ဝၢႆးသေ မိၼ်းဢွင်ႇလၢႆႇ ၶဝ်ႈထူပ်းၸွမ်ၽွင်းလူင်မိူင်းထႆးသေ ပွၵ်ႈၶိုၼ်းပႆႇႁိုင်သင်ၼႆႉ ၸဝ်ႈၼႃႈတီႈထႆး ပၵ်းတႃပႂ်ႉတူၺ်းႁႅင်းၵၢၼ်ၵူႈၶၢဝ်း ။ တီႈလႂ်မီးလွင်ႈၵွင်ႉသၢၼ်ၵၼ်တင်းႁႅင်းၵၢၼ်ၵေႃႈ ၶဝ်ႈၸႅတ်ႈထိုင်တီႈထိုင်လႅၼ်။ လိူဝ်ၼၼ်ႉ ၼႂ်းဝူင်ႈဝၢင်ႈဝႆႉ မီးၶၢဝ်ႇလိုဝ်းဢွၵ်ႇမႃးထႅင်ႈဝႃႈ ၵူၼ်းယိပ်းဝႂ်ၶၢမ်ႈမိူင်း PV သေ ၶဝ်ႈယူႇၼႂ်းမိူင်းထႆးဝႆႉၼၼ်ႉ သင်ဢႃယုပပ်ႉမၼ်းမူတ်းလႄႈသင် သင်ၶႂ်ႈလႅၵ်ႈလၢႆႈပပ်ႉမၼ်းၸိူဝ်းၼႆႉလႄႈသင် တေလႆႈတၢင်ႇယိုၼ်ထိုင်ၼေႇပျီႇတေႃႇၵွၼ်ႇ။တေဢမ်ႇလႆႈႁဵတ်းၸွမ်းၵိင်ႇၽႄလုမ်းဢွၼ်ႇလုမ်းဢိတ်းသေ ယဝ်ႉၵႂႃႇႁင်းၵူၺ်း ပေႃးပႆႇလႆႈၶႂၢင်ႉတီႈၼေႇပျီႇတေႃႇတႄႉ ဢမ်ႇပၼ်ၽၢၼ်ႇ ၼႆယဝ်ႉ ။

တႄႇဢဝ်ဝၼ်းတီႈ 19/08/2026 ၼႆႉၵႂႃႇ လုမ်းတၢင်မၢၼ်ႈဢၼ်ပိုတ်ႇဝႆႉတီႈၵုင်းထဵပ်ႈ ၸိုင်ႈထႆး တေဢမ်ႇႁပ်ႉတေႃႇဢႃယုပပ်ႉၶၢမ်ႈမိူင်းပၼ်ၵူၼ်းမိူင်းၵမ်းသိုဝ်ႈ သင်ဢမ်ႇလႆႈၶႂၢင်ႉတီႈၼေႇပျီႇတေႃႇ ၼႆ လိုဝ်းယူႇ ၼိူဝ်ၼႃႈသိုဝ်ႇလၢႆဢၼ် ။

ပိူင်လူင်မၼ်း ပဵၼ်ပပ်ႉၶၢမ်ႈမိူင်းသီလႅင် ဢၼ်ႁဵတ်းဝႆႉ ပဵၼ် PV သေ ယူႇဝႆႉၼႂ်းမိူင်းထႆးၸိူဝ်းၼၼ်ႉ သင်ၶႂ်ႈတေႃႇဢႃယုလႄႈသင် ၶႂ်ႈလႅၵ်ႈပဵၼ်ပပ်ႉ PJ ၸိူဝ်းၼႆႉလႄႈသင် တေဢမ်ႇယူႇတီႈလုမ်းတၢင်သေ ၸတ်းႁဵတ်းပၼ်လႆႈႁင်းၵူၺ်း တေလႆႈတၢင်ႇယိုၼ်ႈထိုင် ၼေႇပျီႇတေႃႇ ဝႃႈၼႆ။

