တႄႇၼႂ်းႁူဝ်လိူၼ် ဢေႃးၵၢတ်ႉသ် ၼႆႉမႃး ယွၼ်ႉၾူၼ်တူၵ်းႁႃႇယႂ်ႇ ၼမ်ႉထူမ်ႈၼႂ်းဝၢၼ်ႈၼႂ်းသူၼ်ၼၢၼ်းယွမ်း ၊ ႁဵတ်းႁႂ်ႈၵူၼ်းဝၢၼ်ႈပဵၼ်ၶူမ်းၵၢႆးၸွမ်းၽိဝ်ၼင် ၊ တွင်ႉလူႉဢမ်ႇယူႇလီ ထိုင်တီႈ လုၵ်ႈဢွၼ်ႇ ၵူၼ်းဝၢၼ်ႈႁၢင်လွႆး ဢိူင်ႇၵုင်းၵႅင်း ၼႂ်းၸႄႈဝဵင်းႁူဝ်ပူင်း  ဢမ်ႇၸၢင်ႈၵႂႃႇႁဵၼ်းလိၵ်ႈလၢႆးတီႈႁူင်းႁဵၼ်းတင်းၼမ်။

ၼၢင်းယိင်းၼုမ်ႇၼႂ်းပိုၼ်ႉတီႈ ဢႃယုမွၵ်ႈ 20 ပီပၢႆ လၢတ်ႈၽူႈတွႆႇႁွၵ်ႈဝႃႈ -“ၼမ်ႉၼွင်းၼႂ်းဝၢၼ်ႈ ယိုင်ႈၶဝ်ႈထိုင်ၼႂ်းႁိူၼ်းလႄႈ  လုၵ်ႈဢွၼ်ႇၵူၼ်းလူင်လႆႈဢွၼ်ၵၼ်တဝ်ၼမ်ႉၼၼ်ႉၶႃႈၼႃႇ။ ဢွၼ်ၵၼ်ပဵၼ်ၶူမ်းၵၢႆးႁေ လုၵ်ႈဢွၼ်ႇၵေႃႈဢမ်ႇၸၢင်ႈၵႂႃႇႁူင်းႁဵၼ်းၶႃႈဢိူဝ်ႈ ။ ၵူဝ်ၵႂႃႇလၢမ်းၽႄႈၸူးၵၼ်ၶႃႈၼေႃႈ။     “- ဝႃႈၼႆ ။

လုၵ်ႈဢွၼ်ႇဢၼ်ပဵၼ်ၶူမ်းၵၢႆး ၊ ပဵၼ်တူမ်ႇပဵၼ်ပူမ်ၸွမ်းတိၼ်မိုဝ်း ၸွမ်းၵႅမ်ႈ ၸွမ်းပုမ်  – ပဵၼ်တၢင်းဝၢၼ်ႈ ၼႂ်းဝၢၼ်ႈၼမ်ႉၵုတ်ႇ ၊ ဝၢၼ်ႈတူၼ်ႈမူင်ႈ လႄႈ ဝၢၼ်ႈၸၢဝ်းပဢူဝ်းယူႇသဝ်း ၼႂ်းဢိူင်ႇၵုင်းၵႅင်းၸိူဝ်းၼႆႉ – ၾၢႆႇၼိုင်ႈၵေႃႈ ပဵၼ်ယွၼ်ႉ ဢမ်ႇမီးယႃႈယႃလီလီ ဢမ်ႇမီးမေႃယႃၵုမ်ႇထူၼ်ႈ -တႃႇၵႂႃႇသိုဝ်ႉယႃႈယႃၼႂ်းဝဵင်းၵေႃႈပဵၼ်ဢၼ်ယၢပ်ႇၽိုတ်ႇ ၼမ်ႉမၼ်းရူတ်ႉၵႃးဢမ်ႇမီး-  ၵူၼ်းပိုၼ်ႉတီႈလၢတ်ႈ ။

