ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႂ်းၶၢဝ်းတၢင်း 5 ပီပၢႆၼႆႉ ၵူၼ်းမိူင်းလႆႈႁူပ်ႉၽေးသိုၵ်းၽေးသိူဝ်  ယူႇတီႈလႂ်ၵေႃႈ  ဢမ်ႇမီးလွင်ႈႁူမ်ႇလူမ်ႈသေဢမ်ႇၵႃး ၵၢၼ်ႁႃၵိၼ် လဵင်ႉတွင်ႉၵေႃႈယၢပ်ႇၽိုတ်ႇ ႁဵတ်းႁႂ်ႈ ၵူၼ်းမိူင်းတုၵ်ႉၶၵိၼ်းၸႂ်မႃးၵူႈမိုဝ်ႉၵူႈဝၼ်း  ။

မိူဝ်ႈၽွင်းဝၢၼ်ႈမိူင်းသုၵ်ႉသၵ်ႉဢမ်ႇၼိမ်သဝ်းၼႆႉ  ၵၢၼ်ငၢၼ်းႁႃယၢပ်ႇ ပၢႆးမၢၵ်ႈမီးတူၵ်းလႄႈ ၵူၼ်းၼုမ်ႇၵမ်ႈၼမ် ဢမ်ႇမီးတိုဝ်ႉတၢင်းတႃႇႁဵၼ်း သွၼ်လိၵ်ႈလၢႆးပၢႆးပၺ်ႇၺႃႇ ဢွၼ်ၵၼ်ႁႃႁဵတ်းၵၢၼ် တႃႇၵႄႈလိတ်ႈပၼ်ႁႃလဵင်ႉတွင်ႉတင်းၼမ်။

ၽွင်းၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၼႆႉ ၼၢင်းယိင်းၼုမ်ႇ ၸိူဝ်းႁႃၵၢၼ်တၢင်းဢွၼ်ႊလၢႆႊ တူၵ်းပဵၼ်တူဝ်ယိူဝ်ႇ ၺႃးလွၵ်ႇလႅၼ်ႁူၺ်းႁွင်ႉၵႂႃႇၶၢႆ ၊ တဵၵ်းၸႂ်ႉႁဵတ်းမႄႈမွၵ်ႇယႃႈ လႄႈ ႁဵတ်းၵၢၼ်ၼႂ်းလၢၼ်ႉလဝ်ႈ လၢၼ်ႉ မူၼ်ႈၵျေႃႇၵေႃႈမီးမႃးတင်းၼမ် ။

ၼႂ်းဝၼ်းတီႈ 13 လိူၼ်ၵျႃၼ်ႊ 2026 ၼၢင်းယိင်းဢွၼ်ႇဢႃယု 16 -17  သွင်ၵေႃႉ ယူႇဝဵင်းတူၼ်ႈတီး ဢၢၼ်းၵႂႃႇႁဵတ်းၵၢၼ်တီႈဝဵင်းသူၺ်ႇၺွင်ႇ ၸိုင်ႈတႆးပွတ်းၸၢၼ်း၊ ၵႂႃႇၺႃးၼၢႆးၼႃႈ ႁူၺ်းႁွင်ႉ ဢဝ်ၵႂႃႇၶၢႆတီႈႁူင်းမႄႈမွၵ်ႇယႃႈ ။  

 ၼၢႆးၼႃႈသွင်ၵေႃႉၼၼ်ႉၸိုဝ်ႈႁွင်ႉ – သူဝ်ႇၾီႇယႃႇ လႄႈ မူဝ်းသႅတ်ႉ။   ၶႃသွင်ၵေႃႉလႅၼ်ဝႃႈ တေႁႃပၼ်ၵၢၼ် ဢၼ်လႆႈငိုၼ်းလိူၼ်လီတီႈဝဵင်းဢေးတႃႇယႃႇ ၼႆသေ  ႁူၺ်းႁွင်ႉၶႃ ၵႂႃႇသူင်ႇဝႆႉတီႈႁူင်းမႄႈမွၵ်ႇယႃႈ ဢၼ်မီးၸိုဝ်းဝႃႈ “ၼၼ်းသူၺ်ႇယီႇ” ၼႆၼၼ်ႉသေ ၶၢႆၶႃဝႆႉ ၼိုင်ႈၵေႃႉ ၼိုင်ႈသႅၼ်ပျႃး ဝႃႈၼႆ။   

ၼၢင်းယိင်းတူင်ႉၼိုင်သုၼ်ႇလႆႈသုၼ်ႇပဵၼ်ၼၢင်းယိင်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ “ တီႈတႄႉမၼ်းၵူၼ်းၼိုင်ႈၵေႃႉဢၼ်ဝႃႈၼႆႉဢမ်ႇၸႂ်ႈဝႃႈၼိုင်ႈသႅၼ်ၵူၺ်း ၊ ဢဝ်ငိုၼ်းဢၼ်ႁူဝ်သိပ်းသႅၼ်မၼ်းၵႃႈႁိုဝ်ၵေႃႈသိုဝ်ႉၶၢႆၵၼ်ဢမ်ႇလႆႈ ဢမ်ႇတႅပ်းတတ်း ၵႃႈၶၼ်မၼ်းလႆႈ ၊ ၸဵမ်မိူဝ်ႈမၼ်းၵိူတ်ႇမႃးယဝ်ႉ မၼ်းၵေႃႈမီးသုၼ်ႇလႆႈသုၼ်ႇပဵၼ်ၵူၼ်း”- ဝႃႈၼႆ

