ၵူၼ်းမိူင်းပွတ်းတၢင်း ထုင်ႉၼမ်ႉမႃႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ လႆႈမႆႈၸႂ်တႃႇသိင်ႇဝႅတ်ႇလွမ်ႉလႄႈၵၢၼ်ႁႃၵိၼ်လဵင်ႉတွင်ႉမႃးတႃႇသေႇ ။ ထုင်ႉၼမ်ႉမႃႉၼႆႉ ပဵၼ်ဢွင်ႈတီႈဢၼ် ထၢၼ်ႇႁိၼ်လိူင်ႇၼမ်လႄႈ ၸုမ်းလႂ်ၵေႃႈ ၶႂ်ႈၶဝ်ႈၶုတ်းၶဝ်ႈယႃႉတဝ်ဢဝ်ၶၢႆ ။

မိူဝ်ႈလဵဝ်ၵေႃႈ သိုၵ်းၶႄႇၵဝ်ႈၵၢင်ႉ ဢၢၼ်းမႃးၶုတ်းၶမ်း ႁိမ်းဝၢၼ်ႈၼွင်ၼူၺ်း ၼႆထႅင်ႈလႄႈ ႁဵတ်းႁႂ်ႈၵူၼ်းဝၢၼ်ႈမႆႈၸႂ်ဝႆႉထႃႈ ။ သင်ပဵၼ်လႆႈ ၶႂ်ႈႁႂ်ႈ ထွမ်ႇပၼ်ၵၢင်ၸႂ်ၵူၼ်းဝၢၼ်ႈၵူၼ်းမိူင်းၼမ်ၼမ် ၊ တေၶုတ်းတေယႃႉသင်ၵေႃႈ ႁႂ်ႈသွၼ်ႇတေႃႇသိင်ႇဝႅတ်ႉလွမ်ႉလႄႈ ၵူၼ်းမိူင်းၽွင်ႈဝႃႈၼႆ။

ၵူၼ်းမိူင်း လုၵ်ႉႁိုၼ်ႇသၢၼ်ၶတ်းမႃး လၢႆပွၵ်ႈလၢႆၵမ်းၵေႃႈ ဢမ်ႇႁၼ်ၵိုတ်းယင်ႉၵႂႃႇတင်းပိုၵ်း ။ တေႃႇထိုင်ငဝ်းလၢႆးမိူဝ်ႈလဵဝ်ၵေႃႈ ပၼ်ႁႃပႆႇယဝ်ႉပႆႇဝၢႆး ။ ၼႂ်းထုင်ႉၼမ်ႉမႃႉၼႆႉ ဢိင်ၼိူဝ် ၵၢၼ်ၶုတ်းထၢၼ်ႇႁိၼ်ၼႆႉသေ ဢမ်ႇလၢႆးဢွမ်ႈၵေႃႈ ၵမ်းသိုဝ်ႈ တိုၼ်းမီးပၼ်ႁႃသိုၵ်းမႃးၵဵဝ်ႇၶွင်ႈ။ ဢိင်ၼိူဝ် ၼႂ်းပိုၼ်ႉတီႈ မီး ထၢၼ်ႇႁိၼ်ၼၼ်ႉသေ သိုၵ်းၵေႃႈဢမ်ႇယဵၼ် ၵူၼ်းမိူင်းၵေႃႈဢမ်ႇလွတ်ႈၶဵၼ်မႃးသေပွၵ်ႈ ။

