တႆးၼႆႉ ပဵၼ်ၸိူဝ်ႉၶိူဝ်းယႂ်ႇ  ၊ ယူႇသဝ်းၵိၼ်သၢင်ႈလၢႆဝၢၼ်ႈလၢႆမိူင်း ။ ၶူဝ်းၼုင်ႈပီႈၼွင်ႉတႆး ထုင်ႉၼိုင်ႈလႄႈ ထုင်ႉၼိုင်ႈၵေႃႈ ပႅၵ်ႇပိူင်ႈၵၼ် ။ တီႈၼိုင်ႈလႄႈတီႈၼိုင်ႈ ၶူဝ်းၼုင်ႈတႆးႁဝ်းပိူင်ႈၵၼ်သေတႃႉ မီးၵႃႈၶၼ်ႈတႃႇၸိူဝ်ႉၶိူဝ်းႁဝ်းၵူႈသႅၼ်း ။

ၸၢဝ်းၶိူဝ်းၼိုင်ႈၶိူဝ်းၼႆႉ ပေႃး လိၵ်ႈၸူမ်ၵေႃႈ ၶိူဝ်းၸၢင်ႈတၢႆ ၊ ပေႃးၾိင်ႈႁၢႆၵေႃႈ ၶိူဝ်းၸၢင်ႈလူႉ ။ ၸင်ႇၼၼ် ၶူဝ်းတႆးႁဝ်းၵူႈသႅၼ်းသႅၼ်းၵေႃႈ ၵိုင်ႇလီႁၵ်ႉသႃဝႆႉ တႃႇထိင်းၸိူဝ်ႉထိင်းၶိူဝ်း ။ ၼင်ႇႁိုဝ် တေဢမ်ႇၸူမ်ႁၢႆၼၼ်ႉ ဢိင်ၼိူဝ် ၽူႈသူင်ယဵပ်ႉသိူဝ်ႈၶူဝ်းပၢၼ်မႂ်ႇၼႆႉ တွၼ်ႈၼိုင်ႈယူႇ ။

ၸင်ႇၼၼ် ၼင်ႇႁိုဝ် ၾိင်ႈယဵပ်ႉၶူဝ်းတႆးပၢၼ်ၵဝ်ႇတေဢမ်ႇႁၢႆ ၊ ပၢၼ်မႂ်ႇၵေႃႈ ႁႂ်ႈၶိုတ်းၵၢပ်ႈၼၼ်ႉ ၵိုင်ႇလီသႂ်ႇၸႂ်ႁဵတ်းႁိုဝ်  ၼႆၼၼ်ႉ ၸၢႆးသႅင်ယွတ်ႈ ၸုမ်းၶၢဝ်ႇၽူႈတွႆႇႁွၵ်ႈ လႆႈႁူပ်ႉထူပ်း တွင်ႈထၢမ်ဝႆႉ Designer  ၼုမ်ႇၸၢႆး ၵူၼ်းမူႇၸေႊ ၵေႃႉဢၼ်သူင်ယဵပ်ႉၶူဝ်းတႆးတႂ်ႈၶူင်းဝႆႉ။

လိူဝ်ၼၼ်ႉ မၼ်းၸၢႆး  လႆႈၸွႆႈပႃး ၼႂ်းၵၢၼ်လိၵ်ႈလၢႆးလႄႈၾိင်ႈထုင်းတႆး ၸိူင်ႉႁိုဝ် ၼႆၼၼ်ႉ  မႃး တမ်း ၼႄပီႈၼွင်ႉၽူႈလူလိၵ်ႈႁဝ်းၶႃႈ ၼင်ႇပႃႈတႂ်ႈၼႆႉယူႇၶႃႈဢေႃႈ။

ထၢမ် – မႂ်ႇသုင်ၶႃႈ ဢွၼ်တၢင်းသုတ်း ၵပ်းသိုပ်ႇတူဝ်ပၼ် ၽူႈပၼ်ႁႅင်းၸုမ်းၶၢဝ်ႇၽူႈတွႆႇႁွၵ်ႈၵွၼ်ႇၶႃႈ။

တွပ်ႇ –  မႂ်ႇသုင်ၶႃႈ ၸိုဝ်ႈၶႃႈႁဝ်းႁွင်ႉ ၸၢႆးသၢႆၸွမ်မိူင်း ယူႇပွၵ်ႉၵၢတ်ႇ ဝဵင်းမူႇၸေႊၶႃႈဢေႃႈ ။ ၼႃႈၵၢၼ်တႄႉ ပဵၼ် Designer ။ ၸွႆႈဝႆႉပႃး ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းမူႇၸေႊ ၶႃႈဢေႃႈ။

