ပီ 2026 လိူၼ်ဢွၵ်ႉထူဝ်ႊပိူဝ်ႊတေမႃးၼႆႉ ၸုမ်းသိုၵ်းၶႄႇၵဝ်ႈၵၢင်ႉ (MNDAA) တေပိုတ်ႇၸၼ်ႉၸွမ် ၾၢႆႇပၢႆးယူႇလီ (LUMNHS) ဢၼ်လႆႈၸႂ်ႉတိုဝ်းၽႃသႃဢိင်းၵလဵတ်ႈ လႄႈ ၽႃသႃမၢၼ်ႈ ပူင်သွၼ်ၵႂႃႇ ၼႂ်းၶၢဝ်းတၢင်း 4 ပီ တီႈဝဵင်းၵၢတ်ႇၵဝ်ႇ (လၢဝ်ႇၵၢႆး) ဝႃႈၼႆ။
မိူဝ်ႈပူၼ်ႉမႃးဝၼ်းတီႈ 12/7/2026 ႁွင်ႈၵၢၼ်သိုဝ်ႇၶၢဝ်ႇၸုမ်းသိုၵ်းၶႄႇၵဝ်ႈၵၢင်ႉ (The Kokang) ႁၢႆးငၢၼ်းဝႃႈ – တႃႇၶဝ်ႈႁဵၼ်းၸွမ်းပၢင်သွၼ် လွၵ်းလၢႆးပၢႆးလုမ်းလႃးၵူၼ်းပဵၼ်သေ ႁပ်ႉ ၸုမ်ႈၶူး (Bechelor of Nursing Science- BNSc) တီႈၸၼ်ႉၸွမ် ၾၢႆႇယႃႈယႃ ၊ လုမ်းလႃး ၵူၼ်းပဵၼ် လႄႈ ပၢႆးယူႇလီဢၼ်ၵဵဝ်ႇၸွမ်းပၢႆးသၢႆႊ (Laukkaing University of Medicine, Nursing and Health Sciences – LUMNHS) ၼၼ်ႉ တေႁပ်ႉလုၵ်ႈႁဵၼ်းတႃႇ 50 ၵေႃႉၵူၺ်း- ၼႆယဝ်ႉ။
တီႈၸၼ်ႉၸွမ် ဢၼ်ၸုမ်းသိုၵ်းၶႄႇၵဝ်ႈၵၢင်ႉ (MNDAA) ဢွၼ်ၼမ်း ႁၢင်ႈႁႅၼ်းတႃႇပိုတ်ႇယူႇၼၼ်ႉ တေၸႂ်ႉ လွၵ်းလၢႆးပၢႆးသၢႆႊ ဢၼ်ၶိုတ်းတၼ်းၵၢပ်ႈပၢၼ် မိူၼ်ၼင်ႇ Artificial Intelligence (AI) သေ ႁဵၼ်းၵၼ်ၵႂႃႇ ၵမ်းၸုမ်းၸုမ်း (TBL) ၊ ၶိုၼ်းၽႄႁဵတ်းၸုမ်းဢွၼ်ႇၸုမ်းဢိတ်း သေ ဢုပ်ႇဢူဝ်းႁဵၼ်းသွၼ်ၵႂႃႇ (SGD) ၵူၺ်းဢမ်ႇၵႃး တေၸႂ်ႉတိုဝ်းပႃး လၢႆး တၢင်း Augmented Reality (AR)၊ Virtual Reality (VR) ဢၼ်ၶိုတ်းၸၼ်ႉၸိူဝ်းၼႆႉပႃးထႅင်ႈ – ၼႆယဝ်ႉ။
