွႆႈမၼ်း ပေႃးၶဝ်တီႉၺွပ်းၵႂႃႇယဝ်ႉ ဢမ်ႇလႆႈႁူႉဝႃႈ ၵႂႃႇဝႆႉတီႈလႂ် ၊ မၢင်ၸိူဝ်းဢမ်ႇလႆႈတင်းၵပ်းသိုပ်ႇၵၼ်တင်းၵူၼ်းႁိူၼ်း”- ၼႆယဝ်ႉ  ။

ယၢမ်းလဵဝ် သိုၵ်းမၢၼ်ႈဢၼ်ၶဝ်ႈပၵ်းတပ်ႉၼႂ်းဢိူင်ႇၼႂ်းဝၢၼ်ႈ ပွမ်တူဝ်ၼုင်ႈၶူဝ်းၵူၼ်းႁိူၼ်း ပၼ်ႇလဵပ်ႈပႂ်ႉယမ်း ၵူတ်ႇထတ်းၵူၼ်းဢၼ်ထၢင်ႇထိူမ်ဝႃႈ ၵဵဝ်ႇၵွင်ႉၵၼ်တင်းၸုမ်းလုၵ်ႉၽိုၼ်ႉသေ တီႉၺွပ်းဝႆႉ – ၵူၼ်းပိုၼ်ႉတီႈလၢတ်ႈ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပေႃးၵူၼ်းဢၼ်ယူႇၸမ်ဝဵင်းတႄႉ ဢမ်ႇပေႃးလႆႈယိၼ်း ၶၢဝ်ႇဝႃႈထုၵ်ႇသိုၵ်းမၢၼ်ႈတီႉ ၊ ၵူၼ်းဝၢၼ်ႈၸိူဝ်းယူႇၵႆဝဵင်း ၼၼ်ႉ ဢေႃႈၵႆႉထုၵ်ႇသိုၵ်းမၢၼ်ႈ ပေႃႉထုပ်ႉတီႉၺွပ်းၵႂႃႇၼႃႇ ၊ ယဝ်ႉၵေႃႈမၢပ်ႇယွၼ်းငိုၼ်းထႅင်ႈ ၊ ပေႃးဢမ်ႇမီးငိုၼ်းထုၵ်ႇတူဝ်ၵေႃႈသူင်ႇၼႃႈသိုၵ်း”- ဝႃႈၼႆ ။

ၼႂ်းႁၢင်လိူၼ်ဢေႃးၵၢတ်ႉသ်ၼႆႉမႃး သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉၼႂ်းပိုၼ်ႉတီႈ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်တင်းဝၢၼ်ႈ သတ်ႉၶျၢၼ်ႇ(ဆတ်ခြံ) လႄႈ ဝၢၼ်ႈတွင်ႇဢူး (တောင်ဦး) ၼႂ်းၸႄႈဝဵင်းဝၢၼ်ႈငႂ်ႈ (ယႂႃႇငၢၼ်ႇ ) ၼႆယဝ်ႉ ။

မိူၼ်ၼင်ႇၼႆ ၼႂ်းႁၢင်လိူၼ် ဢေႃးၵတ်ႉသ်ၼႆႉၵေႃႈ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ တုမ်ႉတိုဝ်ႉပဵၼ်ပၢင်တိုၵ်းၵၼ်ထႅင်ႈ တင်းဝၢၼ်ႈ မျၢႆႇလႄႈ ငူၵ်ႉၶျွင်း (ငုတ်ချောင်း) ၵမ်းၼိုင်ႈ – ၵူၼ်းပိုၼ်ႉတီႈလၢတ်ႈ ။

 ယွၼ်ႉပိုၼ်ႉတီႈဢမ်ႇၼ်ိမ်သဝ်းလႄႈ ယၢမ်းလဵဝ် သိုၵ်းမၢၼ်ႈႁၢမ်ႈၵူၼ်းမိူင်း ဢွၵ်ႇၵၢင်ၶမ်ႈ ၵၢင်ၶိုၼ်း ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တလဵဝ် သိုၵ်းမၢၼ်ႈၵူတ်ႇထတ်းဝႆႉႁၢဝ်ႈႁႅင်း ၊ တင်းဝၢၼ်ႈၼႆႉ သိုၵ်းမၢၼ်ႈဢမ်ႇပၼ်ၵူၼ်းဝၢၼ်ႈၸူႉတုမ်ၵၼ် ၊ ဢမ်ႇပၼ်ဢွၵ်ႇၵၢင်ၶမ်ႈၵၢင်ၶိုၼ်း ၊ ဢမ်ႇႁဵတ်းသင်ဝႆႉၵေႃႈ ပေႃးၶဝ်(သိုၵ်းမၢၼ်ႈ) ၶဝ်ၶႂ်ႈတီႉၵေႃႉတီႉၸိူင်ႉၼၼ်ၵႂႃႇဢေႃႈ ၊ ယူႇတီႈႁိူၼ်းတင်းဢမ်ႇမီးလွင်ႈႁူမ်ႇလူမ်ႈ ၊ ပေႃးပဵၼ်ပၢင်တိုၵ်းမႃးၼႆႉ တေဢဝ်ၾႆးၽဝ်ႁိူၼ်းၵူၼ်းဝၢၼ်ႈၼႆလွၵ်ႇဝႆႉပႃးထႅင်ႈ”- ဝႃႈၼႆ ။

မိူဝ်ႈလိူၼ်ၵျူႊလၢႆႊ 22 ဝၼ်းပူၼ်ႉမႃးၼၼ်ႉ သိုၵ်းမၢၼ်ႈလႄႈ တပ်ႉသိုၵ်းပူတ်းပွႆႇၵူၼ်းမိူင်းထၼူႉ DPLA ပဵၼ်ပၢင်တိုၵ်းၵၼ် ၼႂ်းၵႄႈ ဝဵင်းယႂႃႇငၢၼ်ႇလႄႈ တႃႇသီႇ (သာစည်) ၊ ၼႂ်းပၢင်တိုၵ်းၼၼ်ႉ လႆႈႁူႉဝႃႈ ၾၢႆႇသိုၵ်းမၢၼ်ႈ တၢႆမၢတ်ႇၸဵပ်း ဢမ်ႇယွမ်း 20 ၵေႃႉ ၼႆယဝ်ႉ။