ပပ်ႉၶၢမ်ႈမိူင်း PV (Passport for Visit) ၼႆႉ ပေႃးဢဝ်ပိူင်ၽဵၼ်ႈၽဵၼ်ႈမၼ်းဝႃႈတႄႉ ပဵၼ်ပပ်ႉၶၢမ်ႈမိူင်းတႃႇဢႅဝ်ႇယဵမ်ႈၼွၵ်ႈမိူင်းၵူၺ်း ဢမ်ႇၸႂ်ႈတႃႇႁဵတ်းၵၢၼ် ။ ၵူၺ်းၵႃႈ ဢိင်ၼိူဝ်တၢင်းလူဝ်ႇၵူၼ်းမိူင်းသေ လူင်ပွင်ၸိုင်ႈတင်းသွင်ၾၢႆႇ ယၢမ်ႈယွၼ်ႇယၢၼ်းပၵ်းပိူင်သေ ပၼ်ၵူၼ်းယိပ်း ပပ်ႉPVယူႇၶၢဝ်းယၢဝ်းၼႂ်းမိူင်းထႆးလႆႈ လူၺ်ႈၸႂ်ႉဝီႊသႃႊ Visa လၢႆသႅၼ်း။

ၸိူဝ်းၸႂ်ႉပပ်ႉၶၢမ်ႈမိူင်း PJ (Passport for Job) တႄႉ တိုၼ်းပဵၼ်တႃႇႁႅင်းၵၢၼ် တႃႇႁဵတ်းၵၢၼ်ယူႇယဝ်ႉလႄႈ ပေႃးတွၵ်ႇဝီႊသႃႊႁဵတ်းၵၢၼ်ယဝ်ႉတႄႉ ဢမ်ႇမီးလွင်ႈၽိတ်းပၵ်းပိူင်သင်သေတႃႉ တႄႇၼႆႉၵႂႃႇတႄႉ ပေႃးလူဝ်ႇတေႃႇဢႃယု လူဝ်ႇလႅၵ်ႈလၢႆႈပပ်ႉမၼ်းၸိူဝ်းၼႆႉတႄႉ ၸၢင်ႈၸိူင်ႉၵၢတ်ႈႁိုင်ယူႇ ၵွပ်ႈလူင်ပွင်ၸိုင်ႈဢၼ်သိုၵ်းမၢၼ်ႈၽွတ်ႈဝႆႉ ၶႂ်ႈထတ်းၶႂ်ႈထွင်ၼႆ ၽူႈၸွႆႈထႅမ် ၾၢႆႇဝတ်းဝႂ်ႁႅင်းၵၢၼ်လၢတ်ႈ။

ၵူၼ်းမိူင်းႁူမ်ႈတုမ်မၢၼ်ႈ ဢၼ် ယိပ်းဝႂ်ၶၢမ်ႈမိူင်းတႃႇဢႅဝ်ႇယဵမ်ႈ PV ၼႆႉ ၵမ်ႈၼမ် တွၵ်ႇဝီႊသႃႊႁဵတ်းၵၢၼ် Non L-A ၊ မၢင်ၸိူဝ်းၵေႃႈ ဝီႊသႃႊတႃႇႁဵတ်းပၢႆးမၢၵ်ႈမီး Non-B ၸိူဝ်းၼႆႉ ။ ဢၼ်ဢွၼ်ၵၼ်ႁဵတ်းထႅင်ႈၼမ်ၵေႃႈ တွၵ်ႇဝီႊသႃႊ တႃႇၶိုၼ်ႈႁဵၼ်း Non-ED ၸိူဝ်းၼႆႉ ။ၵူၺ်းၵႃႈ သင်ဝႃႈ သိုၵ်းမၢၼ်ႈ ၶႂ်ႈၵမ်ၵိၼ်းမႃးႁႅင်းလိူဝ်ၼႆႉတႄႉ တႃႇၸႂ်ႉပပ်ႉၶၢမ်ႈမိူင်း PV သေ တွၵ်ႇဝီႊသႃႊသႅၼ်းၸိူဝ်းလၢတ်ႈမႃးၼႆႉ လႅပ်ႈတေယၢပ်ႇၵႂႃႇထႅင်ႈၼႆ ႁႅင်းၵၢၼ်ဢွၼ်ၵၼ်လၢတ်ႈၼင်ႇၼႆ။