ယွၼ်ႉငဝ်းလၢႆးမိူင်းမၢၼ်ႈမိူဝ်ႈလဵဝ်ၼႆႉ ဢမ်ႇၼိမ်သဝ်း ၸဝ်ႈဢႃႇၼႃႇ ၽွင်းငမ်းဝၢၼ်ႈမိူင်းဝႆႉ – ပၵ်းပိူင်ၸိုင်ႈမိူင်းဢမ်ႇသုမ်ႇငမ်းၵူၼ်းမိူင်း၊ဢႃႇၼႃႇလႄႈပၢႆၵွင်ႈၵူၺ်းသုမ်ႇငမ်းၼိူဝ်ၵူၼ်းမိူင်း။ ႁဵတ်းႁႂ်ႈၵူၼ်းမိူင်းလႆႈၵူဝ်ၽေးၵူႈလွင်ႈလွင်ႈယူႇၵူႈၶၢဝ်း။ ဢမ်ႇမီးပၵ်းပိူင်ႁႄႉၵင်ႈပၼ်လႄႈ ၵႃႈၶၼ်ၵူၼ်းမိူင်းၵေႃႈဢမ်ႇမီး၊ ၶူဝ်းၶွင်ၵူၺ်းဢမ်ႇၵႃး ၵူၼ်းၵေႃႈၺႃးလၵ်ႉၵႂႃႇၶၢႆၵိၼ် လူၺ်ႈၵႃႈထုၵ်ႇၵႃႈပေႃး။ သင်ဝႃႈထူပ်းၽေးသေၸိူဝ်ႉသေပိူင်လႄႈတၢႆၵႂႃႇၸိုင် ဢမ်ႇမီးၵႃႈႁူဝ်ၵႃႈတႅၼ်းသင် တၢႆၵႂႃႇလၢႆလၢႆၸိူင်ႉၼၼ်ၵူၺ်း-   မၼ်းၼၢင်းသိုပ်ႇလၢတ်ႈထႅင်ႈၼင်ႇၼႆ ။

ၽွင်းဢွၼ်ႇယိင်းသွင်ၵေႃႉၼၼ်ႉၵိုင်ႉၵၢင်ႉႁူႉဝႃႈ ထုၵ်ႇဢဝ်မႃးၶၢႆၵိၼ်တီႈ ႁူင်းမႄႈမွၵ်ႈယႃႈၼႆၵေႃႈ ၶႃၼႅတ်ႈဢွၼ်ၵၼ်ႁႃလၢႆးမၼ်းတင်းၶိုၼ်းသေ လၵ်ႉဢွၵ်ႇပၢႆႈ။ ဝၼ်းတီႈ 14/6/2026 ၶၢဝ်းမိူင်းလႅင်းၸင်ႇပၢႆႈလွတ်ႈမႃးၵေႃႉလဵဝ်။

ၵေႃႉဢၼ်လွတ်ႈမႃးၼၼ်ႉၼႅတ်ႈၵႂႃႇတီႈပလိၵ်ႈပႂ်ႉသဵၼ်တၢင်း တီႈၾႆးၶဵဝ်ၾႆးလႅင်ၼၼ်ႉသေ ယွၼ်းတၢင်းၸွႆႈထႅမ်လႄႈ  ၸင်ႇၶိုၼ်းတိတ်းတေႃႇၸူးၵူၼ်းလူင်ဝၢၼ်ႈ ဢိၵ်ႇ ႁွင်ႈၵၢၼ်ၾၢႆႇၵဵဝ်ႇၶွင်ႈသေ ၵႂႃႇၸွႆႈဢဝ်ထႅင်ႈၵေႃႉၼိုင်ႈၼၼ်ႉဢွၵ်ႇမႃးလႆႈ။

ၵၢင်ႉၵႄႇဝဵင်းတူၼ်ႈတီးၵေႃႉၼိုင်ႈ ယိုၼ်ယၼ်လၢတ်ႈဝႃႈ -“ႁႃၵၢၼ်တၢင်းဢွၼ်ႊလၢႆႊလႄႈ ၶႃၸင်ႇၺႃးၼၢႆးၼႃႈလႅၼ်ဝႃႈ တေႁႃပၼ်ၵၢၼ်၊  တေလႆႈငိုၼ်းလိူၼ်လီၼႆသေ ၺႃးႁွင်ႉဢဝ်ၵႂႃႇၶၢႆ”- ဝႃႈၼႆ ။

ပလိၵ်ႈမၢၼ်ႈ သိုၵ်းမၢၼ်ႈ ၵေႃႈၶဝ်ႈၵႂႃႇၵူတ်ႇထတ်းတီႈႁူင်းပျေႃႇမူၼ်ႈ KTV ဢၼ် ဢွၼ်ႇယိင်းၺႃးဢဝ်ၵႂႃႇၶၢႆဝႆႉၼၼ်ႉ သေ ၊ တီႉၺွပ်း ၼၢႆးၼႃႈ ပွႆးၸႃး 2 ၵေႃႉ လႄႈတင်းၸဝ်ႈႁၢၼ်ႉ ၸိုဝ်ႈ ၼွႆႇၼီႇဢူး (ႁိုဝ်) ၸူႇလၢႆမူဝ်း ၼၼ်ႉဝႆႉသေ ၵုမ်းၶင်ဝႆႉတီႈႁူင်းပလိၵ်ႈ ဢေးတႃႇယႃႇ ။ တေၵူတ်ႇထတ်းဢဝ်လိူင်ႈလူၺ်ႈ ပၵ်းပိူင်မၢႆမီႈ ၵၢၼ်ၵႃႉၶၢႆၵူၼ်း မတ်ႉတႃ  35/44   ဝႃႈၼႆ။