ၼႂ်းႁူဝ်လိူၼ်ဢေႊပရိူဝ်ႊ 2026 ၼႆႉ သိုၵ်းၶႄႇၵဝ်ႈၵၢင်ႉ ဢဝ်ၵႃးဝူၵ်းမႃးဝႆႉ ၾၢႆႇႁွင်ႇ ဝၢၼ်ႈၼွင်ၼူၺ်း ထုင်ႉၼမ်ႉမႃႉ ၸႄႈဝဵင်းသီႇပေႃႉသေ လၢတ်ႈၵူၼ်းဝၢၼ်ႈဝႃႈ တႃႇၶုတ်းၶမ်း ၊ လွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈမႆႈၸႂ်ဝႆႉလၢႆလွင်ႈ ဝႃႈၼႆ ။
မိူဝ်ႈႁူဝ်ပီ 2026 ၼၼ်ႉၵေႃႈ သိုၵ်းၶႄႇၵဝ်ႈၵၢင်ႉ MNDAA ႁႂ်ႈသိုၵ်း SSPP/SSA ထွႆထွၼ်ဢွၵ်ႇ ပိုၼ်ႉတီႈ ထုင်ႉၼမ်ႉမႃႉ ၸႄႈဝဵင်းသီႇပေႃႉ ။ ၽွင်းၼၼ်ႉ ၾၢႆႇၼိုင်ႈၵေႃႈ ဢမ်ႇႁၼ်တုမ်ႉတွပ်ႇသင်ၶိုၼ်း ။ ယူႇယူႇၵေႃႈ သိုၵ်းၵဝ်ႈၵၢင်ႉၶဝ်ႈဢဝ်တီႈယူႇလူၺ်ႈ ဢမ်ႇလႆႈၶေႃႈတူၵ်းလူင်းသင် ၊ ဝၢႆးၼႆႉ ၸင်ႇမီးပၼ်ႁႃမႃးၶိူဝ်းယႂ်း ၼႆ ၵူၼ်းပိုၼ်ႉတီႈလၢတ်ႈၼႄၼင်ႇၼႆ ။

ၽွင်းႁူဝ်ပီ ၼၼ်ႉ ၵူၼ်းပိုၼ်ႉတီႈလၢတ်ႈ သိုၵ်းၶႄႇၵဝ်ႈၵၢင်ႉ ဢၢၼ်းမႃးၶုတ်းထၢၼ်ႇႁိၼ် ၼႂ်းထုင်ႉၼမ်ႉမႃႉၼင်ႇၵဝ်ႇ ။ ဢိင်ၼိူဝ် ၵူၼ်းဝၢၼ်ႈဢမ်ႇၽွမ်ႉသေဢမ်ႇၵႃး ဢမ်ႇလႆႈၶေႃႈတူၵ်းလူင်းသင်ၵၼ်တင်း သိုၵ်း SSPP လႄႈ ၸင်ႇယဵၼ်ၵႂႃႇၵမ်းၼိုင်ႈ ၼႆယူႇ။
ၾၢႆႇသိုၵ်းတင်းသွင်ၸုမ်း ဢမ်ႇမီးပၼ်ႁႃၵၼ်ထႅင်ႈၼႆသေတႃႉ ၵူၼ်းမိူင်းတႄႉ လႆႈၾၢင်ႉၵႂႃႇၾၢင်ႉပႆ ၵူဝ်ပဵၼ်တူဝ်ယိူဝ်ႇၼႂ်းၵႄႈမၼ်း ။ ယွၼ်ႉဝႃႈ မိူဝ်ႈႁူဝ်ပီၼၼ်ႉ ၾၢႆႇၼိုင်ႈၵေႃႈ သိုၵ်းၶႄႇၵဝ်ႈၵၢင်ႉ ဢၢၼ်းၶုတ်းထၢၼ်ႇႁိၼ် ၊ ၾၢႆႇၼိုင်ႈၵေႃႈ ဢမ်ႇလၢတ်ႈၼႄလွင်ႈၼႄတၢင်း ၶႂ်ႈလႆႈၵူၼ်းႁဵတ်းၵၢၼ်ၼႂ်းသူၼ်ဢွႆႈၼႆသေ တီႉၺွပ်းၸဝ်ႈသူၼ်ဢွႆႈ ၼႂ်းဢိူင်ႇၼႃးၼိဝ်ႉၼၼ်ႉ ပေႃႉထုပ်ႉပေႃးၵမ်ႇပေႃးမၢၼ်ႉ ၼႆ ၵူၼ်းပိုၼ်ႉတီႈလၢတ်ႈ ။

