ဢွၼ်ႇယိင်းဢႃယု 6 ၶူပ်ႇ ယူႇဝၢၼ်ႈၼွင်ယႄး ဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း ႁၢႆၵႂႃႇလႆႈ 5 ၸူဝ်ႈမူင်းပၢႆ ပေႃႈမႄႈၸွမ်းႁႃ ၽိူဝ်ႇႁၼ်ၶိုၼ်းပဵၼ်တူဝ်တၢႆမီးယူႇၼႂ်းၼမ်ႉမေႃႇ ။

 မိူဝ်ႈဝၼ်းတီႈ 6/8/2026 ယၢမ်းႁူဝ်ၶမ်ႈ 5 မူင်း လုၵ်ႈဢွၼ်ႇယိင်းၵေႃႉၼိုင်ႈ  လဵၼ်ႈယူႇတၢင်းၼႃႈႁိူၼ်းၸဝ်ႈၵဝ်ႇ ၽိူဝ်ႇပေႃႈမႄႈၶုၵ်းၸႂ်လႆႈသေႁွင်ႉႁႃၵေႃႈဢမ်ႇႁၼ်ယဝ်ႉ။ ပေႃႈမႄႈ တင်း ၵူၼ်းဝၢၼ်ႈလႄႇၸွမ်းႁႃၼႂ်းဝၢၼ်ႈဢမ်ႇႁၼ် ။  ထိုင်မႃး ယၢမ်းၵၢင်ၶိုၼ်းမွၵ်ႈ  10 မူင်း ၸင်ႇထူပ်းႁၼ် ၶၢပ်ႈတူဝ်တၢႆ ၼႂ်းၼမ်ႉမေႃႇ ဢၼ်မီးၾၢႆႇၸၢၼ်းၵျွင်းမုၼ်ၸဝ်ႈၼိူဝ်လွႆ ၼႂ်းဝၢၼ်ႈၼွင်ယႄး ၊ ယၢၼ်ၵၼ်တင်းႁိူၼ်းလုၵ်ႈဢွၼ်ႇၼၼ်ႉမွၵ်ႈ လၵ်းပၢႆ ဝႃႈၼႆ ။

လုၵ်ႈဢွၼ်ႇယိင်းၼၼ်ႉ ၸိုဝ်ႈႁွင်ႉမသွင်းၼိၼ်း ( မဆောင်းနှင်း )  ဢႃယု 6 ၶူပ်ႇ ၊ ႁဵၼ်းလိၵ်ႈၸၼ်ႉဢွၼ်  KG ဝႆႉတီႈႁူင်းႁဵၼ်း ဝဵင်းဢွင်ႇပၢၼ်း။

ၸုမ်းၸွႆႈထႅမ်ပရႁိတ လၢတ်ႈၽူႈတွႆႇႁွၵ်ႈဝႃႈ -“ပေႃႈမႄႈၶဝ်ၵေႃႈတိုၵ်ႉႁဵတ်းၵၢၼ်လႄႈ ဢမ်တၼ်းၾၢင်ႉမႅၼ်ႈလုၵ်ႈဢွၼ်ႇတၼ်းဢွၵ်ႇႁိူၼ်းၵႂႃႇမိူဝ်ႈလႂ်ၼႆဢေႃႈ ၊ ၽိူဝ်ႇၶုၵ်းၸႂ်လႆႈၵေႃႈ ဢမ်ႇႁၼ်လုၵ်ႈဢွၼ်ႇယဝ်ႉ ၊ ၸင်ႇဢွၼ်ၵၼ်ၸွမ်းႁႃတင်းဝၢၼ်ႈၶႃႈဢေႃႈ ၵၢင်ၶမ်ႈ10မူင်းၼႆႉ ၸင်ႇထူပ်းႁၼ်တူဝ်တၢႆ လုၵ်ႈဢွၼ်ႇၶိုၼ်း တီႈၼႂ်းၼမ်ႉမေႃၼႆဢေႃႈ ၊ ပေႃႈၶဝ်တႄႉလၢတ်ႈဝႃႈ  တီႈတူဝ်တၢႆလုၵ်ႈဢွၼ်ႇၼၼ်ႉ ပေႇႁူဢွၼ်ႇမၼ်းႁၢႆဝႆႉ ”- ဝႃႈၼႆ ။  