ဢၼ်လိုဝ်းၵၼ်ယူႇတႄႉဝႃႈ တႃႇတေႃႇဢႃယုပပ်ႉၶၢမ်ႈမိူင်း PV ၼႆႉ တေလႆႈပႂ်ႉတီႈၼေႇပျီႇတေႃႇထတ်းထွင်တူၺ်းယဝ်ႉတူဝ်ႈ ၊ ၼေႇပျီႇတေႃႇပၼ်ၶႂၢင်ႉယဝ်ႉတူဝ်ႈ ၸင်ႇၸၢင်ႈတေႃႇဢႃယုလႆႈ ။ တေႁိုင်မွၵ်ႈ 2 လိူၼ် ၊ ပေႃးၼေႇပျီႇတေႃႇ ပႆႇပၼ်ၶႂၢင်ႉတႄႉ လုမ်းတၢင်မၢၼ်ႈတီႈၵုင်းထဵပ်ႈၵေႃႈ တေပႆႇၸၢင်ႈႁဵတ်းသင် ၼႆယူႇ။

ဢမ်ႇၵွမ်ႉဝႃႈ တႃႇတေႃႇဢႃယုၵူၺ်း တႃႇလႅၵ်ႈပပ်ႉ လုၵ်ႉတီႈပပ်ႉၶၢမ်ႈမိူင်းတႃႇဢႅဝ်ႇယဵမ်ႈ PV ၶႂ်ႈလႅၵ်ႈၸူး PJ တႃႇႁဵတ်းၵၢၼ် ၊ PE တႃႇႁဵၼ်း ၊ PT တႃႇယူႇႁူမ်ႈမုင်ႉႁေႃႁိူၼ်း ၸိူဝ်းၼႆႉ ၵေႃႈ တေလႆႈၶၢမ်ႈပူၼ်ႉၶၵ်ႉတွၼ်ႈၼႆႉမိူၼ်ၵၼ်ဝႃႈၼႆ။

ယွၼ်ႉၶၢဝ်ႇလိုဝ်းၸိူင်ႉၼႆလႄႈ ႁႅင်းၵၢၼ်ၵမ်ႈၼမ် ၸိူဝ်းဢႃယုပပ်ႉၶၢမ်ႈမိူင်း ၸမ်တေသဵင်ႈ ဢွၼ်တူၵ်းၸႂ် မႆႈၸႂ်ဝႆႉႁင်းၽႂ်မၼ်း ။ ၾၢႆႇလုမ်းတၢင်မၢၼ်ႈတီႈၵုင်းထဵပ်ႈလႄႈ လုမ်းသိုၵ်းမၢၼ်ႈတီႈၼေႇပျီႇတေႃႇတႄႉ ပႆႇႁၼ်ဢွၵ်ႇလိၵ်ႈပဵၼ်တၢင်းၵၢၼ်။

ဢိင်ၼိူဝ်လွင်ႈၼႆႉ ၽူႈၸွႆႈႁဵတ်းဝတ်းဝႂ်ႁႅင်းၵၢၼ်တီႈၵုင်းထဵပ်ႈၵေႃႉၼိုင်ႈလၢတ်ႈၼႄၼင်ႇၼႆ –

