ၵူၼ်းမိူင်းပၢႆး ၸိူဝ်းပၢႆႈၽေးပၢင်တိုၵ်း ၸွမ်းလႅၼ်လိၼ်တႆး-ယၢင်းလႅင် ၶၢႆႉပၢႆႈမႃးသွၼ်ႈယူႇ တီႈဝဵင်းသီႇၵိပ်ႇ ၸႄႈဝဵင်းပၢင်လွင်း မိူင်းတႆးပွတ်းၸၢၼ်းၼၼ်ႉ ၺႃးၽူႈၵွၼ်းပွၵ်ႉၵွၼ်း ဢိူင်ႇ ၼႂ်းပိုၼ်ႉတီႈ လွၵ်ႇငိုတ်ႈ ႁႂ်ႈပွၵ်ႈမိူဝ်းယူႇၶိုၼ်း ႁိူၼ်းၽႂ်မၼ်း ၼႆယဝ်ႉ။

ၽူႈမီးပုၼ်ႈၽွၼ်း ၾၢႆႇၵၢၼ်ၽွင်းငမ်းဝဵင်း လႄႈ ၵွၼ်းပွၵ်ႉၵွၼ်းဢိူင်ႇ ၼႂ်းပိုၼ်ႉတီႈဝဵင်းသီႇၵိပ်ႇ လၢတ်ႈႁႂ်ႈၵူၼ်းပၢႆႈၽေး ၸိူဝ်းလုၵ်ႉတၢင်းမိူင်းပၢႆးမႃးသွၼ်ႈယူႇဝႆႉၼႂ်းဝဵင်းသီႇၵိပ်ႇ လူင်းလၢႆးမိုဝ်းဝႃႈ တေပွၵ်ႈမိူဝ်းယူႇၶိုၼ်းႁိူၼ်းၽႂ်ၼ်း ၼႂ်းလိူၼ်ဢေႊပရႄႇ ပီ 2026 ၼႆႉ ဝႃႈၼႆ။

ၵူၼ်းပၢႆႈၽေးၵေႃႉၼိုင်ႈလၢတ်ႈဝႃႈ “ၶဝ်ဝႃႈ ၼႂ်းလိူၼ်ဢေႇပရႄႇၼႆႉ တေလႆႈမိူဝ်းတေႉတေႉ။ ဢမ်ႇမိူဝ်းဢမ်ႇလႆႈ။ ပေႃးဢမ်ႇမိူဝ်း ၶဝ်ဢမ်ႇဢဝ်ပၼ်လွင်ႈႁူမ်ႇလူမ်ႈၼႆ လၢတ်ႈႁဝ်းၸိူင်ႉၼႆ။ မိူဝ်ႈလဵဝ် တၢင်းမိူင်းပၢႆးၼႆႉ ပၢင်တိုၵ်းတမ်ပႆႇယဝ်ႉ။ ၸႂ်ႉႁဝ်းမိူဝ်းၽွင်းဢမ်ႇမီးလွင်ႈႁူမ်ႇလူမ်ႈၸိူင်ႉၼႆ ၵူဝ်ၼင်ႇၵဝ်ႇဢေႃႈ” ဝႃႈၼႆ။

ယၢမ်းလဵဝ် တီႈၼႂ်းဝဵင်းသီႇၵိပ်ႇၼႆႉ ၵူၼ်းမိူင်းပၢႆး ၸိူဝ်းယူႇတီႈပွၵ်ႉၵွင်းၵၢတ်ႇ၊ ပွၵ်ႉမျဵဝ်ႉမ လႄႈ ပွၵ်ႉမႂ်ႇ (ကွက်သစ်) ၵမ်ႈၼမ် ယူႇသဝ်းဝႆႉ လူၺ်ႈဢမ်ႇမီးၵၢၼ်ႁဵတ်း၊ ယၢပ်ႇၽိုတ်ႇၶဝ်ႈၼမ်ႉတၢင်းၵိၼ်လႄႈ ႁူပ်ႉပၼ်ႁႃလွင်ႈပၢႆးယူႇလီဝႆႉ ၼႆယဝ်ႉ။

လႆႈႁူႉဝႃႈ ယၢမ်းလဵဝ် ၸွမ်းႁိမ်းႁွမ်း ဝဵင်းမိူင်းပၢႆးၼႆႉ သိုၵ်းမၢၼ်ႈ တင်း ၸုမ်းသိုၵ်းလုၵ်ႉၽိုၼ်ႉၶဝ် ပဵၼ်ပၢင်တိုၵ်းၵၼ်ဝႆႉ ပႆႇယဝ်ႉပႆႇတူဝ်ႈလႄႈ ၵူၼ်းမိူင်းၸိူဝ်းယူႇၸွမ်းပိုၼ်ႉတီႈၼၼ်ႉ ဢမ်ႇပႆႇႁတ်းပွၵ်ႈ မိူဝ်းယူႇၶိုၼ်းႁိူၼ်းယေး ၼႆယဝ်ႉ။

ၵူၼ်းမိူင်းပၢႆး ၸိူဝ်းပၢႆႈမႃးယူႇသဝ်းဝႆႉ ၼႂ်းဝဵင်းသီႇၵိပ်ႇၼႆႉ ႁူမ်ႈသဵၼ်ႈမီးယူႇမွၵ်ႈ 500 ၵေႃႉ ႁိုင်ၶၢဝ်းတၢင်း 3 ပီပၢႆယဝ်ႉ ဝႃႈၼႆ။