တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ႁိူဝ်းမိၼ်တိုၵ်း ၶွင်ၸုမ်းသိုၵ်းမၢၼ်ႈ ပၼ်ႇလဵပ်ႈယႂ်းမႃးၵူႈဝၼ်းလႄႈ ၵူၼ်းမိူင်းလႃႈသဵဝ်ႈမႆႈၸႂ် ၵူဝ်ပဵၼ်ပၢင်တိုၵ်းသိုၵ်းသိူဝ်ၶိုၼ်း။

ဝၼ်းတီႈ 28 လႄႈ 29 လိူၼ်ဢေႃႊၵတ်ႉသ်ၼႆႉ ႁိူဝ်းမိၼ်သိုၵ်းမၼ်ႈပၼ်ႇလဵပ်ႈၼိူဝ်ၵၢင်ႁၢဝ် တီႈဝဵင်းလႃႈသဵဝ်ႈ ဝၼ်း 2 လမ်း တင်း 2 ဝၼ်း ။

ၵူၼ်းပိုၼ်ႉတီႈလၢတ်ႈဝႃႈ -“ဢွၼ်တႄႉဢွၼ်ၵၼ်တူၵ်းၸႂ်ယူႇဢေႃႈ။ လႆႈၾၢင်ႉယူႇၾၢင်ႉၵိၼ်ဢေႃႈ။ ၼႂ်းဝဵင်းၵေႃႈသိုၵ်းမၢၼ်ႈဢဝ်ႁႅင်းသိုၵ်း ထဝ်ႇၶိုၼ်ႈထဝ်ႇလူင်းယူႇဢေႃႈ” ဝႃႈၼႆ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ၽွင်းပီ 2024 ၼၼ်ႉသေ သိုၵ်းၶႄႇၵဝ်ႈၵၢင်ႉ MNDAA ယိုတ်းဢဝ်ဝဵင်းလႃႈသဵဝ်ႈၵုမ်းၵမ်မႃးလႆႈမွၵ်ႈ 8 လိူၼ် ထိုင်မႃး လိူၼ်ဢေႊပရိူဝ်ႊ 2025 ၶႄႇပၼ်ႁႅင်းဢီးသိုၵ်းၶႄႇႁႂ်ႈထွႆထွၼ်ဢွၵ်ႇဝဵင်းပၼ်သိုၵ်းမၢၼ်ႈၶဝ်ႈမႃးၽွင်းငမ်းၵုမ်းၵၼ်ၶိုၼ်းၼႂ်းပွၵ်ႉၼႂ်းဝဵင်း။ တွၼ်ႈတႃႇသိုၵ်းၶႄႇၵဝ်ႈၵၢင်ႉတႄႉ လႆႈၵုမ်းၼႂ်းဢိူင်ႇၼႂ်းဝၢၼ်ႈၸွမ်းသၢပ်ႇဝဵင်းလႃႈသဵဝ်ႈ။ တေႃႇထိုင်ယၢမ်းလဵဝ် သိုၵ်းၶႄႇၵဝ်ႈၵၢင်ႉလႄႈ သိုၵ်းမၢၼ်ႈ ဢုပ်ႇၵုမ်ငူပ်ႉငိၼ်ၵၼ်ယူႇၵေႃႈဢမ်ႇပႆႇတွၼ်ႉတူၵ်းလူင်းလႆႈၸႂ်ၵၼ်။

ဝၢႆးလင်သိုၵ်းမၢၼ်ႈၵုမ်းၶိုၼ်းၼႂ်းပွၵ်ႉၼႂ်းဝဵင်းယဝ်ႉ ၼႂ်းပီ 2025- 26 ၼႆႉ ၺႃးသျွတ်ႉတၢႆႉၻူင်း မၢၵ်ႇလူင်ယိုဝ်းၶဝ်ႈဝဵင်း 4 ၵမ်း။ ၵူၼ်းမိူင်းမၢတ်ႇၸဵပ်းလူႉတၢႆ။ ပဵၼ်ၽႂ်ယိုဝ်းတႄႉတႄႉဢမ်ႇႁူႉ။ ၵႃၼႄးၵဝ်ႉ ၵဝ်ႉၼႄးၵႃ။

မိူၼ်ၼင်ႇတီႈဝဵင်း သီႇပေႃႉ ၵျွၵ်ႉမႄး ၵူတ်ႉၶၢႆ ၼမ်ႉၽၵ်းၵႃလႄႈမူႇၸေႊ ၸိူဝ်းၼႆႉၵေႃႈ သိုၵ်းမၢၼ်ႈဢဝ်ႁိူဝ်းမိၼ်သိုၵ်း ၵႆႉပၼ်ႇလဵပ်ႈ။ မိူဝ်ႈဝၼ်းတီႈ 14/08/2026 ၼႆႉၵေႃႈသိုၵ်းမၢၼ်ႈဢဝ်ႁိူဝ်းမိၼ်သိုၵ်း ပၼ်ႇလဵပ်ႈတီႈၼမ်ႉၽၵ်းၵႃသေ ယိုဝ်းလူင်းၸူး သိုၵ်းၶၢင် KIA ။

