ၼႂ်းႁၢင်လိူၼ်ၵျူႊလၢႆႊၼႆႉ ၵူၼ်းမိူင်းၸိူဝ်းယူႇၼႂ်းဝဵင်းလႃႈသဵဝ်ႈ ၵႆႉႁူမ်ႈၵၼ်တီႉၺွပ်း ၽူႈလၵ်ႉၼႂ်းပွၵ်ႉ ၼႂ်းယွမ်ႇသေ ထၢႆႇငဝ်းႁၢင်ႈသဵင် တၢင်ႇၶိုၼ်ႈၼိူဝ်သိုဝ်ႇတူင်ႇဝူင်းၵူၼ်း ႁဵတ်း ႁႂ်ႈၵူၼ်းတင်းမိူင်းႁူႉႁၼ်ၸွမ်း လွင်ႈဝႃႈ မိူင်းလႃႈသဵဝ်ႈဢမ်ႇမီးလွင်ႈႁူမ်ႇလူမ်ႈ လွင်ႈၼႆႉၽူႈၵွၼ်းပွၵ်ႉ ႁွင်ႉၵူၼ်းမိူင်းပိုၼ်ႉတီႈႁဵတ်းပၢင်ၵုမ်သေ ႁေႉႁၢမ်ႈ ယႃႇႁႂ်ႈလႆႈထၢႆႇႁၢင်ႈတၢင်ႇ သိုဝ်ႇ ၼႆယဝ်ႉ။

ၶၢဝ်းတၢင်းလိူၼ်ၵျုၼ်ႊ မႃးထိုင် လိူၼ်ၵျူႊလၢႆႊၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်ၼႂ်းပွၵ်ႉ 9၊ ပွၵ်ႉ10 ဝဵင်းလႃႈသဵဝ်ႈ ၊ ၾၢႆႇၸဝ်ႈၼႃႈတီႈပလိၵ်ႈ လႄႈ ၽူႈမီးပုၼ်ႈၽွၼ်းၶဝ် ဢမ်ႇ ၸတ်းၵၢၼ် ဢမ်ႇတီႉၺွပ်းပၼ်လႆႈတဵမ်တီႈလႄႈ ၵူၼ်းမိူင်းၸင်ႇလႆႈႁူမ်ႈၵၼ် ၸတ်းၽႅၼ်သေ ပႂ်ႉၺွပ်းၽူႈလၵ်ႉႁင်းၵူၺ်း၊ ယဝ်ႉဢဝ် သူင်ႇမွပ်ႈပၼ် ၼႂ်းမိုဝ်းၸုမ်းပလိၵ်ႈ ၼႆယဝ်ႉ။

ၵူၼ်းမိူင်းၵေႃႉယူႇၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ “ၵွၼ်းပွၵ်ႉၵွၼ်းဢိူင်ႇၶဝ် ႁွင်ႉပၢင်ၵုမ်ႁႄ လၢတ်ႈဝႃႈ ၸွႆႈၵၼ်ၺွပ်းပၼ်ၽူႈလၵ်ႉတႄႉ ယိၼ်းၸူမ်းယူႇ ၵူၺ်းၵႃႈ ယႃႇပေႇထၢႆႇႁၢင်ႈ တၢင်ႇၶိုၼ်ႈၼိူဝ်ဢွၼ်ႊလၢႆႊ။ ပေႃးတီႉလႆႈယဝ်ႉၵေႃႈ ၶႂ်ႈႁႂ်ႈသူင်ႇပၼ်ၼႂ်းမိုဝ်းယႄး (ပလိၵ်ႈ) ၶဝ်ယဵၼ်ယဵၼ် ” ဝႃႈၼႆ။

ၸွမ်းၼင်ႇၶေႃႈၸီႉသင်ႇ ၽူႈၵွၼ်းၸႄႈဝဵင်း ၼႂ်းဝဵင်းလႃႈသဵဝ်ႈသေ ၽူႈၵွၼ်းပွၵ်ႉၶဝ် ႁွင်ႉၵူၼ်းမိူင်း ၸွမ်းၼႂ်း ပွၵ်ႉ ၼိုင်ႈႁိူၼ်းၼိုင်ႈၵေႃႉ မိူဝ်ႈဝၼ်းတီႈ 25 လိူၼ်ၵျူႊလၢႆႊၼၼ်ႉသေ ႁဵတ်းပၢင်ၵုမ်ၵၼ် ။

