မိူဝ်ႈၼႆႉ ဝၼ်းတီႈ 7/8/2026 ယၢမ်းၵၢင်ၼႂ် ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ၸွမ်ၸိုင်ႈမိူင်းမၢၼ်ႈ ၵႂႃႇဢႅဝ်ႇယဵမ်ႈၼႂ်းသၽႃး မိူင်းထႆး ၺႃးတႅၼ်းၽွင်းၵေႃႉၼိုင်ႈ ႁွင်ႉသႅၼ်ႇၼႄၵၢင် ၸႂ်တေႃႇမိၼ်းဢွင်ႇလၢႆႇ ၼႂ်းၵႄႈၵၢင်ၵူၼ်းတင်းၼမ် ၾၢႆႇၼႃႈသိုဝ်ႇၶၢဝ်ႇ ထိုင်တီႈပလိၵ်ႈႁူမ်ႇလူမ်ႈ လႆႈလၢၵ်ႈတူဝ်ၸၼ်ဢွၵ်ႇႁွင်ႈ။

ၽွင်းမိၼ်းဢွင်ႇလၢႆႇႁွတ်ႈထိုင်လုမ်းသၽႃးၼၼ်ႉ တႅၼ်းၽွင်းၵေႃႉၼိုင်ႈၸိုဝ်ႈႁွင်ႉ ဢၼုသွၼ်ႊ ထမ်ႊၵျႆႊ ႁွင်ႉသႅၼ်ႇဝႃႈ – “For peace, for humanity” “တႃႇလွင်ႈငမ်းယဵၼ် – တႃႇသုၼ်ႇလႆႈၵူၼ်း” ၼႆသေ ယိပ်းၸေႈၽိုၼ်ၼိုင်ႈ ယုၵ်ႉမိုဝ်း ၼႄၵၢင်ၸႂ်။ ႁဵတ်းႁႂ်ႈၵူၼ်းၸိူဝ်းပႂ်ႉႁပ်ႉယူႇၼၼ်ႉတူၵ်းၸႂ်။ ပလိၵ်ႈထႆးၼႅတ်ႈဢဝ်တူဝ် ဢၼုသွၼ်ႊ ထမ်ႊၵျႆႊ ဢွၵ်ႇ ႁွင်ႈၵႂႃႇ။ ၽွင်းမၼ်းၸၢႆးၶဝ်ႈမႃးၼၼ်ႉၵေႃႈ မၼ်းၸၢႆးလၢတ်ႈတီႈႁူဝ်ပဝ်ႈသၽႃးဝႃႈ – မီးလိၵ်ႈၽိုၼ်ႈၼိုင်ႈတႃႇယိုၼ်ႈထိုင်မိၼ်းဢွင်ႇလၢႆႇ။ ပဵၼ်လိၵ်ႈဢၼ်တၢင်းပိုၼ်ႉတီႈ တၢင်ႇယိုၼ်ႈမႃး ႁႂ်ႈၸွႆႈၵႄႈလိတ်ႈပၼ် ပၼ်ႁႃလႅၼ်လိၼ် လႄႈတႃႇပူၵ်းပွင်ၸိုင်ႈမိူင်း မိူင်းမၢၼ်ႈ – ၼႆသေ ၶဝ်ႈမႃးပႂ်ႉဝႆႉၸဵမ်ၸဝ်ႉယဝ်ႉ- ဝႃႈၼႆ။

