ၾူၼ်တူၵ်းထပ်းၵၼ်လၢႆလၢႆဝၼ်း ႁဵတ်းႁႂ်ႈလိၼ် ၵူၼ်ႇပင်းသႂ်ႇ ၵူၼ်းဝၢၼ်ႈ 4 ၵေႃႉပေႃႈမႄႈလုၵ်ႈ တၢႆထင်တီႈ တီႈဝၢၼ်ႈႁူဝ်သႅင် ထုင်ႉသၢႆးလႅင် ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း ။
မိူဝ်ႈဝႃး ဝၼ်းတီႈ 8/9/2026 ယၢမ်းၵင်ၼႂ် 4 မူင်း လိၼ်ၵူၼ်ႇတဵင်သႂ်ႇ ႁိူၼ်း တီႈဝၢၼ်ႈ ႁူဝ်သႅင် ၊ ႁိူၼ်းယေးလူႉၵွႆ 2 လင် ၵူၼ်းတၢႆ ၵိုၵ်းႁိူၼ်း 4 ၵေႃႉပေႃႈမႄႈလုၵ်ႈ ။
ၵူၼ်းမိူင်းသူႈလၢတ်ႈၽူႈတွႆႇႁွၵ်ႈဝႃႈ – “ ၶၢဝ်းၼႆႉ ၾူၼ်တူၵ်းႁႅင်းၼႃႇ ၊ ပေႃးၾူၼ်တူၵ်းႁႅင်းၼႆႉ လႆႈမႆႈၸႂ်လွင်ႈလိၼ်ၵူၼ်ႇ ၊ မိူဝ်ႈဝႃးၼႆႉ လိူၼ်ၵူၼ်ႇသႂ်ႇႁိူၼ်းသွင်လင် ပေႃႈမႄႈလုၵ်ႈ 4 ၵေႃႉ တၢႆထင်တီႈ ”- ဝႃႈၼႆ ။
ဢၼ်လိၼ်ၵူၼ်ႇတဵင်သႂ်ႇသေတၢႆၵႂႃႇၼၼ်ႉပဵၼ် ၵေႃႉပဵၼ်ပေႃႈ ဢႃယု လႆႈ 41 ပီ ၊ ၵေႃႉပဵၼ်မႄႈၵေႃႈဢႃယုႁိမ်းၸမ် 40 ပီ လႄႈလုၵ်ႈၸၢႆး 2 ၵေႃႉ ဢႃယု 13 ပီ ၵေႃႉၼိုင်ႈ လႄႈ ဢႃယု 16 ပီ ၵေႃႉၼိုင်ႈ – လႆႈႁူႉၼင်ႇၼႆ။
တီႈဝဵင်းမိူင်းသူႈၼႆႉ ပေႃးပဵၼ်ၶၢဝ်းၾူၼ် ၵူၼ်းမိူင်းလႆႈထူပ်းၽေးၼမ်ႉထူမ်ႈၼမ်ႉၼွင်း လိၼ်လွႆ ၵူၼ်ႇပင်းတႃႇသေႇလႄႈ ၵူၼ်းၸိူဝ်းယူႇၸွမ်းတၢပ်ႈႁူၺ်ႈတိၼ်လွႆ ၶႂ်ႈႁႂ်ႈၾၢင်ႉယူႇၾၢင်ႉၵိၼ်၊ ၾၢင်ႉထွမ်ႇၶၢဝ်ႇငဝ်းသေၵမ်း – ၵူၼ်းပိုၼ်ႉတီႈလၢတ်ႈ ၼင်ႇၼႆ။
ႁွင်ႈၵၢၼ်ၾၢႆႇပႂ်ႉတူၺ်းလၢမ်းၶၢတ်ႈ ၾိင်ႈၾႃႉရႃႇသီႇ တီႈၼေႇပျီႇတေႃႇတႄႉဢွၵ်ႇဝႆႉဝႃႈ ႁႅင်းလုမ်းမုၼ်ႊသုၼ်ႊဢၼ်လုၵ်ႉတၢင်းၾင်ႇပၢင်ႇလၢႆႇပင်ႊၵလႃႊလႄႈ ပၢင်ႇလၢႆႇမုတ်ႉတမ တိုၵ်ႉၽတ်ႉပဝ်ႇၶိုၼ်ႈမႃးႁႅင်းယူႇဢမ်ႇထၢတ်ႇ။ ဝၼ်းမိူဝ်ႈၼႆႉၵေႃႈ ၼႂ်းမိူင်းတႆးပွတ်းၸၢၼ်းၾူၼ်တိုၵ်ႉတူၵ်းယူႇဢမ်ႇထၢတ်ႇ။ လၢမ်းၶၢတ်ႈဝႃႈတေတူၵ်းတေႃႇထိုင်ဝၼ်းမိူဝ်ႈၽုၵ်ႈ။ ၵွပ်ႈၼႆလႄႈ ၵူၼ်းၸိူဝ်းယူႇႁိမ်းၸမ်ႁူၺ်ႈလွႆ လႄႈၾင်ႇႁိုၵ်းၸိူဝ်းၼႆႉ ႁႂ်ႈၾၢင်ႉၽေးၼမ်ႉၽေးၼွင် ၽေးလိၼ်ၵူၼ်ႇသေၵမ်း- ဝႃႈၼႆဝႆႉ။
မိူၼ်ၼင်ႇၼႆ ၼႂ်းလိူၼ်ဢေႃးၵၢတ်ႉသ် ပူၼ်ႉမႃးၼႆႉၵေႃႈ ယွၼ်ႉၾူၼ်တူၵ်းဢမ်ႇထၢတ်ႇ ၼမ်ႉလွႆ ၼွင်းထူမ်ႈၶဝ်ႈ ၼႂ်းပွၵ်ႉတီႈတႅမ်ႇတီႈၶူင်ႈ 3 ပွၵ်ႉ တီႈဝဵင်းမိူင်းသူႈ ႁဵတ်းႁႂ်ႈ ၵူၼ်းမိူင်းလႆႈထူပ်း ၽေးၼမ်ႉထူမ်ႈ ၼမ်ႉၼွင်း ဝႃႈၼႆ ။
ႁၢင်ႈ – လိၼ်ၵူၼ်ႇတီႈဝၢၼ်ႈႁူဝ်သႅင် ( crd to owner )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