သိုၵ်းၶႄႇၵဝ်ႈၵၢင်ႉၼႆႉ ဢဝ်တီႈယူႇဝႆႉ ၸွမ်း ဝၢၼ်ႈၶူဝ်ၼႃးၽႃႉ ဢိူင်ႇၼႃးၼိဝ်ႉ ၸဵမ်မိူဝ်ႈႁူဝ်ပီ 2026 ၼၼ်ႉမႃး ထိုင်ႁၢၼ်ႉၼႆႉ ။ လွင်ႈၶုတ်းထၢၼ်ႇႁိၼ်ၼၼ်ႉ ယဵၼ်ၵႂႃႇယဝ်ႉသေတႃႉ ထိုင်မႃးၼႂ်း လိူၼ်ဢေႊပရိူဝ်ႊလ် 2026 ၼႆႉ ၵူၼ်းဝၢၼ်ႈႁၼ်လွင်ႈတူင်ႉၼိုင်သိုၵ်းၶႄႇၵဝ်ႈၵၢင်ႉထႅင်ႈၵမ်းၼိုင်ႈ ၼႆယဝ်ႉ။

ဢွင်ႈတီႈဢၼ် သိုၵ်းၶႄႇၵဝ်ႈၵၢင်ႉ ဢၢၼ်းမႃးၶုတ်းၶမ်းၼႆႉ မီးၾၢႆႇၼိူဝ် ၼမ်ႉပွင်ႈလႄႈၼမ်ႉမၶွႆႈၵၼ် မီးၾၢႆႇႁွင်ႇ ဝၢၼ်ႈၼွင်ၼူၺ်း ။ ယၢမ်းလဵဝ် သိုၵ်းၵဝ်ႈၵၢင်ႉ ဢဝ်ၵႃးဝူၵ်းၵႃးထုၺ် မႃးၶႂၢၵ်ႈတၢင်း တႃႇၶဝ်ႈၸူးၾင်ႇၼမ်ႉပွင်ႈငၢႆႈလိူဝ်ၵဝ်ႇ ၊ ပိူင်လူင် တႃႇဢဝ်ၶိူင်ႈၶူဝ်းဢၼ်ထွင်ၶမ်းၸိူဝ်းၼႆႉ မႃးဝႆႉငၢႆႈ ။

လွင်ႈၸိူဝ်းၼႆႉ ဢမ်ႇႁၼ်ၶဝ် ယွၼ်ႉၶႂၢင်ႉ သပ်းၸႅင်ႈသင်တီႈၵူၼ်းမိူင်း ၊ ဢမ်ႇထၢမ်ၵူၼ်းဝၢၼ်ႈဝႃႈ ၽွမ်ႉဢမ်ႇၽွမ်ႉ ၼႆ
ၵူၼ်းထုင်ႉၼမ်ႉမႃႉၵေႃႉၼိုင်ႈလၢတ်ႈၼႄၼင်ႇၼႆ –

ၶဝ်ယၢမ်ႈမႃးလၢတ်ႈ ပီႈၼွင်ႉၼွင်ၼူၺ်းဝႃႈ ႁဝ်းတေမႃးၶုတ်းၶမ်း ၊ ၵူၺ်းၵႃႈ သူၵူၼ်းဝၢၼ်ႈပၼ်ႁႃႉဢမ်ႇပၼ်ႁႃႉတႄႉၵေႃႈ ၶဝ်ဢမ်ႇထၢမ် ။ ႁဝ်းတေမႃးတႄႇၶုတ်းၶမ်း ႁဝ်းတေဢဝ် ၶိူင်ႈၸႂ်ႉတၢင်းတိုဝ်းႁဝ်းမႃး မႃးဝႆႉထႃႈ ။ ၵူၺ်းႁဵတ်းတႄႉပႆႇႁဵတ်းၼင်ႇၵဝ်ႇ ။ ဢၼ်ၵူၼ်းမိူင်းတေပၼ်ႁႃႉဢမ်ႇပၼ်တႄႉ ၶဝ်ဢမ်ႇထၢမ်

ၶိူင်ႈဢၼ်ထွင်ၶမ်းၼၼ်ႉ သိုၵ်းၵဝ်ႈၵၢင်ႉဢဝ်မႃး ဝၢင်းဝႆႉႁိမ်းၾင်ႇၼမ်ႉပွင်ႈၼၼ်ႉ မွၵ်ႈ ၶၢဝ်းတၢင်း 2 ဝူင်ႈ ၼႆႉယဝ်ႉၼႆ ၵူၼ်းပိုၼ်ႉတီႈသိုပ်ႇလၢတ်ႈ ။

