ၸုမ်းယိပ်းၵွင်ႈၵၢင်ႇၸုမ်းၼိုင်ႈ ႁွင်ႉဢဝ်ၸဝ်ႈၸၢင်းမႂ်ႇတူၼ်ၼိုင်ႈ    တီႈဝၢၼ်ႈပူၺ်းၼၽႃး ၸႄႈဝဵင်းဝၢၼ်ႈငႂ်ႈ( ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း ၼၼ်ႉ  ၵႂႃႇ ၶႃႈႁႅမ်တၢႆ ပႅတ်ႈၼွၵ်ႈဝၢၼ်ႈ ။

ၼႂ်းဝၼ်းတီႈ 20 လိူၼ်ၵျူႊလၢႆႊယၢမ်းၵၢင်ၶမ်ႈ 10 မူင်းၼႆႉ မီးၵူၼ်းဢမ်ႇႁူႉၾၢႆႇ 5 ၵေႃႉ ပႃးၵွင်ႈၸေးမိုဝ်း ၶဝ်ႈမႃးလၢတ်ႈဝႃႈ မီးလွင်ႈလူဝ်ႇတွင်ႈထၢမ်ၼႆသေ  ႁွင်ႉဢဝ်ၸဝ်ႈၸၢင်းဝိလႃႇသ တီႈၵျွင်းမုၼ်ႇၸဝ်ႈ မျႃႉတဵင်းတၢၼ်ႇ တီႈဝၢၼ်ႈပူၺ်းၼၽႃး ၵႂႃႇ  ။

ထိုင်မႃးဝၼ်းတီႈ 21 ယၢမ်းၵၢင်ၼႂ် ၵူၼ်းဝၢၼ်ႈၵႂႃႇထူပ်းႁၼ်တူဝ်တၢႆ ၸဝ်ႈၸၢင်း တီႈၼိူဝ်သဵၼ်ႈတၢင်း ပူၺ်းၼၽႃး- ၼပၢၼ်းၵျီး မီးႁွႆးမၢတ်ႇၸဵပ်းဝႆႉတင်းတူဝ်ဝႃႈၼႆ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “မုၼ်ၸၢင်းပႃးၼႆႉ ၸင်ႇႁႃမႃးၼုင်ႈသၢင်ႇၵၢၼ်းဝႆႉပႆႇပေႃးႁိုဝ်ၵႃႈႁိုဝ်။ ၵွၼ်ႇတေမႃးၼုင်ႈၸၢင်း မိူဝ်ႈမၼ်းပဵၼ်ၵူၼ်းႁိူၼ်းၼၼ်ႉ မၼ်းၵႂႃႇပူၼ်ႉပႅၼ်လူလၢႆၵၼ်ႉၸၼ်လုၵ်ႈဢွၼ်ႇယိင်း၊ ၵွၼ်ႇၼႃႈၼၼ်ႉၸိူဝ်းၼၼ်ႉသမ်ႉ မၼ်းၸဝ်ႈမီးၶတီး ဢမူႉလဵၵ်ႉ/ယႂ်ႇတင်းၼမ်။ ဢၼ်ႁၢႆႉသုတ်းတႄႉၵေႃႈ ငိၼ်းဝႃႈမီးလွင်ႈၶႃႈႁႅမ်ၵူၼ်းတၢႆလူးၵွၼ်ႇၼႆ   “– ဝႃႈၼႆ ။   

 ၼႂ်းဝၢၼ်ႈၼႂ်းသူၼ်ၵေႃႈ မီးၶၢဝ်ႇလိုဝ်းဝႃႈ ၸဝ်ႈၸၢင်း ဝိလႃႇသၼႆႉ  ႁဵတ်းၵေႃႉၸမ်ၸႂ်ၵၼ်တင်းသိုၵ်းမၢၼ်ႈ ၊ ၵႆႉတိတ်းတေႃႇပၼ်ၶၢဝ်ႇၸူးသိုၵ်းမၢၼ်ႈလႄႈ  ၸုမ်းလုၵ်ႉၽိုၼ်ႉၼႂ်းပိုၼ်ႉတီႈ ယၢမ်ႈသူင်ႇလိၵ်ႈပၼ်ၾၢင်ႉယဝ်ႉ  2-3 ပွၵ်ႈ။ ၵွပ်ႈၼႆလႄႈ မၼ်းၸင်ႇပၢႆႈမႃးၼုင်ႈသၢင်ႇၵၢၼ်း – ဝႃႈၼႆ။

