ဝၢႆးလင်ၸိုင်ႈမိူင်းယူႊၶရဵၼ်ႊ ၺႃးၶိူင်ႈၻရူၼ်ႊယိုဝ်းယဝ်ႉ ၸွမ်ၸိုင်ႈမိူင်းယူႊၶရဵၼ်ႊ သလၼ်ႊသၵီး ပိုၼ်ၽၢဝ်ႇဢွၵ်ႇၼႂ်းသိုဝ်ႇၼႅင်ႈသၢၼ်မၼ်းဝႆႉဝႃႈ – သိုပ်ႇတိုၵ်းယိုဝ်းသႂ်ႇ ႁူင်း ၸၢၵ်ႈႁုင်ၼမ်ႉမၼ်းမဵၼ် မိူင်းရတ်ႉသျႃႊၵႂႃႇ သွင်တီႈ ၼႆယဝ်ႉ။

ႁူင်းၸၢၵ်ႈႁုင်ၼမ်ႉမၼ်းမဵၼ်မိူင်းရတ်ႉသျႃႊၼႆႉ မီးၼႂ်းဝဵင်းယႃႊရူဝ်ႊသလၵ်ႊ ဢၼ်မီးႁူင်းၵၢၼ်ထွင်ၼမ်ႉ မၼ်းမဵၼ် ယႂ်ႇလိူဝ်ပိူၼ်ႈသုတ်း။ ႁူင်းၵၢၼ်ၼႆႉ တႄႇၵေႃႇသၢင်ႈမႃး မိူဝ်ႈပီ 1961 ။ ႁူင်းၵၢၼ်ၸၢၵ်ႈႁုင်ၼမ်ႉ မၼ်းမဵၼ် ၼႂ်းမိူင်းရတ်ႉသျႃႊၼႆႉ တင်းသဵင်ႈမီးယူႇ 5 တီႈ -ဝႃႈၼႆ။

ၵူၼ်းႁဵတ်းၵၢၼ် ၼႂ်းႁူင်းၵၢၼ်ၸၢၵ်ႈႁုင်ၼမ်ႉမၼ်းမဵၼ်ၼၼ်ႉ တင်းသဵင်ႈမီး 3500 ၵေႃႉသေ ႁဵတ်းဢွၵ်ႇၼမ်ႉမၼ်းသႅၼ်းၸႂ်ႉတိုဝ်းၼႂ်း ရူတ်ႉၵႃး လႄႈ ႁိူဝ်းမိၼ်ၵျႅတ်ႊ ဢိၵ်ႇတင်း ၼမ်ႉမၼ်းတၢင်ႇသႅၼ်း ၼိုင်ႈပီလႂ် ႁဵတ်းဢွၵ်ႇမွၵ်ႈ 15 လၢၼ်ႉတၼ်ႊ ဝႃႈၼႆ။

ယႃႊရူဝ်ႊသလၵ်ႊၼႆႉ မီးယူႇတၢင်းၸဵင်ႇႁွင်ႇဝၼ်းဢွၵ်ႇ ဝဵင်းမေႃႊသၵူဝ်ႊမွၵ်ႈ 170 လၵ်းသေ ႁၢင်ႇၵႆၵၼ် တင်းလႅၼ်လိၼ်မိူင်းယူႊၶရဵၼ်ႊ 430 လၵ်း ၼႆယဝ်ႉ။

မိူဝ်ႈဝူင်ႈပူၼ်ႉမႃးၼႆႉ ယူႊၶရဵၼ်ႊတႄႇယိုဝ်း ႁူင်းၵၢၼ် ၵဵပ်းၶင်ၼမ်ႉမၼ်းမဵၼ်၊ ႁူင်းၵၢၼ်ၸၢၵ်ႈႁုင်ၼမ်ႉ မၼ်းမဵၼ် တင်း ႁူင်းၵေႃႇၵၢႆႇ ၼႂ်းမိူင်းရတ်ႉသျႃႊ ဝႃႈၼႆ။