ႁူဝ်လိူၼ်ဢေႃးၵၢတ်ႉသ်ၼႆႉ ၸွမ်ၽွင်းလူင်မိူင်းတႆး ဢွၵ်ႇၶၢဝ်းတၢင်းၵႂႃႇဢႅဝ်ႇယဵမ်ႈ လူင်းပိုၼ်ႉတီႈ ၼႂ်း ၸႄႈဝဵင်းၼွင်ၶဵဝ်၊ ၵျွၵ်ႉမႄး၊ လႃႈသဵဝ်ႈ၊ မိူင်းယႆ လႄႈ တၢင်ႉယၢၼ်း မိူင်းတႆး ပွတ်းႁွင်ႇ ၼႆယဝ်ႉ။

ၼႂ်းၶၢဝ်းတၢင်းၸွမ်ၽွင်းလူင်မိူင်းတႆး လူင်းပိုၼ်ႉတီႈယူႇၼၼ်ႉ ႁွင်ႈၵၢၼ်ၾၢႆႇလိူမ်ႈလႆႇ ဝဵင်းလႂ်ဝဵင်းၼၼ်ႉ ၸီႉ သင်ႇတီႈၵူၼ်းမိူင်း ႁႂ်ႈယႃႉသုမ်ႉသွင်းတၢင်းၶၢႆ ၸိူဝ်းမီးဢိူမ်ႈၸမ်သဵၼ်ႈတၢင်းလူင်တင်းသဵင်ႈၵူၺ်းဢမ်ႇၵႃး ၸွမ်းႁွင်ႈၵၢၼ်လူင်ပွင်ၸိုင်ႈသိုၵ်းမၢၼ်ႈၵုမ်းၵမ်ၼၼ်ႉၵေႃႈ လႆႈၵႂႃႇႁဵတ်းလွင်ႈမူတ်းသႂ်ဝႆႉပၼ် ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းတီႈလုမ်းၸီႇပိၼ်ႇၶဝ် မႃး ၸႂ်ႉႁဝ်းယႃႉသုမ်ႉတၢင်းၶၢႆၶႃႈဝႃႇ။ ၶဝ်မႃးလၢတ်ႈဝႃႈ ၵူၼ်းလူင်တေမႃး ၼႆ ၵူၺ်း။ သုမ်ႉတၢင်းၶၢႆၼႆႉ ႁဝ်းႁဵတ်း မႃးလၢႆပီ ၸဵမ်လႂ်ယဝ်ႉသမ်ႉၸႂ်ႉၶိုၼ်းယႃႉၼႆႉ မိူၼ်ၵၼ်တင်း ၶႂ်ႈပေႉၵိၼ် ၵူၼ်းမိူင်းၵူၺ်း။ ၸွင်ႇႁဝ်းတေလႆႈ ၶိုၼ်းမႃးၶၢႆႁႃႉဢမ်ႇလႆႈၶိုၼ်းမႃးၶၢႆၼႆ ၵေႃႈ ဢမ်ႇႁူႉ” ဝႃႈၼႆ။

မိူဝ်ႈဝႃး ဝၼ်းတီႈ 4 လိူၼ်ဢေႃးၵၢတ်ႉသ်ၼၼ်ႉၵေႃႈ ၸွမ်ၽွင်းလူင်မိူင်းတႆး ဢူးထဵင်ႇၸူဝ်း ႁွတ်ႈထိုင်ဝဵင်း လႃႈသဵဝ်ႈသေ ႁူပ်ႉထူပ်းၸွမ်းၵူၼ်းမိူင်း တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး ၊ ၼႂ်းၸၼ်ႉၸွမ် လႄႈ ထႅင်ႈလၢႆတီႈ ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ၸွမ်ၽွင်းလူင်မႃးၵေႃႈ ဢမ်ႇလၢၵ်ႇလၢႆး သင်မႃး။ ၵူၼ်းလၵ်ႉၵေႃႈဢမ်ႇယွမ်းလူင်းၵႂႃႇ။ ၵမ်ႈၽွင်ႈတႄႉၵႂႃႇတုၵ်းယွၼ်း ႁႂ်ႈၵႄႈလိတ်ႈပၼ် လွင်ႈၵၢၼ် ၵဵပ်းၶွၼ်ႇၼမ် ၵဵတ်ႉလၢၼ်ႇတီႈမႄႈႁၢၼ်ႇ လႄႈ ၼမ်ႉဢုၼ်ႇၼႆယူႇ။ ၸွင်ႇၶဝ်တေၵႄႈလိတ်ႈပၼ်လႆႈႁႃႉ ဢမ်ႇၵႄႈလိတ်ႈပၼ်လႆႈၼၼ်ႉတႄႉ ဢမ်ႇ တႅတ်ႈတေႃး။ ၵွၼ်ႇၼႃႈၵူၼ်းလူင်တေမႃးၼႆႉ ၶဝ်လႆႈႁဵတ်း လွင်ႈမူတ်းသႂ်ၸွမ်းၼႂ်းဝဵင်း။ ၸႂ်ႉသႅင်ႇတၢင်းၶၢႆ ဢၼ်ဢွၼ်ႇဢၼ်ဢိတ်း ၸွမ်းၶၢင်ႈတၢင်းၸိူဝ်းၼၼ်ႉၶၢႆႉ လူင်ၵႂႃႇၵူႈတီႈ။ မိူၼ်ၵၼ်တင်း မႃးပၼ်တၢင်းယၢပ်ႇ ၵူၼ်းမိူင်းၵူၺ်းယဝ်ႉ” ဝႃႈၼႆ။

ဝၢႆးလင်ပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉသေ သိုၵ်းမၢၼ်ႈယိုတ်းမိူင်းၶဝ်ႈမႃးၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈၼႆႉ ၽူႈလၵ်ႉၸၵ်ႉၶုတ်ႈၵေႃႈ လိူင်ႇၼမ်မႃးႁႅင်းသေ ၾၢႆႇ ၸဝ်ႈၼႃႈတီႈပလိၵ်ႈ လႄႈ ၽူႈမီးပုၼ်ႈၽွၼ်းၶဝ်ၵေႃႈ ဢမ်ႇၵႄႈလိတ်ႈသင်ပၼ်လႆႈတေႉတေႉဝႃႈဝႃႈလႄႈ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁၢၼ်ႉၸႂ်ၼိူဝ် ၶႃႈႁၢပ်ႇၵၢၼ်ၶုၼ် ၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈယိုတ်းမိူင်းၶဝ် – ၼႆ ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈလၢတ်ႈ။