မိူဝ်ႈၼႆႉ ဝၼ်းတီႈ 10 လိူၼ်မၢတ်ႉၶျ် ယၢမ်းၵၢင်ၼႂ် ၾူၼ်ၵိုင်ႉၵၢင်ႉတူၵ်း ၼႂ်းမိူင်းတႆးပွတ်းဢွၵ်ႇ ၼမ်ႉလုပ်ႇၼွင်းထူမ်ႈ ၸွမ်းပွၵ်ႉၸွမ်းယွမ်ႇ ၼႂ်းဝဵင်းတႃႈၶီႈလဵၵ်း ႁိမ်းၶူဝ်လႅၼ်လိၼ် မၢႆ 1 မိူင်းတႆး – မိူင်းထႆး ဝႃႈၼႆ။

ၼၢင်းယိင်းၵေႃႉယူႇၼႂ်းပိုၼ်ႉတီႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈတႃႈၶီႈလဵၵ်းၼႆႉတႄႉ ၾူၼ်တူၵ်းၵမ်းၼိုင်ႈၵူၺ်းၵေႃႈ ၼမ်ႉထူမ်ႈယဝ်ႉ။ ၸွမ်းၾင်ႇႁွင်ႈၵေးၼမ်ႉသၢႆ ဢၼ်ၶဝ်ၵင်ႈယႃႇႁႂ်ႈ ၼမ်ႉ ထူမ်ႈငၢႆႈၼၼ်ႉၵေႃႈ တမ်ႉပႆႇယဝ်ႉ။ ၼႆႉတမ်ႉပႆႇၸႂ်ႈၶၢဝ်းၾူၼ်ၵွၼ်ႇ။ ပေႃးထိုင်ၶၢဝ်းၾူၼ်မႃး တေႁဵတ်းႁိုဝ်ၵေႃႈဢမ်ႇႁူႉ။ တိုၵ်ႉလႆႈမႆႈၸႂ်ယူႇ” ဝႃႈၼႆ။

ယၢမ်းၵၢင်ၼႂ်ၸဝ်ႉ ယွၼ်ႉၾူၼ်တူၵ်းႁႅင်းသေ ၵွပ်ႈဢမ်ႇမီးႁွင်ႈတႃႇၼမ်ႉလႆလူင်းလီလီလႄႈ ၼမ်ႉၶိုၼ်ႈၼွင်းထူမ်ႈၵႂႃႇထိုင် ၸွမ်းပွၵ်ႉ။ ႁၢၼ်ႉတေႃႇထိုင် ယၢမ်းၵၢင်ဝၼ်း တီႈဝဵင်းတႃႈၶီႈလဵၵ်းၼႆႉ ယင်းတိုၵ်ႉလႆႈႁၼ်ၾႃႉၵၢမ်ႈဝႆႉယူႇၼႆ ၵူၼ်းမိူင်းပိုၼ်ႉတီႈလၢတ်ႈ။

ၼႂ်းဝၼ်းမိူဝ်ႈၼႆႉ (10/3/2026) ၾူၼ်တူၵ်းၼႂ်းဝဵင်းတႃႈၶီႈလဵၵ်းၵူၺ်းဢမ်ႇၵႃး တီႈဝဵင်းၵဵင်းတုင်၊ မိူင်းၽျၢၵ်ႈ၊ မိူင်းလႃး၊ မိူင်းသၢတ်ႇ၊ တႃႈလိူဝ်ႇ လႄႈ မိူင်းယု ၸိူဝ်းၼႆႉၵေႃႈ ၾူၼ်တူၵ်းယူႇမိူၼ်ၵၼ် ၼႆယဝ်ႉ။

ၸွမ်းၸႄႈဝဵင်းၼႂ်းမိူင်းတႆးပွတ်းဢွၵ်ႇၼႆႉ မီးၵၢၼ်ၶုတ်းႁႄႈၶုတ်းၶမ်းလိူင်ႇၼမ်ႁႅင်းမႃးတေႉတေႉသေ ၼိုင်ႈပီ ၼိုင်ႈပီ ပေႃးၾူၼ်တူၵ်းၸိုင် ၼမ်ႉထူမ်ႈၼွင်းသႂ်ႇ ၸွမ်းပွၵ်ႉယွမ်ႇ ၸိူဝ်းပဵၼ်ပိုၼ်ႉတီႈတႅမ်ႇၼၼ်ႉႁႅင်းမႃးၵူႈဝၼ်း ၼႆယဝ်ႉ။