မိူဝ်ႈဝႃးဝၼ်းတီႈ 19 လိူၼ်ၵျူႊလၢႆႊယၢမ်းတၢမ်းၶမ်ႈ ၼၢင်းယိင်းသွင်ၵေႃႉပီႈၼွင်ႉဢၼ်ယူႇဝႆႉ ၼႂ်းပွၵ်ႉ 10 (တိုင်းရုံးလမ်း) သဵၼ်ႈတၢင်းဢွၼ်ႇ (ဂမုန်းလမ်းသွယ်) ဝဵင်းလႃႈသဵဝ်ႈ ၺႃး ၸူၼ် ၸူၼ်ဢဝ်ငိုၼ်းၶမ်းၵႂႃႇသေ ၶႃႈႁႅမ်တၢႆပႅတ်ႈတင်းသွင်ၵေႃႉ ။
ၵူၼ်းမိူင်းၵေႃႉယူႇၼႂ်းပွၵ်ႉ 10 ဝဵင်းလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ “ပဵၼ်သွင်ၵေႃႉပီႈၼွင်ႉ ၶဝ်ဢႃႇယုယႂ်ႇယဝ်ႉၼင်ႇၵဝ်ႇ။ ယူႇၸွမ်းၵၼ်ဝႆႉ ပဵၼ်ၼၢင်းယိင်းတင်းသွင်ၵေႃႉ။ ႁိူၼ်းၶဝ်မီးႁိမ်းတၢင်းၶဝ်ႈၵႂႃႇ ၼႂ်းတိူင်းၼၼ်ႉဢေႃႈ။ ပေႃးၶဝ်ႈၵႂႃႇၼႂ်းသဵၼ်ႈတၢင်းဢွၼ်ႇၼၼ်ႉၼႆႉ ပဵၼ်ႁိူၼ်းလင်မၢႆထီႉ 5 ၼၼ်ႉၵမ်းလဵဝ်ယဝ်ႉၶႃႈ။ ၶႃပီႈၼွင်ႉၼႆႉ ပဵၼ်ၸဝ်ႈတႅင်ႇ ၶႄး သွင်တူဝ်၊ ယဝ်ႉၵေႃႈ ပိုတ်ႇႁၢၼ်ႉၶၢႆၵုၼ်ႇယွႆႈ ဝႆႉပႃး။ မိူဝ်ႈလဵဝ် ပွၵ်ႉ 10 ႁဝ်းၼႆႉ ဢမ်ႇမီးလွင်ႈႁူမ်ႇလူမ်ႈသင်ယဝ်ႉ။ ၼႂ်းဝဵင်းလႃႈသဵဝ်ႈႁဝ်းၵေႃႈ ယူႇဢမ်ႇပေႃးလွတ်ႈၽေးယဝ်ႉ။ ၽူႈလၵ်ႉ ၵူၼ်းၸူၼ် လိူင်ႇမႃးၶိုၼ်းႁႅင်းတေႉတေႉဢေႃႈ” ဝႃႈၼႆ။
လႆႈႁူႉဝႃႈ သွင်ၵေႃႉပီႈၼွင်ႉဢၼ်ၺႃးၶႃႈႁႅမ်တၢႆၵႂႃႇၼၼ်ႉ ပဵၼ်ပီႈၼၢင်းလူင် လႄႈ ၼွင်ႉယိင်းၵေႃႉလဵၵ်ႉ သုတ်း ၸဝ်ႈႁၢၼ်ႉၶၢႆပူႉ ၵွင်းသၢၼ်ႇ (ကောင်းစံ) ဢၼ်မီးႁိမ်းတၢင်းယႅၵ်ႈၾႆး ၶဵဝ်ၾႆးလႅင် သဵၼ်ႈတၢင်းၵႂႃႇၼမ်ႉတူႈ ၼႂ်းဝဵင်းလႃႈသဵဝ်ႈၼၼ်ႉ – ၼႆယဝ်ႉ။
မိူဝ်ႈဝူင်ႈပူၼ်ႉမႃး ဝၼ်းတီႈ 13/7/2026 ၼၼ်ႉၵေႃႈ ၵူၼ်းၸၢႆးၵေႃႉၼိုင်ႈ ပႃးငိုၼ်းသေ ၶီႇရူတ်ႉလတ်းၵႂႃႇ တၢင်းဝၢင်းႁိူဝ်းမိၼ် ႁိမ်းတိူင်းသိုၵ်းမၢၼ်ႈ (ရမခ)ၼၼ်ႉသေ ၺႃးၵူၼ်းၵေႃႉ ၼိုင်ႈ ပႂ်ႉႁေႉရူတ်ႉသေ ၸူၼ်ဢဝ်ငိုၼ်းၵႂႃႇ 40 သႅၼ်ပျႃး။ ႁူဝ်လိူၼ်ၵျုႊလၢႆႊ ဝၼ်းတီႈ 7 ၼၼ်ႉၵေႃႈ မီးၵူၼ်းၸၢႆးသၢမ်ၵေႃႉ ၶဝ်ႈၸူၼ်ဢဝ်ငိုၼ်းၶမ်း ၼႂ်းႁိူၼ်းလင်ၼိုင်ႈ တီႈပွၵ်ႉ 5 ဝဵင်းလႃႈသဵဝ်ႈ မိူၼ်ၵၼ်ၼင်ႇၵဝ်ႇ။
ၼႂ်းၶၢဝ်းတၢင်းလူင်ပွင်ၸိုင်ႈသိုၵ်းမၢၼ်ႈၸတ်းႁဵတ်းၽႅၼ်ၵၢၼ် 100 ဝၼ်းၼႆႉ ၽူႈလၵ်ႉၵူၼ်းၸူၼ် လိူင်ႇၼမ်မႃးၶိုၼ်း ၼႂ်းဝဵင်းလႃႈသဵဝ်ႈၵူႈမိုဝ်ႉၵူႈဝၼ်း ဢမ်ႇတွၼ်ႉႁၼ် ၸဝ်ႈၼႃႈတီႈပလိၵ်ႈ တီႉၺွပ်းဢဝ်လႆႈ ၵူၼ်းၸိူဝ်းႁဵတ်းၽိတ်းၼၼ်ႉသေပွၵ်ႈၼႆ ၵူၼ်းမိူင်းလႃႈသဵဝ်ႈ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