ၵဵဝ်ၵပ်းလွင်ႈၼႆႉ ၸုမ်းလုၵ်ႉၽိုၼ်ႉၼႂ်းပိုၼ်ႉတီႈၵေႃႈ ဢမ်ႇပိုၼ်ၽၢဝ်ႇပဵၼ်တင်းၵၢၼ်သင် ။ ယူႇတီႈၽူႈတွႆႇႁွၵ်ႈၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ ၸုမ်းသိုၵ်းထၼူႉ DSNDA ယူႇသေတႃႉ ၵပ်းသိုပ်ႇဢမ်ႇပႆႇလႆႈ။ ၵွပ်ႈၼႆလႄႈၸုမ်းယိပ်းၵွင်ႈၵၢင်ႇဢၼ်မႃးႁွင်ႉဢဝ်မၼ်းၸဝ်ႈၵႂႃႇၼၼ်ႉပဵၼ်ၸုမ်းလႂ် ပဵၼ်ၼမ်ႉမိုဝ်းၽႂ်ၼႆဢမ်ႇလႆႈႁူႉၸွမ်းတႅတ်ႈတေႃး။   

ဢွင်ႈတီႈ ထူပ်းႁၼ်တူဝ်တၢႆၸဝ်ႈၸၢင်း ၼိူဝ်သဵၼ်ႈတၢင်း ပူၺ်းၼၽႃး – ၼပၢၼ်းၵျီးၼႆႉ ယၼ်ၵႆၵၼ်တင်း တီႈတပ်ႉသိုၵ်းမၢၼ်ႈ 10 လၵ်းၵူၺ်း – ၵူၼ်းပိုၼ်ႉတီႈလၢတ်ႈ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၽွင်းႁၼ်ၶၢပ်ႈတူဝ်ၸဝ်ႈၸၢင်းၼၼ်ႉ ၵူၼ်းဝၢၼ်ႈၸွႆႈၵၼ်ဢဝ်ၵႂႃႇႁူင်းယႃ တီႈဝဵင်းယႂႃႇငၢၼ်ႇၵေႃႈ ဢမ်ႇတၼ်းၶိုတ်းသၢႆၸႂ် ၊ ၾၢႆႇသိုၵ်းမၢၼ်ႈၵေႃႈၵႆႉထူဝ်းသိုၵ်းၶဝ်ႈၼႃႇ ၊ ယဝ်ႉၵေႃႈၵူတ်ႇထတ်းႁၢဝ်ႈႁႅင်း ၊ ၽွင်းၼႆႉ လူဝ်ႇၾၢင်ႉၵၼ်ၵႂႃႇမႃးၵၼ်“– ၼႆယဝ်ႉ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။  

မိူၼ်ၼင်ႇၼႆ ၼႂ်းဝၼ်းတီႈ ၼႂ်းဝၼ်းတီႈ 18 လိူၼ်ၵျူႊလၢႆႊၼႆႉ သိုၵ်းမၢၼ်ႈထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၵျွၵ်ႉငႅၵ်ႉ (ကျောက်ငှက်)သေ  ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈ။ ဝၢႆးၼၼ်ႉသိုၵ်းမၢၼ်ႈတီႈၵူၼ်းဝၢၼ်ႈၵႂႃႇ 8 ၵေႃႉ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇသင် ။

 မိူဝ်ႈဝၼ်းတီႈ 14/7/2026 ယၢမ်းႁူဝ်ၶမ်ႈ မီးၸုမ်းဢမ်ႇႁူႉၾၢႆႇၸုမ်းၼိုင်ႈ ၶဝ်ႈတီႉ ၺွပ်း ၶႃႈႁႅမ် ၵႅမ်ႁူဝ်ပဝ်ႈ DNDP  လႄႈၵူၼ်းၶၢႆမူၵေႃႉၼိုင်ႈၵႂႃႇထႅင်ႈ ။ တႄႇလိူၼ်မေႊ ထိုင် လိူၼ်ၵျူႊလၢႆႊမႃးၼႆႉ ၵူၼ်းမိူင်း ၊ ပိဝ်ႇသေႃးထီးလႄႈ ၵၢင်ႉၵႄႇ ဝဵင်းယႂႃႇငၢၼ်ႇထုၵ်ႇၶႃႈႁႅမ် 13 ၵေႃႉ ယဝ်ႉ။