သိုၵ်းမၢၼ်ႈလမ်းတီႉၺွပ်း ပေႃႉထုပ်ႉ ၵူၼ်းဝၢၼ်ႈၼႂ်းၸႄႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈ ဢွၼ်ၵၼ်ပၢႆႈဢွၵ်ႇဝၢၼ်ႈ  ။

ဝၼ်းတီႈ 22 လိူၼ်ၵျူႊလၢႆႊ ၼႆႉ သိုၵ်းမၢၼ်ႈတင်း တပ်ႉသိုၵ်းပူတ်းပွႆႇၵူၼ်းမိူင်းထၼူႉ DPLA ပဵၼ်ပၢင်တိုၵ်းၵၼ်တၢင်းဝၢၼ်ႈသိၼ်ႇသႃႇပျႃး (ဆင်ဆာပြား) ၼႆယဝ်ႉ ။

ဝၢႆးၼၼ်ႉ ဝၼ်းတီႈ 24 လိူၼ်ၵျူႊလၢႆႊ ထိုင် ဝၼ်းတီႈ 27 ၼႆႉ သိုၵ်းမၢၼ်ႈထႅမ်ႁႅင်းသိုၵ်း ထူဝ်းသိုၵ်းၶဝ်ႈၼႂ်းဝၢၼ်ႈ ၵျွၵ်ႉငႅတ်ႉ(ကျောက်ငှက်)  လႄႈ ဝၢၼ်ႈသိၼ်ႇသႃႇပျႃး (ဆင်ဆာပြား) တီႉၺွပ်းထုပ်ႉပေႃႉၵူၼ်းဝၢၼ်ႈ 20 ပၢႆ ၊ ၵမ်ႈၽွင်ႈ ပွႆႇလွတ်ႈမႃးၶိုၼ်းသေတႃႉ ၸိူဝ်းၺႃးတီႉၺွပ်းဝႆႉ တိုၵ်ႉမီးယူႇတင်းၼမ် ဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ႁၼ်ၵူၼ်းဝၢၼ်ႈတီႈလႂ်ၵေႃႈ ဢမ်ႇဝႃႈယိင်း ၊ ၸၢႆး ပေႃႉထုပ်ႉတီႉၺွပ်းၵႂႃႇ ၊ ၵူၼ်းဝၢၼ်ႈၵမ်ႈၽွင်ႈၵေႃႈပၢႆႈဢေႃႈ ၊ ဢၼ်တီႉလႆႈၸိူဝ်းၼၼ်ႉ သိုၵ်းမၢၼ်ႈၵႂႃႇၶင်ဝႆႉတီႈၸလွပ်ႈ ၵျွင်းမုၼ်ႇၸဝ်ႈၶႃႈ ၊ မၢင်ၸိူဝ်းႁွင်ႉၵႂႃႇတီႈလႂ်ၵေႃႈဢမ်ႇႁူႉ”– ဝႃႈၼႆ ။   

လႆႈႁူႉဝႃႈ တပ်ႉသိုၵ်းမၢၼ်ႈဢဝ်ဢဵၼ်ႁႅင်း ၸမ် 300 ထူဝ်းသိုၵ်း  ၶဝ်ႈသွၵ်ႈၼႂ်းႁိူၼ်းလၢႆလၢႆလင် တီႈဝၢၼ်ႈၵျွၵ်ႉငႅတ်ႉသေ တီႉၺွပ်းၵႂႃႇၵူၼ်းပိုၼ်ႉတီႈ 20 ပၢႆ ၸဵမ်ယိင်းၸဵမ်ၸၢႆး တႃႇမုင်ႉႁေႃႁိူၼ်း 4 ႁိူၼ်း။ ဝၢႆးၼၼ်ႉ ၶၢဝ်ႇလိုဝ်းဢွၵ်ႇမႃးဝႃႈ ၵူၼ်းၸၢႆးၵေႃႉၼိုင်ႈ ထုၵ်ႇသိုၵ်းမၢၼ်ႈ ထုပ်ႉပေႃႉႁၢဝ်ႈႁႅင်း ထိုင်တၢႆ ဝႃႈၼႆ။ ၵူၼ်းၸၢႆးၵေႃႉၼၼ်ႉ ပဵၼ်ၽႂ်ၸိုဝ်ႈသင်ဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။

ယွၼ်ႉသိုၵ်းမၢၼ်ႈလမ်းတီႉၺွပ်းၵူၼ်းဝၢၼ်ႈဢမ်ႇမီးလွင်ႈႁူမ်ႇလူမ်ႈလႄႈ ၵူၼ်းဝၢၼ်ႈၵျွၵ်ႉငႅတ်ႉ 10 လင်ႁိူၼ်း ငိူင်ႉပၢႆႈဢွၵ်ႇဝႆႉၼႂ်းဝၢၼ်ႈဝႆႉၼႆယဝ်ႉ ။

