ယေးငိုၼ်းငဝ်ႈၸိုင်ႈ (ဗဟိုဘဏ်) မိူင်းမၢၼ်ႈ ဢၼ်ယူႇတႂ်ႈဢႃႇၼႃႇသိုၵ်းမၢၼ်ႈယိုတ်းမိူင်းၵုမ်းၵမ် ၸီႉသင်ႇႁႂ်ႈယေးငိုၼ်းသုၼ်ႇလဵဝ်ၵူႈတီႈတီႈ ၼႂ်းမိူင်းႁူမ်ႈတုမ်ဢိုတ်းပႅတ်ႈ ယေးငိုၼ်း ၵူၼ်းမိူင်းမၢၼ်ႈ ၸိူဝ်းယူႇသဝ်းဝႆႉၼွၵ်ႈမိူင်းသေ ၸႂ်ႉတိုဝ်း KBZ-Pay၊ Wave Money ၊ AYA Pay၊ CB Pay၊ Mobile Banking တင်းသဵင်ႈ ၼႆယဝ်ႉ။
ၼင်ႇႁိုဝ် ၵူၼ်းမိူင်းမၢၼ်ႈ ၸိူဝ်းယူႇၼွၵ်ႈမိူင်းသေ ၸႂ်ႉတိုဝ်းယေးငိုၼ်းၼၼ်ႉ ပေႃးတေဢမ်ႇၸၢင်ႈၶဝ်ႈဢၵွင်ႉသေ ဢူၼ်းငိုၼ်း ၊ ႁဵတ်းၵၢၼ်လႅၵ်ႈငိုၼ်း ၊ သူင်ႇငိုၼ်း၊ ႁပ်ႉငိုၼ်းၼၼ်ႉ တေလႆႈၸႂ်ႉတိုဝ်းလွၵ်းလၢႆးပၢႆးပၺ်ႇၺႃႇ Geo-blocking၊ Location-based Restriction လႄႈ IP-based Restriction သေ ႁဵတ်းသၢင်ႈလွင်ႈႁူမ်ႇလူမ်ႈယေးငိုၼ်းၵႂႃႇႁႂ်ႈယဝ်ႉတူဝ်ႈ ၼႂ်းဝၼ်းတီႈ 28 လိူၼ်ဢေႃးၵၢတ်ႉသ် ပီ 2026 ၼႆႉ ဝႃႈၼႆ။
ၵူၼ်းၼုမ်ႇတႆးၵေႃႉယူႇၼႂ်းမိူင်းထႆးသေ ႁဵတ်းၵၢၼ်ႁပ်ႉဢူၼ်းငိုၼ်းယူႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်ႁဵတ်းပေႃႇလသီႇဢွၵ်ႇမႃးၸိူင်ႉၼႆ မီးပၼ်ႁႃႁႅင်းၼႃႇ။ ပေႃးၶၢမ်ႈမိူင်းႁႄ ၸႂ်ႉပၢၼ်ႇၼႆ ၺႃးတႄႉတေဢမ်ႇၺႃးဢိုတ်း။ တေၺႃးႁႅတ်ႉ (Block) ပႅတ်ႈဢေႃႈ။ ပေႃးၺႃးဢိုတ်းတႄႉ ပၢၼ်ႇမိူင်းမၢၼ်ႈၼႆႉ တေၸၢင်ႈတုၵ်ႉၶႁႅင်းၼႃႇ။ မၼ်းဢမ်ႇငၢႆႈၶႃႈ။ မိူဝ်ႈလဵဝ်တႄႉ ၶဝ်တေ Block ၵူၺ်းၼႆၵေႃႈ သမ်ႉပေႃးမီးပၼ်ႁႃတွၼ်ႈတႃႇၵူၼ်းၸိူဝ်းယူႇၼွၵ်ႈမိူင်းႁႄ ႁဵတ်းၵၢၼ်ၸိူင်ႉႁဝ်းယူႇၼႆႉ ယဝ်ႉဢေႃႈ။ ပေႃးႁဝ်းၶႂ်ႈဢူၼ်းငိုၼ်းမၢၼ်ႈ ၶႂ်ႈၸႂ်ႉပၢၼ်ႇ မိူင်းမၢၼ်ႈၼႆႉ တေလႆႈမိူဝ်းၸႂ်ႉၶိုၼ်း တီႈမိူင်းမၢၼ်ႈၵူၺ်းယဝ်ႉ။ လၢႆးၵႄႈမၼ်းဢၼ်ၼိုင်ႈတႄႉ တေၸၢင်ႈပဵၼ်ဝႃႈ လူဝ်ႇၸႂ်ႉတိုဝ်း VPN သေ ဢူၼ်းငိုၼ်း။ VPN ဢၼ်ႁဝ်းၸႂ်ႉၼၼ်ႉ ၵေႃႈ တေလႆႈပဵၼ်ဢၼ်သိုဝ်ႉဢဝ်ၼႂ်းမိူင်းမၢၼ်ႈ။ Locations တေလႆႈဢွၵ်ႇပဵၼ် မိူင်းမၢၼ်ႈ (Myanmar) ၼႆၼၼ်ႉၼႃႇ” ဝႃႈၼႆ။
