ဝၼ်းတီႈ 20/8/2026 ယၢမ်းၵၢင်ၼႂ် ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈၼမ်ႉၼွင်းထူမ်ႈၶဝ်ႈၼႂ်းၵၢတ်ႇဝဵင်းသီႇသႅင်ႇ ၸိုင်ႈတႆးပွတ်းၸၢၼ်း   ။

ၵူၼ်းၸၢႆးၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵၢတ်ႇၼႆႉ ပဵၼ်ၵၢတ်ႇႁဵတ်းဝႆႉ ၵၢတ်ႇၸူဝ်ႈၶၢဝ်းၵူၺ်းလႄႈ ဢမ်ႇမီးႁွင်ႈၼမ်ႉမိူင်ၼမ်ႉ တႃႇလႆလူင်း ၊ ယွၼ်ႉၼၼ် ၼမ်ႉယိုင်ႈၶဝ်ႈၼႂ်းၵၢတ်ႇဝႆႉ”- ဝႃႈၼႆ ။

မိူၼ်ၼင်ႇၼႆ ယၢမ်းလဵဝ် ၵူၼ်းမိူင်း ၼႂ်းၸႄႈဝဵင်းၼမ်ႉၸၢင် ၊ ၼွင်ႁၢႆးယႃႈ ၊ ထုင်ႉပူင်း ၊ ၵၢတ်ႇလေႃႉ ၊ ယွင်ႁူၺ်ႈ ပိုၼ်ႉတီႈလၢႆလၢႆတီႈၼႂ်းၸိုင်ႈတႆးပွတ်းၸၢၼ်း ၸိူဝ်းၼႆႉ ထူပ်းၽေးၼမ်ႉထူမ်ႈၼမ်ႉၼွင်းဝႆႉ   ။

 ၵဵဝ်ၵပ်းလွင်ႈ ၼမ်ႉထူမ်ႈၼမ်ႉၼွင်းၼႆႉသေ ISP Myanmar ပိုၼ်ၽၢဝ်လၢတ်ႈဝႆႉဝႃႈ တႄႇဢဝ် ဝၼ်းတီႈ 11 လိူၼ်ၵျူႊလၢႆႊ တေႃႇထိုင် ဝၼ်းတီႈ 11 လိူၼ်ဢေႃးၵၢတ်ႉသ်ၼႆႉ ၾူၼ်တူၵ်းႁႅင်း ထပ်းၵၼ် ၵူၼ်းမိူင်းႁူမ်ႈတုမ်မၢၼ်ႈ 13 သႅၼ်ပၢႆ ၼႂ်း 41 ၸႄႈဝဵင်း တီႈၼႂ်းတိူင်း လႄႈ ၸႄႈမိူင်း 5 ဢၼ် လႆႈထူပ်းၽေးၼမ်ႉၼွင်းထူမ်ႈ – ဝႃႈၼႆဝႆႉ ။

ၵၢတ်ႇဝဵင်းသီႇသႅင်ႇၼႆႉ မိူဝ်ႈပီ 2024 ၼႂ်းလိူၼ်ၾႅပ်ႉပိဝ်ႊရီႊ  ၼၼ်ႉ  မၢၵ်ႇၵွင်ႈလူင်တူၵ်းသႂ်ႇလႄႈ ၾႆးမႆႈႁၢၼ်ႉ လူႉၵွႆၵႂႃႇတင်းၼမ်။

ထိုင်မႃးၼႂ်းပီ 2025 လိူၼ် မတ်ႉၶျ် ၵူၼ်းမိူင်းၶိုၼ်းမႄးၵုမ်းၵေႃႇသေ ပိုတ်ႇႁၢၼ်ႉၶၢႆၶူဝ်းၶိုၼ်း တေႃႇထိုင်ဝၼ်းမိူဝ်ႈၼႆႉ။