တီႈဝဵင်းၵူတ်ႉၶၢႆၵေႃႈ ပီၵၢႆ 2025 သိုၵ်းမၢၼ်ႈ ဢဝ်ႁိူဝ်းမိၼ်သိုၵ်းယိုဝ်းသႂ်ႇလႄႈ ၵူၼ်းမိူင်းတၢႆ 7 ၵေႃႉ မၢတ်ႇၸဵပ်း 13 ၵေႃႉ။

ယၢမ်းလဵဝ်ၵေႃႈသိုၵ်းမၢၼ်ႈၼႆႉ ၶႂ်ႈၵုမ်းၶိုၼ်းသဵၼ်ႈတၢင်း ဝဵင်းလိူဝ်ႇ – မူႇၸေႊလႄႈ ၶိုၼ်းယွၼ်းၶိုၼ်းဝဵင်းဢၼ်ၸုမ်းသိုၵ်းၸၢဝ်းၶိူဝ်း ယိုတ်းလႆႈဝႆႉၽွင်းပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉယူႇ။ မိူၼ်ၼင်ႇဝဵင်း ၼွင်ၶဵဝ်၊ သီႇပေႃႉ၊ လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ မူႇၸေႊ ၸိူဝ်းၼႆႉ ပဵၼ်ဢၼ်သိုၵ်းမၢၼ်ႈ ပၵ်းတႃၶႂ်ႈလႆႈယူႇၵူႈၶၢဝ်း။

ယၢမ်းလဵဝ်တႄႉသိုၵ်းမၢၼ်ႈၼႆႉၵုမ်းလႆႈဝႆႉၼႂ်းဝဵင်း ဝဵင်းလႃႈသဵဝ်ႈ၊ ၼွင်ၶဵဝ်၊သီႇပေႃႉၵူၺ်း။ မိူၼ်ၼင်ႇၸွမ်းဝၢၼ်ႈ ၸွမ်းဢိူင်ႇ ၼွၵ်ႈဝဵင်းလႃႈသဵဝ်ႈလႄႈဝဵင်း ၵူတ်ႉၶၢႆ ၊ ဝဵင်းသႅၼ်ဝီ တႄႉပဵၼ် သိုၵ်းၶႄႇ MNDAA ၵုမ်း၊ မိူၼ်ၼင်ႇ ၼမ်ႉၽၵ်းၵႃ သမ်ႉသိုၵ်းၶၢင်ၵုမ်း ၊ ဝဵင်းၼမ်ႉၶမ်း သမ်ႉသိုၵ်းတဢၢင်း TNLA ၵုမ်း ၊ တီႈၵဵၵ်ႉ/လၢၼ်ႇလႅၼ်လိၼ် သၢမ်ၸဵင်ႇၶမ်း ၵျိၼ်ႊသၢၼ်ႊၵျေႃႉ ဢိၵ်ႇ ၵၢတ်ႇၵႃႉၶၢႆ 105 လၵ်းသမ်ႉပဵၼ် ၸုမ်းဢူၺ်းလီပွတ်းႁွင်ႇ 3 ၸုမ်းၵုမ်းၵမ်ဝႆႉ။

ၼႆႉၵေႃႈ ၽွင်းပၢင်ၵုမ်လူင် တႃႇႁဵတ်းသဵၼ်ႈတၢင်းႁေႃႈဝႆး ထႆး-မၢၼ်ႈ-ဢိၼ်ႊတီႊယႃႊ ဢၼ်ၸတ်းၵႂႃႇ မိူဝ်ႈဝၼ်းတီႈ 9/07/2026 ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ – ၵၢၼ်ၵႃႉၶၢႆ တီႈလၢၼ်ႇလႅၼ်လိၼ်ၼႆႉ ပဵၼ်လူင်ပွင်ၸိုင်ႈ 2 ၸိုင်ႈမိူင်း တိတ်းတေႃႇၵႃႉၶၢႆၵၼ်ၵမ်းသိုဝ်ႈလႄႈ ဢမ်ႇလူဝ်ႇမီးၸုမ်းယိပ်းၵွင်ႈ/ ၸုမ်းလႂ်သေၸုမ်းၸုမ်း ယူႇၵႄႈမၼ်း၊ ထုၵ်ႇလီပဵၼ်လူင်ပွင်ၸိုင်ႈ တိတ်းတေႃႇၵႃႉၶၢႆၵၼ်ၵမ်းသိုဝ်ႈဝႃႈၼႆ။

ဝၢႆးလင်ၼၼ်ႉၵေႃႈသိုၵ်းမၢၼ်ႈဢဝ်ႁိူဝ်းမိၼ်သိုၵ်းပၼ်ႇလဵပ်ႈၼိူဝ်ဝဵင်း ၼႂ်းၸိုင်ႈတႆးပွတ်းႁွင်ႇမႃးထပ်းၵၼ်ၶိူဝ်းယႂ်း ၵူၼ်းပိုၼ်ႉတီႈလၢတ်ႈၼင်ႇၼႆ။