ၾၢႆႇယေးငိုၼ်းငဝ်ႈၸိုင်ႈတႄႉ ပိုၼ်ၽၢဝ်ႇဢွၵ်ႇဝႆႉဝႃႈ “ႁႂ်ႈယေးငိုၼ်းသုၼ်ႇလဵဝ် ၼႂ်းမိူင်းမၢၼ်ႈတင်းသဵင်ႈ သူင်ႇၽိုၼ်လိၵ်ႈႁၢႆးငၢၼ်း ငဝ်းလၢႆးၶၵ်ႉၵၢၼ်တတ်းယေးငိုၼ်း ၵူၼ်းၸိူဝ်းယူႇမိူင်းၼွၵ်ႈၼၼ်ႉပၼ်ၶိုၼ်း ႁႂ်ႈယဝ်ႉတူဝ်ႈၼႂ်းလိူၼ်ဢေႃးၵၢတ်ႉသ်ၼႆႉ။” ဝႃႈၼႆ။
လိူဝ်ၼၼ်ႉၾၢႆႇယေးငိုၼ်းသုၼ်ႇလဵဝ်ၶဝ် တေလႆႈပၵ်းတႃပႂ်ႉတူၺ်းၸွမ်း ၵူၼ်းၸႂ်ႉတိုဝ်းယေးငိုၼ်း (ပၢၼ်ႇ) ၶဝ်။ သင်ထူပ်းႁၼ်မႅၼ်ႈ ၵူၼ်းဢၼ်ယူႇတၢင်းၼွၵ်ႈမိူင်းသေ ၸႂ်ႉတိုဝ်းယေးငိုၼ်း ဢူၼ်းငိုၼ်း၊ ႁပ်ႉငိုၼ်း ၸိုင် တေလႆႈၵဵပ်းၶေႃႈမုလ်းတင်းသဵင်ႈ ႁဵတ်းပဵၼ် ၽိုၼ်လိၵ်ႈၽိုၼ်လၢႆးသေ ႁၢင်ႈႁႅၼ်းဢဝ်တၢင်းၽိတ်း သူင်ႇယိုၼ်ႈႁၢႆးငၢၼ်းပႃးတီႈယေးငိုၼ်း ငဝ်ႈၸိုင်ႈ ဝႃႈၼႆ။
ၵူၼ်းၸိူဝ်းယၢပ်ႇၽိုၼ်ႇႁႅင်းၼႆႉ ပဵၼ်ၵူၼ်းမိူင်းမၢၼ်ႈၸိူဝ်းယူႇသဝ်း ႁဵတ်းၵၢၼ်ဝႆႉယူႇၸွမ်းၼွၵ်ႈမိူင်း၊ ၵူၼ်းႁဵတ်းၵၢၼ်ၸွမ်း ႁိူဝ်းသၢင်းၽေႃးသေ ႁွတ်ႈထိုင်ဝႆႉၼွၵ်ႈမိူင်းၸဵမ်ၸိူဝ်ၼႆႉ။
ႁၢၼ်ႉတေႃႇထိုင်ဝၼ်းမိူဝ်ႈၼႆႉ 27/8/2026 တႄႉ ၵူၼ်းမိူင်းမၢၼ်ႈ ၸိူဝ်းႁဵတ်းၵၢၼ်ယူႇဝႆႉၼႂ်းမိူင်းၼွၵ်ႈၶဝ် တိုၵ်ႉၸႂ်ႉတိုဝ်းလႆႈ ယေးငိုၼ်းမိူင်းမၢၼ်ႈယူႇသေတႃႉ ဝၢႆးလင် ဝၼ်းတီႈ 28 /8/2026 မိူဝ်ႈၽုၵ်ႈၼႆႉၵႂႃႇတႄႉ တေၸၢင်ႈမီးပၼ်ႁႃၵၢၼ်ၸႂ်ႉတိုဝ်းယေးငိုၼ်းယူႇၼႆ ၼုမ်ႇယိင်းၵူၼ်းမိူင်းမၢၼ်ႈ ဢၼ်ၵႂႃႇႁဵတ်းၵၢၼ်ယူႇဝႆႉတီႈမိူင်းၼွၵ်ႈလၢတ်ႈ။
ၵဵဝ်ႇလူၺ်ႈလွင်ႈၼႆႉသေ ၽူႈလူင်ႉလႅၼ်ႇၾၢႆႇဢၢႆႊတီႊ IT ၶဝ်တႄႉ ထတ်းသၢင်လၢတ်ႈဝႃႈ – သင်ၺႃးႁႅတ်ႉၸိုင် ၶၵ်ႉတွၼ်ႈဢွၼ်တၢင်းသုတ်းတႄႉ တီႈၶိူင်ႈၸဝ်ႈၵဝ်ႇၼၼ်ႉတေၸၢင်ႈ ၼႄ “Network Error”၊ “Connection Failed”ၼႆမႃးဢွၼ်တၢင်း ၊ OTP သုၼ်ႇတူဝ်ၼၼ်ႉၵေႃႈ တေဢမ်ႇတူၵ်းမႃးပၼ် ။ ပေႃးပဵၼ်ၼၼ်မႃး ထုၵ်ႇလီယဵပ်ႇၶဝ်ႈၼႂ်းလိၼ်မိူင်းမၢၼ်ႈသေ ၶိုၼ်းပိုတ်ႇၸႂ်ႉ ဢိၼ်ႊထိူဝ်ႊၼႅတ်ႉမိူင်းမၢၼ်ႈၵမ်းသိုဝ်ႈ လူၺ်ႈဢမ်ႇၸႂ်ႉ VPN ။ ၸၢင်ႈတေလႆႈၶိုၼ်းယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