ၼႂ်းႁၢင်လိူၼ် ဢေႃးၵၢတ်ႉသ် ၼႆႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၾၢႆၶုၼ် လႄႈ မိူင်းပၢႆး ။ သိုၵ်းမၢၼ်ႈ ၽဝ် ႁိူၼ်းၵူၼ်းဝၢၼ်ႈ ၸိူဝ်းၵိုတ်းဝႆႉၼၼ်ႉထႅင်ႈ  ဝႃႈၼႆ  ။

ၼၢင်းယိင်းၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉပၢင်တိုၵ်းလႄႈ ႁိူၼ်းယေးၾႆးမႆႈလူႉၵွႆတင်းၼမ် ဢမ်ႇပေႃးၶႂ်ႈမီးသင်ယဝ်ႉ ၊ ၵမ်းၼႆႉသမ်ႉ ႁိူၼ်းဢၼ်ၵိုတ်းဝႆႉ ၸိူဝ်းၼၼ်ႉၵေႃႈ သိုၵ်းမၢၼ်ႈၶဝ်ႈဢဝ်ၾႆးၽဝ်ထႅင်ႈၼႆ ၊ ၵူၼ်းပၢႆႈၽေးသိုၵ်းတႄႉ ဢမ်ႇၸၢင်ႈပွၵ်ႈၶိုၼ်းႁိူၼ်းယဝ်ႉ ၊ ပၢႆႈၽေးသိုၵ်းၼႆႉၵေႃႈ ဢမ်ႇငၢႆႈငၢႆႈ”- ဝႃႈၼႆ ။

သိုၵ်းမၢၼ်ႈၶဝ်ႈ ၽဝ်ႁိူၼ်းလူႉၵွႆလၢႆလင်ဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ် ။

ယၢမ်းလဵဝ် သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ထႅမ်ႁႅင်းသိုၵ်းၶဝ်ႈၼႂ်းပိုၼ်ႉတီႈသေ ၵႆႉတုမ်ႉတိူဝ်ႉပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈဝႆႉလႄႈ ၵူၼ်းပၢႆႈၽေးသိုၵ်း ဢမ်ႇမီးလွင်ႈႁူမ်ႇလူမ်ႈ ဢမ်ႇၸၢင်ႈပွၵ်ႈမိူဝ်းႁိူၼ်းၽႂ်မၼ်း ၼႆယဝ်ႉ ။

ထႅင်ႈၾၢႆႇၼိုင်ႈၵေႃႈ သိုၵ်းမၢၼ်ႈၼႂ်းပိုၼ်ႉတီႈလွၵ်ႇငိုတ်ႈၵူၼ်းပၢႆႈၽေးသိုၵ်း ၸိူဝ်းဢမ်ႇပွၵ်ႈမႃးႁိူၼ်းၼၼ်ႉဝႃႈ ၽႂ်ဢမ်ႇမႃး တေယိုတ်းႁိူၼ်းၼႆထႅင်ႈ ။

ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ ၼႂ်းလိူၼ်ၵျူႊလၢႆႊၼၼ်ႉ ၶဝ်(သိုၵ်းမၢၼ်ႈ) ၸႂ်ႉပွၵ်ႈမိူဝ်းၶိုၼ်းတင်းသဵင်ႈၼႆ ၊ ပေႃးဢမ်ႇပွၵ်ႈမိူဝ်း တေယိုတ်းဢဝ်ႁိူၼ်းၼႆဢေႃႈ ၊ ၽိူဝ်ႇပွၵ်ႈမိူဝ်းၼၼ်ႉ ယွၼ်ႉပဵၼ်ပၢင်တိုၵ်းလႄႈ ဢွၼ်ၵၼ်လႆႈၵႂႃႇယူႇၸွမ်းၵျွင်းမုၼ်ၸဝ်ႈ လႆႈပၢႆႈထႅင်ႈၵမ်းၼိုင်ႈဢေႃႈ ယၢပ်ႇၸႂ်ၼႃႇ”- ဝႃႈၼႆ ။

ဝၢႆးသိုၵ်းမၢၼ်ႈယိုတ်းမိူင်းၸႄႈဝဵင်းမိူင်းပၢႆး၊ၾၢႆၶုၼ်လႄႈၸွမ်းလႅၼ်လိၼ်တႆး-ယၢင်းလႅင် ၼႂ်းၸႄႈဝဵင်းလွႆၶေႃၸိူဝ်းၼႆႉ သိုၵ်းမၢၼ်ႈတင်း သိုၵ်းPDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ။ ၸုမ်းသိုၵ်းမၢၼ်ႈ ၵႆႉယိုဝ်းမၢၵ်ႇလူင် တူၵ်းသႂ်ႇၼႂ်းဝၢၼ်ႈ။

လိူဝ်ၼၼ်ႉဢမ်ႇၵႃး ၶဝ်ၽဝ်ႁိူၼ်းၵူၼ်းဝၢၼ်ႈ ႁဵတ်းႁႂ်ႈၾႆးမႆႈ ႁိူၼ်းၵူၼ်းဝၢၼ်ႈ လူႉၵွႆ လႆႈထူပ်းၽေးပၢႆႈၽေးပဵၼ်ႁူဝ်ႁဵင် တေႃႇထိုင်ဝၼ်းမိူဝ်ႈၼႆႉ ဝႃႈၼႆ ။

ၶေႃႈတူၵ်းလူင်း ၵျီႊတီႊဝႃႊ ၶွၼ်ႊဝႅၼ်ႊသျိၼ်ႊ မတ်ႉတႃ 14 ၶေႃႈတူၵ်းလူင်းၽိူမ်ႉထႅမ် 2 ၼၼ်ႉပႃးဝႆႉဝႃႈ – သိုၵ်းၼႆႉ ႁၢမ်ႈယႃႉၶူဝ်းၶွင်လမ်ႇလွင်ႈၵူၼ်းမိူင်း ဢၼ်ဢမ်ႇမီးဢမ်ႇပဵၼ် မိူၼ်ၼင်ႇ ႁိူၼ်းယေး လိၼ်သူၼ်ႁႆႈၼႃး ဢၼ်ၽုၵ်ႈသွမ်ႈဝႆႉမၢၵ်ႇၶဝ်ႈတဝ်ႈၼမ်ႉ၊ သူၼ်-ၶွၵ်ႈလဵင်ႉသတ်း ၊ ႁူဝ်ၼမ်ႉၵိၼ်ၼမ်ႉၸႂ်ႉ၊ ၵၢၼ်တေႃႉသူင်ႇၶူဝ်းၶွင်ၵူၼ်းမိူင်း ၸိူဝ်းၼႆႉလႃးလႃး။