ၽူႈလၵ်ႉၸၵ်ႉၶုတ်ႈ ပဵၼ်မူႇပဵၼ်ၸုမ်း ႁႃလၵ်ႉၶူဝ်းႁိူၼ်း ၵူၼ်းပၢႆႈၽေးသိုၵ်း တီႈဝဵင်းလွႆၶေႃ မိူင်းယၢင်းလႅင် ႁဵတ်းႁႂ်ႈ ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈပႃး ၼႆယဝ်ႉ ။
ၼၢင်းယိင်းပၢႆႈၽေးသိုၵ်းပွၵ်ႈယူႇၶိုၼ်းႁိူၼ်းလၢတ်ႈၽူႈတွႆႇႁွၵ်ႈဝႃႈ – “ ၽွင်းပွၵ်ႈမႃးႁိူၼ်းၼႆႉ ၵိုတ်းပိူၵ်ႇ မၼ်းၵူၺ်း ၊ ၶူင်းလဵၵ်း ၊ ၶူၺ်ႇလဵၵ်းၼႆႉဢမ်ႇၵိုတ်းသင် ၊ ၽူႈလၵ်ႉၸိူဝ်းၼၼ်ႉ ၶဝ်ႁဵတ်း ပဵၼ်မူႇ ပဵၼ်ၸုမ်း သေႁႃလၵ်ႉ ၊ ႁၼ်ၶဝ်လၵ်ႉၶူဝ်းၶွင်ယူႇၵေႃႈ ၽႂ်ဢမ်ႇႁတ်း လၢတ်ႈသင် ယွၼ်ႉၵူဝ်ႁဵတ်းႁၢႆႉသၢႆၸႂ် ယွၼ်ႉ ဢမ်ႇမီးလွင်ႈႁူမ်ႇလူမ်ႈ ဢမ်ႇမီးၽႂ်မႃးဢဝ်ပုၼ်ႈၽွၼ်း ၼႆယဝ်ႉ”- ဝႃႈၼႆ ။
ယၢမ်းလဵဝ် တီႈဝဵင်းလွႆၶေႃၼႆႉ ၽွင်းၵၢင်ၶမ်ႈၵၢင်ၶိုၼ်း ၽူႈလၵ်ႉပဵၼ်မူႇပဵၼ်ၸုမ်း ႁႃလၵ်ႉသွၵ်ႈတဝ် ႁိူၼ်း ၵူၼ်းပၢႆႈၽေးသိုၵ်း ၸိူဝ်းဢမ်ႇပႆႇပွၵ်ႈမႃးၼၼ်ႉ လၵ်ႉဢဝ်ၶိူဝ်းႁိူၼ်း မိူၼ်ၼင်ႇ မၢၵ်ႇၾႆး ၊ ၶူင်းလဵၵ်း ၊ ရူတ်ႉၶိူင်ႈ ၸိူဝ်းၼႆႉသေ ၵႂႃႇၶၢႆၸွမ်းႁၢၼ်ႉၼႂ်းဝဵင်းလွႆၶေႃၶိုၼ်း – ၵူၼ်းပိုၼ်ႉတီႈလၢတ်ႈ ။
လိူဝ်သေ ၽူႈလၵ်ႉလိူင်ႇၼမ်ယဝ်ႉ ယွၼ်ႉမီးမၢၵ်ႇမႅင်းၾင်လိၼ်လႄႈ မၢၵ်ႇၵွင်ႈၸိုၼ်းယၢမ်းၵိုတ်းဝႆႉ ၽွင်းပၢင်တိုၵ်းၼၼ်ႉ ၸွမ်းၼႂ်းသူၼ် ၼႂ်းႁႆႈ လႄႈ တႃႇၵႂႃႇၽုၵ်ႇသွမ်ႈ ႁဵတ်းႁႃၵိၼ်လဵင်ႉတွင်ႉၼၼ်ႉၵေႃႈ ယၢပ်ႇၽိုတ်ႇၵိၼ်းၸႂ်ဝႆႉ – ၵူၼ်းပိုၼ်ႉ တီႈ လၢတ်ႈ ။
“ၸႂ်ႉပွၵ်ႈမႃးလႄႈ ပွၵ်ႈမႃးၵူၺ်း ဢမ်ႇၸၢင်ႈႁဵတ်းၵိၼ်ၵၢၼ်သင် ၊ တေၶၢႆၶူဝ်းၵုၼ်ႇၵေႃႈၵူၼ်းၶၢႆၼမ်ၼႃႇ ၵူၼ်းသိုဝ်ႉမၼ်းဢမ်ႇမီး ၊ တႃႇတေႁဵတ်းၵိၼ်သူၼ်ႁႆႈၵေႃႈ လႆႈမႆႈၸႂ်တႃႇမၢၵ်ႇမႅင်း ၊ မိူဝ်ႈပွၵ်ႈမႃးၼၼ်ႉ ႁိူၼ်းၼႆႉ တိူဝ်ႉမၢၵ်ႇမႅင်းဝႆႉလႄႈ ၵွႆၼမ်ၼႃႇ လႆႈမႄးဝႆႉၶိုၼ်းသဵင်ႈ 50 သႅၼ်ပျႃး”- ဝႃႈၼႆ ။
ၵူၼ်းမိူင်းဝဵင်းလွႆၶေႃၼႆႉဢမ်ႇၸၢင်ႈယူႇသဝ်းယွၼ်ႉပၢင်တိုၵ်း ၸဵမ်မိူဝ်ႈပီ 2023 ။ လႆႈဢွၼ်ၵၼ် ပၢႆႈ ၽေးသိုၵ်း ၵႂႃႇယူႇတၢင်ႇတီႈ ။ ဝၢႆးပၢင်တိုၵ်းၶိုၼ်းယဵၼ်ၵႂႃႇ ႁၢင်ပီ 2025 သိုၵ်းမၢၼ်ႈ သင်ႇႁႂ်ႈၵူၼ်းပၢႆႈၽေးသိုၵ်းပွၵ်ႈယူႇၶိုၼ်းဝၢၼ်ႈၵိူတ်ႇမိူင်းၼွၼ်းသေတႃႉ ၵဵဝ်ႇၵပ်းလွင်ႈမၢၵ်ႇမႅင်းလႄႈ ၽူႈလၵ်ႉၸၵ်ႉၶုတ်ႈၼႆႉ ဢမ်ႇမီးၽူႈမီးပုၼ်ႈၽွၼ်ႈဢဝ်လိူင်ႈပၼ်သင် – ၼႆယဝ်ႉ ။
ၽွင်းၵူၼ်းပၢႆႈၽေးသိုၵ်းပွၵ်ႈယူႇၶိုၼ်းႁိူၼ်းၼၼ်ႉ ၼႂ်းၶၢဝ်းတၢင်း 4 လိူၼ်ၵူၺ်း မီးၵူၼ်းယဵပ်ႇၺႃးမၢၵ်ႇမႅင်း ၼႂ်းသူၼ်ၼႂ်းႁႆႈ ၊ ၸွမ်းတႃႈၸွမ်းတၢင်း ၊ ၼႂ်းပွၵ်ႉယွမ်ႇ ၼႂ်းဝၢင်းႁိူၼ်းၸဝ်ႈၵဝ်ႇသေ လူႉတၢႆ /မၢတ်ႇၸဵပ်းမီး 10 ပၢႆယဝ်ႉ။ ပဵၼ်ၵူၼ်းပၢႆႈၽေးသိုၵ်းသေ ပွၵ်ႈၶိုၼ်းႁိူၼ်းယေးလွၼ်ႉလွၼ်ႉ- ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