မိူဝ်ႈၼႆႉ ဝၼ်းတီႈ 5 လိူၼ်ဢေႃးၵၢတ်ႉသ် ၾင်ႇႁိုၵ်းၵူၼ်ႇလူင်းတဵင်ၺႃးသႂ်ႇႁိူၼ်းယေးၵူၼ်းမိူင်း ၼႂ်းပွၵ်ႉပၢၼ်းမ ပွတ်းတူၵ်းဝဵင်းမိူင်းၵုတ်ႈ လူႉၵွႆၵႂႃႇ 2 လင် ၵူၼ်းမၢတ်ႇၸဵပ်းၵႂႃႇ 1 ၵေႃႉ ၼႆယဝ်ႉ။

ႁူဝ်လိူၼ်ဢေႃးၵၢတ်ႉသ်မႃးၼႆႉ ၾူၼ်တူၵ်းႁႅင်းၼႂ်းမိူင်းတႆးလၢႆလၢႆတီႈ မၢင်ဝဵင်းၼမ်ႉၼွင်း ၼမ်ႉႁူၺ်ႈၼမ်ႉလွႆၼွင်းႁႅင်း လုပ်ႇထူမ်ႈၶဝ်ႈထိုင်ၸွမ်းသဵၼ်ႈတၢင်း လႄႈ ႁိူၼ်းယေးၵူၼ်း မိူင်း ႁဵတ်းႁႂ်ႈၶၢဝ်းတၢင်းၸိူင်ႉၵၢတ်ႈ ၸိူဝ်းၼႆႉ။ ယၢမ်းလဵဝ် တီႈဝဵင်းမိူင်းၵုတ်ႈၵေႃႈ ၾင်ႇႁိုၵ်းၵူၼ်ႇတဵင်သႂ်ႇ ႁိူၼ်း ထိုင်တီႈလူႉၵွႆၵႂႃႇႁၢဝ်ႈႁႅင်း ၼႆယဝ်ႉ။

ၵူၼ်းမိူင်းၵေႃႉယူႇၼႂ်းဝဵင်းမိူင်းၵုတ်ႈလၢတ်ႈတီႈၽူႈတွႆႇႁွၵ်ႈဝႃႈ “ၾူၼ်မႃးထပ်းၵၼ်လၢႆဝၼ်း လိၼ်ၾင်ႇႁိုၵ်းၵူၼ်ႇသႂ်ႇၶၢဝ်းၵၢင်ၼႂ်ၸဝ်ႉ ၵတ်ႉၵႃႈဢမ်ႇတၼ်းတိူဝ်ႉၵူၼ်းၼမ်။ ႁိူၼ်းၼႆႉ ၵွႆၵႂႃႇသွင်လင်။ လႅဝ်ၽႅဝ်ႉ ယွၵ်းယွႆၵႂႃႇသဵင်ႈ။ တႃႇၵေႃႉၼိုင်ႈတႄႉ ပၢႆႈဢမ်ႇတၼ်းပူၼ်ႉႁိူၼ်းလႄႈ မၢတ်ႇၸဵပ်း ၵႂႃႇဢေႃႈ။ ၵူၼ်းၼႂ်းပွၵ်ႉဢွၼ်ၵၼ်ၸွႆႈၵၼ်ဢဝ်ၵႂႃႇယူတ်းယႃဝႆႉယဝ်ႉ ၶႃႈ။ ၶၢဝ်းၾူၼ်ႁႅင်းၸိူင်ႉၼႆ ၵူၼ်းၸိူဝ်းယူႇႁိမ်းၸမ်လွႆ၊ ၸမ်ၼမ်ႉၼႆႉ လီၾၢင်ႉၵၼ် ယူႇတေႉတေႉ” ၼႆယဝ်ႉ။

လႆႈႁူႉဝႃႈ ယၢမ်းလဵဝ် ၸုမ်းပရႁိတ လႄႈ ၶႂၢႆႇၶႃပႄလႅင် (ကြက်ခြေနီအသင်း) တင်း ၸုမ်းၶႄၾႆးပွတ်းတူၵ်းဝဵင်းမိူင်းၵုတ်ႈၶဝ် လႆႈၵႂႃႇၸွႆႈထႅမ် ၵူၼ်းၸိူဝ်းႁူပ်ႉၺႃးၽေးလိၼ် ၵူၼ်ႇတဵင် ႁိူၼ်းၼၼ်ႉဝႆႉယူႇ ဝႃႈၼႆ။

ၶၢဝ်းၾူၼ်ပီ 2026 ၼႆႉ ၾူၼ်ၵႆႉသိင်းထပ်းၵၼ်လၢႆဝၼ်း ႁဵတ်းႁႂ်ႈၼမ်ႉၼွင်းငၢႆႈၵူၺ်းဢမ်ႇၵႃး လိၼ်ၵေႃႈၸၢင်ႈၵူၼ်ႇပင်းငၢႆႈမိူၼ်ၵၼ်။ မိူၼ်ၼင်ႇ ဝဵင်းသႅၼ်ဝီၵေႃႈ ၵႄးၼမ်ႉတူႈၼွင်း ၶိုၼ်ႈလူၼ်ႈၾင်ႇ ထူမ်ႈတူင်ႈၼႃး လႄႈ သဵၼ်ႈတၢင်းၵႂႃႇမႃးၵူၼ်းမိူင်း ၼႂ်းႁၢင်လိူၼ်ၵျူႊလၢႆႊ တေႃႇထိုင် ႁူဝ်လိူၼ်ဢေႃးၵၢတ်ႉသ်ၼႆႉၵူၺ်း မီးၵႂႃႇ 5 ၵမ်းယဝ်ႉ။

မိူၼ်ၼၼ်ၼင်ႇၵဝ်ႇ ၼႂ်းႁူဝ်လိူၼ်ဢေႃးၵၢတ်ႉသ်ၼႆႉ ၾူၼ်တူၵ်းႁႅင်းၼႂ်းမိူင်းတႆးသေ ၵႄးၼမ်ႉလၢႆလၢႆတီႈ ၼွင်းလူၼ်ႉၾင်ႇ ၼမ်ႉႁူၺ်ႈၼမ်ႉပႃႇလုပ်ႇၼွင်းထူမ်ႈသႂ်ႇလေႃးထႅင်ႈ ၸွမ်း ၼႂ်းဝဵင်းၵျွၵ်ႉမႄး၊ သီႇပေႃႉ၊ လႃႈသဵဝ်ႈ၊ ထုင်ႉၼမ်ႉပွင်ႈ၊ ၼမ်ႉမ လႄႈ တၢင်းမိူင်းတႆးပွတ်းဢွၵ်ႇ ဝဵင်းတႃႈၶီႈ လဵၵ်း ၸဵမ်ၸိူဝ်းၼႆႉ။