ႁိမ်းႁွမ်းၸိူဝ်းၼႆႉ မီးဝၢၼ်ႈလူင် ဝၢၼ်ႈၼွင်ၼူၺ်း ဝၢၼ်ႈၵုင်းပဝ်းၸိူဝ်းၼႆႉ ၼိုင်ႈဝၢၼ်ႈလႂ် လင်ၶႃးႁိူၼ်း မီး ဢမ်ႇယွမ်း 90 ။ ထုင်ႉၼမ်ႉမႃႉၼႆႉပဵၼ်ထုင်ႉႁၢင်ႈလီတႃ မီးသၽႃႇဝ ၶဵဝ်ၸမ်ႉၼမ်ႉလိူင်ႇ ၾုၼ်ႇငႂ်ႈလီလႄႈ သူၼ်မၢၵ်ႇၸွၵ်းမၢၵ်ႇဝၢၼ် ပူင်ႇမၢၵ်ႈၵိုၼ်းၼမ်။ ၵူၼ်းပိုၼ်ႉတီႈ လႆႈပိုင်ႈဢိင်ၸႂ်ယႂ်ႇၵၢၼ်ႁႃၵိၼ်လဵင်ႉတွင်ႉ လူၺ်ႈၽုၵ်ႇမၢၵ်ႇဝၢၼ်ႈမၢၵ်ႇၸွၵ်း ၸဵမ်ပၢၼ်ပူႇမွၼ်ႇၼၢႆးယႃႈ။

ၵူၺ်းၵႃႈၺႃးၸဝ်ႈငိုၼ်းသႃး ၸဝ်ႈပၢႆးမၢၵ်ႈမီး ဢိၵ်ႇၸုမ်းယိပ်းၵွင်ႈ ၽူႈမီးဢႃႇၼႃႇၶဝ် ၶဝ်ႈမႃးၼႂ်းထုင်ႉၼမ်ႉမႃႉသေ ပၼ်တၢင်းတုၵ်ႉၸႂ်ၵူၼ်းမိူင်းမႃး ၶၢဝ်းတၢင်း 10 ပီပၢႆယဝ်ႉ။ တေႃႇထိုင်ဝၼ်းမိူဝ်ႈၼႆႉၵူၼ်းမိူင်းဢမ်ႇၸၢင်ႈပိုင်ႈဢိင်ၸႂ်ယႂ်ႇၽႂ်။

ၼႂ်းထုင်ႉၼမ်ႉမႃႉၼႆႉ မီးသိုၵ်း SSPP/SSA တူင်ႉၼိုင်ဝႆႉယူႇသေတႃႉ ဢိင်ၼိူဝ် လွင်ႈသိုၵ်းၶႄႇၵဝ်ႈၵၢင်ႉ တေၶုတ်းၶမ်းၼႆႉသေ ပႆႇႁၼ်ဢွၵ်ႇသဵင်သင် ။ ၵူၼ်းမိူင်းတႄႉ လွမ်မႆႈၸႂ် ၵူဝ်ၵၢၼ်ၶုတ်းၶမ်း မႃးပဵၼ်ၽေးတေႃႇသိင်ႇဝႅတ်ႉလွမ်ႉလႄႈသင် ၊ တုမ်ႉတိူဝ်ႉလွင်ႈယူႇသဝ်းၵိၼ်သၢင်ႈၵူၼ်းဝၢၼ်ႈပႃးဝႃႈၼႆ။

ဢၼ်တေၸၢင်ႈတုမ်ႉတိူဝ်ႉၼႆႉ တေမီးသူၼ်ပီႈၼွင်ႉၼွင်ၼူၺ်းၶဝ် ၊ တေမီးသူၼ်မၢၵ်ႇဝၢၼ် ၊ သူၼ်ၶဝ်ႈၵၢပ်ႇၶဝ်ၸိူဝ်းၼႆႉ။ ၶဝ်ႈၵၢပ်ႇၼႆႉ ၶၢဝ်းၼႆႉၶဝ်ၽုၵ်ႇသေ ပေႃး ၸမ်ဢွၵ်ႇဝႃႇမႃး သမ်ႉပေႃးလူဝ်ႇၵၢၼ်ႉယဝ်ႉၶႃႈၼႃႇ ။

