ၵူၼ်းမိူင်း ၼႂ်းတိူင်းတႃႈၵုင်ႈ (ယၢၼ်ႇၵုင်ႇ) ၸိူဝ်းယူႇသဝ်းၼႂ်းၸႄႈဝဵင်း လတႃႇ၊ လၢၼ်းမတေႃႇ၊ ၸၢၼ်းၶျွင်း၊ မယၢၼ်းၵူင်း၊ ဢိၼ်းၸဵင်ႇ၊ တႃႇၵေႇတႃႉ ၸိူဝ်းၼႆႉ ဢွၼ်ၵၼ်ၸပ်း တၢင်းပဵၼ် တွင်ႉႁေႈတွင်ႉၵႂႃႇ ၼမ်ႁႅင်း၊ ၽူႈမီးပုၼ်ႈၽွၼ်းၶဝ် လႆႈၸီႉသင်ႇပိၵ်ႉဢိုတ်းဝႆႉ ႁၢၼ်ႉတၢင်းၵိၼ်ၸွမ်းၶၢင်ႈတၢင်း ၸူဝ်ႈၶၢဝ်း ၼႆယဝ်ႉ။
ယၢမ်းလဵဝ် ၸွမ်းႁူင်းယႃလူင် လႄႈ ႁူင်းယႃသုၼ်ႇလဵဝ် ၼႂ်းတိူင်းတႃႈၵုင်ႈလၢႆလၢႆတီႈၼၼ်ႉ ၵူၼ်းၸပ်းတၢင်းပဵၼ် တွင်ႉႁေႈတွင်ႉၵႂႃႇ မီးၼမ်ဝႆႉ၊ ၸိူဝ်းဢမ်ႇၵႂႃႇၼႄႁူင်းယႃႁွင်ႈယႃၵေႃႈ မီးတင်းၼမ်။
ၼႂ်းဝၼ်းတီႈ 11/8/2026 ၼႆႉ ၵူၼ်းပဵၼ် တွင်ႉႁေႈတွင်ႉၵႂႃႇ ၼႂ်းၸႄႈဝဵင်းလတႃႇ လႄႈ လၢၼ်းမတေႃႇ တိူင်းတႃႈၵုင်ႈ မီးဢမ်ႇယွမ်း 50 ၵေႃႉ။ တႃႇတေႁူႉလႆႈ ငဝ်ႈႁၢၵ်ႈလွင်ႈတၢင်း ၼၼ်ႉ ၸုမ်းၾၢႆႇပၢႆးယူႇလီၸၼ်ႉၸႄႈဝဵင်းၶဝ် လႆႈလူင်းပိုၼ်ႉတီႈၵူတ်ႇထတ်းဝႆႉ။ လိူဝ်ၼၼ်ႉ လွင်ႈၵူၼ်းတၢင်းၼွၵ်ႈ ၵႂႃႇၸႃႇၵလဵင်ႉလူ ၶဝ်ႈၽၵ်းတၢင်းၵိၼ် တီႈႁူင်းယႃလူင်ၵူၼ်းမိူင်းတႃႈၵုင်ႈၼၼ်ႉၵေႃႈ လႆႈၵိုတ်းဝႆႉၸူဝ်ႈၶၢဝ်း။
တၢင်းပဵၼ် တွင်ႉႁေႈတွင်ႉၵႂႃႇႁၢဝ်ႈႁႅင်းၼႆႉ တိတ်းၸပ်းမႃးတီႈ ယွၼ်ႉၵိၼ်မႅၼ်ႈ ၼမ်ႉ လႄႈ တၢင်းၵိၼ်တၢင်းယႅမ်ႉ ဢၼ်ဢမ်ႇမူတ်းသႂ်၊ ၸၢင်ႈပဵၼ်လႆႈၵူႈၶၢဝ်းၼႆသေတႃႉ ပိူင်လူင် တေဢွၼ်ၵၼ်ပဵၼ်ၼမ် ၶၢဝ်းႁူဝ်ၾူၼ် လႄႈ ၶၢဝ်းၾူၼ်ၸမ်သဵင်ႈသေ ၶၢႆႉၶဝ်ႈၸူးၶၢဝ်းၵတ်းၸိူဝ်းၼႆႉ။
ႁွင်ႈၵၢၼ်ၾၢႆႇပၢႆးယူႇလီပၼ်ၾၢင်ႉဝႆႉဝႃႈ သင်ဢမ်ႇယူႇလီသေ မီးၾၢင်ႁၢင်ႈ တၢင်းပဵၼ် တွင်ႉၵႂႃႇတွင်ႉႁေႈၼႆၸိုင် ႁႂ်ႈဢွၼ်ၵၼ် ၼႅတ်ႈၵႂႃႇယူတ်းယႃတီႈ ႁွင်ႈယႃ ႁူင်းယႃ ၸိူဝ်းမီးၸမ် ဢွင်ႈတီႈၸဝ်ႈၵဝ်ႇယူႇသဝ်းၼၼ်ႉ ၶၢၼ်ၶၢၼ်ဝႆးဝႆး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