သိုၵ်းၶႄႇၵဝ်ႈၵၢင်ႉ (MNDAA) ၸိူဝ်းတူင်ႉၼိုင်ပၼ်ႇၵၢၼ်ၽွင်းငမ်းယူႇၼႂ်းပိုၼ်ႉတီႈ ထုင်ႉမိူင်းယေႃ ၸႄႈဝဵင်းလႃႈသဵဝ်ႈ မိူင်းတႆးပွတ်းႁွင်ႇၼၼ်ႉ သင်ႇၵၢင်ႉၵႄႇ ၽူႈမီးပုၼ်ႈၽွၼ်း ႁႃပၼ်ၵူၼ်းၼႂ်းဢိူင်ႇၼႂ်းဝၢၼ်ႈတႃႇ ႁၢပ်ႇၵၢၼ်သိုၵ်း ဝႃႈၼႆ။

မိူဝ်ႈဝၼ်းတီႈ 17 ၵၢင်လိူၼ်ဢေႃးၵၢတ်ႉသ်ၼႆႉ ၽူႈယႂ်ႇၵူၼ်းလူင် ၵၢင်ႉၵႄႇဝၢၼ်ႈလွႆၶေႃ ၊ ဝၢၼ်ႈၵွင်းၵၢင်၊ ဝၢၼ်ႈပၢင်ၼႃး၊ ဝၢၼ်ႈႁူဝ်ႁူၺ်ႈ လႄႈ ဝၢၼ်ႈလွႆတေႃး ၼႂ်းထုင်ႉမိူင်းယေႃ ၺႃးသိုၵ်းၶႄႇၵဝ်ႈၵၢင်ႉ ႁွင်ႉၵႂႃႇဢုပ်ႇဢူဝ်း ၸီႉသင်ႇႁႂ်ႈႁႃၵူၼ်းပၼ်ၶဝ် တႃႇႁၢပ်ႇၵၢၼ်သိုၵ်း ။

ၵူၼ်းမိူင်းၵေႃႉယူႇဝႆႉ ၼႂ်းပိုၼ်ႉတီႈ ထုင်ႉမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်ယွၼ်းႁႂ်ႈပူႇၵႄႇ ႁႃၵူၼ်းမႂ်ႇၵႂႃႇတႅၼ်း ၵူၼ်းၵဝ်ႇ ၸိူဝ်းပၢႆႈတပ်ႉၵႂႃႇၸိူဝ်းၼၼ်ႉဢေႃႈ။ ၼႂ်းပီ 2026 ၼႆႉၵူၺ်း ၶဝ်ယွၼ်းမႃး ပဵၼ်တၢင်းၵၢၼ်ၸိူင်ႉၼႆၼႆႉ မီးမွၵ်ႈ 2-3 ပွၵ်ႈယဝ်ႉ။ ၵူၺ်းၵႃႈ ၶီႈယႃႈၶီႈၾိၼ်ႇၵူၼ်းၸိူဝ်းဢၼ်ၶဝ်ၺွပ်းႁႄ ၵႂႃႇႁဵတ်းသိုၵ်းၼၼ်ႉတႄႉ ၼမ်ၼႃႇယဝ်ႉၶႃႈ။ မိူဝ်ႈလဵဝ် ၽူႈယႂ်ႇၵူၼ်းလူင် ႁဝ်းၶဝ်ၵေႃႈ ဢွၼ်ၵၼ် တွပ်ႇလၢတ်ႈၶဝ်ဝႆႉဝႃႈ သိုၵ်းဝႃႉ ဢမ်ႇပၼ်ၵႂႃႇႁဵတ်းသိုၵ်းၶႄႇၼႆႁႄလႄႈ ဢဝ်ယဵၼ်ဝႆႉယူႇ” ဝႃႈၼႆ။

ၼႂ်းထုင်ႉမိူင်းယေႃၼႆႉ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 မႃး မီးၸုမ်းသိုၵ်းဝႃႉ၊ ၸုမ်းသိုၵ်းၶႄႇၵဝ်ႈၵၢင်ႉ၊ ၸုမ်းသိုၵ်းၶၢင် လႄႈ ၸုမ်းသိုၵ်းလွႆ (တဢၢင်း) ယူႇသဝ်းတူင်ႉၼိုင်ပၼ်ႇၵၢၼ်ၽွင်းငမ်းဝႆႉ ၼႆ ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

