ဝၼ်းတီႈ 12/8/2026 ၼႆႉ ၵူၼ်းၼႂ်းလုမ်ႈၾႃႉ ၼပ်ႉႁူဝ်လၢၼ်ႉၵေႃႉ ဢွၼ်ၵၼ်ပႂ်ႉတူၺ်း ၵၢင်ဝၼ်းဝၢတ်ႇ ဢၼ်တေႁၼ်လႆႈၸႅင်ႈလိူဝ်ပိူၼ်ႈသုတ်း ၼႂ်းၶၢဝ်းတၢင်း 30 ပီ။ ၸိုင်ႈမိူင်း ၼႂ်းၵုၼ်ယူးရူပ်ႊ သွင်မိူင်း လႆႈႁၼ်ၵၢင်ဝၼ်းဝၢတ်ႇၵႂႃႇ တဵမ်လုၵ်ႈ ၼႆယဝ်ႉ။

ဢိင်ၼိူဝ်ပိုၼ်ႉတီႈ မိူင်းလႂ်မိူင်းၼၼ်ႉသေ မၢင်တီႈတေလႆႈႁၼ် ၵၢင်ဝၼ်းဝၢတ်ႇ 90 % ထိုင် 95 % ဢမ်ႇၼၼ် မၢင်တီႈၵေႃႈတေလႆႈႁၼ်ၵၢင်ဝၼ်းဝၢတ်ႇၵႂႃႇတဵမ်ႁူၺ်ႇ။ တီႈမိူင်း ဢၢႆႉသ် လႅၼ်ႊ တင်း မိူင်းသပဵၼ်ႊ မၢင်တီႈတႄႉ လႆႈႁၼ်ၵၢင်ဝၼ်းဝၢတ်ႇၵႂႃႇတဵမ်ႁူၺ်ႇ ထိုင်တီႈလပ်းသိင်ႇၵႂႃႇတၢင်းမူတ်း။ မိူင်းသပဵၼ်ႊ မီးၵူၼ်းလႆႈႁၼ်ၵၢင်ဝၼ်းဝၢတ်ႇတဵမ်လုၵ်ႈ ၼမ်လိူဝ်ပိူၼ်ႈ။

ပိုၼ်ႉတီႈဢၼ်လႆႈႁၼ် ၵၢင်ဝၼ်းဝၢတ်ႇတဵမ်လုၵ်ႈ ဢွၼ်တၢင်းသုတ်းပိူၼ်ႈတႄႉ ပဵၼ်မိူင်း ရတ်ႉသျႃး တင်း သၢႆႉပေးရီးယိူဝ်း၊ ၵူၺ်းၵႃႈၼႂ်းပိုၼ်ႉတီႈၼၼ်ႉ ဢမ်ႇမီးၵူၼ်းဢွၼ်ၵၼ်ပႂ်ႉတူၺ်း။

မိူဝ်ႈၽွင်း လူၵ်ႈလုမ်ႈၾႃႉ – လိူၼ် လႄႈ ၵၢင်ဝၼ်း မႃးတူၵ်းမႅၼ်ႈသိုဝ်ႈလဵဝ်ၵၼ်လီလီၼၼ်ႉ တေလႆႈႁၼ် ၵၢင်ဝၼ်းဝၢတ်ႇတဵမ်ႁူၺ်ႇ၊ သင်ဢမ်ႇမႅၼ်ႈသိုဝ်ႈလဵဝ်ၵၼ်သမ်ႉ တေလႆႈႁၼ် ၵၢင်ဝၼ်းဝၢတ်ႇ ပဵၼ်ပွတ်းပဵၼ်တွၼ်ႈၵူၺ်း၊ လွင်ႈၼႆႉ ပဵၼ်ပိူင်သၽႃႇဝ မိူဝ်ႈၽွင်းယူႇတီႈလုမ်ႈၾႃႉသေ မုင်ႈတူၺ်းၵၢင်ဝၼ်းၼၼ်ႉ မီးလုၵ်ႈလိူၼ် မႃးႁႄႉဝႆႉ။

ၽူႈလူင်ႉလႅၼ်ႇၶဝ်လၢတ်ႈဝႃႈ ၸိုင်ႈမိူင်းၼႂ်းၵုၼ်ယူႊရူပ်ႊ လႆႈႁၼ်ၵၢင်ဝၼ်းဝၢတ်ႇ ၸႅင်ႈလီလိူဝ်တၢင်ႇတီႈ ဝႃႈၼႆ။ ပိူင်ပဵၼ် ၵၢင်ဝၼ်းဝၢတ်ႇတဵမ်လုၵ်ႈၼႆႉ 18 လိူၼ်လႂ် တေလႆႈႁၼ် ၼိုင်ႈပွၵ်ႈၼႆသေတႃႉ ပိုၼ်ႉတီႈ လႄႈ ဝၢၼ်ႈမိူင်း ဢၼ်လႆႈႁၼ်ၼၼ်ႉတႄႉ တေဢမ်ႇမိူၼ်ၵၼ်လႆႈ။ သင်လႆႈႁၼ် ၵၢင်ဝၼ်းဝၢတ်ႇၵႂႃႇ တဵမ်လုၵ်ႈ 1 ပွၵ်ႈယဝ်ႉၼႆ တႃႇတေလႆႈႁၼ် ၶိုၼ်းထႅင်ႈ ပွၵ်ႈၼိုင်ႈၼၼ်ႉ ၸၢင်ႈႁိုင်ထိုင် 400 ပီၵေႃႈ ပဵၼ်လႆႈ။

တီႈမိူင်းသပဵၼ်ႊၼၼ်ႉ ယွၼ်ႉႁႅင်းမႆႈပုင်ႈၶိုၼ်ႈသုင် မီးၽေး ၾႆးမႆႈပႃႇဝႆႉလႄႈ ပလိၵ်ႈၶဝ် လႆႈဝၢင်းဝႆႉ ဢဵၼ်ႁႅင်း မွၵ်ႈ 25000 ၵေႃႉသေ ဢဝ်ႁူမ်ႇလူမ်ႈပၼ် ၵူၼ်းၸိူဝ်းၶွၼ်ႈတုမ်ၵၼ် ပႂ်ႉတူၺ်းၵၢင်ဝၼ်းဝၢတ်ႇ ၼႆယဝ်ႉ။