ၵဵဝ်ၵပ်းလွင်ႈၼႆႉၵူၼ်းၸၢႆးယူႇဝဵင်းဢေးတႃႇယႃႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ႁၢၼ်ႉမူၼ်ႈၵျေႃႇ တီႈဝဵင်းဢေးတႃႇယႃႇၼႆႉ  ၵမ်ႈၼမ်တႄႉ ဢမ်ႇဝႆႉ မႄႈမွၵ်ႈယႃႈ တီႈႁၢၼ်ႉၶႃႈၼႃ။  ပေႃးမီးၶႅၵ်ႇၶႂ်ႈလႆႈၼႆ ၶဝ်ၸင်ႇႁွင်ႉပၼ်ဢေႃႈ။ မႄႈမွၵ်ႇယႃႈၸိူဝ်းၼၼ်ႉၶဝ်ၵႂႃႇၶၢတ်ႈႁွင်ႈသေဝႆႉပၼ်ယူႇဝႆႉထႅင်ႈတီႈၼိုင်ႈၶေႃၶေႃဢေႃႈ  ”- ဝႃႈၼႆ ။

တီႈဝဵင်းဢေးတႃႇယႃႇ၊ သူၺ်ႇၺွင်ႇ ဢၼ်မီးၾၢႆႇတႅမ်ႇ ဝဵင်းလူင်တူၼ်ႈတီးၼႆႉ ပိုတ်ႇဝႆႉ ႁူင်းမိပ်ႇၼူတ်ႈ၊ ႁၢၼ်ႉၵျေႃႇမူၼ်ႈ KTV လႄႈတင်း ႁူင်းမႄႈမွၵ်ႇယႃႈၼႆႉ မီးမႃးပီယၢဝ်းၶၢဝ်းႁိုင်ယဝ်ႉ ။ ယူႇတီႈၽူႈမီးပုၼ်ႈၽွၼ်းၼႂ်းပိုၼ်ႉတီႈၵေႃႈ ႁူႉယူႇသေတႃႉ ပွႆႇဝႆႉပၼ် ဢမ်ႇမီးလွင်ႈဢဝ်လိူင်ႈ ဢမ်ႇၶဝ်ႈၵူတ်ႇထတ်းတီႉၺွပ်းသင်ၼႆ-  ၵူၼ်းပိုၼ်ႉတီႈ လၢတ်ႈၼင်ႇၼႆ။

ယၢမ်းလဵဝ်တီႈဝဵင်းဢေးတႃႇယႃႇၼႆႉမီး  ႁၢၼ်ႉၵျေႃႇမူၼ်ႈ KTV လိူင်ၼမ်ၵူၼ်းၵိုၼ်းၶွၼ်ႈ သဵင်ဢူၼ်ဢၢၼ်မေႃးႁႅင်းၽွင်းၵၢင်ၶမ်ႈၵၢင်ၶိုၼ်း လႄႈႁဵတ်းႁႂ်ႈၵူၼ်းပိုၼ်ႉတီႈ ၸိူဝ်းပဵၼ်ၵူၼ်းထဝ်ႈၵူၼ်းၵႄႇ ဢမ်ႇၸၢင်ႈလိုဝ်ႈသဝ်းၼွၼ်းလီလီ  တုမ်ႉတိူဝ်ႉပၢႆးယူႇလီလႄႈ ပဵၼ်ဢၼ်သုၵ်ႉသၵ်ႉၸႂ်တႄႉတႄႉ – ၵူၼ်းပိုၼ်ႉတီႈလၢတ်ႈ ။

မိူၼ်ၼင်ႇၼႆ မိူဝ်ႈလိူၼ်ၵျုၼ်ႊ ဝၼ်းတီႈ 7 ၼၼ်ႉၵေႃႈ ဢွၼ်ႇယိင်း 14 ၵေႃႉ ၵူၼ်းဝၢၼ်ႈ တွင်လိူဝ်ႇ  ၸႄႈဝဵင်းပၢင်လွင်း ၺႃးၼၢႆးၼႃႈႁူၺ်းႁွင်ႉဝႃႈ ႁႃပၼ်ၵၢၼ် တီႈႁူင်းၸၢၵ်ႈ ယဵပ်ႉသိူဝ်ႈၶူဝ်း  ဝဵင်းမူႇၸေႊ ၼႆသေ  ဢဝ်ၵႂႃႇၶင်ဝႆႉႁိုင် 2 လိူၼ် – ဢၢၼ်းတေဢဝ်ၶဝ် ၵႂႃႇၶၢႆတီႈလႅၼ်လိၼ် တႆး- ၶႄႇ။

ဝၢႆးၼၼ်ႉ ဢွၼ်ႇယိင်း 12 ၵေႃႉပၢႆႈဢွၵ်ႇလႆႈသေ ၸင်ႇၵပ်းမႃးၸူးတၢင်းႁိူၼ်းၶဝ် –  ႁႂ်ႈၵူၼ်းႁိူၼ်းႁွင်ႉ  ၵၢင်ႉၵႄႇၼႂ်းဝၢၼ်ႈ ၵႂႃႇႁပ်ႉၶဝ်ပွၵ်ႈၶိုၼ်းႁိူၼ်း ၊ ထႅင်ႈ 2 ၵေႃႉ ပႆႇ ၵပ်းသိုပ်ႇလႆႈၼႆယဝ်ႉ ။

ယၢမ်းလဵဝ် လုၵ်ႈဢွၼ်ႇ 12 ၵေႃႉဢၼ်ႁွတ်ႈထိုင်ၶိုၼ်းတီႈႁိူၼ်းယေးၼၼ်ႉ  ႁဵတ်းၵၢၼ်ဝႆႉယူႇၼႂ်းဝၢၼ်ႈၼႂ်းၶူင်ႇၼၼ်ႉၼႆယယဝ်ႉသေတႃႉ တုမ်ႉတိူဝ်ႉပၢႆးတူဝ် ပၢႆးၸႂ်ဝႆႉၼႆ ၵူၼ်းၸွႆႈထႅမ် ၼႂ်းပိုၼ်ႉတီႈလၢတ်ႈၼင်ႇၼႆ ။

