ဝၼ်းတီႈ 1/11/2025 မိူဝ်ႈၶမ်ႈဝႃး ၾူၼ်ၵိုင်ႉၵၢင်ႉတူၵ်းတီႈဝဵင်းတူၼ်ႈတီးၸိုင်ႈတႆးပွတ်းၸၢၼ်း ။ ၵူၼ်းၼပ်ႉႁူဝ်သႅၼ်ၵေႃႉ ၼႂ်းပၢင်ႇပွႆႇႁူင်းၾႆးမိၼ် ဢွၼ်ၵၼ်လႅၼ်ႈပၢႆႈႁႃတီႈသေႃႉၾူၼ် လူမ်ႉယဵပ်ႇၺႃးၵၼ်မၢတ်ႇၸဵပ်း 70 ပၢႆ။
ပၢင်ပွႆးတသွင်ႇတၢႆႇ လိူၼ်သိပ်းသွင် ပွႆးႁူင်းၾႆးမိၼ်တီႈဝဵင်းတူၼ်ႈတီး တႄႇၸတ်းမိူဝ်ႈဝၼ်းတီႈ 29/10/2025 ၊ ထိုင်မႃးဝၼ်းတီႈ 1/11/2025 ၼႃႈၾႃႉတႃၾူၼ်ၵေႃႈၸိုၼ်ႈပၢင်ႇယူႇသေတႃႉ ၾူၼ်ၵိုင်ႉၵၢင်ႉတူၵ်းႁႃႇယႂ်ႇလႄႈ ၵူၼ်းၼႂ်းပၢင်ႇႁူင်းၾႆးမိၼ် တႅၵ်ႇတိုၼ်ႇလႅၼ်ႈပၢႆႈၾူၼ်ႁႃတီႈသေႃႉၾူၼ်။
ၵူၼ်းၵႂႃႇၶဝ်ႈပွႆးၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ-“ ၵူၼ်းၼႆႉမၼ်းၵိုၼ်းၼႃႇဢႃးလႃးႁေ ၽိူဝ်ႇၾူၼ်ၵိုင်ႉၵၢင်ႉတူၵ်းၵေႃႈဢွၼ်ၵၼ် ပွႆးတိုၼ်ႇ။ လူမ်ႉလူမ်ႉယဵပ်ႇယဵပ်ႇၵၼ် ။ ႁွင်ႉႁွင်ႉႁႆႈႁႆႈ ။ လုၵ်ႈဢွၼ်ႇၵေႃႈႁၢႆ။ ၵူၼ်းလူင်ၵေႃႈၽၢတ်ႇၵၼ်။ မဝ်းလူမ်ႉၵေႃႈမီး ပဵၼ်လူမ်းၵေႃႈမီး။ ဢၼ်တၢႆတႄႉဢမ်ႇလႆႈငိၼ်း။ ဢၼ်မၢတ်ႇၸဵပ်းဝႃႇပဵၼ်လူမ်းဝႃႇၼႆႁေ ထိုင်ၵႂႃႇႁူင်းယႃတႄႉ ဢမ်ႇယွမ်း 70 ၵေႃႉၼႆႉယူႇၶႃႈယူဝ်ႉ ”- ဝႃႈၼႆ။
လွင်ႈၼႆႉ ၸုမ်းပရႁိတ ဢၼ်ပႂ်ႉၸွႆႈထႅမ်တီႈပၢင်ပွႆး လၢတ်ႈဝႆႉတီႈၶၢဝ်ႇ BBC တႄႉဝႃႈ ဢၼ်မၢတ်ႇၸဵပ်းဢိတ်းဢွတ်းသေ ၵႂႃႇမီးတီႈႁွင်ႈယႃ (သေးၶၢၼ်း)ႁိမ်းႁွမ်းၸိူဝ်းၼၼ်ႉမီးမွၵ်ႈ 20 ၵေႃႉ။ ဢၼ်မၢတ်ႇၸဵပ်းႁႅင်းသေ လႆႈဢဝ်ၵႂႃႇႁူင်းယႃလူင်ၸဝ်ႈၸၢမ်ႇထုၼ်း မီး 8 ၵေႃႉ။ ဢၼ်ဢဝ်ၵႂႃႇႁူင်းယႃသုၼ်ႇတူဝ်ၸိူဝ်းၼႆႉၵေႃႈမီးလႄႈတင်းမူတ်း ၵူၼ်းမၢတ်ႇၸဵပ်းဢမ်ႇယွမ်း 80 ၵေႃႉဝႃႈၼႆဝႆႉ။
တီႈၶၢဝ်ႇ BBC သိုပ်ႇတႅမ်ႈဝႆႉထႅင်ႈဝႃႈ ၶမ်ႈဝႃးဝၼ်းတီႈ 1/11/2025 ၼႆႉၵူၼ်းမႃးၶဝ်ႈပွႆး ဢမ်ႇယွမ်း 2 သႅၼ်ၵေႃႉ ။ ႁူင်းၾႆးမိၼ်သႅၼ်း ၸဵင်ႇၼပၢၼ်ႇ ႁၢင်ႈႁႅၼ်းမႃးတႃႇပွႆႇ 2 လုၵ်ႈ။ လုၵ်ႈၼိုင်ႈတႄႉၺႃးၾူၼ်ယမ်းသေၵွႆပႅတ်ႈ ။ လုၵ်ႈၼိုင်ႈတႄႉတၼ်းပွႆႇၶိုၼ်ႈၵႂႃႇလီငၢမ်း -လႆႈႁူႉၼင်ႇၼႆ။
ၵူၼ်းမိူင်းဝဵင်းတူၼ်ႈတီးၵေႃႈလၢတ်ႈၽူႈတွႆႇႁွၵ်ႈဝႃႈ ပီၼႆႉ ၵူၼ်းမႃးၶဝ်ႈပွႆး ၼမ်ႁႅင်းဝႆႉ။ ယွၼ်ႉပိူဝ်ႈ ပီၵၢႆလႄႈပီဢွၼ် ၵၢၼ်မိူင်းဢမ်ႇလီလႄႈ ဢမ်ႇမီးၵူၼ်းမႃးၶဝ်ႈပွႆး – ဝႃႈၼႆ။
ၸေႈၽိုၼ်ၶၢဝ်ႇၶွမ်ႇမသျိၼ်ႇသိုၵ်းမၢၼ်ႈတႄႉတႅမ်ႈဝႆႉဝႃႈ – “ ပီၼႆႉႁူင်းၾႆးမိၼ် ႁၢင်ႈတူဝ်သတ်း ဢၼ်ပွႆႇၵၢင်ဝၼ်း 258 လုၵ်ႈ၊ ႁူင်းၾႆးမိၼ်ဢၼ်ၼႄတၢင်းႁၢင်ႈလီၾႆး ဢၼ်ပွႆႇၵၢင်ၶိုၼ်းမီး 43 လုၵ်ႈ၊ ႁူင်းၾႆးမိၼ်သႅၼ်းယႂ်ႇ ဢၼ်မီးမွၵ်ႇၾႆး ႁၢင်ႈလီသုတ်း ဢၼ်ၶဝ်ႈပၢင်ၶႄႉၶႅင်ႇ မီး 37 လုၵ်ႈ” ဝႃႈၼႆဝႆႉ။
ၾၢႆႇလၢမ်းၶၢတ်ႈၾိင်ႈၾႃႉရႃႇသီႇတႄႉပိုၼ်ၽၢဝ်ႇဝႆႉဝႃႈ ၾူၼ်ၼႆႉၸၢင်ႈတူၵ်းထိုင်ဝၼ်းတီႈ 6/11/2025 ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