မိူဝ်ႈဝၼ်းတီႈ 20 လိူၼ်ဢေႃးၵၢတ်ႉသ် ၸဝ်ႈသိုၵ်းလူင် ၸိင်ႇဝိၼ်း ၽွင်းလူင်ၾၢႆႇႁူမ်ႇလူမ်ႈလႅၼ်လိၼ် လူင်ပွင်ၸိုင်ႈမိူင်းတႆး လၢတ်ႈၵႂႃႇၼႂ်းပၢင်ၵုမ်လုမ်းသၽႃး မိူင်းတႆးဝႃႈ – ၼႂ်းၶၢဝ်းတၢင်း ၼိုင်ႈပီၼႆႉ တီႉၺွပ်းလႆႈ ၵူၼ်းၸိူဝ်း ၽိတ်းပၵ်းပိူင်မၢႆမီႈ 781 ၵေႃႉ ၼႆယဝ်ႉ။

ဢိင်လူၺ်ႈ ၸႂ်ႉတိုဝ်းၶိူင်ႈၸၢၵ်ႈ PSMS ၵူတ်ႇထတ်းတီႈၵဵတ်ႉလၢၼ်ႇၸွမ်းသဵၼ်ႈတႃႈသၢႆတၢင်း လႄႈ တၢင်း ၶဝ်ႈဝၢင်းႁိူဝ်းမိၼ် ၼႂ်းမိူင်းတႆးၸိူဝ်းၼႆႉသေ ၼႂ်းပီ 2025 ၼႆႉ တီႉၺွပ်းလႆႈ ၵူၼ်းပၢႆႈသိုၵ်း 211 ၵေႃႉ၊ ပလိၵ်ႈပၢႆႈတပ်ႉ 170 ၵေႃႉ ဝႃႈၼႆ။

လိူဝ်ၼၼ်ႉယင်းတီႉၺွပ်းလႆႈ ၶူဝ်းၵုၼ်ႇၸိူဝ်းဢမ်ႇၶဝ်ႈတၢင်းၵၢၼ် တႃႇ 72 လိူင်ႈ၊ တၢင်းၽိတ်း ၵဵဝ်ႇၵပ်း ယႃႈမဝ်းၵမ် 109 လိူင်ႈ၊ တီႉၺွပ်းလႆႈၵူၼ်းၼွၵ်ႈမိူင်း ၸိူဝ်း ၶဝ်ႈမႃးယူႇၼႂ်းမိူင်းတႆး လူၺ်ႈဢမ်ႇ ထုၵ်ႇမႅၼ်ႈ ၸွမ်းပၵ်းပိူင်ၾိင်ႈမိူင်းၼၼ်ႉ 25 ၵေႃႉ ၊ ရူတ်ႉၵႃးၸိူဝ်းဢမ်ႇမီးလၢႆႊသဵၼ်ႊပဵၼ်တၢင်းၵၢၼ်ၼၼ်ႉၵေႃႈ တီႉ ၺွပ်းဢဝ်လႆႈ 46 လမ်းသေ ၸတ်းၵၢၼ်ဢဝ်လိူင်ႈၵၢၼ်ၵႃႉၶၢႆၶိူင်ႈၵွင်ႈၵၢင်ႇ တႃႇ 6 လိူင်ႈ -ဝႃႈၼႆ။

ၵဵဝ်ႇၵပ်းၵၢၼ်ၸႅၵ်ႇယႅၵ်ႈ လွင်ႈႁေႉႁၢမ်ႈၸၢဝ်းၶိူဝ်း ဢွၵ်ႇၶၢဝ်းတၢင်းၵႂႃႇမႃးၼႂ်းပိုၼ်ႉတီႈၼၼ်ႉၵေႃႈ ဢမ်ႇမီး လွင်ႈမၵ်းတတ်းသင်ဝႆႉ ၸွမ်းၼင်ႇၶၢဝ်ႇႁူင်လိုဝ်းၼႆ ၽွင်းလူင်ၾၢႆႇႁူမ်ႇ လူမ်ႈလႅၼ်လိၼ် ၸဝ်ႈသိုၵ်းလူင် ၸိင်ႇဝိၼ်း လၢတ်ႈၼင်ႇၼႆ။

ဢူးထေးဝိၼ်း ၽူႈတႅၼ်းၽွင်းၸႄႈဝဵင်းၵူတ်ႉၶၢႆတႄႉ တုမ်ႉတွပ်ႇလၢတ်ႈၶိုၼ်းဝႆႉဝႃႈ “ ၼႂ်းပိုၼ်ႉတီႈတေႉ တေႉၼႆႉ မီးၵၢၼ်မၵ်းတတ်းဝႃႈ ပေႃးပဵၼ်ၵူၼ်းယိပ်းမၢႆၾၢင် 5/ …8/….ၸိူဝ်း ၼႆႉ ဢမ်ႇလႆႈဢွၵ်ႇၶၢဝ်းတၢင်း ၶဝ်ႈမႃးၼႂ်းမိူင်းတႆးၼႆယူႇ။ လွင်ႈၼႆႉႁဵတ်းႁႂ်ႈပဵၼ်တၢင်းၵိၼ်းၸႂ်တႃႇ ၵူၼ်းၸိူဝ်းတေဢွၵ်ႇၶၢဝ်းတၢင်းၶဝ်လႄႈ ပဵၼ်ၵၢၼ်ပိူင်းၼႄလွင်ႈၸႅၵ်ႇယႅၵ်ႈၸၢဝ်း ၶိူဝ်းမဵဝ်းၼိုင်ႈ ” ဝႃႈၼႆ။

ၾၢႆႇလူင်ပွင်ၸိုင်ႈဢွၵ်ႇၶေႃႈပိုၼ်ၽၢဝ်ႇမၵ်းမၼ်ႈဝႃႈ သင်ၽူႈမီးပုၼ်ႈၽွၼ်း ႁိုဝ် ၶႃႈႁၢပ်ႇၵၢၼ်ၶုၼ်ၸိူဝ်းႁပ်ႉ ပုၼ်ႈၽွၼ်းၸွမ်းၵဵတ်ႉလၢၼ်ႇၶဝ် တဵၵ်းတဵင်ယွၼ်းငိုၼ်းတီႈၵူၼ်းဢွၵ်ႇ ၶၢဝ်းတၢင်းၸိုင် တိူင်ႇၸႅင်ႈလႆႈတီႈ လူင်ပွင်ၸိုင်ႈမိူင်းတႆးၼႆသေတႃႉ ပေႃးထိုင်ၸွမ်းၵဵတ်ႉလၢၼ်ႇၸိုင် ၵူၼ်းမိူင်းဢမ်ႇမီးသုၼ်ႇလႆႈ ၸႂ်ႉတိုဝ်းၾူၼ်းလႄႈ တႃႇတေဢဝ်လၵ်းထၢၼ်ၼႆႉ ယၢပ်ႇယဵၼ်းႁႅင်းတေႉတေႉ ၼႆယဝ်ႉ။