ၼၢင်းယိင်းယူႇဝၢၼ်ႈၵျွၵ်ႉငႅတ်ႉဢၼ်ငိူင်ႉပၢႆႈဝႆႉလၢတ်ႈၽူႈတွႆႇႁွၵ်ႈဝႃႈ –“ ငိူင်ႉပၢႆႈဝႆႉၼႆႉ လီသေ ပိူၼ်ႈ ယဝ်ႉၶႃႈ ။ ဢမ်ႇတၼ်းလႆႈဢဝ်မႃးသင် ၊ ပေႃးသိုၵ်းမၢၼ်ႈၶဝ်ႈပၵ်းတပ်ႉ ၼႂ်းဝၢၼ်ႈတႄႉ ဢမ်ႇၸၢင်ႈဢွၵ်ႇယဝ်ႉၶႃႈ ငဝ်းလၢႆးၼႂ်းပိုၼ်ႉတီႈဢမ်ႇၼိမ်သဝ်း လႆႈမႆႈၸႂ်ဝႆႉဢေႃႈ”– ဝႃႈၼႆ ။

ၵဵဝ်ၵပ်းလွင်ႈၼႆႉ ၽူႈၶၢၼ်ႇပၢၵ်ႇ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼု DSNDA လၢတ်ႈၽူႈတွႆႇႁွၵ်ႈဝႃႈ –“ ယၢမ်းလဵဝ်ၾၢႆႇသိုၵ်းမၢၼ်ႈဢဝ်ဢဵၼ်ႁႅင်း  ဢိုတ်းႁႅတ်ႉဝႆႉ ငဝ်းလၢႆးမၼ်းႁၢဝ်ႈႁႅင်းဝႆႉ ဢမ်ႇပေႃးၶႅမ်ႉ”– ဝႃႈၼႆ ။  

မိူၼ်ၼႆ ပူၼ်ႉမႃးလၢႆဝၼ်းၼႆႉၵူၺ်း သိုၵ်းမၢၼ်ႈတီႉၺွပ်း ၵူၼ်းဝၢၼ်ႈၵျွၵ်ႉငႅတ်ႉ 5 ၵေႃႉ၊ ၸိူဝ်းၶဝ် ထုၵ်ႇသူင်ႇၵႂႃႇၾိုၵ်းၵၢၼ်သိုၵ်းဝႆႉ။

ယၢမ်းလဵဝ် တၢင်းဝၢၼ်ႈၵျွၵ်ႉငႅတ်ႉၼၼ်ႉ  သိုၵ်းမၢၼ်ႈ ပၵ်းတပ်ႉသေ တူင်ႉၼိုင်ၵၢၼ်သိုၵ်းဝႆႉ။ ၼႂ်းပိုၼ်ႉတီႈၼၼ်ႉသမ်ႉ မီးဝႆႉပႃး ၸုမ်းလုၵ်ႉၽိုၼ်ႉလၢႆလၢႆၸုမ်းထႅင်ႈလႄႈ ၵူၼ်းပိုၼ်ႉတီႈ မႆႈၸႂ် လွင်ႈႁူမ်ႇလူမ်ႈၵၼ်ဝႆႉ။

ၼႂ်းၸႄႈဝဵင်းယႂႃႇငၢၼ်ႇၼၼ်ႉ ၸုမ်းလုၵ်ႉၽိုၼ်ႉ မီးလၢႆလၢႆၸုမ်း တူင်ႉၼိုင်ယူႇသဝ်းဝႆႉ။ မိူၼ်ၼင်ႇ တပ်ႉသိုၵ်းပူတ်းပွႆႇၵူၼ်းမိူင်းထၼူႉ DPLA ၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈထၼု DSNDA လႄႈ တပ်ႉၵွင် 1003 ၸုမ်း PDF ဢၼ်ယူႇတႂ်ႈ NUG ၸိူဝ်းၼႆႉ တူင်ႉၼိုင်ယူႇသဝ်းဝႆႉ။

ၼွၵ်ႈလိူဝ်ၼၼ်ႉ တေမီးတပ်ႉသိုၵ်းမၢၼ်ႈ ၸုမ်းပျူႇသေႃးထီး လႄႈ ပျီႇတူႉၸိတ်ႉၸိူဝ်းၼႆႉၵေႃႈ တူင်ႉၼိုင်ၵႂႃႇမႃးဝႆႉ။