မိူဝ်ႈဝၼ်းတီႈ 28 လိူၼ်ၵျူႊလၢႆႊ လူင်ပွင်ၸိုင်ႈတေႃႊၼႄႊလ်ထရမ်ႉ ဢိုတ်းႁပ်းပႅတ်ႈ ၵၢၼ်ႁပ်ႉသိုဝ်ႉ ႁုၼ်ႇႁၢင်ႈၶိူင်ႈၸၢၵ်ႈ AI ဢၼ်မိူင်းၶႄႇ ၸႂ်ႉတိုဝ်း ပႃႊဝႃႊဢိၼ်ႊပၢႆႊတိူဝ်ႊသ် (Power Inverters) သေ ႁဵတ်းဢွၵ်ႇဝႆႉၼၼ်ႉ ၼႆယဝ်ႉ။

ပိူဝ်ႈတႃႇၵႅတ်ႇၶႄႇၵၢၼ်လွၵ်ႇငိုတ်ႈ လွင်ႈႁူမ်ႈလူမ်ႈၸိူဝ်ႉၸၢတ်ႈၼႆသေ လူင်ပွင်ၸိုင်ႈမိူင်းဢမေႊရိၵၼ်ႊ မၵ်းတတ်း ဢိုတ်ႊႁပ်းပႅတ်ႈ ၵၢၼ်ႁပ်ႉသိုဝ်ႉ ၶိူင်ႈၸၢၵ်ႈႁုၼ်ႇႁၢင်ႈ AI ၶိုတ်း ၵၢပ်ႈပၢၼ် ဢၼ်လူင်ပွင်ၸိုင်ႈမိူင်းၶႄႇ သၢင်ႈဢွၵ်ႇမႃး ပဵၼ်ႁၢင်ႈၵူၼ်း လႄႈ ပႃႊဝႃႊဢိၼ်ႊပၢႆႊတိူဝ်ႊသ် ၸိူဝ်းၵွင်ႉသၢၼ်ပၼ်ၵၼ်တင်း သၢႆႁႅင်းထၢတ်ႈ လႄႈ သုၼ်ၶေႃႈမုလ်း ၸိူဝ်း ၼၼ်ႉ တင်းသဵင်ႈ ၼႆယဝ်ႉ။

ၶွမ်ႊမသျိၼ်ႊၵၢၼ်ၵပ်းသိုပ်ႇသၢၼ် မိူင်းဢမေႊရိၵၼ်ႊ (FCC) ႁၢႆးငၢၼ်းပိုၼ်ၽၢဝ်ႇဢွၵ်ႇဝႃႈ “ၶိူင်ႈၸၢၵ်ႈႁုၼ်ႇႁၢင်ႈ ၸိူဝ်းမိူင်းၶႄႇႁဵတ်းၼႆႉ ၸၢင်ႈမႃးတုမ်ႉတိူဝ်ႉၼႂ်းၵၢၼ်ႁူမ်ႇလူမ်ႈ ၸိူဝ်ႉၸၢတ်ႈ လႄႈ ၵၢၼ်မၢၵ်ႈမီးမိူင်းဢမေႊရိၵၼ်ႊ။ လမ်ႇလွင်ႈသုတ်းတႄႉ ၸၢင်ႈမႃးလွၵ်ႇငိုတ်ႈ လွင်ႈႁူမ်ႇလူမ်ႈသၢႆႊပႃႊ လႄႈ ဢွင်ႈတီႈလမ်ႇလွင်ႈတီႈသုတ်းၼႂ်းမိူင်းဢမေႊရိၵၼ်ႊ” ဝႃႈၼႆ။

လုမ်းၽွင်းတၢင်မိူင်းၶႄႇ ဢၼ်မီးဝႆႉယူႇၼႂ်းမိူင်းဢမေႊရိၵၼ်ႊၼၼ်ႉတႄႉ လၢတ်ႈၵဵဝ်ႇလူၺ်ႈလွင်ႈၼႆႉဝႃႈ “ၾၢႆႇလူင်ပွင်ၸိုင်ႈဢမေႊရိၵၼ်ႊၵေႃႈ တိုၵ်းသူၼ်းဝႆႉႁႂ်ႈၵိုတ်းယိုတ်း ၵၢၼ် ဢိုပ်းႁၢၼ် လႄႈ ယႃႉသလေႇၼႃႈတႃ ၶွမ်ႊပၼီႊၶႄႇ” လႄႈ တေလႆႈႁပ်ႉထွမ်ႇ သဵင်ၵၢင်ၸႂ် ၵူၼ်းၼႂ်းတူင်ႇဝူင်းၵၢၼ်မၢၵ်ႈမီး တင်းသွင်ၸိုင်ႈမိူင်း ႁႂ်ႈထုၵ်ႇမႅၼ်ႈၽဵင်ႇပဵင်းပဵၼ်ထမ်းပႃးထႅင်ႈ ဝႃႈၼႆ။

ၼင်ႇႁိုဝ်တေဢမ်ႇမႃးတုမ်ႉတိူဝ်ႉၼိူဝ် ၵၢၼ်ပၢႆးမၢၵ်ႈမီးၸဝ်ႈၵဝ်ႇၼၼ်ႉ ထုၵ်ႇလီႁဵတ်းသၢင်ႈ ၵၢၼ်တူင်ႉၼိုင် ၸိူင်ႉႁိုဝ်ၵေႃႈ တေၶတ်းၸႂ်တုမ်ႉတွပ်ႇၵႂႃႇတင်းသဵင်ႈၼႆ လူင်ပွင်ၸိုင်ႈမိူင်း ၶႄႇ သိုပ်ႇပၼ်ၾၢင်ႉဝႆႉၼင်ႇၼႆ။

ၵၢၼ်တီႈ လူင်ပွင်ၸိုင်ႈမိူင်းဢမေႊရိၵၼ်ႊ ဢိုတ်းႁပ်းပႅတ်ႈ ၵၢၼ်ႁပ်ႉသိုဝ်ႉ ၶိူင်ႈၸၢၵ်ႈႁုၼ်ႇႁၢင်ႈ AI ၶိုတ်းၵၢပ်ႈၼၼ်ႉ ပဵၼ်တႃႇလူတ်းယွမ်း ၵၢၼ်ပိုင်ႈဢိင်မိူင်းၶႄႇသေ ၵေႃႇသၢင်ႈ သုၼ်ၶေႃႈမုၼ်းလႄႈ ႁႂ်ႈၶတ်းၸႂ်မေႃၸႂ်ႉတိုဝ်း ၶူဝ်းၵုၼ်ႇဢၼ်ႁဵတ်းဢွၵ်ႇ ၼႂ်းမိူင်းၸဝ်ႈၵဝ်ႇၼၼ်ႉ ၼမ်ၶိုၼ်ႈလိူဝ်ၵဝ်ႇ – ဝႃႈၼႆ။