မိူၼ်ၼင်ႇၼႆ မိူဝ်ႈၽွင်းလိူၼ်ဢေႊပရိူဝ်ႊလ်ပူၼ်ႉမႃးၼႆႉလုၵ်ႈဢွၼ်ႇယိင်းၵေႃႉၼိုင်ႈမွၵ်ႈဢႃယု 15-16 ၶူပ်ႇ  ႁဵတ်းၵၢၼ်တီႈႁၢၼ်ႉလဝ်ႈတီႈၼိုင်ႈတီႈဝဵင်းတူၼ်ႈတီး –  ၽူႈၵုမ်းၵၢၼ်ၼႄးဝႃႈမၼ်းၼၢင်းဢဝ်ငိုၼ်းသူးတီႈၵူၼ်းမႃးၵိၼ်တၢင်းၵိၼ်ၼႆသေ ပၼ်တူတ်ႈတၢမ်ႇ ပေႃႉႁႅမ်ထိုင်တီႈလူႉတၢႆ။ 

ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်မႃးႁႅင်းလႄႈ  လွင်ႈလွၵ်ႇလႅၼ်ဢဝ် ၼၢင်းယိင်း ၵႂႃႇၶၢႆသေ တဵၵ်းၸႂ်ႉႁဵတ်းမေးၶႄႇၼႆႉ ၼမ်မႃးလိူဝ်ၵဝ်ႇတေႉ တေႉဝႃႈဝႃႈ ၊ ယွၼ်ႉၼၼ် သင်ဝႃႈမီးၵူၼ်းမႃးႁူၺ်းႁွင်ႉဝႃႈ တေႁႃပၼ်ၵၢၼ်ၼႆၸိုင် ႁႂ်ႈၸွပ်ႇထၢမ်လီလီယဝ်ႉ ၸင်ႇၵႂႃႇ – ၵူၼ်းပိုၼ်ႉတီႈလၢတ်ႈ။

ယွၼ်ႉသင်လႄႈ  ၵၢၼ်လွၵ်ႇလႅၼ်ၵႃႉၶၢႆၵူၼ်း မီးမႃးဢမ်ႇထၢတ်ႇဢမ်ႇဝၢႆး

ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၵၢၼ်ၵႃႉၶၢႆ ၊ ၵၢၼ်ၽုၵ်ႇသွမ်ႈ ၊ ၵၢၼ်ႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ်မႃးႁႅင်းလႄႈ ၵူၼ်းမိူင်း လႆႈတေႃႇသူႈပၼ်ႁႃ ဢိုပ်းယၢပ်ႈလႄႈ ဢွၼ်ၵၼ် ၶႂ်ႈႁႂ်ႈလုၵ်ႈလၢင်းၸဝ်ႈၵဝ် ႁဵတ်းၵၢၼ် တွၼ်ႈတႃႇတေၵႄႈလိတ်ႈ ၵၢၼ်ႁႃၵိၼ်လဵင်ႉတွင်ႉၸူဝ်ႈၶၢဝ်း ။

ဢဝ်တိုဝ်ႉတၢင်းၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၼႆႉသေ  ၼၢႆးၼႃႈမိူဝ်ႈလဵဝ်ၵေႃႈမေႃလၢတ်ႈမေႃၸႃ ႁူၺ်းသူၼ်းႁႂ်ႈယုမ်ႇၸႂ်ဢွၼ်တၢင်း ။

ၼၢင်းယိင်းၼႂ်းၸႄႈဝဵင်းႁူဝ်ပူင်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“မိူဝ်ႈဢွၼ်တၢင်းၼႆႉ ႁဵတ်းသူၼ်ႁဵတ်းႁႆႈၵူၺ်းၵေႃႈ ပေႃးၵိၼ်ပေႃးၸၢႆႇလဵင်ႉၼႃႈႁိူၼ်းယဝ်ႉ ။ ၵမ်းၼႆႉတႄႉ ဢမ်ႇလႆႈ ပိုၼ်ႉတီႈၸၢဝ်းပဢူဝ်းယူႇသဝ်းၼမ်ၼႆႉ ၵမ်ႈၼမ် ႁဵတ်းၵိၼ်ႁႃလဵင်ႉတွင်ႉၽုၵ်ႈသွမ်ႈၵူၺ်း ယွၼ်ႉမိူဝ်ႈလဵဝ် ဢမ်ႇမီးလွၵ်းၵၢတ်ႇလႄႈ ၶဝ်ၵေႃႈႁႃတင်းဢွၵ်ႇ ၊ ၸႂ်ႉလုၵ်ႈလၢင်းၵႂႃႇႁဵတ်းၵၢၼ် ႁႃၵၢၼ်ၸိူင်ႉၼၼ် ၊ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇမႃးၵူႈမိုဝ်ႉၵူႈဝၼ်းလႄႈ ၸင်ႇၵိူတ်ႇၶိုၼ်ႈမႃးလွင်ႈၸိူင်ႉၼႆ”- ဝႃႈၼႆ ။

