ယၢမ်းလဵဝ် တီႈလႅၼ်လိၼ်တႆး – ထႆး ဝဵင်းတႃႈၶီႈလဵၵ်းၼႆႉ ၵူၼ်းမိူင်းၸိူဝ်းယိပ်းပပ်ႉၶၢမ်ႈလႅၼ်လိၼ် ဢၼ်မီးဢႃယုၼိုင်ႈပီၼၼ်ႉ ထူပ်းလွင်ႈယၢပ်ႇ ယွၼ်ႉၾၢႆႇၵၢၼ်လုမ်းၶဝ် ဢမ်ႇ ႁပ်ႉတေႃႇဢႃယုလႄႈ ႁဵတ်းပၼ် ပပ်ႉမႂ်ႇထႅင်ႈ ၼႆယဝ်ႉ။

ၵူၼ်းတေႃႉသူင်ႇ ၵူၼ်းၶၢမ်ႈလႅၼ်လိၼ် ဝဵင်းတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႃႇတေၶၢမ်ႈၵႂႃႇၶၢမ်ႈမႃးၼႆႉ ပပ်ႉမၼ်းၸႂ်ႉလႆႈမိူၼ်ၵဝ်ႇယူႇ။ ၵူၺ်းၵႃႈ ပေႃးပပ်ႉႁဝ်းၼၼ်ႉ ၼႃႈလိၵ်ႈတႃႇ တွၵ်ႇၸုမ်းမၼ်းမူတ်းၵႂႃႇႁိုဝ် ဢမ်ႇၼၼ် ဢႃယုပပ်ႉမၼ်းမူတ်းၼိုင်ႈပီၵႂႃႇႁိုဝ်ၼႆၸိူဝ်းၼႆႉ တီႈလုမ်းၶဝ် တေဢမ်ႇတေႃႇဢႃယုပၼ်၊ တူဝ်ၶႃႈၵေႃႉၵႂႃႇတေႃႇ ဢႃယုပပ်ႉမႃးၼႃႇဝၼ်းၼၼ်ႉ။ ၶဝ်ဝႃႈ ပပ်ႉမၼ်းဢမ်ႇမီးဝႆႉယဝ်ႉဝႃႇ ၵႃႈပေႉၶႂ်ႈပဵၼ်ၵူၼ်းယႂ်ႇၵူၼ်းထဝ်ႈယဝ်ႉ ၶဝ်ဢမ်ႇႁဵတ်းပၼ်ပပ်ႉမႂ်ႇယဝ်ႉ”- ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၾၢႆႇၵူၼ်းႁဵတ်းၵၢၼ်တီႈၶူဝ်ၶၢမ်ႈလႅၼ်လိၼ်ၶဝ်တႄႉ လၢတ်ႈဝႃႈ မိူဝ်ႈႁၢင်လိူၼ်ၵျူႊလၢႆႊၼႆႉ ၼမ်ႉလုပ်ႇၼွင်းထူမ်ႈႁႅင်း တီႈႁဵတ်းဢွၵ်ႇၶၢႆပၼ်ပပ်ႉၶၢမ်ႈလႅၼ်လိၼ်ၵေႃႈ ၼမ်ႉထူမ်ႈၶိူင်ႈၸၢၵ်ႈၵေႃႈ မီးလွင်ႈလူႉၵွႆလၢႆဢၼ် ဝႃႈၼႆ။

ယွၼ်ႉၾၢႆႇၵၢၼ်လုမ်းၶဝ် ဢမ်ႇႁပ်ႉႁဵတ်းဢွၵ်ႇပၼ်လႆႈပပ်ႉမႂ်ႇ တႃႇၶၢမ်ႈလႅၼ်လိၼ်လႄႈ ၵူၼ်းမိူင်းၶဝ် လႆႈၶဝ်ႈထႅဝ် ႁဵတ်းဝႂ်ၶၢမ်ႈလႅၼ်လိၼ်ၸူဝ်ႈၶၢဝ်းၼမ်မႃးလိူဝ်ၵဝ်ႇသေ တႃႇၶၢမ်ႈလႅၼ်လိၼ်ၵေႃႈ လႆႈသဵင်ႈၶၢဝ်းယၢမ်း ပဵၼ်လၢႆၸူဝ်ႈမူင်း။