ၾၢႆႇတႂ်ႈၸၼ်ႉၸွမ် ၾၢႆႇပၢႆးယူႇလီၼႆႉ ဢၼ်ၸႂ်ႉ AI သေႁဵၼ်းသွၼ်ၵႂႃႇၼႆႉ ၼႂ်းၼႃႈလိၼ်ဢၼ်သိုၵ်းၵဝ်ႈၵၢင်ႉၵုမ်းၵမ်ဝႆႉ တေမီးယူႇ ၵိင်ႇၽႄ သၢမ်ႁူင်းႁဵၼ်း။ တေပဵၼ်ႁူင်းႁဵၼ်း School of Medicine, School of Nursing လႄႈ School of Health Sciences ၸဵမ်ၸိူဝ်းၼႆႉ။
ၾၢႆႇၸုမ်းသိုၵ်းၶႄႇၵဝ်ႈၵၢင်ႉ တေႁွင်ႉဢဝ် ၶူးပူင်သွၼ်လူင် (ပႃႇမွၵ်ႉၶ) ၵေႃႉမီးတူဝ်ထူပ်း ၼႂ်းၸၼ်ႉလုမ်ႈၾႃႉၵေႃႉ ၼိုင်ႈ မႃးၼမ်းၼႃႈ ၶူးပူင်သွၼ်လူင်ၾၢႆႇၵၢၼ်ယူတ်းယႃၶိုၵ်ႉတွၼ်း 30 ၵေႃႉ ၼႂ်းၼႃႈတီႈၵုမ်းၵမ်ၶိုၵ်ႉ တွၼ်း မၢႆ (1) သေ ပူင်သွၼ်ပၼ်ၵႂႃႇ ႁႂ်ႈၶိုတ်းၸၼ်ႉၸွမ်းၼင်ႇလၵ်းသုတ်ႇၵၢၼ် ႁဵၼ်း ၸၼ်ႉၸွမ်လုမ်ႈၾႃႉမီးၼၼ်ႉ ။
လႆႈႁူႉဝႃႈ ပေႃးပဵၼ်ႁူင်းႁဵၼ်းၾၢႆႇယႃႈယႃ School of Medicine ၸိုင် တေတႄႇႁပ်ႉလုၵ်ႉႁဵၼ်း မွၵ်ႈ 50 ၵေႃႉသေ တႄႇပိုတ်ႇၵႂႃႇ ၼႂ်းႁူဝ်ပီ 2027 ။ ႁၢင်ႈႁႅၼ်းဝႆႉ တေဢဝ် ပိူင်ဢေႊ ဢၢႆႊ (AI-Integrated Competency-Based Curriculum) ပဵၼ်ပိူင်ယႂ်ႇသေ တေလႆႈႁဵၼ်း သွၼ်ဢဝ်ၵႂႃႇ ၶၢဝ်းတၢင်း 5 ပီၶိုင်ႈ – ဝႃႈၼႆ။
လုၵ်ႈႁဵၼ်းၸိူဝ်းမီးသုၼ်ႇသူင်ႇယိုၼ်ႈဝႂ် တႃႇၶဝ်ႈႁဵၼ်းသွၼ်တီႈၸၼ်ႉၸွမ်ၼၼ်ႉ မၵ်းမၼ်ႈဝႆႉ ႁႂ်ႈ လႆႈပဵၼ်ၵူၼ်းၼုမ်ႇၸိူဝ်းမီးဢႃႇယု 16 ပီ ထိုင် 30 ပီ သေ တေလႆႈယဝ်ႉၵၢၼ်ႁဵၼ်း ႁူင်းႁဵၼ်းလူင် ပွင်ၸိုင်ႈသိုၵ်းမၢၼ်ႈ ၸၼ်ႉ 11-12 ၾၢႆႇပၢႆးသၢႆႊ ဢမ်ႇၼၼ် တေလႆႈပဵၼ်ၵူၼ်းၸိူဝ်းဢွင်ႇပူၼ်ႉ ၸၼ်ႉ GED ႁိုဝ် ၵူၼ်းၼုမ်ႇၸိူဝ်းယဝ်ႉၵၢၼ်ႁဵၼ်းဢၼ်ၸၢတ်ႈၸိုင်ႈ လုမ်ႈၾႃႉ မၵ်းမၼ်ႈ IGCSE ၸဵမ်ၸိူဝ်းၼႆႉ – ဝႃႈၼႆ။