လွင်ႈတၢင်းဢၼ်ႁဵတ်းႁႂ်ႈမီးလွင်ႈၵႃႉၶၢႆၵူၼ်းၼႆႉ ပဵၼ်ယွၼ်ႉၼႂ်းပိုၼ်ႉတီႈၸဝ်ႈၵဝ်ပဵၼ်ပၢင်တိုၵ်း ။ ပိုၼ်ႉတီႈၸိူဝ်း ဢမ်ႇပဵၼ်ပၢင်တိုၵ်းၼၼ်ႉၵေႃႈ ယွၼ်ႉၼႂ်းမိူင်းမၢၼ်ႈပတ်းပိုၼ်ႉပဵၼ် ပၢင်တိုၵ်းလႄႈ မီးလွင်ႈၵဵပ်းသိုၵ်း တီႉၺွပ်းႁၢပ်ႇၵၢၼ်သိုၵ်း ၊ ဢမ်ႇၸႂ်ႈဝႃႈ ပဵၼ်ၵူၼ်းၸၢႆး ၵူၺ်းယဝ်ႉ မိူဝ်ႈလဵဝ်ၼႆႉ ပႃးမႃးၼၢင်းယိင်းၸိူဝ်းၼၼ်ႉလႄႈ ၼင်ႇႁိုဝ်တေဢမ်ႇထုၵ်ႇ တီႉၺွပ်းၵႂႃႇႁၢပ်ႇၵၢၼ်သိုၵ်းၼၼ်ႉ ဢွၼ်ၵၼ် ငိူင်ႉပၢႆႈ ၵေႃႈမီးၼမ် ။  

ထႅင်ႈဢၼ်ၼိုင်ႈတႄႉ ယွၼ်ႉပိုၼ်ႉတီႈၸဝ်ႈၵဝ် ပဵၼ်ပၢင်တိုၵ်းလႄႈ လႆႈပၢႆႈပၢင်တိုၵ်း၊  လႆႈယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ လႆႈတႄႇၶိုၼ်းမႂ်ႇမႂ်ႇမူတ်းလႄႈ လႆႈၵၢၼ်သင်ၵေႃႈ လႆႈႁႃႁဵတ်း ။ ယွၼ်ႉပိူဝ်ႈငဝ်းလၢႆးၸိူင်ႉၼႆလႄႈ ၸင်ႇႁဵတ်းႁႂ်ႈ ၵၢၼ်ၵႃႉၶၢႆၵူၼ်း ၼႆႉလိူင်ၼမ်မႃးၵူႈမိုဝ်ႉၵူႈဝၼ်း – ထတ်းသင်ႁၼ်မႅၼ်ႈၸိူင်ႉၼၼ် ။

ယွၼ်ႉသိုၵ်းမၢၼ်ႈယိုတ်းဢႃၼႃႇၸိုင်ႈမိူင်းလႄႈ ၼႂ်းမိူင်းမိူဝ်ႈလဵဝ် ၊ ဢမ်ႇၶိုၼ်ႈယႂ်ႇၶိုတ်းၸၼ်ႉ ၊ ၵူၼ်းပိုၼ်ႉတီႈၵေႃႈ ဢမ်ႇယိုၼ်ႈမိုဝ်းထိုင်သိုဝ်ႇလႆႈ ၊ ဢမ်ႇမီးၵူၼ်းဢဝ်ပုၼ်ႈၽွၼ်းႁႂ်ႈထိုင်တီႈလႆႈလႄႈတွၼ်ႈတႃႇၵူၼ်းပူၼ်ႉပႅၼ်ၵေႃႈ မီးၸႂ်ႁတ်းႁဵတ်းမႃး ။

ၼၢင်းယိင်းႁဵတ်းသုၼ်ႇလႆႈသုၼ်ႇပဵၼ်ၵူၼ်းၼႂ်းပိုၼ်ႉတီႈ တုၵ်းယွၼ်းလၢတ်ႈဝႃႈ- ယွၼ်ႉၼၼ်လႄႈ ယူႇတီႈသိုဝ်ႇတူင်ႇဝူင်းၵူႈၾၢႆႇၵေႃႈ ၶႂ်ႈတုၵ်းယွၼ်းႁႂ်ႈဢွၵ်ႇပၼ်သဵင်လွင်ႈၼႆႉ ၊ ဢမ်ႇၸႂ်ႈဝႃႈ ပိုၼ်ႉတီႈၸၢဝ်းၶိူဝ်းယူႇသဝ်းၼႆႉ တႃႇတေယိုၼ်ႈမိုဝ်းထိုင်လႆႈလႄႈ လွင်ႈၸိူင်ႉၼႆႉ ၸင်ႇလႆႈၵိူတ်ႇၶိုၼ်ႈမႃးတင်းၼမ် ။

ၶႂ်ႈႁႂ်ႈဢဝ်ႁူမ်ႇလူမ်ႈပၼ်ၵူၼ်းမိူင်း

ငဝ်းလၢႆးမိူင်းမၢၼ်ႈမိူဝ်ႈလဵဝ်ၼႆႉ ပဵၼ်ၽွင်းၸဝ်ႈဢႃႇၼႃႇယိုတ်းဝႆႉလႄႈ ႁွင်ႈၵၢၼ်ဢၼ်ၵဵဝ်ႇ ၶွင်ႈ ၸိူဝ်းၼၼ်ႉၵေႃႈ ဢမ်ႇဢဝ်ပုၼ်ႈၽွၼ်းပၼ်လႆႈႁႂ်ႈထိုင်တီႈ ၊ တွၼ်ႈတႃႇ ၵူၼ်းၸိူဝ်းႁဵတ်းပူၼ်ႉပႅၼ် မိူၼ်ၼင်ႇ ၵူၼ်းၵႂႃႇၵႃႉၶၢႆၵူၼ်း ၸိူဝ်းၼႆႉ ။

ၼၢင်းယိင်းပိုၼ်ႉတီႈလၢတ်ႈဝႃႈ-“ ၸုမ်းလႂ် ၽႂ်ဢမ်ႇဝႃႈ ၊ ၽူႈမီးပုၼ်ႈၽွၼ်းၸိူဝ်း ၽွင်းငမ်းဝႆႉၼႂ်းပိုၼ်ႉတီႈမိူဝ်ႈလဵဝ်ၼႆႉတင်းသဵင်ႈၵေႃႈ တေလႆႈမီးယူင်ႉသၢင်ႈ တႃႇႁႂ်ႈဢဝ်လိူင်ႈၼၵ်းၼႃႇ ၵူၼ်းၸိူဝ်းႁဵတ်းၽိတ်းၼႆႉတေလႆႈၶတ်းၸႂ်ထႅင်ႈတင်းၼမ်”- ဝႃႈၼႆ ။   

