မိူဝ်ႈဝႃး ဝၼ်းတီႈ 2 လိူၼ်တီႊသႅမ်ႊပိူဝ်ႊ ၸွမ်ၸိုင်ႈမိူင်းရတ်ႉသျႃႊ ဝလႃႊၻိမီႊရ် ပူႊတိၼ်ႊ ပိုၼ်ၽၢဝ်ႇလၢတ်ႈဝႃႈ တူဝ်ႈတၼ်း တႃႇတိုၵ်းၵၼ် တင်း မိူင်းယူႊရူပ်ႊယဝ်ႉ ဝႃႈၼႆ။

ၾၢႆႇမိူင်းရတ်ႉသျႃႊ ဢမ်ႇၶႂ်ႈပဵၼ်ပၢင်တိုၵ်းတေႃးၵၼ်သေတႃႉ သင်မိူင်းယူႊရူပ်ႇ ၶဝ်တႄႇပိုတ်ႇပၢင်တိုၵ်းမႃးဢွၼ်တၢင်းၸိုင် ရတ်ႉသျႃႊ ၽွမ်ႉတူဝ်ႈတၼ်းဝႆႉယူႇ ၼႆယဝ်ႉ။

ၽူႈတၢင်တူဝ် ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ ၵႂႃႇႁူပ်ႉဢုပ်ႇၵၼ် တီႈဝဵင်းမေႃႊသၵူဝ်ႊ၊ မိူင်းရတ်ႉသျႃႊ ႁိုင်ၶၢဝ်းတၢင်း 5 ၸူဝ်ႈမူင်းသေတႃႉ ဢမ်ႇမီးလွင်ႈၶိုပ်ႈၼႃႈသင်၊ တႃႇတေၵႄႈလိတ်ႈပၼ်ႁႃ ပၢင်တိုၵ်း မိူင်းယူႊၶရဵၼ်ႊၵေႃႈ ပႆႇလႆႈၶေႃႈတူၵ်းလူင်းသင် ၼႆယဝ်ႉ။

လႆႈႁူႉဝႃႈ ဢၼ်ၽူႈၼမ်းၸိုင်ႈမိူင်းၸတ်းပၢင်ဢုပ်ႇဢူဝ်းၵၼ်ၼႆႉ လမ်ႇလွင်ႈသုတ်း ပဵၼ်တႃႇမၵ်းမၼ်ႈ လႅၼ်ၶႅၼ်ႈ လႅၼ်လိၼ် သွင်ၸိုင်ႈမိူင်းၼႆသေတႃႉ ႁၢၼ်ႉတေႃႇထိုင်ယၢမ်းလဵဝ်ၵေႃႈ တင်းသွင်ၾၢႆႇပႆႇလႆႈၶေႃႈတူၵ်းလူင်းၵၼ် ဝႃႈၼႆ။

ၵွၼ်ႇပႆႇတႄႇပၢင်ဢုပ်ႇၵုမ်ၼၼ်ႉ ၸွမ်ၸိုင်ႈမိူင်းရတ်ႉသျႃႊလၢတ်ႈဝႃႈ မိူင်းယူႊရူပ်ႊ ၶတ်းၶႂၢင်ၶပ်ႉမၢႆလွင်ႈငမ်းယဵၼ် ဢၼ်လူင်ပွင်ၸိုင်ႈမိူင်းဢမေႊရိၵၼ်ႊ ၶတ်းၸႂ်ႁဵတ်းသၢင်ႈၼၼ်ႉၵူၺ်းဢမ်ႇၵႃး ယင်းပၢႆၸုၵ်းမၼ်ႈယူႇဝႆႉၾၢႆႇ ဢၼ်ၶႂ်ႈပဵၼ်ပၢင်တိုၵ်း ဝႃႈၼႆ။

လိူဝ်ၼၼ်ႉ ၸွမ်ၸိုင်ႈမိူင်းရတ်ႉသျႃႊတွပ်ႇထဵင်ၵႂႃႇပုတ်းၶၢတ်ႇဝႃႈ ၶေႃႈတုၵ်းယွၼ်း ဢၼ်ၾၢႆႇမိူင်းယူႊရူပ်ႊၶဝ် တုၵ်းယွၼ်းမႃးၼၼ်ႉ ရတ်ႉသျႃႊ တိုၼ်းတေဢမ်ႇယွမ်းႁပ်ႉလႆႈ ဝႃႈၼႆ။

ၾၢႆႇမိူင်းရတ်ႉသျႃႊ ယိုၼ်ယၼ်လၢတ်ႈဝႃႈ – ၸွမ်းၼင်ႇငဝ်းလၢႆးယၢမ်းလဵဝ်ၼၼ်ႉသေ ၶပ်ႉမၢႆတႃႇ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ တင်း ၸွမ်ၸိုင်ႈမိူင်းရတ်ႉသျႃႊ ပူႊတိၼ်ႊ တေႁူပ်ႉထူပ်း ဢုပ်ႇၵုမ်ၵၼ်ထႅင်ႈပွၵ်ႈၼိုင်ႈတႄႉ တေဢမ်ႇပႆႇမီး ၼႆယဝ်ႉ။