လိူဝ်ၼၼ်ႉ လုၵ်ႈႁဵၼ်း ဢမ်ႇၼၼ် ၵူၼ်းၼုမ်ႇ ၸိူဝ်းလႆႈၵိုတ်းယင်ႉၵၢၼ်ႁဵၼ်း ၾၢႆႇပၢႆးယူႇလီဝႆႉ ၼၼ်ႉၵေႃႈ မီးသုၼ်ႇယိုၼ်ႈတၢင်ႇဝႂ်လႆႈသေ တေၸတ်းပၢင်တွပ်ႇလိၵ်ႈ ၵႂႃႇၼိူဝ်ဢွၼ်ႊလၢႆႊ လႄႈ ႁူပ်ႉထူပ်းတူဝ်ၵူၼ်းသေ ၸတ်းပၢင်တွပ်ႇလိၵ်ႈ ၽႃသႃဢိင်းၵလဵတ်ႈ၊ ပၢႆးသၢႆႊၵႂႃႇ – ဝႃႈၼႆ။
ႁူင်းႁဵၼ်း ၾၢႆႇလုမ်းလႃးၵူၼ်းပဵၼ် School of Nursing ၵေႃႈ တေတႄႇႁပ်ႉလုၵ်ႈႁဵၼ်း မွၵ်ႈ 50 ၵေႃႉသေ တႄႇပိုတ်ႇၵႂႃႇ ၼႂ်းလိူၼ်ဢွၵ်ႉထူဝ်ႊပိူဝ်ႊ ပီ 2026 ၼႆႉၵႂႃႇ။ ၸုပ်ႈဢွၼ် တၢင်းသုတ်းတႄႉ တေၸႂ်ႉလၵ်းသုတ်ႇပိူင်ၵၢၼ်ႁဵၼ်းဢၼ်ၵဝ်ႇသေ ပူင်သွၼ်ပၼ်ၵႂႃႇသေတႃႉ တႄႇၸုပ်ႈမၢႆသွင် ၵႂႃႇ တႄႉ တေၸႂ်ႉလႅၵ်ႈလၢႆႈၸႂ်ႉတိုဝ်း ဢဝ်ပိူင်ဢေႊဢၢႆႊ (AI Integrated Curriculum) ပူင်သွၼ် ၵႂႃႇ- ၼႆ ႁွင်ႈၵၢၼ်ၾၢႆႇပိုၼ်ၽၢဝ်ႇ သိုၵ်းၵဝ်ႈၵၢင်ႉပိုၼ်ၽၢဝ်ႇဝႆႉၼင်ႇၼႆ။
ႁူင်းႁဵၼ်းၾၢႆႇပၢႆးသၢႆႊလွင်ႈပၢႆးယူႇလီ School of Health Sciences တႄႉ ႁၢင်ႈႁႅၼ်းဝႆႉ တေပိုတ်ႇ ၵႂႃႇႁႂ်ႈလႆႈ ၼႂ်းႁၢင်ပီ 2027 သေ ယိူင်းဢၢၼ်းတႃႇ ပူၵ်းပွင် ႁႂ်ႈမီးၽူႈလူင်ႉလႅၼ်ႇၾၢႆႇပၢႆး ယႃႈယႃၼမ် မႃးလိူဝ်ၵဝ်ႇ – ဝႃႈၼႆ။
ႁူင်းႁဵၼ်းၸၼ်ႉသုင်လွၵ်းလၢႆးပၢႆးသၢင်ႈၼႆႉ တေပိုတ်ႇပၼ်တီႈ ဝဵင်းၵူတ်ႉၶၢႆ၊ ႁူင်းႁဵၼ်းၸၼ်ႉသုင် (ပညာရေးကောလိပ်) သမ်ႉ တေပိုတ်ႇဝႆႉပၼ်တီႈ ဝဵင်းသႅၼ်ဝီသေ ၸၼ်ႉၸွမ်ၶွမ်ႊ ပိဝ်ႊတိူဝ်ႊၵေႃႈ ႁၢင်ႈႁႅၼ်းဝႆႉတႃႇပိုတ်ႇၵႂႃႇ ၼႂ်းႁၢင်ပီ 2027 ယူႇမိူၼ်ၵၼ်သေတႃႉ တေပဵၼ်ၼႂ်းၸႄႈဝဵင်းလႂ်ၼႆတႄႉ ပႆႇတႅပ်းတတ်းလႆႈ ဢွင်ႈတီႈမၼ်း – သိုၵ်းၵဝ်ႈၵၢင်ႉပိုၼ်ၽၢဝ်ႇဝႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