မၼ်းၼၢင်းသိုပ်ႇလၢတ်ႈထႅင်ႈဝႃႈ -ၽူႈမီးပုၼ်ႈၽွၼ်းၾၢႆႇၽွင်းငမ်းၼႂ်းပိုၼ်ႉတီႈယၢမ်းလဵဝ် ဢမ်ႇၶႂ်ႈႁႂ်ႈမိုတ်ႈမၵ်ႉဢႃႇၼႃႇၽွင်းငမ်းၵူၺ်း၊ ၶႂ်ႈႁႂ်ႈဝႆႉ ၼမ်ႉၼၵ်းၼႂ်းၵၢၼ်ၽွင်းငမ်းၸဝ်ႈၵဝ်ႇသေ ႁႂ်ႈဢဝ်ႁူမ်ႇလူမ်ႈၵႅတ်ႇၶႄႇပၼ် ၵူၼ်းမိူင်းႁႂ်ႈမီးလွင်ႈႁူမ်ႇလူမ်ႈ ၊ပေႃးဢမ်ႇဢဝ်ႁူမ်ႇလူမ်ႈပၼ်လႆႈၼႆႉ လၢႆးဢုပ်ႉပိူင်ႇၼႆႉ မၼ်းဢမ်ႇပႆႇမႅၼ်ႈ။  ပေႃးပဵၼ်လႆႈ ၶႂ်ႈႁႂ်ႈ တၢင်းၾၢႆႇၽွင်းငမ်းၶဝ် ႁူမ်ႈမိုဝ်းၵၼ်တင်းၵူၼ်းမိူင်းလႄႈ ႁူမ်ႈမိုဝ်း ၸုမ်းၸိူဝ်းတူင်ႉၼိုင်ၼႂ်းပိုၼ်ႉတီႈၸိူဝ်းၼႆႉသေႁဵတ်းၵၢၼ်ၵႂႃႇ ႁႂ်ႈထိုင်တီႈထိုင်လႅၼ်ၽွင်ႈ – ၵူၼ်းမိူင်းၸင်ႇတေမီးလွင်ႈႁူမ်ႇလူမ်ႈ ၶိုၼ်ႈယႂ်ႇမႂ်ႇသုင် – ဝႃႈၼႆ။  

ၵူၼ်းဢၼ်ထုၵ်ႇလႅၼ်ၵမ်ႈၼမ်ၼႆႉ တေပဵၼ်ပိုၼ်ႉတီႈၸိူဝ်းယူႇၼႂ်းဢၼ်မီးပတိၵ်ႈၶၢတ်ႈၼမ် ၊ ၵူၼ်းမိူင်းဢမ်ႇမီးတိုဝ်ႉတၢင်းတႃႇၶဝ်ႈထိုင်သိုဝ်ႇ၊ ဢမ်ႇၼၼ် ၵူၼ်းမိူင်းဢမ်ႇဝႆႉၵႃႈၶၼ်သိုဝ်ႇ။ၼၢႆးၼႃႈၸိူဝ်းၼႆႉၵေႃႈ ၶဝ်ႈႁႃလွၵ်ႇလႅၼ်ၵူၼ်းၸိူဝ်းၼႆႉၵူၺ်း ယွၼ်ႉဝႃႈမၼ်းလႅၼ်ငၢႆႈ။

ၵွပ်ႈၼႆၼင်ႇႁိုဝ်တေဢမ်ႇၺႃးလွၵ်ႇလႅၼ်ၼၼ်ႉ ၵူၼ်းမိူင်းတၵ်းလႆႈတူၺ်း သိုဝ်ႇ ဢၼ်ပဵၼ်ႁွင်ႈၵၢၼ်ၶၢဝ်ႇဢၼ်တႄႉ မၼ်း။ လူဝ်ႇမေႃလိူၵ်ႈတူၺ်းသိုဝ်ႇၶၢဝ်ႇ ဢၼ်ပဵၼ်ၸုမ်းယႂ်ႇ ဢၼ်ႁဵတ်းတႃႇၵူၼ်းမိူင်းတႄႉတႄႉ – ဢၼ်ဢမ်ႇၸႂ်ႈ သုၼ်ႇလဵဝ် ႁဵတ်းတႃႇၸဝ်ႈၵဝ်ႇၵေႃႉလဵဝ်ၼၼ်ႉ။

တႃႇၸဝ်ႈၵဝ်ႇတေဢမ်ႇထုၵ်ႇလွၵ်ႇလႅၼ်ဢဝ်ၵႂႃႇၶၢႆၵိၼ်ၼၼ်ႉၵေႃႈ ၸဝ်ႈၵဝ်ႇတၵ်းလႆႈမီးလွင်ႈႁူမ်ႈမိုဝ်းၵၼ်တင်းၸုမ်းတူင်ႉၼိုင်တူင်ႇဝူင်းၵူၼ်းၼႂ်းပိုၼ်ႉတီႈပႃး၊တေလႆႈမီးမၢႆၾူၼ်ႊ ၸုမ်းဢၼ်တေၸၢင်ႈၸွႆႈထႅမ်ႁဝ်းလႆႈ။ တေလႆႈလဵပ်ႈႁဵၼ်းဝႆႉလီလီဝႃႈတေႁဵတ်းႁိုဝ်ဢဝ်တူဝ်လွတ်ႈ။

