မိူဝ်ႈဝၼ်းတီႈ 12 ယၢမ်းတၢမ်းၶမ်ႈ 4 မူင်းၶိုင်ႈ ၸဝ်ႈၼႃႈတီႈပလိၵ်ႈ ဢဝ်ၶိူင်ႈ PSMS သေၵူတ်ႇထတ်း ၵူၼ်းၸိူဝ်းတေလုၵ်ႉ တီႈဝၢင်းႁိူဝ်းမိၼ်ဝဵင်းတႃႈၶီႈလဵၵ်း ၵႂႃႇ ဝၢင်းႁိူဝ်းမိၼ် ႁၢႆး ဝူဝ်း ၼၢင်းယိင်းၵေႃႉၼိုင်ႈ ၺႃးတီႉၺွပ်းၵႂႃႇ ၼႆယဝ်ႉ။
ၼၢင်းယိင်းၵေႃႉၺႃးတိႉၺွပ်းၵႂႃႇၼၼ်ႉ ပဵၼ်ၸၢဝ်းၶိူဝ်းမၢၼ်ႈ ၸိုဝ်ႈႁွင်ႉ မဢေးငဵင်းၸၢၼ်ႇ မိူဝ်ႈပီ 2024 ၼၼ်ႉ ၺႃးၸဝ်ႈၼႃႈတီႈပလိၵ်ႈဝဵင်းတႃႈၶီႈလဵၵ်း မၵ်းမၼ်ႈမၼ်းၼၢင်းဝႆႉပဵၼ်ၵူၼ်းမီးတၢင်းၽိတ်း ပၢႆႈၶွၵ်ႈၶင်ဝႆႉ ၼႆယဝ်ႉ။
ၵူၼ်းမိူင်းၵေႃႉၸမ်ၸႂ်ၵၼ်တင်း ၸဝ်ႈၼႃႈတီႈပလိၵ်ႈ ၸိူဝ်းပႂ်ႉၵူတ်ႇထတ်း ၼႂ်းဝၢင်းႁိူဝ်းမိၼ် ဝဵင်းတႃႈၶီႈလဵၵ်း ၼၼ်ႉ လၢတ်ႈဝႃႈ “မိူဝ်ႈပလိၵ်ႈၶဝ်တႄႇၺွပ်းတႄႉ ၼၢင်းယိင်းၵေႃႉ ၼၼ်ႉ ၺႃးၵုမ်းတူဝ်ဝႆႉတီႈဝၢင်းႁိူဝ်းမိၼ်ၵူၺ်း။ ၽိူဝ်ႇထိုင်မွၵ်ႈ 5 မူင်းမႃး သိုၵ်းမၢၼ်ႈၶဝ် ၶီႇၵႃးမႃးႁႄ ႁွင်ႉဢဝ်မၼ်းၼၢင်း။ ၵႂႃႇဝႆႉတၢင်းလႂ်တႄႉဢမ်ႇႁူႉ” ဝႃႈၼႆ။
တႄႇပီ 2025 လိူၼ်ၾႅပ်ႉပိဝ်ႊရီႊၼၼ်ႉ ပလိၵ်ႈ လႄႈ သိုၵ်းမၢၼ်ႈ ၸိူဝ်းပႂ်ႉၵဵတ်ႉလၢၼ်ႇၸွမ်းၼႂ်းမိူင်းတႆးပွတ်းဢွၵ်ႇ လႄႈ မိူင်းတႆးပွတ်းၸၢၼ်း ၸႂ်ႉတိုဝ်းၶိူင်ႈဢၢႆႊတီႊလူၺ်ႈလၢႆးတၢင်း PSMS သေ ၵူတ်ႇထတ်းၵူၼ်းမိူင်း ၸိူဝ်းလတ်းၽၢၼ်ႇၵႂႃႇမႃးႁၢဝ်ႈႁႅင်း။
ၵူၼ်းႁေႃႈၵႃးတၢင်ႇၵုၼ်ႇၵႂႃႇမႃး ၼႂ်းမိူင်းတႆးပွတ်းၸၢၼ်း လႄႈ မိူင်းတႆးပွတ်းဢွၵ်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၸွမ်းၵဵတ်ႉလၢၼ်ႇ မိူင်းတႆးပွတ်းဢွၵ်ႇ လႄႈ ပွတ်းၸၢၼ်းၼႆႉ ၵူၼ်းၺႃးၺွပ်းယွၼ်ႉၶိူင်ႈၸၢၵ်ႈ ၼၼ်ႉ ၼမ်ႁႅင်းၼႃႇ။ ဢၼ်ၵျၢမ်းႁႅင်းၼႃႇၼၼ်ႉ ပဵၼ်ၵဵတ်ႉၼေႇမိၼ်းယွင်ႇ တီႈလွႆလႅမ် လႄႈ ၶူဝ်တႃႈၵေႃႈၼၼ်ႉ ၸိုဝ်ႈယႂ်ႇၼႃႇ” ဝႃႈၼႆ။
ဝၢႆးသိုၵ်းမၢၼ်ႈယိုတ်းမိူင်းလႆႈၵုမ်းဢႃႇၼႃႇဝၢၼ်ႈမိူင်းသေ တင်ႈလူင်ပွင်ၸိုင်ႈပဵၼ်တၢင်းၵၢၼ် ပလိၵ်ႈ တင်း သိုၵ်းမၢၼ်ႈ ၸိူဝ်းပႂ်ႉၵူတ်ႇထတ်းၸွမ်းၵဵတ်ႉလၢၼ်ႇ တၢင်းၶဝ်ႈဢွၵ်ႇဝဵင်းၵူႈတီႈ ပတ်းပိုၼ်ႉမိူင်းႁူမ်ႈတုမ်ၸႂ်ႉတိုဝ်းပႃး ၶိူင်ႈဢၢႆႊတီႊ IT ဢဝ်လၢႆးတၢင်း PSMS (Person Scrutinization and Monitoring System) သေၵူတ်ႇထတ်း တီႉၺွပ်းလႆႈၵူၼ်းမိူင်းမၢၼ်ႈ 238 ၵေႃႉ လႄႈ ၵူၼ်းၼွၵ်ႈမိူင်း 28 သေ ဢဝ်လိူင်ႈၵူၼ်း ၼႂ်းမိူင်းတႆး လႄႈ မိူင်းၶၢင်ဝႆႉ တႃႇ 36 လိူင်ႈၼႆ ႁွင်ႈၵၢၼ်သိုဝ်ႇလူင်ပွင်ၸိုင်ႈသိုၵ်း ႁၢႆးငၢၼ်းဢွၵ်ႇဝႆႉ မိူဝ်ႈလိူၼ် ၵျုၼ်ႊဝႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