ထၢမ် – မိူဝ်ႈလဵဝ် ႁၼ်ဢွၵ်ႇၶၢဝ်းတၢင်းဝႆႉလႄႈ တႃႇၼႃႈၵၢၼ်ႁႃႉ တင်ႈၸႂ်ဢႅဝ်ႇယဵမ်ႈၵူၺ်းႁႃႉ။

တွပ်ႇ – တင်းသွင်လွင်ႈယဝ်ႉၶႃႈ ပိူင်လူင်မၼ်းတႄႉ မႃးလဵပ်ႈႁဵၼ်း ႁွင်ႈၼႄပိုၼ်းသိူဝ်ႈၽႃႈ တီႈၵဵင်းမႂ်ႇ ၊ ယဝ်ႉၵေႃႈ တေၵႂႃႇလဵပ်ႈႁဵၼ်းတီႈမိူင်းၵွၵ်ႇ ။ ယဝ်ႉၵေႃႈ ဝႄႉလႄႇပႃး ပီႈၼွင်ႉဢူၺ်းၵေႃႉဢူၺ်းသႄႈၶႃႈ။

ထၢမ် – ႁွင်ႈၼႄပိုၼ်းၸိူဝ်းၼႆႉ ၼႄသိူဝ်ႈၽႃႈ ဝႆႉၵမ်ႈၼမ်ႁႃႉ ၊ ပဵၼ်ဝႆႉၸိူင်ႉႁိုဝ်ၶႃႈ။ မႃးလဵပ်ႈႁဵၼ်း တႃႇသင်။

တွပ်ႇ – ၵဵင်းမႂ်ႇၼႆႉ မီးဢမ်ႇယွမ်း 10 တီႈ ၊ ဢၼ်ၶႃႈ ယၢမ်ႈၶဝ်ႈလဵပ်ႈႁဵၼ်းတႄႉ  ၶဝ်ၼႄဝႆႉ ႁွင်ႈသိူဝ်ႈၽႃႈၵေႃႈမီး ၊ ၶိူင်ႈၸႂ်ႉၶူဝ်းသွႆၵေႃႈမီး။ မၢင်ဢွင်ႈၵေႃႈ ၼႄႁၢင်ႈႁုၼ်ႇႁၢင်ႈၽြႃးပဵၼ်ၸဝ်ႈၸိူဝ်းၼႆႉ။ ပိူင်လူင် မႃးလဵပ်ႈႁဵၼ်း တႃႇပဵၼ်လွင်ႈၵမ်ႉထႅမ် ၼႂ်းၵၢၼ်ယဵပ်ႉၶူဝ်းၾိင်ႈငႄႈၾိင်ႈထုင်း ။

ထၢမ် – လႆႈႁၼ် ၼၢင်းႁၢင်ႈလီ (ၼၢင်းငၢမ်း) မိူင်းတႆး မိူဝ်ႈပီ 2024 ၼၼ်ႉ ၼုင်ႈၶူဝ်းတႆးတႂ်ႈၶူင်းသေ ၶဝ်ႈၶႄႇၶႅင်ႇ လႆႈသူးၶူဝ်းၾိင်ႈထုင်းႁၢင်ႈလီ ထီႉၼိုင်ႈဝႆႉ ။ ၶူဝ်းၼၼ်ႉ ပဵၼ်ၸၢႆးႁဝ်း ယဵပ်ႉပၼ်လႆႈႁူႉၼင်ႇၼႆ ။ ႁဵတ်းႁိုဝ်မီးတိုဝ်ႉတၢင်း လႆႈယဵပ်ႉပၼ်။

တွပ်ႇ – ၽွင်းၼၼ်ႉ တေလႆႈဝႃႈ မီးတိုဝ်ႉတၢင်းလီဢေႃႈ ။ တႃႇယဵပ်ႉၶူဝ်းတႆးၼၼ်ႉသမ်ႉ  တႆးၵေႃႉၶႃႈ  ၸၢႆးၼုမ်ႇမိူင်း ႁိုဝ် ၸၢႆႁူင်ၾႃႉ ၼႆႉ ပၼ်ႁႅင်းၶႃႈ ၼႄပၼ်လွၵ်းလၢႆးယဵပ်ႉၶူဝ်းၸိူဝ်းၼႆႉပၼ်ၶႃႈ ။ ၶဝ်သမ်ႉပဵၼ်ၵူၼ်းလဵပ်ႈႁဵၼ်းပိုၼ်းပႃး ။