တႃႇတေဢမ်ႇၺႃးထုၵ်ႇလွၵ်ႇလႅၼ်ၵႃႉၶၢႆၼၼ်ႉၵိုင်ႇလီႁဵတ်းၸိူင်ႉႁိုဝ်

 မိူင်းမၢၼ်ႈဢၼ်ထူပ်းၽေးသိုၵ်းၼႂ်းမိူင်းယူႇယၢမ်းလဵဝ်ၼႆႉ ၾၢႆႇၼိုင်ႈယင်းထူပ်းပႃးၽေး ၸုမ်းၵျႃႊၽျႅၼ်ႉ လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ၊ လွၵ်ႇလႅၼ်ၵူၼ်းၼုမ်ႇၼႂ်းပိုၼ်ႉတီႈဢဝ်ၵႂႃႇၶၢႆၵိၼ်ၼွၵ်ႈမိူင်း၊ ဢဝ်ၵႂႃႇၶၢႆပၼ်တႃႇႁဵတ်းၵၢၼ်ၵျႃႊၽျႅၼ်ႉ။ ၼႂ်းဝၢၼ်ႈၼႂ်းဝဵင်း ၼႂ်းမိူင်းမၢၼ်ႈၵေႃႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။ ယွၼ်ႉဝႃႈၸုမ်းၵျႃႊၽျႅၼ်ႉ ၸုမ်းလွၵ်ႇလႅၼ်ၸိူဝ်းၼႆႉ ပၵ်းသဝ်းယူႇလူင်ၵႂႃႇၵူႈတီႈ။ ပိူင်လူင်ၵဝ်းလႅၼ်ၵူၼ်းၸိူဝ်းၸႂ်ႉဢိၼ်ႊထိူဝ်ႊၼႅတ်ႉ ၊ ဢဝ်ၼႂ်းႁူဝ်ၶေႃႈ ၵေႃႉႁၵ်ႉၸူႉၸူဝ်းသေၵဝ်းငိုၼ်း၊ ၵဝ်းၵူၼ်း၊ ဢဝ်ၼႂ်းႁူဝ်ၶေႃႈ ၵၢၼ်လူင်းတိုၼ်းလၢင်းသေၵဝ်းဢဝ်ငိုၼ်းပိူၼ်ႈၸဵမ်ၸိူဝ်းၼႆႉ။

လွင်ႈလွၵ်ႇလႅၼ်ၵႃႉၶၢႆၵူၼ်းၼႆႉ ၶဝ်ႈပႃးၼႂ်း ၵၢၼ်ၵျႃႊၽျႅၼ်ႉ ဢၼ်ၼိုင်ႈၼႆၵေႃႈဝႃႈလႆႈ။ ၼႂ်းၶၢဝ်းတၢင်း   သွင်သၢမ်ပီမႃးၼႆႉ  ပဵၼ်မႃးလွင်ႈလွၵ်ႇလႅၼ်ၵိၼ်ၵၼ်ၶိူဝ်းယႂ်း ဢမ်ႇထၢတ်ႇၶႂ်ႈဝႃႈမီးၵူႈဝၼ်း ၵူႈတီႈ။ ၵွပ်ႈၼႆ တီႈလႂ်မီးလုၵ်ႈလၢၼ်ၵူၼ်းၼုမ်ႇၼမ်ၵေႃႈ တီႈၼၼ်ႈထုၵ်ႇလီမီးပၢင်သွၼ်ပၼ်ပိုၼ်ႉႁူႉ တႃႇၵႅတ်ႇၶႄလွင်ႈၼႆႉၼမ်ၼမ်။

 ယွၼ်ႉဝႃႈ  တီႈၼိူဝ်ဢွၼ်ႊလၢႆႊၼႆႉ မၢင်ၸိူဝ်းၼႆႉ လႅၼ်တေႃႇၼႃႈတေႃႇတႃႇ ၊ မၢင်ၸိူဝ်းၺႃးလႅၼ်ယူႇၵေႃႈဢမ်ႇႁူႉဝႃႈ ပိူၼ်ႈလႅၼ်ႁဝ်းယူႇ – ၼႆၸိူဝ်းၼႆႉ မၼ်းပဵၼ်လွင်ႈယူပ်ႈယွမ်းလူင်။ ၸင်ႇဝႃႈ ဢၼ်ၺႃးလႅၼ်ၵႂႃႇၶၢႆၵိၼ်ၼႆႉၵေႃႈမီးယူႇၵူႈဝၼ်း။

ၵမ်ႈၽွင်ႈၺႃးလွၵ်ႇလႅၼ်ဢဝ်ၵႂႃႇၶၢႆတေႃႇ လၢဝ်းပၢၼ်းၶႄႇ (တႃႇဢဝ်ႁဵတ်းမေး)  ၸိူဝ်းယူႇၸွမ်းတူၼ်းႁၢဝ်းသၼ်လွႆ ႁူၺ်ႈလိုၵ်ႉၼႂ်းမိူင်းၶႄႇလူင်ပုၼ်ႉၵေႃႈမီး။

ၶႂ်ႈဝႃႈၺႃးလႅၼ်ၵႂႃႇၸိူင်ႉႁိုဝ်ၵေႃႈယဝ်ႉ ၊ လူႉသုမ်းၵႂႃႇၵႃႈႁိုဝ်ၵေႃႈလီ ယွၼ်ႉပိူဝ်ႈငဝ်းလၢႆးၵၢၼ်မိူင်းဢမ်ႇလီ ပၵ်းပိူင်မၢႆမီႈဢမ်ႇႁူမ်ႇငမ်းလႄႈ တႃႇတေဢဝ်လိူင်ႈပၼ်တူတ်ႈတၢမ်ႇၵေႃႉ/ၸုမ်းလႅၼ် ၼႆၵေႃႈဢမ်ႇမီး၊ ပၼ်တူတ်ႈတၢမ်ႇၵေႃႈဢမ်ႇထိုင်တီႈလႆႈ။