“ၸူဝ်ႈသိုၵ်းဝႃႉမႃးယူႇၶိုၼ်း ၼႂ်းထုင်ႉမိူင်းယေႃၼႆႉ သိုၵ်းၵဝ်ႈၵၢင်ႉၶဝ်ၵေႃႈ ဢမ်ႇပေႃးႁတ်းၵဵပ်းသိုၵ်းႁႅင်းၵႃႈႁိုဝ်။ ႁိုင်မွၵ်ႈ 2 ပီယဝ်ႉ ဢေႃႈ။ သိုၵ်းၶၢင်ၵေႃႈ ၶဝ်ၵဵပ်းၵူၼ်းၶၢင်ၶဝ်ၵူၺ်း သိုၵ်းလွႆၵေႃႈ ဢဝ်ၵူၼ်းလွႆၶဝ် သိုၵ်းၵဝ်ႈၵၢင်ႉသမ်ႉယွၼ်းပႃး ၵူၼ်းတႆးထႅင်ႈၼၼ်ႉ ၼႃႇ။ သိုၵ်းဝႃႉၶဝ်ၵေႃႈ မႃးလၢတ်ႈတီႈၵူၼ်းဝၢၼ်ႈဝႃႈ ပေႃးသိုၵ်းတၢင်ႇၶိူဝ်းမႃးယွၼ်းၼႆ ယႃႇပေ သူင်ႇပၼ်ၼႆဝႆႉယူႇဢေႃႈ။ ၸူဝ်ႈသိုၵ်းဝႃႉမႃးယူႇၼႂ်းထုင်ႉမိူင်းယေႃၼႆႉ ၵူၼ်းတၢင်းမိူင်းယၢင်း၊ မိူင်းၵႅတ်ႈ၊ မၢၼ်ႈမၢၵ်ႇၸိူဝ်းၼႆႉ ၵႂႃႇၶဝ်ႈႁဵတ်းသိုၵ်းဝႃႉ ၼမ်ႁႅင်းၼႃႇယဝ်ႉ” ဝႃႈၼႆ။

ၼႂ်းပီ 2026 ၼႆႉ ၵူၼ်းမိူင်းတႆးပွတ်းႁွင်ႇ ႁူပ်ႉတၢင်းယၢပ်ႇၵိၼ်း လွင်ႈၽေးသိုၵ်း လွင်ႈၵၢၼ်ၵႃႉၶၢႆ လွင်ႈၵႂႃႇမႃးယၢပ်ႇၽိုတ်ႇ ၵူၺ်းဢမ်ႇၵႃး ယွၼ်ႉၸဝ်ႈၵၢၼ်ပၢႆးမၢၵ်ႈမီးလူင် ၸိူဝ်းပဵၼ် ၸၢဝ်းၶိူဝ်းၶႄႇ လုၵ်ႉတၢင်းမိူင်းၶႄႇ မႃးလူင်းတိုၼ်းလၢင်း ၼႂ်းမိူင်းတႆးသေ ႁဵတ်းႁႂ်ႈၵူၼ်းပိုၼ်ႉတီႈ ၸိူဝ်းပဵၼ်ၸဝ်ႈသူၼ် ၸဝ်ႈၼႃး ၸဝ်ႈၵုၼ်ႇၵႃႉတၢင်းၶၢႆသႅၼ်းလဵၵ်ႉ သႅၼ်းပၢၼ်ၵၢင် ၸိူဝ်းယူႇဝႆႉ ၼႂ်းၼႃႈတီႈ သိုၵ်းၵဝ်ႈၵၢင်ႉ MNDAA ၵုမ်းၵမ် ဢမ်ႇၶဵင်ႇတႃႉလႆႈ ႁႅင်းငိုၼ်းပေႃႈလဵင်ႉၸၢဝ်းၶႄႇ ႁူပ်ႉလွင်ႈၶဵင်ႇတႃႉၼမ်။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ယဝ်ႉ သိုၵ်းၵဝ်ႈၵၢင်ႉ လႆႈၵုမ်းၵမ် ပၼ်ႇၵၢၼ်ၽွင်းငမ်း ၼႂ်းၸႄႈဝဵင်းသႅၼ်ဝီ၊ ဢိူင်ႇ/ ဝၢၼ်ႈ ၾၢႆႇၼွၵ်ႈဝဵင်းလႃႈသဵဝ်ႈ တေႃႇထိုင် ၸႄႈဝဵင်း ၵၢတ်ႇၵဝ်ႇ (လၢဝ်ႇၵၢႆး) ၊ ၸႄႈဝဵင်းၵူတ်ႉၶၢႆ ၸိူဝ်းၼႆႉပဵၼ်တၢင်းၵၢၼ်သေ ၵဵပ်းသိုၵ်းမႂ်ႇ ယွၼ်းၵူၼ်းၸၢႆး ဢႃႇယု 18 ထိုင် 45 ၶဝ်ႈႁၢပ်ႇၵၢၼ်သိုၵ်း ၼိုင်ႈဢိူင်ႇလႂ် ဢေႇသုတ်း 2 ၵေႃႉ။ မၢင်ၸႄႈဝဵင်း ၼိုင်ႈလိူၼ် ယွၼ်းၵူၼ်း ၼိုင်ႈပွၵ်ႈ မၢင်ၸႄႈဝဵင်း 3 လိူၼ်ၼိုင်ႈပွၵ်ႈၼႆသေ ၸတ်းၵၢၼ်ၵဵပ်းၵူၼ်းသိုၵ်းမႂ်ႇမႃး ၼိုင်ႈတီႈလႄႈ ၼိုင်ႈတီႈ ဢမ်ႇမိူၼ်ၵၼ်ၼႆ – ၵူၼ်းမိူင်း ပိုၼ်ႉတီႈလၢတ်ႈ။