ဢၼ်ၶဝ်ႈၼႂ်းဝူင်းၵၢၼ်ၼၢင်းငၢမ်းၼၼ်ႉတႄႉ ပဵၼ် ၸၢႆးဢွၼ်ႇလႅင်းႁၢၼ် လႄႈ ၸၢႆးတိင်ႉတိင်ႉ ဢူၺ်းၵေႃႉၶႃႈ တီႈမူႇၸေႊ ႁွင်ႉႁူၺ်းၶႃႈၶဝ်ႈတူင်ႉၼိုင်။

ဢၼ်ႁဵတ်းႁႂ်ႈ ၵူၼ်းၼမ် ႁူႉၸၵ်းၶႃႈမႃးၵေႃႈ မိူဝ်ႈပီ 2024 ၼၼ်ႉယဝ်ႉ ။ ၼၢင်းငၢမ်းဢၼ်ၶႃႈ ယဵပ်ႉၶူဝ်းပၼ်ၼၼ်ႉ လႆႈၶဝ်ႈၶႄႉတႃႇ 58 မိူင်း ။ တႄႇၼၼ်ႉၶႃႈ ၶႃႈ ၸင်ႇၵိုၵ်းၸိုဝ်ႈ Designer မႃး။

ၼႂ်းပီ 2026 ၼႆႉၵေႃႈ ယင်းလႆႈယဵပ်ႉပၼ် ၶူဝ်းၼၢင်းငၢမ်းၸိူဝ်းၶဝ်ႈ ၶႄႉၶႅင်ႇယူႇ ။

ထၢမ် –  Designer ၼႆႉ လိူၵ်ႈယဵပ်ႉၶူဝ်းလၢႆသႅၼ်းလၢႆပိူင်လႆႈယူႇ ။ ႁဵတ်းသင်သမ်ႉ လိူၵ်ႈယဵပ်ႉၶူဝ်း ၾိင်ႈထုင်းတႆး။

တွပ်ႇ –  ပိူင်လူင်မၼ်းတႄႉ ဢမ်ႇၸႂ်ႈဝႃႈ တင်ႈၸႂ်ၶဝ်ႈမႃးႁဵတ်းၵၢၼ်သႅၼ်းၼႆႉ ။ ၽွင်းၶိုၼ်ႈႁဵၼ်းၾၢႆႇဢင်းၵိတ်ႉတီႈလႃႈသဵဝ်ႈၼၼ်ႉ ၽွင်း ပီ 2011 ။မိူဝ်ႈၼၼ်ႉ ၼိုင်ႈဝူင်ႈ ၼိုင်ႈပွၵ်ႈ ႁဝ်းလႆႈ ႁဵတ်းပၢင်ဢွၵ်ႇလၢတ်ႈတင်းၼႃႈၵူၼ်းၼမ် ႁဝ်းလႆႈႁဵတ်း Presentation ။ တႄႇတီႈၼၼ်ႈသေ လႆႈလဵပ်ႈႁဵၼ်းသိူဝ်ႈၶူဝ်းတႆး။

မိူဝ်ႈၼၼ်ႉ တႃႇႁႃၶေႃႈမုလ်း Data ၶူဝ်းတႆး ႁႂ်ႈတဵမ်ထူၼ်ႈ ဢမ်ႇငၢႆႈ ။ တႆးႁဝ်းၼႆႉ ပဵၼ်ၶိူဝ်းၸဝ်ႈ ၶိူဝ်းၶုၼ် ဝႃႈၼႆသေတႃႉ ပိုၼ်းၶူဝ်းတႆးဢမ်ႇၼမ် ။ လဵပ်ႈႁဵၼ်းလႆႈဢိတ်းဢွတ်းၵူၺ်း ၊ ဝူၼ်ႉၼႂ်းၸႂ်ဝႃႈ မီးမွၵ်ႈၵႃႈၼႆႉၵူၺ်းတႄႉ ပႆႇၸႂ်ႈ ၼႆသေ ၶတ်းၸႂ် ၶူၼ်ႉသွၵ်ႈတူၺ်း။