ၼႂ်းဝၼ်းမိူဝ်ႈၼႆႉ ၸိုင်ႈမိူင်းဢၼ်မီးပၵ်းပိူင်မၢႆမီႈတႃႇၸတ်းၵၢၼ်ၸုမ်းလွၵ်ႇလႅၼ်ၵႃႉၶၢႆၵူၼ်း ဢမ်ႇၼၼ်ၸုမ်းၵျႃႊၽျႅၼ်ႉ ႁႂ်ႈထိုင်တီႈထိုင်လႅၼ်ၼႆယင်းပႆႇမီး။

ၾၢႆႇတၢင်းသိုၵ်းမၢၼ်ႈတႄႉ ဢုပ်ႇၵၼ်ၼႂ်းသၽႃးမိူဝ်ႈလိူၼ်မေႊ ဝၼ်းတီႈ 14 ပူၼ်ႉမႃးၼႆႉဝႃႈ တေပိုၼ်ၽၢဝ်ႇ ပိူင်ယုၵ်းယၢင်ႇတႃႇပၼ်တူတ်ႈတၢမ်ႇ ၸုမ်းၵျႃႊၽျႅၼ်ႉ   ။  

ၼႂ်းပၵ်းပိူင်ယုၵ်းယၢင်ႇၼၼ်ႉ ပႃးဝႆႉဝႃႈ – သင်ဝႃႈထူပ်းႁၼ် ႁူၺ်းႁွင်ႉလွၵ်ႇလႅၼ်ၵူၼ်းၼုမ်ႇၵႂႃႇ(ၸႂ်ႉၼႂ်းၵၢၼ်လွၵ်ႇလႅၼ်ၵိၼ်ငိုၼ်းပိူၼ်ႈ)သေ ပေႃႉထုပ်ႉပေႉၵိၼ် ႁဵတ်းႁၢႆႉၵုမ်းၶင် ၸိုင် ၵေႃႉ/ၸုမ်းလူင်းမိုဝ်းၼၼ်ႉ တေၺႃးတူတ်ႈတၢမ်ႇသုင်သုတ်း ထိုင်တၢမ်ႇတၢႆ။ သင်ၸိူဝ်ႉတီႉလႆႈ ၸုမ်းၵျႃႊၽျႅၼ်ႉ ဢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊသမ်ႉ တူတ်ႈတၢမ်ႇသုင်သုတ်း ပဵၼ်တၢမ်ႇၶွၵ်ႈတေႃႇၸူဝ်ႈဝႃႈၼႆဝႆႉ။

ၵူၺ်းၵႃႈတေႃႇထိုင်ဝၼ်းမိူဝ်ႈၼႆႉပႆႇႁၼ်ဢဝ်ပၵ်းပိူင်မၢႆမီႈဢၼ်ၼႆႉဢွၵ်ႇမႃးၸႂ်ႉတိုဝ်းတေႃႇၽႂ်ၸုမ်းလႂ်။ ၸုမ်းၵျႃႊၽျႅၼ်ႉဢၼ်ပလိၵ်ႈမၢၼ်ႈႁဵတ်းၵႅင်ႈတိၼႄၼၼ်ႉၵေႃႈ ပေႃးပဵၼ်ၵူၼ်းမိူင်းၶႄႇ ၸိူဝ်းဢမ်ႇမီးဝတ်းဝႂ်ယူႇသဝ်း/ႁဵတ်းၵၢၼ်ၼႂ်းမိူင်းမၢၼ်ႈ ၼၼ်ႉၵေႃႈ သိုၵ်းမၢၼ်ႈၶိုၼ်းသူင်ႇမွပ်ႈပၼ်ၼႂ်းမိုဝ်းၶႄႇ ၸိူင်ႉၼၼ်ၵူၺ်း ။

ၵွပ်ႈၼႆၼၢင်းယိင်းႁဝ်းၶႃႈၼႆႉ တေႁဵတ်းၵၢၼ်သင်ၵေႃႈ တၵ်းလႆႈမေႃလိူၵ်ႈၵၢၼ်ဢၼ် တေမီး ၽွၼ်းလီတႃႇတူဝ်ၵဝ်ႇလႄႈ တႃႇၵူၼ်းႁိူၼ်း၊ တႃႇတူင်ႇဝူင်းၵူၼ်း။ ႁဵတ်းၵၢၼ်တီႈလႂ် ၵေႃႈလွင်ႈလွတ်ႈၽေးၸဝ်ႈၵဝ်ႇၼႆႉ တၵ်းတေလႆႈဝႆႉပိူင်လူင်။  လိူဝ်ၼၼ်ႉ   ၵိုင်ႇလီႁူႉပႃး ဢၼ်လႂ်ပဵၼ်ၼႃႈၵၢၼ်လႄႈ ဢၼ်လႂ်ပဵၼ်လွင်ႈပူၼ်ႉပႅၼ်သုၼ်ႇလႆႈသုၼ်ႇပဵၼ် ။  ပေႃးထုၵ်ႇပူၼ်ႉပႅၼ်သုၼ်ႇလႆႈမႃးၸိုင် တၵ်းတေလႆႈမေႃတွပ်ႇထဵင်လႄႈ ႁႄႉၵင်ႈ သုၼ်ႇလႆႈၸဝ်ႈၵဝ်ႇ ႁတ်းႁတ်းႁၢၼ်ႁၢၼ် ၸင်ႇတေၵၢင်းယၢၼ်လႆႈလွင်ႈလွၵ်ႇလႅၼ်ႁူၺ်းႁွင်ႉဢဝ်ၵႂႃႇၶၢႆၵိၼ်  ။