ၵူၼ်းမိူင်းမၢၼ်ႈ ၸိူဝ်းၶဝ်ႈၵႂႃႇႁဵတ်းၵၢၼ်ယူႇ ၼႂ်းမိူင်းၶႄႇ 1000 ၵေႃႉပၢႆ ၺႃးပလိၵ်ႈမိူင်းၶႄႇ တီႉၺွပ်းသေ မွပ်ႈပၼ်ၼႂ်းမိုဝ်း ၸုမ်းသိုၵ်းမိူင်းလႃး ၵူၼ်းၸၢႆးၸိူဝ်းဢႃႇယုတဵမ် မီးယူႇၼႂ်းသဵၼ်ႈမၢႆ ႁၢပ်ႇၵၢၼ်သိုၵ်းၼၼ်ႉ ထုၵ်ႇသိုပ်ႇသူင်ႇၵႂႃႇတီႈသိုၵ်းမၢၼ်ႈယိုတ်းမိူင်း ဝႃႈၼႆ။

ၵူၼ်းၺႃးတီႉၺွပ်းၼႆႉ ပဵၼ်ႁႅင်းၵၢၼ်ၸိူဝ်းဢမ်ႇထုၵ်ႇမႅၼ်ႈၸွမ်းပၵ်းပိူင်  ၸိူဝ်းမီးယူႇဝႆႉၼႂ်းမိူင်းၶႄႇ။ တႃႇ 400 ၵေႃႉ ၸိူဝ်းမီးယူႇၼႂ်းဝဵင်းၵျိၼ်ႊႁူင်ႊ ၾၢႆႇၸၢၼ်းမိူင်းၶႄႇ ႁဵတ်းၵၢၼ် ၼႂ်းသူၼ်ၶဝ်ႈၵၢပ်ႇ လႄႈ ႁူင်းၵၢၼ်ၵဵဝ်ႇၵပ်းၶဝ်ႈၵၢပ်ႇၼၼ်ႉ ၺႃးၵူၼ်းႁႃၵၢၼ်ပၼ် (ပွႆးၸႃး) ၸႅင်ႈတီႈပလိၵ်ႈ ၼႆယဝ်ႉ။

ယွၼ်ႉပလိၵ်ႈမိူင်းၶႄႇ ၸွမ်းတီႉၺွပ်းလႄႈ ႁႅင်းၵၢၼ်မိူင်းမၢၼ်ႈၸိူဝ်းမီးယူႇၼႂ်းမိူင်းၶႄႇ ဢွၼ်ၵၼ်လႆႈပၢႆႈဝႆႉ။ ၸုမ်းသိုၵ်းမိူင်းလႃးၵေႃႈ ပႂ်ႉႁပ်ႉဢဝ် ႁႅင်းၵၢၼ်ၸိူဝ်းၺႃးတီႉၺွပ်းၼၼ်ႉသေ သူင်ႇမွပ်ႈပၼ်ၼႂ်းမိုဝ်း သိုၵ်းမၢၼ်ႈ တီႈတပ်ႉၵဵင်းတုင်ယူႇ ၼႆယဝ်ႉ။  

လႆႈႁူႉဝႃႈ တႄႇဝၼ်းတီႈ 18 ၵၢင်လိူၼ်ၵျူႊလၢႆႊမႃး ပလိၵ်ႈမိူင်းၶႄႇ ၸွမ်းတီႉၺွပ်းၵူၼ်းမိူင်းမၢၼ်ႈႁၢဝ်ႈႁႅင်း ယၢမ်းလဵဝ် ႁႅင်းၵၢၼ်ၸိူဝ်းဢမ်ႇမီးဝတ်းဝႂ်တဵမ်ထူၼ်ႈ လႆႈၾၢင်ႉၵၼ်ယူႇ သဝ်းဝႆႉ။ ပလိၵ်ႈမိူင်းၶႄႇ ဢဝ်ၵူၼ်းၸိူဝ်းၺႃးတီႉၺွပ်း သူင်ႇပၼ်ၸုမ်းသိုၵ်းမိူင်းလႃးယဝ်ႉ 6 ပွၵ်ႈ ၼိုင်ႈပွၵ်ႈ ဝႃႈၼႆ။

ႁႅင်းၵၢၼ်ၸိူဝ်းၺႃးတီႉၺွပ်းၼႆႉ ပဵၼ်ၵူၼ်းၼုမ်ႇသႅၼ်းဢႃႇယု 25 ပီ ထိုင် 30 ပီ ယူႇသဝ်းတၢင်း တိူင်းမၵူၺ်း၊ ၸႄႈမိူင်းရၶႅင်ႇ၊ ၼႃႈတီႈသိုၵ်းပလွင်ႈ လႄႈ ပိုၼ်ႉတီႈၸၢဝ်းၶိူဝ်းၼႃႇၵ ၵုမ်းၵမ်ဝႆႉ။ ႁႅင်းၵၢၼ်ၸိူဝ်းလုၵ်ႉတၢင်းၾင်ႇမိူင်းမၢၼ်ႈ ၵႂႃႇႁဵတ်းၵၢၼ်ယူႇတၢင်း ၾင်ႇမိူင်းၶႄႇ ဝဵင်းၵျိၼ်ႊႁူင်ႊ လႅၼ်လိၼ် မိူင်းလႃး-မိူင်းၶႄႇၼႆႉ မီးယူႇမွၵ်ႈ 6 ႁဵင်ၵေႃႉပၢႆ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၾၢႆႇၸုမ်းသိုၵ်းမိူင်းလႃး ယင်းပႆႇႁပ်ႉတွပ်ႇၵႂၢမ်းထၢမ် ၸုမ်းသိုဝ်ႇၶၢဝ်ႇ။