ၵူၼ်းမိူင်းၸိူဝ်းယူႇၼႂ်းထုင်ႉ 105 လၵ်း ဢိူင်ႇမိူင်းယူး ၸႄႈဝဵင်းမူႇၸေႊ ႁူမ်ႈၵၼ်ဢွၵ်ႇသၢၼ်ၶတ်း တေႃႇ ၵွၼ်းဢိူင်ႇ ၸၢဝ်းၶိူဝ်းလွႆ (တဢၢင်း) မၢႆးမွင်ႇဢေး ၵဵဝ်ႇၵပ်းပၼ်ႁႃ တီႈလိၼ် ဢၼ်ၵူၼ်းမိူင်းပိုၼ်ႉတီႈ ပဵၼ်ၸဝ်ႈၶွင် (တီႈလိၼ်ၽုင်ႇ) ၼၼ်ႉ ဝႃႈၼႆ။

မိူဝ်ႈဝႃး ဝၼ်းတီႈ 29 ၵူၼ်းဝၢၼ်ႈၼမ်ႉႁွႆတႂ်ႈ၊ ၼမ်ႉႁွႆၼိူဝ်၊ မၢၼ်ႈမေႃႈ လႄႈ ၸိူဝ်းယူႇၼႂ်းဢိူင်ႇမိူင်းယူး ဢၼ်မီးၼိူဝ် သဵၼ်ႈတၢင်းၵႂႃႇ ပၢင်ႇသၢႆး-105 လၵ်းၼၼ်ႉ ဢွၼ်ၵၼ်ယိပ်းပၢႆႉ ဢၼ်မီးတူဝ်လိၵ်ႈတႅမ်ႈဝႆႉ “ဢမ်ႇလူဝ်ႇၵွၼ်းဢိူင်ႇ ဢူးမွင်ႇဢေး” ၊ “ဢမ်ႇလူဝ်ႇၵွၼ်းဢိူင်ႇဢၼ်ယိုတ်းသိမ်းတီႈလိၼ်ၵူၼ်းမိူင်း” ၼႆၼၼ်ႉ ဢွၵ်ႇမႃးလႄႇၵၢင်ၸႂ် – ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းထုင်ႉ 105 လၵ်းသေ ႁူႉႁၼ်ၸွမ်းလွင်ႈပိူင်ပဵၼ်ၼႆႉ လၢတ်ႈၼႄတီႈ ၽူႈတွႆႇႁွၵ်ႈဝႃႈ “လိၼ်ၼၼ်ႉ မီးတၢင်းလွႆသၢႆးၼၼ်ႉဢေႃႈ။ မၼ်းပဵၼ်လိၼ် ၽုင်ႇ ၵူၼ်းဝၢၼ်ႈၼမ်ႉႁွႆ။ မိူဝ်ႈလဵဝ် ၶိင်းမၢႆးမွင်ႇဢေးၼႆႉ မၼ်းပဵၼ်ၵွၼ်းဢိူင်ႇ (ဢူၵ်ႉၶျူၵ်ႉယေးမူး) ဝႆႉ။ မၼ်း သမ်ႉၶႂ်ႈၵႂႃႇသွမ်ႈဢွႆႈတီႈ ၼႂ်းသူၼ် လိၼ်ၽုင်ႇဝၢၼ်ႈၼမ်ႉႁွႆၼၼ်ႉ။ မၼ်းၵႂႃႇသွႆးၵရႅၼ်ႇ တီႈၼႂ်းလွႆၶဝ်ဝႃႈ ပဵၼ်ၶွင်မၼ်းဝႆႉ။ ၵွပ်ႈၼၼ် ၵူၼ်းမိူင်းၸိူဝ်းၼႆႉ ၶိုၼ်းၵႂႃႇဢုပ်ႇၵၼ်တင်းၶိင်းမၢႆးမွင်ႇဢေးၼၼ်ႉ ဢမ်ႇတူၵ်းလူင်းၵၼ်လႆႈ ဢမ်ႇပဵၼ်ပၢင်မႃးလႄႈ ၶဝ်ၸင်ႇလုၵ်ႉသၢၼ်ၶတ်းတေႃႇမၼ်းဢေႃႈ” ဝႃႈၼႆ။

ဢိူင်ႇမိူင်းယူးဢၼ်ဝႃႈၼႆႉ ဢမ်ႇၸႂ်ႈမိူင်းယု တၢင်းၼမ်ႉၽၵ်းၵႃၼၼ်ႉ။ 105 လၵ်းၼႆႉ ၵူၼ်းမိူင်းပိုၼ်ႉတီႈ တႆးတိုၼ်းႁွင်ႉဝႃႈ “ဢိူင်ႇမိူင်းယူး” ၼႆၵူၺ်း။ ၼႂ်းဢိူင်ႇမိူင်းယူးၼႆႉ တေပႃးဝႆႉ မၢၼ်ႈမေႃႈ၊ ဝၢၼ်ႈၼမ်ႉႁွႆၼိူဝ်၊ ဝၢၼ်ႈၼမ်ႉႁွႆတႂ်ႈ မီးၼိူဝ်သဵၼ်ႈတၢင်းၵႂႃႇ ပၢင်ႇသၢႆး ဝဵင်းမူႇၸေႊၼႆ – ၵူၼ်း မိူင်းပိုၼ်ႉတီႈယိုၼ်ယၼ်လၢတ်ႈ ၼင်ႇၼႆ။