 ၵူၼ်းဝၢၼ်ႈဢွၼ်ၵၼ် လၢမ်းၶၢတ်ႈဝႃႈ လႅပ်ႈတေပဵၼ်ၵူၼ်းမႃးႁူၺ်းႁွင်ႉ ဢဝ်ပေႇႁူလုၵ်ႈဢွၼ်ႇသေ ၶႃႈႁႅမ်လုၵ်ႈဢွၼ်ႇတၢႆ ယဝ်ႉဢဝ်ထိုမ်ႈတူၵ်းၼမ်ႉမေႃႇ – ဝႃႈၼႆသေတႃႉ ဢမ်ႇမီးၽႂ်ယိုၼ်ယၼ်။

ယူႇတီႈၸုမ်းၸွႆႈထႅမ် ၼႂ်းပိုၼ်ႉတီႈ ဢဝ်တူဝ်တၢႆ ဢွၼ်ႇယိင်းသူင်ႇဝႆႉတီႈႁူင်းယႃ ဝဵင်းဢွင်ႇပၢၼ်းတႃႇၵူတ်ႇထတ်းတူၺ်းၵူႈၸိူဝ်ႉၵူႈလွင်ႈ ဝႃႈၼႆ ။

တီႈဝဵင်းဢွင်ႇပၢၼ်းၼႆႉ မီးၵူၼ်းပႅၵ်ႇၼႃႈၼမ် ၊ ၵူၼ်းပၢႆႈၽေးသိုၵ်းၵေႃႈမႃးယူႇၼမ် ၊ ၵူၼ်းတၢင်းမိူင်းမၢၼ်ႈတူင်ႈပဵင်းၶိုၼ်ႈမႃးယူႇယိင်ႈၶႅၼ်းၼမ်။

ယွၼ်ႉၵူၼ်းၼမ်လႄႈ ၵၢၼ်ႁႃယၢပ်ႇ။ ၽူႈလၵ်ႉၸၵ်ႉၶုတ်ႈလိူင်ႇၼမ် ၊ လၵ်ႉၸူၼ်ႁိမ်ရူတ်ႉၶိူင်ႈလႅၼ်ႈ ၊ လၵ်ႉၾူၼ်ႊ ၊ လၵ်ႉရူတ်ႉၵႃးၵၼ်ၼႆႉ ၵႆႉပဵၼ်။ ၵူၼ်းပိုၼ်ႉတီႈတႄႉလၢတ်ႈဝႃႈ ပဵၼ်ၵူၼ်းၸၢဝ်းမၢၼ်ႈ ဢၼ်လုၵ်ႉတၢင်ႇတီႈၶိုၼ်ႈမႃးယူႇသဝ်း-ဝႃႈၼႆ။   

ၸုမ်းၸွႆႈထႅမ် ၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ – “ၼႂ်းၶၢဝ်းတၢင်းလိူၼ်လဵဝ်ၵူၺ်း  လိူင်ႈဢမူႉလဵၵ်ႉယႂ်ႇ ၼႂ်းပိုၼ်ႉတီႈၼႆႉ ၵိူတ်ႇၶိုၼ်ႈ 15 လိူင်ႈ တေဢႄႇသုတ်း ၊ ၵမ်ႈၼမ် တေပဵၼ်ၵူၼ်းဢမ်ႇမီးႁိူၼ်းယေး တၢႆယူႇၶၢင်ႈတၢင်း ၊ မဝ်းလဝ်းမဝ်းယႃႈတၢႆ ၊ ပဵၼ်ၽေးၵိုင်ႉၵၢင်ႉသေတၢႆ  ၸိူဝ်းၼႆႉ။ လိူင်ႈလုၵ်ႈဢွၼ်ႇထုၵ်ႇၶႃႈႁႅမ်တၢႆၸိူင်ႉၼႆတႄႉ ပဵၼ်လိူင်ႈယႂ်ႇ – ပေႃႈမႄႈ ၽူႈလုမ်းလႃးတူၺ်းလူလုၵ်ႈဢွၼ်ႇၶဝ် ထုၵ်ႇလီၾၢင်ႉတေႉတေႉ” – ဝႃႈၼႆ ။

ယၢမ်းလဵဝ် ယူႇတီႈပလိၵ်ႈသိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်လႆႈႁႂ်ႈထိုင်တီႈလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈဝႆႉ။