တီႈဝဵင်းဢေးတႃႇယႃႇ ၸႄႈဝဵင်းတူၼ်ႈတီးၸိုင်ႈတႆးပွတ်းၸၢၼ်းၼၼ်ႉ ၵူၼ်းၵႂႃႇတႃႈပႆတၢင်းဢၼ်ၶဝ်ႈလႄႈဢွၵ်ႇဝဵင်းၼၼ်ႉသိုၵ်းမၢၼ်ႈပႂ်ႉၵဵတ်ႉ/လၢၼ်ႇ ၵူတ်ႇထတ်းမၢႆၾၢင်(မၢတ်ႉပူင်ႇတိၼ်ႇ) ၊ သင်ဝႃႈဢႃယု တဵမ် 18 ပီယဝ်ႉလႄႈဢမ်ႇလႅၵ်ႈမၢႆၾၢင်ဝႆႉၸိုင် သိုၵ်းမၢၼ်ႈလၢၵ်ႈလူင်းရူတ်ႉၵႃးဝႃႈၼႆ။
သိုၵ်းမၢၼ်ႈပႂ်ႉၵဵတ်ႉတႄႇၵူတ်ႇထတ်းႁဵတ်းၼႆမႃးၸဵမ်မိူဝ်ႈႁူဝ်လိူတ်မၢတ်ႉၶျ်ၼႆႉ။ ၵူတ်ႇထတ်းတင်းရူတ်ႉတၢင်ႇၵူၼ်း ရူတ်ႉၸႂ်ႉၵိုၵ်းႁိူၼ်းလႄႈ ရူတ်ႉၵႃးတၢင်ႇၵုၼ်ႇၸိူဝ်းၼႆႉပႃး။ၵူၼ်းၸိူဝ်းဢႃယုတဵမ် 18 ယဝ်ႉ သင်ဝႃႈဢမ်ႇလႅၵ်ႈမၢႆၾၢင်ဝႆႉၸိုင် လၢၵ်ႈလူင်းရူတ်ႉၵႃးသေ မႂ်ငိုၼ်းၼိုင်ႈၵေႃႈဢမ်ႇတႅမ်ႇလိူဝ် 5 မိုၼ်ႇပျႃး။ ပေႃးပၼ်ငိုၼ်း ၸင်ႇပွႆႇပၼ်ၶိုၼ်းၼႆ ၸဝ်ႈၵႃးဢႃယု 40 ပၢႆ ဢၼ်ၺႃးတီႉယွၼ်းငိုၼ်းၼၼ်ႉလၢတ်ႈၽူႈတွႆႇႁွၵ်ႈၼင်ႇၼႆ။
မၢင်ပွၵ်ႈမႃးယွၼ်းၶေႃႈမုလ်းၵူၼ်းၶီႇၵႃးမႃးၵူၺ်းဢမ်ႇၵႃး ယွၼ်းပႃးငိုၼ်းတီႈၸဝ်ႈၵႃးထႅင်ႈလူးၵွၼ်ႇ ၸင်ႇပၼ်လတ်းၵဵတ်ႉ/လၢၼ်ႇ ဝႃႈၼႆ။
မိူဝ်ႈႁူဝ်လိူၼ်မၢတ်ႉၶျ်ၼႆႉၵေႃႈ သိုၵ်းမၢၼ်ႈဢၼ်ပႂ်ႉၵဵတ်ႉ/လၢၼ်ႇတီႈၼိူဝ်သဵၼ်ႈတၢင်း ယႂႃႇငၢၼ်ႇ(ဝၢၼ်ႈငႂ်ႈ)- ဝဵင်းလိူဝ်ႇတီႈၼိုင်ႈၼၼ်ႉ ၵူတ်ႇထတ်းၵူၼ်းၶီႇၵႃးမႃးသေ ႁၼ်မႄႈထဝ်ႈ ဢႃယု 80 ပၢႆၵေႃႉၼိုင်ႈၼိူဝ်ရူတ်ႉ။ ၽိူဝ်ႇထတ်းမၢႆၾၢင်ယဝ်ႉ ၼႄးဝႃႈ မၢႆၾၢင်မႄႈထဝ်ႈဢမ်ႇလႆႈလႅၵ်ႈဝႆႉၼႆသေ ထႆၵိၼ်ငိုၼ်း 8 မိုၼ်ႇပျႃးၼႆ ၵူၼ်းမိူင်းဝဵင်းဝၢၼ်ႈငႂ်ႈၵေႃႉၼိုင်ႈၵေႃႈလၢတ်ႈၼင်ႇၼႆ။
ၸူဝ်ႈၵၢၼ်မိူင်းၵၢၼ်သိုၵ်းယုင်ႈယၢင်ႈမႃးၼႆႉ သိုၵ်းမၢၼ်ႈၵူတ်ႇထတ်းၼႂ်းဝဵင်း/ၼွၵ်ႈမိူင်းယႂႃႇငၢၼ်ႇႁၢဝ်ႈႁႅင်း ။ မၢင်ပွၵ်ႈၵိုင်ႉၵၢင်ႉဢဝ်ႁႅင်းသိုၵ်းၶဝ်ႈထတ်းႁိူၼ်းယေးၼႂ်းပွၵ်ႉၼႂ်းဝဵင်း။
တီႈၼိူဝ်ႈသဵၼ်ႈတၢင်းဝၢၼ်ႈငႂ်ႈ – ဢုမ်ႇပဝ်းၼၼ်ႉၵေႃႈ ၵဵတ်ႉ/လၢၼ်ႇသိုၵ်းမၢၼ်ႈဢၼ်ၵူတ်ႇထတ်းရူတ်ႉၵႃး/ၵူၼ်း ႁၢဝ်ႈႁႅင်းမီး 3 တီႈ။ တီႈၵဵတ်ႉ/လၢၼ်ႇသိုၵ်းမၢၼ်ႈၼႂ်းမိူင်းတႆးၶႂ်ႈဝႃႈၵူႈတီႈ ၵူတ်ႇထတ်းၵူၼ်းမိူင်းၸိူဝ်းဢွၵ်ႇတၢင်းၵႂႃႇမႃးၸိူဝ်းၼၼ်ႉလူၺ်ႈတၢင်းၸၢၵ်ႈ/ၶိူင်ႈထႅပ်ႊပလႅတ်ႊဢဝ်-ၼႆၸဝ်ႈၵႃးၼႂ်းမိူင်းတႆးၵေႃႉၼိုင်ႈၵေႃႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