မိူဝ်ႈၼႆႉ ဝၼ်းတီႈ 8 /9/2026  ယၢမ်းၵၢင်ၼႂ်ၸဝ်ႉ ႁူင်းႁုင်ယၢမ်း  ၶွင်သိုၵ်းၵဝ်ႈၵၢင်ႉ ဢၼ်မီးၾၢႆႇတူၵ်း မၢၼ်ႈမႂ်ႇ  ဝဵင်းသႅၼ်ဝီ ၼၼ်ႉတႅၵ်ႇလႄႈ ႁိူၼ်းယေး ဢိၵ်ႇဝတ်ႉဝႃးၽႃသိူဝ်ႇ လူႉၵွႆၼမ်၊ ၵူၼ်းမိူင်းၵေႃႈလူႉတၢႆ ။

သဵင်တႅၵ်ႇ မေႃးလင်ႁႅင်း၊ ၽႃႁိူၼ်း၊ ႁဵၵ်ႇမုင်းႁိူၼ်းလႄႈ ႁူဝ်ႉဝၢင်း တႅၵ်ႇၸတ်ႉလူႉၵွႆ ၊ ယွၼ်ႈထိုင်ပႃး ၼႂ်းဝဵင်း သႅၼ်ဝီလႄႈ ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်တူၵ်းၸႂ်တိုၼ်ႇသၢၼ်ႈ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ သဵင်မၼ်းမေႃးလင်ႁႅင်းၼႃႇ ၊ ၼင်လိၼ်မိူင်း ပေႃးသၼ်ႇ ၊ ႁူဝ်ႉႁိူၼ်းၸိူဝ်းၼႆႉၵေႃႈၵူၼ်ႇ ၊ ဢၼ်ပဵၼ်မိူဝ်ႈလဵဝ်ၼႆႉ ဢမ်ႇၸႂ်ႈပဵၼ်ၼႂ်းဝၢၼ်ႈ ပဵၼ်ၼွၵ်ႈ ဝၢၼ်ႈၼႆ ၊ ႁိူၼ်းလႄႈၵျွင်းမုၼ်ၸဝ်ႈ ႁိမ်းၼၼ်ႉ လူႉၵွႆၵႂႃႇၽွင်ႈ”-ဝႃႈၼႆ ။

ၵူၼ်းမိူင်းဝဵင်းသႅၼ်ဝီ  တွပ်ႇလၢတ်ႈဝႆႉတီႈသိုဝ်ႇ DVB ဝႃႈ – ယွၼ်ႉႁူင်းႁုင်ယၢမ်းတႅၵ်ႇသေ မီးၵူၼ်းတၢႆ မွၵ်ႈ 8 ၵေႃႉ၊ ပဵၼ်ၸဝ်ႈႁူင်းၵၢၼ် ၸၢဝ်းၶႄႇ 2 ၵေႃႉ၊ ၵူၼ်းႁဵတ်းၵၢၼ် 5 ၵေႃႉလႄႈ လုၵ်ႈသိုၵ်း သိုၵ်းၵဝ်ႈၵၢင်ႉ 8 ၵေႃႉ၊ မၢတ်ႇၸဵပ်းထႅင်ႈဢမ်ႇယွမ်း 3 ၵေႃႉ၊ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင်သႅၼ်ဝီ ဝႃႈၼႆ။

ၵဵဝ်ႇၵပ်းလွင်ႈၵူၼ်းမၢတ်ႇၸဵပ်းလူႉတၢႆၼႆႉသေ ယူႇတီႈၸုမ်းႁဝ်းၶႃႈတႄႉ ပႆႇၸၢင်ႈယိုၼ်ယၼ်၊ ၾၢႆႇသိုၵ်းၵဝ်ႈၵၢင်ႉၵေႃႈ ပႆႇႁၼ်ပိုၼ်ၽၢဝ်ႇဢွၵ်ႇမႃး ပဵၼ်တၢင်းၵၢၼ်။

ယၢမ်းလဵဝ် ယွၼ်ႉႁုင်းႁုင်ယၢမ်းတႅၵ်ႇၽူင်ႉၼႆႉသေ သိုၵ်းၵဝ်ႈၵၢင်ႉ မၢၼ်ႈမႂ်ႇ ႁႄႉႁၢမ်ႈသဵၼ်ႈတၢင်း ၵူတ်ႇထတ်းဢဝ်ႁူမ်ႇလူမ်ႈဝႆႉၼႆယဝ်ႉ ။

မိူဝ်ႈလိူၼ်မေႊပူၼ်ႉမႃးၼၼ်ႉၵေႃႈ ႁူင်းႁုင်ယၢမ်း ၶွင်သိုၵ်းတဢၢင်း တီႈဝၢၼ်ႈၵွင်းတပ်ႉ ဝဵင်းၼမ်ႉၶမ်း တႅၵ်ႇႁၢဝ်ႈႁႅင်း၊ မိူဝ်ႈၼၼ်ႉ ၵူၼ်းတၢႆ 50 ပၢႆ မၢတ်ႇၸဵပ်းထႅင်ႈ 100 ပၢႆ၊ တေႃႇထိုင်ယၢမ်းလဵဝ် ယင်းပႆႇၸၢင်ႈပူၵ်းပွင်ႁႂ်ႈမိူၼ်ၵဝ်ႇၶိုၼ်း။