သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇဝႃႈ တီႉၺွပ်းဢဝ်လႆႈ ၵူၼ်းႁဵတ်းၵၢၼ်ၵျႃႊၽျႅၼ်ႉ 56 ၵေႃႉ ၼႂ်းဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇ။ ၸိူဝ်းၺႃးတီႉၼၼ်ႉ ပႃးၵူၼ်းမိူင်းၶႄႇ 5 ၵေႃႉ ဝႃႈၼႆ။
မိူဝ်ႈဝႃးဝၼ်းတီႈ 9 လိူၼ်သႅပ်ႉထႅမ်ႊပိူဝ်ႊ ယၢမ်းတၢမ်းၶမ်ႈ သိုၵ်းမၢၼ်ႈၶဝ်ႈသွၵ်ႈတဝ် ၵူတ်ႇထတ်း ၸွမ်းပွၵ်ႉဝၢၼ်ႈၵွင်း ၼႂ်းဝဵင်းတႃႈၶီႈလဵၵ်း တီႉဢဝ်လႆႈ ၵူၼ်းမိူင်းၶႄႇ 5 ၵေႃႉ ၊ ၵူၼ်းမိူင်းမၢၼ်ႈ ၸၢႆး 25 ၵေႃႉ ၼၢင်းယိင်း 26 ၵေႃႉ ၸိူဝ်းတိုၵ်ႉႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး ဝႃႈၼႆ။
ၵူၼ်းမိူင်းပိုၼ်ႉတီႈၵေႃႉယူႇဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၶမ်ႈဝႃး သိုၵ်းမၢၼ်ႈၶဝ် ၶဝ်ႈၺွပ်းၵူၼ်းႁဵတ်းၵၢၼ်ၵျႃႊၽျႅၼ်ႉ တီႈၼိုင်ႈ။ ၼႂ်းဝဵင်းႁဝ်းၼႆႉတႄႉ ၵျႃႊၽျႅၼ်ႉ၊ ပၢင်တေႃႇလွင်းၵူႈသႅၼ်းသႅၼ်း၊ ႁူင်းၵႃႇသီႇၼူဝ်ႇၸိူဝ်းၼႆႉ မီးၼမ်ၼႃႇ။ ၵႃႈပေႉၶႂ်ႈၺွပ်းလႃႈ တိုၼ်းမႃႇမူတ်းလႆႈငၢႆႈငၢႆႈ။ ၶဝ်ၵူၺ်းၺွပ်းဢဝ်ႁဵတ်းၼႃႈတိူဝ်ႈမၼ်းလၢႆလၢႆ။ ၶဝ်ၺွပ်းမႃး ၵေႃႈႁိုင်ယဝ်ႉ။ ပေႃးၶဝ်တေၶဝ်ႈၺွပ်း ၵူၼ်းႁဵတ်းၵၢၼ်ၵျႃႊၽျႅၼ်ႉၶဝ် ပေႃးပၢႆႈထႃႈယဝ်ႉ။ ပေႃးငဝ်းလၢႆးယဵၼ်ယဝ်ႉၵေႃႈ ၵူၼ်းႁဵတ်းၵၢၼ်ၵျႃႊၽျႅၼ်ႉ သထေးၸိူဝ်းၼၼ်ႉ ပေႃးၶိုၼ်းမႃးသင်ႇၵၢၼ် ပၼ်ႇၵၢၼ်ၶဝ်ၶိုၼ်းယဝ်ႉ” ဝႃႈၼႆ။
လႆႈႁူႉဝႃႈ သိုၵ်းမၢၼ်ႈယိုတ်းမိူင်း တီႉၺွပ်းဢဝ်လႆႈပႃး ၶိူင်ႈၸႂ်ႉၶူဝ်းတိုဝ်း ၼႂ်းၵၢၼ်လွၵ်ႇလႅၼ်ၵိၼ်ငိုၼ်းတင်း ဢွၼ်ႊလၢႆႊ ၶွမ်ႊပိဝ်ႊတိူဝ်ႊ ၵူႈသႅၼ်းသႅၼ်း 60 လုၵ်ႈ၊ ၶိူင်းဝၢႆႇၽၢႆႇ 5 လုၵ်ႈ၊ ၵႃးဢၼ်ဢမ်ႇမီးလၢႆႇၸိၼ်ႇ 2 လမ်း လႄႈ ၶိူင်ႈၶူဝ်းၸိူဝ်းၵဵဝ်ႇၶွင်ႈၼၼ်ႉထႅင်ႈတင်းၼမ် ၼႆယဝ်ႉ။
ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး ႁိုဝ် ၵျႃႊၽျႅၼ်ႉ၊ ပၢင်တေႃႇလွင်း ၵႃႇသီႇၼူဝ်ႇ ၵၢၼ်ငၢၼ်းၸိူဝ်းၽိတ်းပၵ်းပိူင်မၢႆမီႈၼၼ်ႉ မီးၸွတ်ႇၽႄႈၵႂႃႇမိူင်းတႆးပတ်းပိုၼ်ႉသေ ၸိူဝ်း ႁပ်ႉပုၼ်ႈၽွၼ်းဢဝ်ႁူမ်ႇလူမ်ႈဝႆႉပၼ်ၵေႃႈ လႆႈႁၼ်ပဵၼ်ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ လႄႈ ပျီႇတူႉၸိတ်ႉၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈယိုတ်းမိူင်းၵမ်ႈၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