မိူၼ်ၼင်ႇ ဢူၺ်းၵေႃႉ တီႈမိူင်းၶွၼ် ဢေၸၢႆးႁူင်း ၸၢႆးႁူင်ၾႃႉ ၶဝ်ၸိူဝ်းၼႆႉ ႁွင်ႉႁူၺ်းၶႃႈသေ ၶဝ်ႈလဵပ်ႈႁဵၼ်း ၼႂ်းပိုၼ်ႉတီႈ မိူၼ်ၼင်ႇ လၢႆးတေႃးမၼ်း လၢႆးယဵပ်ႉသွႆ မၼ်း တႄႇၵႂႃႇၸိူဝ်းၼႆႉ တီႈၼႂ်းမိူင်းၶွၼ် ။

ၽိူဝ်ႇထိုင် မႃး 2024 ၼၼ်ႉ ၸၢႆးတိင်ႉတိင်ႉလႄႈ ၸၢႆးဢွၼ်ႇလႅင်းႁၢၼ် ၸင်ႇႁွင်ႉႁူၺ်းၶႃႈ ႁႂ်ႈယဵပ်ႉၸၢမ်းပၼ်ၶူဝ်း ၼၢင်းႁၢင်ႈလီ ဢၼ်တၢင်မိူင်းတႃႈၵုင်ႈသေ ၶဝ်ႈၶႄႉၶႅင်ႇ ။ ၼၢင်းႁၢင်ႈလီ ၸိုဝ်ႈဝႃႈ ႁၢၼ်ႇလေး လႆႈသူး National Consume တႃႇမိူင်းႁူမ်ႈတုမ် မိူဝ်ႈၼၼ်ႉ  ။

ထၢမ် –  ၶူဝ်းၾိင်ႈထုင်းတႆး ဢၼ်ၼၢင်းႁၢၼ်ႇလေး ၼုင်ႈၼၼ်ႉ ႁွင်ႉဝႃႈ ၶူဝ်းတႆးၼိူဝ် ၼႆ  ထုၵ်ႇမႅၼ်ႈယူႇၶႃႈႁႃႉ တေလႆႈႁွင်ႉၸိူင်ႉႁိုဝ် ႁႂ်ႈတူၵ်းထုၵ်ႇ ၊ လၢတ်ႈပၼ်တၢင်းႁၼ်ထိုင်ၽွင်ႈ

တွပ်ႇ – ႁဝ်းၶႃႈတႄႉ ႁွင်ႉ ၶူဝ်းၾိင်ႈထုင်း မိူင်းတႆးတႂ်ႈၶူင်းၼႆဢေႃႈ ။ ၶူဝ်း တႆး မိူင်းၼိူဝ် ၼႆၵေႃႈ ဝႃႈယူႇ။ ပေႃးဝႃႈ ၶူဝ်းတႆးတႂ်ႈၶူင်းၼႆ တိူဝ်းသၢင်ႇထုၵ်ႇဢေႃႈ။

ထၢမ် – ၶူဝ်း ပီႈၼွင်ႉတႆး တႂ်ႈၶူင်းၼႆႉ မီးလၢႆသႅၼ်းယူႇၶႃႈႁႃႉ ။ ဢၼ်ယဵပ်ႉယူႇမိူဝ်ႈလဵဝ်ၼႆႉ လႆႈဝႃႈ ပဵၼ်သႅၼ်းလႂ် ။

တွပ်ႇ – ဢၼ်ႁဝ်း ယၢမ်ႈလဵပ်ႈႁဵၼ်းတႄႉ ၶူဝ်းတႆးတႂ်ႈၶူင်းၼႆႉ ယႅၵ်ႈဝႆႉ ပဵၼ် သၢမ် တွၼ်ႈ ။ ၶူဝ်းၵူၼ်းၽဵၼ်ႈၽဵၼ်ႈ ၼႂ်းဝၢၼ်ႈၼႂ်းသူၼ် ၊ ၵူၼ်းၸၼ်ႉသုင် ၊ ၵူၼ်းၼႂ်းဝၢင်းႁေႃ ၼႆ တေမီးဝႆႉၸိူင်ႉၼႆ ။ မိူဝ်ႈပၢၼ်ၶုၼ်ၸိူဝ်းၼၼ်ႉ မီးပိူင်မၼ်းဝႆႉဝႃႈ ၵူၼ်းသႅၼ်းလႂ် ၼိုင်ႈၶူဝ်းသင် ႁဵတ်းၼၼ်။ လႃႈလီ ၼုင်ႈဢမ်ႇလႆႈ။

