တႄႇၼႂ်းႁၢင်လိူၼ် ၵျူႊလၢႆႊ ဝၼ်းတီႈ 20 မႃးၼႆႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ႁႅတ်ႉႁၢမ်ႈ ႁၢၼ်ႉၶၢႆလဝ်ႈ လႄႈ ၵူၼ်းၶၢႆလဝ်ႈ ၊ ပီႇယႃႇ ၼႂ်းဝၢၼ်ႈဢၼ်မီးၼႂ်းၸႄႈဝဵင်းသီႇသႅင်ႇ  လႄႈ ၼႂ်းၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း ။

သင်ၽႂ်ဢမ်ႇႁဵတ်းၸွမ်းၼႆၸိုင် တေပၼ်တူတ်ႈၶွၵ်ႈ 4 ပီလႄႈ တူတ်ႈငိုၼ်း 300 သႅၼ်ပျႃး ဝႃႈၼႆ ။

ၵူၼ်းဝၢၼ်ႈၼႂ်းၸႄႈဝဵင်းသီႇသႅင်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ဝၼ်းတီႈ 20 ၼႆႉၶဝ် ( သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ) မႃးလၢတ်ႈဝႃႈ ဢမ်ႇလႆႈၶၢႆ ပီႇယႃႇ ၊ ၶၢႆလဝ်ႈၼႆ ။ တလဵဝ် ႁူင်းႁုင်လဝ်ႈၼႂ်းဝၢၼ်ႈၵေႃႈ လႆႈပိၵ်ႉဝႆႉ ၊ ဢၼ်ၶၢႆၸွမ်းႁၢၼ်ႉၵေႃႈ ဢမ်ႇလႆႈၶၢႆယဝ်ႉ ၊ ပေႃးၵူတ်ႇထတ်းႁၼ်ၼႆၶဝ်တေတီႉၶင်ၶွၵ်ႈ ၊ တေမႂ်ငိုၼ်းပႃးၼႆ”- ဝႃႈၼႆ ။

လႆႈႁူႉဝႃႈ ႁၢၼ်ႉၶၢႆၶူဝ်းၵုၼ်ႇၸွမ်းဝၢၼ်ႈ ဢၼ်ၶၢႆလဝ်ႈလႄႈပီႇယႃႇ ပႃးၸဵမ်ၶူဝ်းၶွင်ၸႂ်ႉတိုဝ်း ၵူႈသႅၼ်းသႅၼ်း လႆႈပၼ်ၶွၼ်ႇတီႈၸုမ်းၾၢႆႇဢုပ်ႉပိူင်ႇ ၽွင်းငမ်းၼႂ်းပိုၼ်ႉတီႈ ၼိုင်ႈပီၼႆႉ 1 သႅၼ်ပျႃး  ယူႇတႃႇသေ ။ ယၢမ်းလဵဝ် ယွၼ်ႉႁႄႉႁၢမ်ႈဢိုတ်း ဢမ်ႇပၼ်ၶၢႆၼႆလႄႈ ႁဵတ်းႁႂ်ႈ ၸဝ်ႈႁုင်လဝ်ႈ လႄႈ ႁၢၼ်ႉၶၢႆၶူဝ်း ၼႂ်းပိုၼ်ႉတီႈ လႆႈထူပ်းတၢင်းယၢပ်ႇၽိုတ်ႇ ၼႆယဝ်ႉ။

ၵူၼ်းၵႃႉႁုင်လဝ်ႈၼႂ်းၸႄႈဝဵင်းသီႇသႅင်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ၵၢၼ်ၽုၵ်ႇသွမ်ႈဢမ်ႇပဵၼ်ၵၢၼ်လႄႈ ၸင်ႇႁဵတ်းၵၢၼ်ႁုင်လဝ်ႈၶၢႆ သမ်ႉၵိုင်ႉၵၢင်ႉလႆႈပိၵ်ႉဢိုတ်းၸိူင်ႉၼႆ ဢမ်ႇႁူႉတေလႆႈႁဵတ်းသင်ယဝ်ႉ ၊ ႁုင်သေ ၵႂႃႇသၢင်း ႁၢၼ်ႉယႂ်လူင်ၵေႃႈဢမ်ႇၸႂ်ႈ ၊ ၶၢႆတေႃႇၵူၼ်းၼႂ်းဝၢၼ်ႈၼႂ်းသူၼ်ၵူၺ်းဢေႃႈ  ၊ ဢမ်ႇၸႂ်ႈဝႃႈ ၵူၼ်းႁုင်လဝ်ႈၵူၺ်း လဝ်ႈ ၊ ပီႇယႃႇ ဢၼ်ၶၢႆၸွမ်းႁၢၼ်ႉၵုၼ်ႇၸိူဝ်းၼႆႉၵေႃႈ သင်ႇဢိုတ်းဝႆႉမူတ်းၶႃႈဢေႃႈ”- ဝႃႈၼႆ ။

မိူၼ်ၼႆၼင်ႇၵဝ်ႇ ၼႂ်းၵၢင်လိူၼ်ၵျႃၼ်ႊ ပူၼ်ႉမႃးၼႆႉၵေႃႈ ၵၢင်ႉၵႄႇလႄႈ လုမ်းၾၢႆႇၽွင်းငမ်းပွၵ်ႉ ဝဵင်းတူၼ်ႈတီး ႁႅတ်ႉႁၢမ်ႈႁၢၼ်ႉလဝ်ႈၼႂ်းပွၵ်ႉၽြႃးၽိူၵ်ႇ  ႁႂ်ႈလူင်းလၢႆးမိုဝ်း ၶေႃႈၸီႉသင်ႇ ႁၢမ်ႈၶၢႆလဝ်ႈ လႄႈ ပီႇယႃႇ ၼႂ်းႁၢၼ်ႉ ၼႆယဝ်ႉ။

ၽႅၼ်ၵၢၼ် 100 ဝၼ်း ဢၼ်လူင်ပွင်ၸိုင်ႈသိုၵ်းမၢၼ်ႈ မိၼ်းဢွင်ႇလၢႆႇ တမ်းဝၢင်းဝႆႉ ၼၼ်ႉပဵၼ် တႃႇၸတ်းပွင် ႁွင်ႈၵၢၼ်ဢၼ်ယူႇတႂ်ႈၽွင်းလူင်ၾၢႆႇလႂ်ၾၢႆႇၼၼ်ႉလႄႈ တႃႇၶိုင်ပွင်လွင်ႈ ငမ်းယဵၼ် ၼၼ်ႉ တႄႇဢဝ် လိူၼ်ဢေႊပရိူဝ်ႊဝၼ်းတီႈ 20 ထိုင် လိူၼ်ၵျူႊလၢႆႊသဵင်ႈၼႆႉ ။  ၼႂ်းၶၢဝ်းတၢင်းၼႆႉ လႆႈမီးလွင်ႈႁႄႉႁၢမ်ႈ လွင်ႈတေႃႉသူင်ႇၶူဝ်းၶွင်ၼွၵ်ႈမိူင်းမႃးလႄႈ ႁဵတ်းႁႂ်ႈ ၵၢၼ်ၵႃႉၶၢႆ မီးလွင်ႈယၢပ်ႇၽိုတ်ႇဝႆႉ ၼႆယဝ်ႉ ။