“ပေႃးဝႃႈပပ်ႉႁဝ်းၼၼ်ႉ ဢမ်ႇသိုပ်ႇတေႃႇဢႃယုမၼ်းလႆႈၼႆ ပပ်ႉတႃႇၶၢမ်ႈၶူဝ်လႅၼ်လိၼ်ၼႆႉ ၵႃႈလႆႈဝႆႉ ၸိူင်ႉၼႆသေ လႆႈၵႂႃႇၸႅၼ်ႇထႅဝ်ႁဵတ်းဝႂ်ၶၢမ်ႈၶူဝ် မဵဝ်းဢၼ်ပိူၼ်ႈႁဵတ်းပၼ်တႃႇၸႂ်ႉပွၵ်ႈလႂ်ပွၵ်ႈၼၼ်ႉ ႁဵတ်းၼၼ်ၼၼ်ႉၼႃႇ။ တႃႇႁဵတ်းဝႂ်ၶၢမ်ႈၶူဝ်ၼၼ်ႉ မၢင်ပွၵ်ႈမၢင်လႂ် မိူၼ်ၼင်ႇ ဢၼ်ပဵၼ်ယူႇယၢမ်းလဵဝ်ၼႆႉ လႆႈၵႂႃႇၸႅၼ်ႇထႅဝ် မွၵ်ႈၼိုင်ႈၸူဝ်ႈမူင်းသွင် ၸူဝ်ႈမူင်းၸိူဝ်းၼႆႉ ၸင်ႇလႆႈၵေႃႈမီးဢိူဝ်ႈ”- ၵူၼ်းတေႃႉသူင်ႇ ၵူၼ်းၶၢမ်ႈလႅၼ်လိၼ် ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈၶူဝ်လႅၼ်လိၼ်တႃႈၶီႈလဵၵ်း – မႄႈသၢႆၼႆႉ ၵူၼ်းမိူင်းဢွၼ်ၵၼ်ၶဝ်ႈထႅဝ်သေ ၸုၵ်းပႂ်ႉတႃႇ ႁဵတ်းဝႂ်ၶၢမ်ႈလႅၼ်လိၼ်ၸူဝ်ႈၶၢဝ်းၼၼ်ႉ ပဵၼ်ဢၼ်ယၢပ်ႇၽိုတ်ႇဝႆႉ ယွၼ်ႉလႆႈပႂ်ႉႁိုင် ၼႆယဝ်ႉ။  

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ -“ၶဝ်ဝႃႈ ပပ်ႉမၼ်းမူတ်းဝႆႉ တေၶိုၼ်းပိုတ်ႇ ႁဵတ်းပၼ်မိူဝ်ႈလႂ်ၵေႃႈဢမ်ႇပႆႇႁူႉ ၼႆဝႃႇၼႆႉ။ ပေႃးပပ်ႉမၼ်းမႃးၽႅဝ်ၶိုၼ်း မိူဝ်ႈလႂ်ၸင်ႇမိူဝ်ႈၼၼ်ႉ တေႁဵတ်းပၼ်ၶိုၼ်းၼႆၶႃႈဝႃႇ။ ဢၼ်မီးဝႆႉမိူၼ်ၸိူင်ႉၼင်ႇ ပီႈၶဝ်ယိပ်းဝႆႉၼႆႉတႄႉ ပပ်ႉမၼ်းပႆႇတဵမ် တိုၵ်ႉၵိုတ်းဝႆႉယူႇလႄႈ ႁဝ်းၶႃႈတိုၵ်ႉၸႂ်ႉလႆႈယူႇၶႃႈ။ ၵူၺ်း ၵႃႈ ဢၼ်ဢႃယုပပ်ႉမူတ်း၊ ပပ်ႉဢမ်ႇမီးတီႈတွၵ်ႇၸုမ်းမၼ်း ၸိူဝ်းၼႆႉ ၵႃႈလႆႈပႂ်ႉပပ်ႉမၼ်းမႃးၵွၼ်ႇ ၸင်ႇၵွႆႈတေၸၢင်ႈႁဵတ်းၶိုၼ်းၼႆၶႃႈ”- ဝႃႈၼႆ။

သိုပ်ႇလၢတ်ႈဝႃႈ -“ၸူဝ်ႈပႆႇၸၢင်ႈႁဵတ်းပပ်ႉၼႆႉတႄႉ ၵႃႈလႆႈဢဝ်မၢႆၾၢင်သေ ႁဵတ်းဝႆႉထႃႈ ဢၼ်ၸႂ်ႉတႃႇ ပွၵ်ႈလႂ်ပွၵ်ႈၼၼ်ႉႁဵတ်းၼၼ်ၵူၺ်းဢေႃႈ။ ၵူၺ်းၵႃႈ မၼ်းၵေႃႈ သမ်ႉလႆႈသဵင်ႈၶၢဝ်းယၢမ်း မိူဝ်ႈႁဝ်းလႆႈၵႂႃႇ ၸႅၼ်ႇထႅဝ် ႁဵတ်းဝႂ်ၶၢမ်ႈလႅၼ်လိၼ် ဢၼ်ၶဵဝ်ၼၼ်ႉၶႃႈၼႃႇ။ ၵူၼ်းၵေႃႈသမ်ႉၼမ်ႁႅင်းၼႃႇဢႃးလႃးလႄႈ လႆႈၸႅၼ်ႇၶိဝ်းၸႅၼ်ႇထႅဝ်ၼႆ မၼ်းၵေႃႈသဵင်ႈၶၢဝ်းယၢမ်းၼမ်တႄႉၶႃႈ။ ပေႃးဝႃႈႁဝ်းလႆႈယိပ်းပပ်ႉဝႆႉၼႆ ဢမ်ႇလူဝ်ႇၸႅၼ်ႇထႅဝ်ယဝ်ႉ ၶဝ်ႈၵႂႃႇတွၵ်ႇၸုမ်းငၢႆႈငၢႆႈဝႆးဝႆးလႆႈၸိူင်ႉၼၼ်ဢေႃႈ”- ဝႃႈၼႆ။

ဝဵင်းတႃႈၶီႈလဵၵ်းၼႆႉ သုင်လိူဝ်ၼႃႈၼမ်ႉပၢင်ႇလၢႆ 1,200 ထတ်းပၢႆသေ ပဵၼ်ဝဵင်းဢၼ်ထူပ်းၽေးၼမ်ႉ လုပ်ႇၼွင်းထူမ်ႈၵူႈပီ။ ၵူၺ်းၵႃႈ ၼႂ်းၶၢဝ်းတၢင်း 2 ပီမႃးၼႆႉ ယွၼ်ႉၵၢၼ်ၶုတ်း ႁႄႈ၊ ၶုတ်းၶမ်းလႄႈ ႁဵတ်းႁႂ်ႈၼမ်ႉထူမ်ႈႁၢဝ်ႈႁႅင်းႁၢႆႉၸႃးမႃးလိူဝ်ၵဝ်ႇ။

ၼႂ်းပီ 2025 ၼႆႉၵူၺ်း ၼမ်ႉလုပ်ႇၼွင်းထူမ်ႈဢမ်ႇယွမ်း 4 ပွၵ်ႈယဝ်ႉ။ လိူဝ်ၼၼ်ႉ မိူဝ်ႈဝၼ်းတီႈ 01/08/2025 ၼႆႉၵေႃႈ ယင်းလႆႈထူပ်းႁၼ်တူဝ်တၢႆ ၵူၼ်းလွင်ႈမႃးၸွမ်းၼမ်ႉမႄႈသၢႆၼႆႉ ၵေႃႉၼိုင်ႈ ၼႆယဝ်ႉ။