ဢၼ်ၶႃႈ ယဵပ်ႉယူႇယၢမ်းလဵဝ်တႄႉ ပဵၼ်ၶူဝ်းၼႂ်းႁေႃ ။ ၵူၼ်းဢၼ် မႃးၸူးၶႃႈယဵပ်ႉၵေႃႈ ပဵၼ်ၵူၼ်းဢၼ် ၶႂ်ႈလႆႈ ၶူဝ်းၼႂ်းႁေႃၼၼ်ႉၵမ်ႈၼမ် ။ ယွၼ်ႉဝႃႈ ၶဝ်ၵေႃႈ ၶႂ်ႈၼုင်ႈဢဝ်ၵုင်ႇဢဝ်မုၼ် ၸွမ်းၾိင်ႈတႆး ။ ၶဝ်တေသိုဝ်ႉႁေ ၵႂႃႇၼုင်ႈမိူဝ်ႈ ပွႆးပၢင်ၶႅၵ်ႇၶဝ်ႁႃႉ ပွႆးႁပ်ႉဝႂ်ၶူးၶဝ်ၸိူဝ်းၼႆႉ ။ မၢင်ၸိူဝ်း ဝၼ်းၵိူတ်ႇၵူၺ်းၵေႃႈ မႃးသင်ႇသိုဝ်ႉၼုင်ႈၵေႃႈမီး။

ထၢမ် – ၶူဝ်းတႆးတႂ်ႈၶူင်းၼႆႉ ၸွင်ႇၸႅၵ်ႇ ဝႆႉ တႃႇၵူၼ်းတႄႇၼႃႈႁိူၼ်း ႁိုဝ်ဢမ်ႇၼၼ် ၵေႃႉလဵၵ်ႉ ၵေႃႉယႂ်ႇ ၸိူဝ်းၼႆႉႁႃႉ ။

တွပ်ႇ – မိူဝ်ႈၵွၼ်ႇတႄႉ ၸႅၵ်ႇဝႆႉဢေႃႈ ။ ၵၢပ်ႈယၢမ်းလဵဝ်တႄႉ ဢမ်ႇႁၼ်ၸွမ်းၵႃႈႁိုဝ်ယဝ်ႉ ။ ပိူင်လူင်ၶႃႈတႄႉ လဵပ်ႈႁဵၼ်း ၶူဝ်းၼၢင်းယိင်းၵမ်ႈၼမ်လႄႈ တေႁူႉၶူဝ်းၼုင်ႈၼၢင်းယိင်းၵမ်ႈၼမ် ။

မိူၼ်ၼင်ႇ လုၵ်ႈဢွၼ်ႇၼႆ တေလႆႈဝႆႉၶူၼ်ႁူဝ်ၸိူင်ႉႁိုဝ် ၊ တွင်ႇႁူ တေတိုဝ်းၸိူင်ႉႁိုဝ် ။ ပေႃးတူၺ်းၾၢင်ႁၢင်မၼ်းၼႆၵေႃႈ ႁူႉၵမ်းလဵဝ်ဝႃႈ ၵူၼ်းၵေႃႉၼၼ်ႉ ပဵၼ်သၢဝ်ႁႃႉ မႄႈႁိူၼ်း ။ ပဵၼ်ၵူၼ်းၸၼ်ႉလႂ် ထၢၼ်ႈလႂ် ၼႆၸိူဝ်းၼႆႉ ။ မၼ်းမီးမဵတ်ႇမၢႆမၼ်းၸိူင်ႉၼႆၶႃႈ။

ထၢမ် – ဢၼ်ယဵပ်ႉၶူဝ်း ၼႆႉ ၼင်ႇႁိုဝ် ပေႃးတေဢမ်ႇပိူင်ႈၾိင်ႈထုင်းႁိတ်ႈႁွႆးမၼ်းၼၼ်ႉ လႆႈသႂ်ႇၸႂ်ပၵ်းၸႂ်ၸိူင်ႉႁိုဝ် ။

တွပ်ႇ – ၶႃႈတႄႉ လဵပ်ႈႁဵၼ်းၼႂ်းပိုၼ်းႁေ ၊ တူၺ်းၼႂ်းၶႅပ်းႁၢင်ႈၵဝ်ႇၵဝ်ႇ ၸိူဝ်းၼႆႉ သေ ယဵပ်ႉၸွမ်းဢေႃႈ ။ ၼင်ႇႁိုဝ် တေမိူၼ်ၼၼ်ႉၵေႃႈ လႆႈၶူင်သၢင်ႈဢဝ်ၸိူင်ႉၼၼ်ၶႃႈဢေႃႈ။

