မိၼ်းဢွင်ႇလၢႆႇ လႆႈၸၼ်ႉပဵၼ်ၸွမ်ၸိုင်ႈယိုတ်းမိူင်းယဝ်ႉ ၼႃႈတီႈပုၼ်ႈၽွၼ်း လႄႈ ႁွင်ႈၵၢၼ်လူင်ပွင်ၸိုင်ႈ တႂ်ႈဢႃႇၼႃႇဢၢမ်းၼၢတ်ႈသိုၵ်းမၢၼ်ႈၵေႃႈ ပိၼ်ႇလႅၵ်ႈၵႂႃႇလၢႆလၢႆတီႈ။

ဝၢႆးလင်ပွႆးသွၼ်းၼမ်ႉလင်မိၼ်းဢွင်ႇလၢႆႇ တိူင်ႇၵၢဝ်ႇပဵၼ်ၸွမ် ပဵၼ်တၢင်းၵၢၼ်ယဝ်ႉ ႁိူဝ်းမိၼ်သိုၵ်းမၢၼ်ႈ ၶိုၼ်ႈၶိုၼ်ႈလူင်းလူင်း တီႈၶူင်ႇႁိူဝ်းမိၼ် ဝဵင်းလႃႈသဵဝ်ႈ ။

ၵူၼ်းႁူႉၸၵ်းၸမ်ၸႂ်သိုၵ်းမၢၼ်ႈလၢတ်ႈဝႃႈ သိုၵ်းမၢၼ်ႈယိုတ်းမိူင်းၶဝ် တေႃႉဢဝ်ၵူၼ်းသိုၵ်း တၢင်းတိူင်းသိုၵ်းဝဵင်းလႃႈသဵဝ်ႈ ၶိုၼ်ႈၵႂႃႇလႅၵ်ႈၵူၼ်း ၵၼ် တီႈဝဵင်းမူႇၸေႊ လႅၼ်လိၼ် မိူင်းမၢၼ်ႈ-မိူင်းၶႄႇ မိူင်းတႆးပွတ်းႁွင်ႇဝႃႈၼႆ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉတီႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်လၢႆႈၵူၼ်းသိုၵ်း လႄႈ ၶႃႈႁၢပ်ႇၵၢၼ်ၶုၼ်ၶဝ်။ ဢဝ်ၵူၼ်းမႂ်ႇမႃးလၢႆႈၵူၼ်းၵဝ်ႇ ၼိုင်ႈဝၼ်းၼႆႉ ႁိူဝ်းမိၼ် ၶဝ်မႃး ဢေႇသုတ်း 4 ပွၵ်ႈ ၼမ်သုတ်း 6 ပွၵ်ႈၸိူဝ်းၼႆႉ။ ၸိူဝ်းတပ်ႉသၢမ်ၸဵင်ႇၶမ်းၼၼ်ႉၶဝ်တေႃႉဢွၵ်ႇၵႂႃႇယဝ်ႉ။ ၶဝ်ဢဝ်တပ်ႉၾၢႆႇၸဵင်ႇ ဝၼ်းဢွၵ်ႇၼႆႉမႃးတႅၼ်း။ တေႃႈလဵဝ်ႈလႆႈႁူႉဝႃႈၶဝ်လုၵ်ႉတၢင်းလႃႈသဵဝ်ႈႁႄၵႂႃႇမႃးဝဵင်းမူႇၸေႊ။ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်လူင်ပွင်ၸိုင်ႈသိုၵ်းၶဝ်ၼႆႉ တေလႆႈလၢႆႈၼႂ်းလိူၼ်ဢေႇပရႄႇလ် ႁႂ်ႈယဝ်ႉၼႆႁႄ ၶဝ်မႃးတေႃႉသူင်ႇ။ ပႃးတင်း ၵူၼ်းသိုၵ်းၶဝ်။ တပ်ႉမ စကခ 14 ၶဝ်ဢိူဝ်ႈ ထွႆဢွၵ်ႇၵႂႃႇႁႄ ဢဝ်တပ်ႉတိူင်းလႃႈသဵဝ်ႈၶဝ်မႃးတႅၼ်းဝႆႉ” ဝႃႈၼႆ။

သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၼမ်းၸတ်းပၢင်လိူၵ်ႈတင်ႈ ႁႂ်ႈပေႃးယဝ်ႉတူဝ်ႈၵႂႃႇ ၼႂ်းငဝ်းလၢႆး ၵူၼ်းမိူင်းႁူပ်ႉၽေးပၢင်တိုၵ်းသိုၵ်းသိူဝ် တုၵ်ႉယၢၵ်ႈလၢႆလၢႆလွင်ႈယူႇၼၼ်ႉ လိူၼ်ဢေႊပရႄႇ ဝၼ်းတီႈ 10 မိၼ်းဢွင်ႇလၢႆႇ ၸွမ်ၸိၵ်းသိုၵ်းမၢၼ်ႈယိုတ်းမိူင်း လႆႈၵႂႃႇ တိူင်ႇၵၢဝ်ႇ ႁပ်ႉပဵၼ်ၸွမ်ၸိုင်ႈ ၼႂ်းလုမ်းသၽႃးမိူင်းႁူမ်ႈတုမ် ပဵၼ်တၢင်းၵၢၼ်။

ဝၢႆးလင်ၼၼ်ႉ ၽူႈမီးၸၼ်ႉၼႂ်းတပ်ႉသိုၵ်းမၢၼ်ႈ ၊ ၼႂ်းႁွင်ႈၵၢၼ်လူင်ပွင်ၸိုင်ႈ ၵမ်ႈၼမ် လႆႈၶၢႆႉႁွင်ႈၵၢၼ် ၵမ်ႈၽွင်ႈၺႃးပူတ်းၸၼ်ႉ ၵမ်ႈၽွင်ႈၺႃးၶိုၼ်ႈၸၼ်ႉၼႆသေ ပိၼ်ႇလႅၵ်ႈ ယူင်ႉၵၢၼ် ၼႂ်းႁွင်ႈၵၢၼ်လူင်ပွင်ၸိုင်ႈၵဝ်ႇသေ ႁႅၼ်းၽွတ်ႈတင်ႈၶိုၼ်ႈမႃး ၸုမ်းလူင်ပွင်ၸိုင်ႈမႂ်ႇထႅင်ႈ ႁႂ်ႈယဝ်ႉတူဝ်ႈ ၼႂ်းလိူၼ်ဢေႊပရိူဝ်ႊလ်ၼႆႉ။