ပေႃးဢဝ်ၶႃႈထတ်းသၢင်ဝႃႈတႄႉ လုၵ်ႈႁဵၼ်းၸိူဝ်းဢၼ်ဢမ်ႇၵွင်ႉၸွမ်းၵၢၼ်မိူင်း ၊ ၵူၼ်းမိူင်းၸိူဝ်းဢမ်ႇႁဵတ်းၵၢၼ်မိူင်းၸိူဝ်းၼႆႉတႄႉ လႅပ်ႈတေဢမ်ႇမီးပၼ်ႁႃသင် ။ တေပဵၼ် PV PJ ၵေႃႈယဝ်ႉ ဢမ်ႇမီးပၼ်ႁႃသင် ။ ပိူင်လူင်မၼ်းတႄႉ ဢၼ်ၶဝ်ဝႆႉပဝ်ႉမၢႆၼႆႉ လႅပ်ႈတေပဵၼ်ၵူၼ်းႁဵတ်းၵၢၼ်မိူင်းၶဝ်ၵူၺ်း

သိုပ်ႇလၢတ်ႈ ဝႃႈ ဢၼ်တေလႆႈယိုၼ်ႈထိုင်ၼေႇပျီႇတေႃႇၼႆၼၼ်ႉ ပိုၼ်ၽၢဝ်ႇပဵၼ်တၢင်းၵၢၼ်ၵေႃႈယဝ်ႉ ဢမ်ႇပိုၼ်ၽၢဝ်ႇၵေႃႈဝႃႈ ပေႃးၾၢႆႇၸဝ်ႈဢႃႇၼႃႇၶဝ် ၶႂ်ႈႁဵတ်းမႃး ၶဝ်တိုၼ်းႁဵတ်း။ ပၵ်းပိူင်မၢင်ဢၼ် ဢမ်ႇႁၼ်ပိုၼ်ၽၢဝ်ႇသင်သေ ပဵၼ်တၢင်းၵၢၼ်ၵႂႃႇၵေႃႈ မီးတင်းၼမ် ။ ဢမ်ႇၸၢင်ႈလၢမ်းလႆႈ ပိူင်ၶဝ်ၶႂ်ႈႁဵတ်းဝႃႈၼႆ ။

ၵုင်းသုၼ်မၢၼ်ႈ(လုမ်းတၢင်ၶွင်ႊသီႊသိုၵ်းမၢၼ်ႈ)တီႈၵဵင်းမႂ်ႇတႄႉ ၵဵဝ်ႇလူၺ်ႈလွင်ႈၼႆႉ ပႆႇႁၼ်ပွင်ႇၶၢဝ်ႇသင်ပၼ်ၵူၼ်းမိူင်းၼင်ႇၵဝ်ႇ ။ ၼႂ်းၵႄႈၼႆႉ ႁႅင်းၵၢၼ်ၸိူဝ်းတေၵႂႃႇတေႃႇဢႃယုပပ်ႉၶၢမ်ႈမိူင်းၵေႃႈ မီးယူႇလႄႈ လူဝ်ႇပႂ်ႉတူၺ်း လွင်ႈတုမ်ႉတွပ်ႇၵုင်းသုၼ်မၢၼ်ႈထႅင်ႈၵမ်းၼိုင်ႈ ။ ၶၢဝ်ႇဢၼ်လိုဝ်းယူႇၼႆႉၵေႃႈ ပိူင်လူင် တႃႇၵုမ်းၵူၼ်းၸိူဝ်းႁဵတ်းၵၢၼ်မိူင်းဢၼ် ယိပ်းဝႆႉ ပပ်ႉ PV ၸိူဝ်းၼႆႉၵူၺ်း ၼႆ ၵူၼ်းၸွႆႈႁဵတ်းဝတ်းဝႂ်တီႈၵဵင်းမႂ်ႇၵေႃႉၼိုင်ႈလၢတ်ႈ ၼင်ႇၼႆ –