 ယွၼ်ႉၼမ်ႉယိုင်ႈၶဝ်ႈၼႂ်းႁိူၼ်းၵူၼ်းဝၢၼ်ႈလႄႈႁဵတ်းႁႂ်ႈ  တုမ်ႉတိူဝ်ႉ တီႈယူႇတီႈၵိၼ် ၵူၺ်းဢမ်ႇၵႃးတုမ်ႉတိူဝ်ႉပႃး ပၢႆးယူႇလီၵူၼ်းဝၢၼ်ႈ ႁဵတ်းႁႂ်ႈၵူၼ်းဝၢၼ်ႈယၢပ်ႇၽိုတ်ႇဝႆႉလၢႆလွင်ႈ  ဝႃႈၼႆ။

ၼၢင်းယိင်းၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ၼမ်ႉယိုင်ႈၶဝ်ႈၼႂ်းႁိူၼ်းၼႆႉသုင်မွၵ်ႈ ႁူဝ်ၶဝ်ႇၼႆႉဢေႃႈ ၊ မူ ၊ ၵႆႇ ၸိူဝ်းၼၼ်ႉၵေႃႈ ဢမ်ႇၸၢင်ႈၶၢႆႉဝႆႉတီႈလႂ် ၊ ၽိုၼ်းဝႃႇၸိူဝ်းၼႆႉၵေႃႈၼမ်ႉယမ်းမူတ်း ယၢပ်ႇၽိုတ်ႇ လၢႆလွင်ႈၶႃႈဢေႃႈ”- ဝႃႈၼႆ ။

 ဢၼ်လမ်ႇလွင်ႈတႄႉ ယၢမ်းလဵဝ်   ပဵၼ်ၽွင်းၶဝ်ႈသုၵ်းလီငၢမ်း ၽွမ်ႉတႃႇပၢတ်ႇၵဵဝ်ႇၵဵပ်းယဝ်ႉလႄႈ ၸဝ်ႈၼႃး ထူပ်းတၢင်းယၢပ်ႇၽိုတ်ႇ မီးလွင်ႈလူႉသုမ်းၼမ်  ဝႃႈၼႆ ။

ၾၢႆႇၼိုင်ႈတၢင်းၼိုင်ႈၵေႃႈ ယွၼ်ႉၼမ်ႉၼွင်းထူမ်ႈမႃး သၢမ်ပီယဝ်ႉလႄႈ ႁွင်ႈၼမ်ႉမိူင်ၼမ်ႉ ပဵၼ်ၶႅၵ်ႉပဵၼ်ယုၵ်းယၢၵ်းၶၢင်ႉၶမ်တဵမ် ထိုင်တီႈၽဵဝ်ႈဢမ်ႇၶိုတ်းတၼ်း လႄႈ ပီၼႆႉ ၸဝ်ႈၼႃးၼႂ်းၸႄႈဝဵင်းႁူဝ်ပူင်း လႆႈပွႆႇတူင်ႈၼႃးႁၢမ်းဝႆႉလၢႆမွၵ်ႈ  3 ႁဵင် ဢေႊၶိူဝ်ႊ  – လႆႈႁူႉၼင်ႇၼႆ ။

မိူၼ်ၼင်ႇၼႆ ယၢမ်းလဵဝ် ၵူၼ်းမိူင်း ၼႂ်းၸႄႈဝဵင်းၼမ်ႉၸၢင် ၊ ၼွင်ႁၢႆးယႃႈ ၊ ထုင်ႉပူင်း ၊ ၵၢတ်ႇလေႃႉ ၊ ယွင်ႁူၺ်ႈ ပိုၼ်ႉတီႈလၢႆလၢႆတီႈၼႂ်းၸိုင်ႈတႆးပွတ်းၸၢၼ်း ၸိူဝ်းၼႆႉ ထူပ်းၽေးၼမ်ႉထူမ်ႈၼမ်ႉၼွင်းဝႆႉ   ။