ၵွၼ်ႇပႆႇမီးပၼ်ႁႃၸိူဝ်းၼႆႉၵေႃႈ ႁူဝ်လိူၼ်ၵျၼ်ႊၼိဝ်ႊရီႊ 2026 ၼႆႉ သိုၵ်းၶႄႇၵဝ်ႈၵၢင်ႉ ဢဝ်ဢဵၼ်ႁႅင်းသိုၵ်းၶဝ်သေ ယုၵ်ႉတၢင်ႇဢဝ် ၶိူင်ႈၶုတ်းထၢၼ်ႇႁိၼ်ၸိူဝ်းၼႆႉ မႃးဝၢင်းဝႆႉႁိမ်းၾင်ႇၼမ်ႉမႃႉ ဢွင်ႈတီႈၶုတ်းထၢၼ်ႇႁိၼ်ၵဝ်ႇ ဢၼ်မီးႁိမ်းဝၢၼ်ႈၼႃးၼၢင်း ၊ ပဵၼ်ဢွင်ႈတီႈ ဢၼ်ၶွမ်ႊပၼီႊၶဝ်ၶုတ်းဝႆႉ မိူဝ်ႈ ၽႅၼ်ယၼ်ႇသိုၵ်း 1027 ပႆႇတႄႇၼၼ်ႉဝႃႈၼႆ။

မိူဝ်ႈသိုၵ်းၶႄႇၵဝ်ႈၵၢင်ႉၶဝ် တေဢၢၼ်းၸုပ်ႇၼမ်ႉ ၼႂ်းထၢင်ၶုတ်းထၢၼ်ႇႁိၼ်ၵဝ်ႇၼၼ်ႉ ထွၵ်ႇပႅတ်ႈၼႂ်းၵေးၼမ်ႉမႃႉၼၼ်ႉ သိုၵ်း SSPP သမ်ႉႁႄႉႁၢမ်ႈ ။ ၾၢႆႇသိုၵ်းၶႄႇၵဝ်ႈၵၢင်ႉလၢတ်ႈဝႃႈ ၶဝ်လႆႈၶေႃႈၸီႉသင်ႇ ၸၼ်ႉပႃႈၼိူဝ် ၵူၼ်းလူင်ၸၼ်ႉထီႉ 2 တီႈလၢဝ်ႇၵၢႆး မႃးလႄႈ ၸင်ႇတေလူင်းမိုဝ်းႁဵတ်းဝႃႈၼႆတွပ်ႇၶိုၼ်း ။ ႁဵတ်းၼၼ်သေ တင်းသွင်ၾၢႆႇ ယၢမ်ႈၶဵင်ႈၶႅင်ၵၼ် မိူဝ်ႈႁူဝ်ပီ 2026 ၼႆႉ ၼႆ ၵူၼ်းပိုၼ်ႉတီႈသိုပ်ႇလၢတ်ႈ။

တႄႇဢဝ် လိူၼ်ၾႅပ်ႊပိဝ်ႊရီႊ 2026 ၼၼ်ႉမႃး တင်းသွင်ၾၢႆႇ ယဵၼ်ဝႆႉသေတႃႉ ၶိူင်ႈၶူဝ်း ဢၼ်သိုၵ်းၶႄႇၵဝ်ႈၵၢင်ႉ ဢၢၼ်းၶုတ်းထၢၼ်ႇႁိၼ် မိူၼ်ၼင်ႇ ၶူင်ႉလွတ်ႇၸုပ်ႇၼမ်ႉ ၸိူဝ်းၼႆႉ ၵိုတ်းၶင်ႉဝႆႉ ၸွမ်းၾင်ႇၼမ်ႉမႃႉၼၼ်ႉ ထႅင်ႈတင်းၼမ် ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။