လႆႈႁူႉဝႃႈ မၢႆးမွင်ႇဢေး ၵေႃႉပဵၼ်ၵွၼ်းဢိူင်ႇ ၼႂ်းဢိူင်ႇမိူင်းယူးၼႆႉ ပဵၼ်ၸၢဝ်းၶိူဝ်းလွႆ (တဢၢင်း)။ မိူဝ်ႈပႆႇပဵၼ် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉ လႆႈၸၼ်ႉပဵၼ်ၵွၼ်းဢိူင်ႇ ၾၢႆႇတႂ်ႈလူင်ပွင်ၸိုင်ႈသိုၵ်းမၢၼ်ႈဝႆႉ သေတႃႉ ယၢမ်းဝၢၼ်ႈမိူင်းသုၵ်ႉသၵ်ႉ သိုၵ်းမၢၼ်ႈ တင်း သိုၵ်းလွႆ (တဢၢင်း) လႄႈ ၸုမ်းသိုၵ်းဢူၺ်းလီၶဝ် ယိုဝ်းၵၼ်တၢင်း 105 လၵ်းၼၼ်ႉ သိုၵ်းမၢၼ်ႈၶဝ်ႈသွၵ်ႈၼႂ်းႁိူၼ်းမၼ်း ထူပ်းႁၼ်ၺႃး ၶိူင်ႈၵွင်ႈၵၢင်ႇ လႄႈ သိူဝ်ႈၶူဝ်းသိုၵ်းလွႆ လႄႈ ၸင်ႇၺႃးတီႉၺွပ်းၵႂႃႇတူၵ်းၶွၵ်ႈယူႇ တီႈဝဵင်းလႃႈသဵဝ်ႈ။ ယၢမ်းလဵဝ် မၢႆးမွင်ႇဢေးၼႆႉ ယူႇတႂ်ႈဢႃႇၼႃႇသိုၵ်းၵဝ်ႈၵၢင်ႉ ႁိုဝ် သိုၵ်းလွႆ (တဢၢင်း) ဢၼ်လႂ်ဝႆႉတေႉတေႉတႄႉ ဢမ်ႇလႆႈႁူႉတႅတ်ႈၼႅတ်ႈ – ၼႆယဝ်ႉ။

“မၼ်းၵႂႃႇယွၼ်းၽုၵ်ႇသွမ်ႈဢွႆႈ။ တီႈတေႉပဵၼ်တီႈလိၼ်ၽုင်ႇၵူၼ်းဝၢၼ်ႈ။ လၢႆဢေႇၵ တႄႉဢမ်ႇၼပ်ႉလႆႈ။ ၵူၺ်းၵႂၢင်ႈႁႅင်းတေႉတေႉ” ၼႆ ၵူၼ်းမိူင်းပိုၼ်ႉတီႈ ၼႂ်းဢိူင်ႇမိူင်းယူႇ ယိုၼ်ယၼ်လၢတ်ႈဝႆႉၼင်ႇၼႆ။

ၵဵဝ်ႇၵပ်းလွင်ႈပၼ်ႁႃတီႈလိၼ်ၼႆႉသေ ၵူၼ်းမိူင်းၸိူဝ်းဢမ်ႇႁၼ်လီၸွမ်း လွင်ႈႁဵတ်းသၢင်ႈ ၵွၼ်းဢိူင်ႇ မၢႆးမွင်ႇဢေးၼႆႉ ၵႂႃႇတိူင်ႇၸႅင်ႈတီႈလုမ်း ၵေႃႇမတီႇၸုမ်းသိုၵ်းဢူၺ်းလီ 105 လၵ်းၼၼ်ႉၵေႃႈ ၾၢႆႇၸုမ်းသိုၵ်းယိပ်းၵွင်ႈၵၢင်ႇ ဢမ်ႇတႅပ်းတတ်းတြႃးပၼ်ႁႂ်ႈၽဵင်ႇပဵင်း -ဝႃႈၼႆ။

တီႈလိၼ်ၽုင်ႇဢၼ်ၵူၼ်းဝၢၼ်ႈႁူမ်ႈၵၼ်ဢွၵ်ႇမႃးသၢၼ်ၶတ်း ၵႅတ်ႈၵင်ႈဢဝ်ၶိုၼ်းယူႇၼႆႉ ပဵၼ်ၶွင်ၵူၼ်းမိူင်းမႃး ဢမ်ႇယွမ်း 30 ပီပၢႆယဝ်ႉလႄႈ ၽူႈလႂ်ၽႂ်သေဢမ်ႇဝႃႈ ဢမ်ႇမီးသုၼ်ႇလႆႈၵႂႃႇႁဵတ်းသၢင်ႈ ၵၢၼ်ၽုၵ်ႇသွမ်ႈတႃႇသုၼ်ႇတူဝ်၊ ဢမ်ႇမီးသုၼ်ႇၶၢႆၵိၼ်လႆႈ – ဝႃႈၼႆ။