မိူဝ်ႈၼႆႉ ဝၼ်းတီႈ 30 လိူၼ်ၵျူႊလၢႆႊ ယၢမ်းၵၢင်ၼႂ် မွၵ်ႈ 10 မူင်းၶိုင်ႈ ၼုမ်ႇၸၢႆးၵေႃႉၼိုင်ႈ ၺႃးယိုဝ်းတၢႆၵႂႃႇ ၼႂ်းႁၢၼ်ႉလဵၼ်ႈၵဵမ်း ႁိမ်းသဵၼ်ႈတၢင်းၶွႆႈ ၾၢႆႇႁူဝ်ၼႃး (ဟိုနားလမ်းဆုံဂိမ်းဆိုင်) ပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ မိူင်းတႆးပွတ်းႁွင်ႇ။

ၵူၼ်းမိူင်းၵေႃႉယူႇဝႆႉၼႂ်းဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းလဵၼ်ႈၵဵမ်းတေႃႇၵူၼ်းလဵၼ်ႈၵဵမ်း ႁိမ်ၵွင်ႈၼႂ်းမိုဝ်းၵူၼ်းပႂ်ႉယၢမ်းသေ ဢဝ်ၵွင်ႈယိုဝ်းၵၼ်တၢႆ ၼႂ်းသႅင်ႇၵဵမ်း။ ၽူႈမီးပုၼ်ႈၽွၼ်း ပႂ်ႉယၢမ်း ၼႂ်းသႅင်ႇၵဵမ်းၼၼ်ႉၵေႃႈ မိူဝ်ႈလဵဝ် ပျီႇတူႉၸိတ်ႉမဵဝ်ႉမ မၢႆ (2) ၶဝ်ႁွင်ႉၵႂႃႇယဝ်ႉ။ ၵူၼ်းၵေႃႉဢဝ်ၵွင်ႈယိုဝ်း ၼၼ်ႉ ၵေႃႈ ပလိၵ်ႈ (ယႄး) ၶဝ်မႃးၺွပ်းၵႂႃႇယဝ်ႉ။ တူၺ်းတႄႉ ၶဝ်လႅပ်ႈမီးၸႂ်ၼိူဝ်ၵၼ်ဝႆႉႁႄ ႁဵတ်းတီႈၵၼ်ၶိုၼ်းၸိူင်ႉၼၼ်ဢေႃႈ” ဝႃႈၼႆ။

လႆႈႁူႉဝႃႈ ၵူၼ်းၸိူဝ်းႁပ်ႉပုၼ်ႈၽွၼ်း ဢဝ်ႁူမ်ႇလူမ်ႈ ပႂ်ႉယၢမ်းပၼ် ၸွမ်းႁၢၼ်ႉ (သႅင်ႇ) လဵၼ်ႈၵဵမ်းယူႇ ၼႂ်းဝဵင်းမူႇၸေႊၼႆႉ ပဵၼ်ၸုမ်းပျီႇတူႉၸိတ်ႉ တႂ်ႈဢႃႇၼႃႇၵုမ်းၵမ် သိုၵ်းမၢၼ်ႈ ယိုတ်းမိူင်းတင်းသဵင်ႈ ဝႃႈၼႆ။

ၼုမ်ႇၸၢႆးၵေႃႉလူႉတၢႆၵႂႃႇ ၼႂ်းႁၢၼ်ႉလဵၼ်ႈၵဵမ်းၼၼ်ႉ ပဵၼ်လုၵ်ႈလၢင်းၽႂ် ယူႇဝၢၼ်ႈလႂ် ၸၢဝ်းၶိူဝ်းသင်ၼႆ ပႆႇလႆႈႁူႉႁူဝ်ယွႆႈတႅတ်ႈတေႃးသေ ၵေႃႉပူၼ်ႉပႅၼ်ႁဵတ်းၽိတ်း ယိုဝ်းၵူၼ်းတၢႆၵႂႃႇၼၼ်ႉတႄႉ ၸိုဝ်ႈႁွင်ႉ ၵူဝ်ႇမိၼ်းၶၢၼ်ႉ – ဝႃႈၼႆ။

ၼႂ်းဝဵင်းမူႇၸေႊၼႆႉ ၸုမ်းႁဵတ်းၵိၼ်ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၵေႃႈ လိူင်ႇၼမ်၊ ႁၢၼ်ႉပျေႃႇမူၼ်ႈ KTV၊ ႁူင်းမိပ်ႇၼူတ်ႈ ၊ ႁူင်းလဵၼ်ႈၵဵမ်း ၵၢၼ်တေႃႇလွင်း ယိုဝ်းပႃ လႄႈ ပၢင်ၽၢႆႉၵူႈသႅၼ်းသႅၼ်းၸိူဝ်းၼႆႉ မီးတဵမ်ၵႂႃႇသဵင်ႈသေ ပဵၼ်ၸုမ်းသိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉ ပဵၼ်တၢင်းၵၢၼ်ၼႆသေတႃႉ မီးပႃးၸုမ်းပျီႇတူႉၸိတ်ႉ မွၵ်ႈ 15 ၸုမ်း ႁူမ်ႈၵၼ်တင်းသိုၵ်းမၢၼ်ႈ ႁဵတ်းၵၢၼ်ဝႆႉၸွမ်း ၼႆယဝ်ႉ။

လိူဝ်ၼၼ်ႉ ၾၢႆႇၼွၵ်ႈဝဵင်းသမ်ႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆလၢႆၸုမ်း တူင်ႉၼိုင်ယူႇသဝ်းၵႂႃႇမႃးဝႆႉ ထႅင်ႈလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။