ပေႃးႁဝ်းထၢင်ႇတႄႉ မၼ်းၵဵဝ်ႇၵပ်းၵၢၼ်မိူင်းပႃး။ၵူၼ်းႁဵတ်းၵၢၼ်မိူင်းယိပ်းပပ်ႉ PV မႃးၼမ်ၼႃႇလူင်။ၵူၼ်းႁဵတ်းမႂ်ႇ ဢၼ်တိုၵ်ႉပၢႆႈမႃးၸိူဝ်းၼၼ်ႉ။ၶဝ်ယိပ်း ၽၢတ်ႉသပွတ်ႇ PV ဢၼ်ပဝ်ႇမၼ်းမႃးၼမ်ၼႃႇလူး။ ၶဝ်တေၶႂ်ႈႁဵတ်းႁိုဝ်တေႉတေႉ ပႆႇႁူႉၼႃ ။ ယွၼ်ႉၶဝ် ပႆႇပိုၼ်ၽၢဝ်ႇပဵၼ်တၢင်းၵၢၼ်လူး

လွင်ႈဝတ်းဝႂ်ၸိူဝ်းၼႆႉ ၼေႇပျီႇတေႃႇတေၵႅဝ်ႁႃႉ ပႆႇၵႅဝ်ၸွမ်းတႄႉ ပႆႇယိုၼ်ယၼ်သေတႃႉ ၽွၼ်းယွၼ်ႈမၼ်း ဢၼ်ႁႅင်းၵၢၼ်ယၢၼ်မိူင်း ၸၢင်ႈလႆႈၶၢမ်ႇတႄႉ ယိင်ႈၶဵင်ႈၶႅင်ပၵ်းပိူင် ယိင်ႈလႆႈသဵင်ႈငိုၼ်းၼမ်ၼၼ်ႉၵူၺ်း ။

ယွၼ်ႉဝႃႈ ၵမ်ႈၼမ် တႃႇႁဵတ်းဝတ်းႁဵတ်းဝႂ်ၼႆႉ ၸၢင်ႈၼၢႆးၼႃႈ ၸၢင်ႈဢေႊၵျိၼ်ႊသီႊ ႁဵတ်းပၼ်ၵူၺ်း ။ ၸင်ႇၼၼ်လႄႈ ပေႃးဝႃႈ ၶၵ်ႉတွၼ်ႈမၼ်းယၢပ်ႇၵေႃႈ ၵႃႈၸၢင်ႈႁဵတ်းမၼ်းၵေႃႈ တေၵႃႈၶိုၼ်ႈ ၊ ႁႅင်းၵၢၼ်ယၢၼ်မိူင်း ၸၢင်ႈၺႃးၵိၼ်ၸိၵ်းတွၵ်ႇၸွၵ်းငၢႆႈၵႂႃႇထႅင်ႈ ၊ ပွင်ႇဝႃႈ ၸၢင်ႈသဵင်ႈငိုၼ်းသဵင်ႈၶၢဝ်းၵွပ်ႈမၼ်းထႅင်ႈၼမ်လိူဝ်ၵဝ်ႇ ။ မိူၼ်မိူဝ်ႈလဵဝ် ၸိူဝ်းတေႃႇဢႃယုပပ်ႉၶၢမ်ႈမိူင်း သဵင်ႈငိုၼ်း 2မိုၼ်ႇ ထိုင် 3 မိုၼ်ႇငိုၼ်းထႆးၵေႃႈမီး ။ တေႁဵတ်းဝတ်းဝႂ်သင်ၵေႃႈ ႁႂ်ႈႁႃပိုင်ႈၵူၼ်းဢၼ်ၸၢင်ႈယုမ်ႇယမ်တမ်းၸႂ်လႆႈ ၸင်ႇႁဵတ်းၼႆႉ တေတိူဝ်းလွတ်ႈၽေး ၼႆ ၵူၼ်းၸွႆႈတူင်ႇၵူၼ်း တီႈၵုင်းထဵပ်ႈၵေႃႉၼိုင်ႈလၢတ်ႈ။