ၼႂ်းပၢင်ၵုမ်ၼၼ်ႉ ၽူႈၵွၼ်းပွၵ်ႉၶဝ် လၢတ်ႈဝႃႈ- ပေႃးဢဝ်လွင်ႈၶၢဝ်ႇ ငၢဝ်းဢမ်ႇလီ ပိူင်ပဵၼ်ၼႂ်းဝဵင်းတၢင်ႇၶိုၼ်ႈသိုဝ်ႇ ႁဵတ်းႁႂ်ႈၸိုဝ်ႈသဵင်ႈ ဝဵင်းလူႉၸိုင် တေၸၢင်ႈၺႃးဢဝ်လိူင်ႈဝႃႈၼႆ ။ ၵူၺ်းၵႃႈ လွင်ႈဢမ်ႇလီ ဢၼ်ဝႃႈၼၼ်ႉ ပဵၼ်သႅၼ်းၸိူင်ႉႁိုဝ်လႄႈ ၶၢဝ်ႇမဵဝ်းလႂ်ၼႆၼၼ်ႉ ဢမ်ႇလၢတ်ႈႁူဝ်ယွႆႈတႅတ်ႈတေႃး- ၵူၼ်းပိုၼ်ႉတီႈလၢတ်ႈၼင်ႇၼႆ။

လိူၼ်ၵျူႊလၢႆႊၼႆႉၵူၺ်း ၵူၼ်းမိူင်းၼႂ်းဝဵင်းလႃႈသဵဝ်ႈ ႁူမ်ႈၵၼ် တီႉၺွပ်းဢဝ် ၵူၼ်းၵေႃႉမဝ်းယႃႈသေ ပႃးၵွင်ႈႁႃလွၵ်ႇငိုတ်ႈၵူၼ်းၼႂ်းပွၵ်ႉ၊ ၽူႈလၵ်ႉရူတ်ႉၶိူင်ႈ လႄႈ ၵႃးၸိူဝ်းၼႆႉသေ သူင်ႇမွပ်ႈပၼ်ၼႂ်းမိုဝ်း ၸုမ်းပလိၵ်ႈ ဝဵင်းလႃႈသဵဝ်ႈ။

ဝၢႆးလင် ပဵၼ်ပၢင်တိုၵ်းၽႅၼ်ယၼ်ႇသိုၵ်း 1027 မႃး ၽွင်းသိုၵ်းၶႄႇၵဝ်ႈၵၢင်ႉ ၵုမ်းၵမ် ပၼ်ႇၵၢၼ်ၽွင်းငမ်းယူႇၼၼ်ႉ ပၢင်တေႃႇလွင်းၵေႃႈ ပိုတ်ႇၼမ်မႃးႁႅင်းတေႉတေႉသေ ႁဵတ်းႁႂ်ႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၾိင်ႈယၢမ်ႈလူႉ – ၵူၼ်းၸူၼ် ၵူၼ်းလၵ်ႉ လိူင်ႇၼမ်၊ လွင်ႈၵေႃႇၵၢၼ်ႁၢႆႉၵေႃႈၶႂ်ႈဝႃႈၵႆႉမီးယူႇတႃႇသေႇ။

ထိုင်ယၢမ်းသိုၵ်းမၢၼ်ႈယိုတ်းမိူင်းၶဝ်ႈမႃးၵုမ်းၵမ်ပၼ်ႇၵၢၼ်ၽွင်းငမ်း ပၢင်တေႃႇလွင်း လူတ်းယွမ်းၵႂႃႇသေတႃႉ ၽူႈလၵ်ႉၸၵ်ႉၶုတ်ႈၼႆႉ ဢမ်ႇႁၢႆၵႂႃႇၸွမ်း။ ၽူႈလၵ်ႉမၢင်ၸိူဝ်း ပၢႆဢဝ်ၵွင်ႈလွၵ်ႇငိုတ်ႈ တီႉၺွပ်းဢဝ်ၵူၼ်းၵႂႃႇ ယွၼ်းၵႃႈထုတ်ႇတူဝ်၊ မၢင်ၸိူဝ်းၶႃႈႁႅမ်တၢႆ ၸဝ်ႈႁိူၼ်းၵႂႃႇပႃးထႅင်ႈလူးၵွၼ်ႇၼႆ – ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈ လၢတ်ႈ။

ၾၢႆႇၸဝ်ႈၼႃႈတီႈပလိၵ်ႈၶဝ်ၵေႃႈ ဢမ်ႇၶတ်းၸႂ်လမ်းသွၵ်ႈႁႃ တီႉၺွပ်းဢဝ် ၽူႈလၵ်ႉၸၵ်ႉၶုတ်ႈ ၵူၼ်းၸူၼ် လႆႈတေႉတေႉဝႃႈဝႃႈလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ- ၼႆယဝ်ႉ။

ပၼ်ႁႃ ၵူၼ်းၸူၼ်ၵေႃႉၶၢႆႁႅမ် ၼၢင်းယိင်းသွင်ၵေႃႈ ၼႂ်းပွၵ်ႉ 10 ၼိူဝ်သဵၼ်ႈတၢင်းၵႂႃႇ တိူင်းသိုၵ်းမၢၼ်ႈ ဝဵင်းလႃႈသဵဝ်ႈၼၼ်ႉၵေႃႈ ႁၢၼ်ႉတေႃႇထိုင်ယၢမ်းလဵဝ် ပႆႇတီႉၺွပ်းလႆႈ ၵူၼ်း ၵေႃႉပူၼ်ႉပႅၼ်တၢင်းၽိတ်း – ၼႆယဝ်ႉ။