ယိင်းဢွၼ်ႇဢႃယု 11 ၶူပ်ႇ ၺႃးၵူၼ်းၸၢႆးသႅၼ်းပၢၼ်ပေႃႈ (ဢူႈ) ႁွင်ႉၵႂႃႇၵၼ်ႉၸၼ်လူလၢႆ ၼႂ်းထိူၼ်ႇတီႈၼိုင်ႈ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ႁိုင် ၶၢဝ်းတၢင်း 3 လိူၼ်ပၢႆယဝ်ႉ ၵေႃႈ ၵေႃႉထုၵ်ႇပူၼ်ႉပႅၼ်ပႆႇ လႆႈႁပ်ႉလွင်ႈၽဵင်ႇပဵင်း – ဝႃႈၼႆ။

ၵူၼ်းၸၢႆးၵေႃႉဢၼ်ၵၼ်ႉၸၼ်လုၵ်ႈဢွၼ်ႇၼႆႉ ၸိုဝ်ႈႁွင်ႉ ၸၢႆးၼေႃႇသႅင် ဢႃယု 48 ပီ ပဵၼ်ၵႅမ်ပူႇၵျွင်းဢိူင်ႇ ၼႃးမၢၵ်ႇၶေႃ။ တဵၵ်းတဵင်ႁွင်ႉဢဝ်ယိင်းဢွၼ်ႇ ၵေႃႉပဵၼ်လၢၼ် ၸဝ်ႈၵဝ်ႇ ၵႂႃႇႁဵတ်းၵၢၼ်ၼႂ်းထိူၼ်ႇဝႃႈတႃႇၵႂႃႇႁဵတ်း ၵၢၼ်ၼႆသေ ၵၼ်ႉၸၼ်လူလၢႆယဝ်ႉ လွၵ်ႇငိုတ်ႈဝႆႉပႃး- ၼႆ ၵူၼ်းပိုၼ်ႉတီႈၵေႃႉႁူႉႁၼ်ၸွမ်း ပိူင်ပဵၼ်ၼႆႉ လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၵူၼ်းမိူင်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ “ၸဵမ်မိူဝ်ႈတႄႇၺႃးလွင်ႈ ထုၵ်ႇပူၼ်ႉပႅၼ်ၼၼ်ႉ လုၵ်ႈဢွၼ်ႇယိင်းၵေႃႉၼႆႉ မႃးလၢတ်ႈၼႄမႄႈမၼ်းဝႃႈ ဢင်ႇၵႃႇ ၼၢင်းယိင်းမၼ်း ၸဵပ်းၼႆယူႇ။ ၵူၺ်းမႄႈၶဝ်သမ်ႉ ဢမ်ႇသူၼ်ၸႂ်။ ၵေႃႉပူၼ်ႉပႅၼ်တေႃႇ မၼ်းၼၢင်းၼႆႉသမ်ႉ ပဵၼ်လုင်းၶူၺ် မၼ်း (ပဵၼ်ပီႈၶူၺ်ဢူႈသိုပ်ႇမၼ်းၼၢင်း) ။ ဢူႈသိုပ်ႇၼၢင်းဢွၼ်ႇၼႆႉသမ်ႉၵႂႃႇႁႃငိုၼ်းသေ သူင်ႇငိုၼ်းပၼ် ၶႃမႄႈလုၵ်ႈ။ သမ်ႉသူင်ႇပၼ်တီႈ ပႃႈလႄႈ လုင်းၶူၺ် ၵေႃႉၼႆႉဝႆႉ။ သွင်ၵေႃႉမႄႈလုၵ်ႈၼႆႉသမ်ႉ ပေႃးလူဝ်ႇၶဝ်ႈ လူဝ်ႇၼမ်ႉလူဝ်ႇငိုၼ်းၵေႃႈ လႆႈမိူဝ်းဢဝ်တီႈႁိူၼ်းလုင်းၶူၺ်ၶဝ်လႄႈ မႄႈလုၵ်ႈဢွၼ်ႇယိင်းၼႆႉ ဢမ်ႇႁတ်း လၢတ်ႈသင်ၸွမ်း။ ၵွပ်ႈၼၼ်လုၵ်ႈဢွၼ်ႇၼႆႉ ၸင်ႇၵႂႃႇလၢတ်ႈၼႄဢွၵ်ႇ (မႄႈ – ဢူႈဢွၵ်ႇမၼ်း ) မၼ်းၼၢင်း လႄႈ လိူင်ႈမၼ်းၸင်ႇယႂ်ႇမႃး” ဝႃႈၼႆ။

လႆႈႁူႉဝႃႈ ၾၢႆႇၽူႈမီးပုၼ်ႈၽွၼ်း ၼႂ်းဝၢၼ်ႈ ၼႂ်းဢိူင်ႇ တီႉၺွပ်းဢဝ် လုင်းၶူၺ် မၼ်းဝႆႉယဝ်ႉဝႃႈၼႆသေတႃႉ ယွၼ်ႉဝႃႈ လုင်းၶူၺ်ၼႆႉ ၵဵဝ်ႇၵွင်ႉၸွမ်းၽူႈမီးဢႃႇၼႃႇ ၼႂ်းပိုၼ်ႉတီႈဝႆႉလႄႈ တႃႇဢဝ်လိူင်ႈၵၼ်ႁႂ်ႈထုၵ်ႇ မႅၼ်ႈၸွမ်းပိူင်လႄႈ တႃႇယိင်းဢွၼ်ႇၵေႃႉထုၵ်ႇပူၼ်ႉပႅၼ် လႆႈႁပ်ႉလွင်ႈၽဵင်ႇပဵင်းၼၼ်ႉတိုၵ်ႉယၢပ်ႇယူႇ ဝႃႈၼႆ။