ထၢမ် – ၶူဝ်းၾိင်ႈထုင်းႁဝ်းၼႆႉ ၼင်ႇႁိုဝ် ၵူၼ်းသိုဝ်ႉၵူၼ်းၶၢႆမၼ်းလႄႈ ၵူၼ်းတင်းၼမ် တၢင်ႇၸၢဝ်းၶိူဝ်း  ပေႃးတေမေႃႁူႉ ၶူဝ်းဢၼ်လႂ်ၸွမ်းပိူင်ၾိင်ႈထုင်း ႁိုဝ် ဢမ်ႇၸွမ်း ၼႆၼၼ်ႉ  တေလႆႈႁဵတ်းႁိုဝ် ။

တွပ်ႇ – ၵူၼ်းယဵပ်ႉမၼ်း လူဝ်ႇလႆႈမေႃၸႅၵ်ႇ ၶူဝ်းၸုမ်ႇလႂ် ပဵၼ်တႃႇ ၾိင်ႈထုင်း traditional လႄႈ ၶူဝ်းၸုမ်ႇလႂ် ပဵၼ်တႃႇတၢင်းႁၢင်ႈလီ Fashion ။

ၵူၼ်းၼုင်ႈမၼ်းၵေႃႈ လူဝ်ႇမေႃႁူႉဝႃႈ ၶူဝ်းၸုမ်ႇလႂ် တေလႆႈၼုင်ႈၵႂႃႇ တီႈလႂ် ၊ ပေႃး ပဵၼ်ၾိင်ႈငႄႈၾိင်ႈထုင်းတႄႉ ၼုင်ႈႁႂ်ႈပေႃး ၵိုင်ႇလႅပ်ႈ ။ ႁႂ်ႈတဵမ်ထူၼ်ႈ ၊ ပေႃး ပဵၼ်ၶႅၵ်ႇလီပၢင်ၸႃႉတႄႉ ၼုင်ႈထႅင်ႈသႅၼ်း ၼႆတႄႉ တေလီဢေႃႈ။ ပေႃးၼၼ် ၵူၼ်းတင်းၼမ်ၵေႃႈ တေႁူႉမႃးၸွမ်း။

ထၢမ် – မိူဝ်းၼႃႈ ၶႃႈလူး တႃႇၶူဝ်းၾိင်ႈထုင်းၼႆႉ ဝူၼ်ႉတေႁဵတ်းသင်ထႅင်ႈ ။ မီးၽႅၼ်ၵၢၼ်သင်ၽွင်ႈ။

တွပ်ႇ –  ၶႃႈၶႂ်ႈယွၼ်းလၢတ်ႈဝႃႈ ဢၼ်ၶႃႈၶဝ်ႈမႃးၼႂ်းဝူင်းၵၢၼ် Designer ၼႆႉ ဢမ်ႇၸႂ်ႈပိူဝ်ႈငိုၼ်း ။ ပဵၼ်တၢင်းသူင် ဝႃႇသၼႃႇ ၶႃႈၵူၺ်း။ ပေႃး ဝႃႈ မီးၵူၼ်းပၼ်ႁႅင်း မီးၵူၼ်းၶႂ်ႈယဵပ်ႉၼႆၵေႃႈ တေယဵပ်ႉပၼ်ၵႂႃႇယူႇ။ ဢမ်ႇထိုင်တီႈ တေမီးၽႅၼ်ယႂ်ႇလူင်သေတႃႉ တေႁဵတ်းၵႂႃႇ ၶိူဝ်းၶိူဝ်းယႂ်းယႂ်းယူႇ ။

ထၢမ် – လႆႈထၢမ်လွင်ႈ ယဵပ်ႉၶူဝ်းမႃးၼမ်ယဝ်ႉလႄႈ ၵမ်းၼႆႉ တေယွၼ်း ထၢမ်လွင်ႈ ၵေႃလိၵ်ႈလၢႆးလႄႈၾိင်ႈငႄႈတႆး မူႇၸေႊ ၽွင်ႈ။ ၸွႆႈၼႂ်းၵေႃမႃး ႁိုင်ယဝ်ႉၶႃႈႁႃႉ ။