ၼႂ်းၶၢဝ်းတၢင်းမိၼ်းဢွင်ႇလၢႆႇ ႁွတ်ႈထိုင်မိူင်းထႆးပွၵ်ႈၵမ်းၼႆႉ ၺႃးၸုမ်းတူင်ႉၼိုင်သုၼ်ႇလႆႈၵူၼ်းလႄႈ ၵူၼ်းႁဵတ်းၵၢၼ် ၵၢၼ်မိူင်း မိူင်းထႆး ဢိၵ်ႇတင်း ႁႅင်းၵၢၼ်ယၢၼ်မိူင်း ၸိူဝ်းႁွတ်ႈမိူင်းထႆးၶဝ် သႄႉသွမ်းလႃႇဝႃႈတႄႉတႄႉၵူၺ်းဢမ်ႇၵႃး ၸွမ်ၽွင်းလူင်ၸိုင်ႈထႆး ၵေႃႉၽိတ်ႈမွၵ်ႇ မိၼ်းဢွင်ႇလၢႆႇဢႅဝ်ႇယဵမ်ႈမိူင်းထႆးၼၼ်ႉၵေႃႈၺႃးၵူၼ်းမိူင်းသႄႉၼႄးယႂ်ႇလူင် ။ လုမ်ႈ ၾႃႉတႄႉ ပၼ်ႁႅင်းဢီးတေႃႇလူင်ပွင်ၸိုင်ႈမိူင်းထႆးဝႃႈ ႁႂ်ႈလၢတ်ႈမိၼ်းဢွင်ႇလၢႆႇ ၵႄႈလိတ်ႈပၼ်ႁႃၸုမ်ယိပ်းၵွင်ႈၵၢင်ႇၼႂ်းပိုၼ်ႉတီႈလီလီ၊ ႁႂ်ႈပူၵ်းပွင်ၸိုင်ႈမိူင်းၸဝ်ႈၵဝ်ႇ ၶိုၼ်ႈယႂ်ႇဝႆးဝႆး ဝႃႈၼႆ။

ၸုမ်းမိၼ်းဢွင်ႇလၢႆႇႁွတ်ႈထိုင်မိူင်းထႆးၵမ်းၼႆႉ ႁွင်ႈၵၢၼ် ၾၢႆႇတၢင်းႁႅင်းငၢၼ်း မိူင်းထႆးၵေႃႈလႆႈႁူပ်ႉဢုပ်ႇတင်း ၽွင်းလူင်ၾၢႆႇႁႅင်းၵၢၼ်မိူင်းမၢၼ်ႈသေ လၢတ်ႈလွင်ႈတႃႇပၼ်သုၼ်ႇလႆႈႁႅင်းၵၢၼ်ႁဵတ်းၵၢၼ်ယူႇသဝ်းၼႂ်းမိူင်းထႆး၊ လွင်ႈၸတ်းၵၢၼ်ဢဝ်ၶေႃႈမုလ်းႁႅင်းၵၢၼ်သႂ်ႇၼႂ်း ၸၢၵ်ႈပဵၼ်ပၵ်းပဵၼ်ပိူင် ၊ တႃႇသိုပ်ႇႁဵတ်း CI ၵႂႃႇထႅင်ႈ ႁႂ်ႈပဵၼ်လွင်ႈၵမ်ႉထႅမ်ၵၢၼ်ၵဵပ်း ၶွၼ်ႇ ၸဵမ်ၸိူဝ်းၼႆႉ။

တႃႇႁူမ်ႈၵၼ်ႁဵတ်းၵၢၼ်ၵႂႃႇၼၼ်ႉတႄႉ လူင်ပွင်ၸိုင်ႈထႆးလႄႈ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇလႆႈတူၵ်းလူင်း လူင်းလၢႆးမိုဝ်းလိၵ်ႈၵိၼ်ၵႅၼ်ႇၵၼ်ၵႂႃႇ 3 ၽိုၼ် – တႃႇႁူမ်ႈၵၼ်ႁဵတ်း ၵၢၼ်ပၢႆးမၢၵ်ႈမီး၊ လွင်ႈလႅၼ်လိၼ် ၸဵမ်ၸိူဝ်းၼႆႉလႆႈႁူႉၼင်ႇၼႆ။

ဝၼ်းတီႈ 7/8/2026 ယၢမ်းဝၢႆးဝၼ်း ဝၼ်းမိူဝ်ႈၼႆႉတႄႉ တၢမ်တူဝ် ၸွမ်ၽွင်းလူင်ၸိုင်ႈထႆး ဢၼုထိၼ်ႊၶျၢၼ်ႊဝီႊရၵုၼ်ႊ ၵေႃႉၵႂႃႇသူင်ႇၸုမ်းၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ၶိုၼ်ႈႁိူဝ်းမိၼ် ပွၵ်ႈမိူဝ်းၶိုၼ်းမိူင်းမၢၼ်ႈ။