ဝၼ်းတီႈ 7/9/2026 ယၢမ်းၵၢင်ၼႂ် 2 မူင်း ၾူၼ်တူၵ်းဢမ်ႇထၢတ်ႇ ၼမ်ႉလွႆၼွင်း ႁဵတ်းႁႂ်ႈတႅၼ်ႈ  ၼမ်ႉသၢႆ  ၾင်ႇဝဵင်းတႃႈၶီႈလဵၵ်း ၵူၼ်ႇပင်း ၼမ်ႉလႆၶဝ်ႈ ၼႂ်းပွၵ်ႉၼႂ်းယွမ်ႇ ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ  ႁဵတ်းႁႂ်ႈၶူဝ်းၶွင်လွင်ႈလႆၸွမ်းၼမ်ႉ ၵူၼ်းမိူင်းၵႂႃႇမႃးယၢပ်ႇၽိုတ်ႇ  ။

ၼၢင်းယိင်း ၵူၼ်းမိူင်းဝဵင်းတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ – “ ၾူၼ်ၵေႃႈတူၵ်း ၊ တႅၼ်ႈ ၵေႃႈပင်း   ႁဵတ်းႁႂ်ႈၼမ်ႉလႆၶဝ်ႈၼႂ်းပွၵ်ႉ ၊  ၵူၼ်းမိူင်းလႆႈၶၢႆႉၶူဝ်းၶွင် ၶိုၼ်ႈဝႆႉတီႈသုင်”- ဝႃႈၼႆ ။

တေႃႇထိုင်ၶၢဝ်းယၢမ်းၵၢင်ဝၼ်းၼႆႉ ၼႂ်းပွၵ်ႉ လွႆတေႃႇၶမ်း၊ ပုင်းထုၼ်၊ တႃႈလေႃႉ၊ မၢၵ်ႇၵႃႇႁူဝ်ၶမ်း၊ သၼ်သၢႆး (ၵ-ၶ)၊ မႄႈၶၢဝ် ၼႂ်းပွၵ်ႉ တီႈတႅမ်ႇၸိူဝ်းၼႆႉ ၼမ်ႉသၢႆ လႆၶဝ်ႈၼွင်းထူမ်ႈဝႆႉႁၢဝ်ႈႁႅင်း။

ၼၢင်းယိင်းၵူၼ်းၶၢႆၶူဝ်းၵုၼ်ႇ ဝဵင်းတႃႈၶီႈလဵၵ်း သိုပ်ႇလၢတ်ႈထႅင်ႈဝႃႈ -“ ၵႂႃႇမႃးယၢပ်ႇၽိုတ်ႇလႄႈ တႃႇဢဝ် ၶူဝ်းၶၢႆႉပၢႆႈ ၵေႃႈယၢပ်ႇဝႆႉဢေႃႈ ၊ ပေႃးၼမ်ႉလူင်းၶိုၼ်းယဝ်ႉၵေႃႈ တေလႆႈၽဵဝ်ႈၶီႈၵူမ်ႇၶီႈငႂ်ႈ ၸိူဝ်းၼၼ်ႉ ထႅင်ႈ ၊ ၵူၼ်းသိုဝ်ႉၵူၼ်းၶၢႆၵေႃႈဢမ်ႇပေႃးမီးယဝ်ႉ ၊ ပေႃးၼမ်ႉထူမ်ႈၼိုင်ႈပွၵ်ႈၼႆႉ တုမ်ႉတိူဝ်ႉၵူၼ်းပိုၼ်ႉတီႈ ၵူႈသႅၼ်းထၢၼ်ႈယဝ်ႉၶႃႈ ”-ဝႃႈၼႆ ။

မိူၼ်ၼင်ႇၼႆ ၾင်ႇမႄႈသၢႆ မိူင်းထႆးၵေႃႈ ၽူႈမီးပုၼ်ႈၽွၼ်း ပႂ်ႉတူၺ်း ငဝ်းလၢႆးမႄႈၼမ်ႉသေ ပိုၼ်ၽၢဝ်ႇ ပၼ်ၾၢင်ႉ ၵူၼ်းပိုၼ်ႉတီႈ  ႁႂ်ႈပႂ်ႉတူၺ်း ပႂ်ႉထွမ်ႇၶၢဝ်ႇၽေးၼမ်ႉၽေးၼွင်ဝႆႉၵူႈၶၢဝ်း   ဝႃႈၼႆ။

မိူၼ်ၼင်ႇၼႆ ၼႂ်းဝၼ်းတီႈ 5/9/2026 ယၢမ်းၵၢင်ၼႂ် ယွၼ်ႉၾူၼ်တူၵ်းဢမ်ႇထၢတ်ႇလႄႈ ႁဵတ်းႁႂ်ႈ ၼမ်ႉလၢတ်ႈ ၵိုင်ႉၵၢင်ႉၼွင်းၶဝ်ႈထူမ်ႈၼႂ်းပွၵ်ႉ 1 ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းႁၢဝ်ႈႁႅင်း ၵူၼ်းမိူင်းလႆႈၶၢႆႉပၢႆႈၽေးၼမ်ႉ  တေႃႇထိုင်ဝၼ်းမိူဝ်ႈၼႆႉ   ။

ၼၢင်းယိင်း ၵူၼ်းမိူင်းဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ -“ ၼမ်ႉၵိုင်ႉၵၢင်ႉၼွင်း လႄႈ ဢမ်ႇတၼ်းႁူႉတူဝ် ၊ ၼွင်းၶိုၼ်ႈၾင်ႇဝႆးၼႃႇၶႃႈ ၊ ၵူၼ်းၼႂ်းပွၵ်ႉ 1  လႆႈဢွၼ်ၵၼ် ၶၢႆႉၵႂႃႇယူႇတီႈသုင်ဝႆႉဢေႃႈ“- ဝႃႈၼႆ ။

တႄႇႁၢင်လိူၼ်ၵျူႊလၢႆႊမႃး ပေႃးၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈ ၼမ်ႉထူမ်ႈၼမ်ႉၼွင်းၶဝ်ႈတီႈတႅမ်ႇတီႈယၢၼ်း   ၼႂ်းမိူင်းတႆး  ။ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ။   

ၵဵဝ်ၵပ်းလွင်ႈ ၼမ်ႉထူမ်ႈၼမ်ႉၼွင်းၼႆႉသေ ISP Myanmar ပိုၼ်ၽၢဝ်လၢတ်ႈဝႆႉဝႃႈ တႄႇဢဝ် ဝၼ်းတီႈ 11 လိူၼ်ၵျူႊလၢႆႊ တေႃႇထိုင် ဝၼ်းတီႈ 11 လိူၼ်ဢေႃးၵၢတ်ႉသ်ၼႆႉ ၾူၼ်တူၵ်းႁႅင်း ထပ်းၵၼ် ၵူၼ်းမိူင်း ႁူမ်ႈတုမ်မၢၼ်ႈ 13 သႅၼ်ပၢႆ ၼႂ်း 41 ၸႄႈဝဵင်း တီႈၼႂ်းတိူင်း လႄႈ ၸႄႈမိူင်း 5 ဢၼ် လႆႈထူပ်းၽေးၼမ်ႉၼွင်းထူမ်ႈ – ဝႃႈၼႆဝႆႉ ။