တွပ်ႇ – ၶႃႈပဵၼ် ၽူႈၶဝ်ႈၸုမ်းမႃးႁိုင်ယဝ်ႉ ၊ ၶႃႈႁပ်ႉၸွႆႈပဵၼ်မေႃသွၼ် လိၵ်ႈလၢႆးတႆး “ မ ႁႃႈတူဝ်” ။ ၵူၼ်းၼႂ်းၵေႃ ၼင်ႇၵၼ် တိုတ်ႉတၢႆးၵၼ် ။ မိူဝ်ႈဢွၼ်တၢင်း ၶႃႈပဵၼ် မေႃသွၼ် ၊ လုၵ်ႉတီႈမေႃသွၼ်သေ ပဵၼ်ၵႅမ်ၽူႈၼမ်းၼႂ်း ၊  ပီၼႆႉတႄႉ ပဵၼ်ဝႆႉ ၽူႈၼမ်းၼႂ်းယဝ်ႉၶႃႈ ။

ထၢမ် – ၶၢဝ်းၵူၼ်းၼုမ်ႇၶွၼ်ႈၵၼ်တီႈၵေႃလိၵ်ႈလၢႆးၼႆႉ တေပဵၼ်ၶၢဝ်းလႂ်ၽွင်ႈၶႃႈ။

တွပ်ႇ – ၵမ်ႈပႃႈၼမ် ပဵၼ်ၶၢဝ်းမႆႈ ။ လုၵ်ႈဢွၼ်ႇၶဝ်ၵေႃႈ ဢိုတ်းႁူင်းႁဵၼ်းယဝ်ႉၼႃႇ ။ ႁဝ်းၶႃႈၵေႃႈ မီးတိုဝ်ႉတၢင်း တိုတ်ႉၵူၼ်းၼုမ်ႇမႃး။ မိူၼ်ၼင်ႇ ၶၢဝ်းမႆႈ ၶၢဝ်းၾူၼ်ၸိူဝ်းၼႆႉ ႁဝ်းၶႃႈတႄႇပၢင်သွၼ်လိၵ်ႈၸိူင်ႉၼႆၶႃႈဢေႃႈ။

ၵၢၼ်ၶွၼ်တုမ်ၵၼ်ၵေႃႈ တိုၵ်ႉႁႃ တႄႇမႃးလႆႈၶိုၼ်းၵူၺ်း မိူဝ်ႈၵွၼ်ႇၼႃႈၼႆႉ ဢိတ်းၼိုင်ႈဢမ်ႇလႆႈ ။ ယွၼ်ႉဝႃႈ ၵၢၼ်မိူင်းယုင်ႈႁႅင်း။ မိူဝ်ႈလဵဝ် ပၢင်သွၼ်ႁဝ်းၶႃႈၼႆႉ ပေႃးပဵၼ်ၶၢဝ်းမႆႈတႄႉ တႃႇလုၵ်ႈဢွၼ်ႇ ၊ ပေႃးၶၢဝ်းၾူၼ်တႄႉ တေပဵၼ်သႅၼ်းယႂ်ႇမၼ်း ။

ထၢမ် – တီႈမူႇၸေႊၼႆႉ မီးၵိင်ႇၽႄၵေႃလိၵ်ႈလၢႆးယူႇၶႃႈႁႃႉ တႃႇတူဝ်ႈထိုင်ၵူႈဝၢၼ်ႈၵူႈပွၵ်ႉၼၼ်ႉ လႆႈႁဵတ်းႁိုဝ်။

တွပ်ႇ – ၶွၼ်ႈၵၼ် တီႈလဵဝ်ၵူၺ်းၶႃႈ ။ ၼႂ်းဢိူင်ႇၼႂ်းဝၢၼ်ႈၽႂ်မၼ်းၵေႃႈ တၢင်းႁဝ်းၼႆႉ မီးဝႆႉ ၸၢႆးႁူဝ်မၢဝ်ႇ ၵူႈပွၵ်ႉၵူႈၾၢႆႇၼႆ တေမီးဝႆႉ။ ယဝ်ႉၵေႃႈ ႁူဝ်မႄႈၼုမ်ႇ ။  

ထၢမ် – ၶၢဝ်းၶိဝ်းၼႆႉ ၵေႃလိၵ်ႈလၢႆးမူႇၸေႊ ၸွင်ႇလႆႈၵွင်ႉၵၼ်တင်းၵေႃလိၵ်ႈလၢႆးတၢင်ႇဝဵင်းယူႇၶႃႈႁႃႉ ။ ငဝ်ႈငုၼ်းၵေႃလိၵ်ႈလၢႆးလူး ၸွင်ႇလႆႈၵွင်ႉၸွမ်း ။

တွပ်ႇ – မိူဝ်ႈပူၼ်ႉမႃးၼႆႉၵူၺ်း ၵေႃလိၵ်ႈလၢႆးလႄႈၾိင်ႈငႄႈတႆးဝဵင်းလိူဝ်ႇ ၶဝ်မႃးလဵပ်ႈႁဵၼ်းလွင်ႈၶူဝ်းၾိင်ႈတႆး ။ ၼၼ်ႉၵေႃႈ လႆႈၸွႆႈၵၼ်ယူႇ။ သိူဝ်ႈၶူဝ်းတႆးမၢဝ်း ႁဵတ်းႁိုဝ်ၼုင်ႈ ၊ ၶူဝ်းတႆးၼိူဝ် ႁဵတ်းႁိုဝ်ၼုင်ႈ ၼႆၸိူဝ်းၼႆႉ ။ ဢွၼ်တၢင်းၼႆႉၵေႃႈ ၵေႃတႆး မႃးတွင်ႈမႃးထၢမ် လွင်ႈယဵပ်ႉသိူဝ်ႈၶူဝ်းတႆး ၸိူဝ်းၼႆႉယူႇ။

လွင်ႈဝႃႈ ၸွင်ႇၵွင်ႉငဝ်ႈငုၼ်းသေႁဵတ်းၼႆတႄႉၵေႃႈ မိူၼ်ၼင်ႇ ႁဝ်းၶႃႈ ဢဝ်ပိူင်သွၼ်လိၵ်ႈလၢႆးတႆး ဢၼ်ငဝ်ႈငုၼ်းမၵ်းမၼ်ႈဝႆႉၼၼ်ႉ သွၼ်ယူႇလႄႈ ပွင်ႇဝႃႈ ႁဝ်းၵွင်ႉၵၼ်ယူႇ။

ထၢမ် – တီႈမူႊၸေႊၼႆႉ ၵေႃလိၵ်ႈလၢႆးလႄႈၾိင်ႈငႄႈၸၢဝ်းၶိူဝ်းသင်ၽွင်ႈၶႃႈ ။ လႆႈႁၼ်မီးဝႆႉ လၢႆးၸၢဝ်းၶိူဝ်းယူႇလႄႈ ၸွင်ႇၶဝ် မီးၵေႃလိၵ်ႈလၢႆးပၵ်းဝႆႉ။

တွပ်ႇ – ဢၼ်ပဵၼ်ၸဝ်ႈႁိူၼ်းမၼ်းတႄႉ ပဵၼ်တႆး ၊ လိူဝ်ၼၼ်ႉယဝ်ႉ တေမီး ၶၢင်  ၊ ယဝ်ႉၵေႃႈ လွႆ(တဢၢင်း ) ။ ႁဝ်းၸိူဝ်းၼႆႉၵေႃႈ ယူႇမိူၼ်ပီႈၼွင်ႉၵၼ်ၵူၺ်း။ တေၸၢင်ႈမီးမႃးထႅင်ႈ ၸၢဝ်းဢွၼ်ႇ ၸိူဝ်းၼႆႉထႅင်ႈ။

ထၢမ် – တႃႇၸၢဝ်းၶိူဝ်း ၵူႈၶိူဝ်း ၼႂ်းပိုၼ်ႉတီႈၸဝ်ႈၵဝ်ႇ ပေႃးတေယူႇၸွမ်းၵၼ်ၵတ်းၵတ်းယဵၼ်ယဵၼ်လႆႈၼၼ်ႉလူး ၶႂ်ႈပၼ်တၢင်းႁၼ်ထိုင်ၸိူင်ႉႁိုဝ် ။

တွပ်ႇ – ႁႂ်ႈႁူႉပွင်ႇလွင်ႈၾိင်ႈငႄႈၾိင်ႈထုင်းၵၼ် ၊ ႁႂ်ႈမေႃၼပ်ႉယမ်ၵၼ် ။ ယႃႇပေလူလၢႆၵၼ် ။ လူဝ်ႇလႆႈဝႆႉၵႃႈၶၼ်ၼိူဝ်ၵၼ်ၼၼ်ႉၼႃႇၼေႃႈ။ပေႃးၸိူင်ႉၼႆ တေယူႇၸွမ်းၵၼ်လႆႈ ။

ယိၼ်းၸူမ်းၶႃႈဢေႃႈ ။