ၽူႈလၵ်ႉၸၵ်ႉၶုတ်ႈ ၵူၼ်းၸူၼ်လိူင်ႇၼမ်ၼႂ်းဝဵင်းလႃႈသဵဝ်ႈ ၸဝ်ႈၼႃႈတီႈပလိၵ်ႈ ဢမ်ႇတီႉၺွပ်းယဵတ်ႈသႂ်ႇၶွၵ်ႈၶင် ပၼ်တူတ်ႈတၢမ်ႇႁႂ်ႈထိုင်တီႈလႆႈၼၼ်ႉ ယွၼ်ႉဢဝ်ၵူၼ်းၸိူဝ်း ၼၼ်ႉ လဵင်ႉဝႆႉပဵၼ်တႃႇၸႂ်ႉတိုဝ်းႁဵတ်းၽူႈၸွပ်ႇ ဢမ်ႇၼၼ် ဢဝ်ၶၢဝ်ႇပၼ်ၶဝ် ၼႆယဝ်ႉ။

လုင်းၸၢင်းၵေႃႉယူႇဝႆႉၼႂ်းဝဵင်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝဵင်းလႃႈသဵဝ်ႈၼႆႉ ႁဵတ်းသင်လႄႈ ၽူႈလၵ်ႉၸၵ်ႉၶုတ်ႈလိူင်ႇၼမ်မႃးၵူႈမိုဝ်ႉၵူႈဝၼ်း ဢမ်ႇႁၢႆလႆႈဢၼ်ဝႃႈၼၼ်ႉ ယႄးၶဝ် သိုၵ်းၶဝ် ၼႄႇထဵင်းၶဝ် ၸိူဝ်းၼႆႉ ၶဝ်ဢမ်ႇၶဝ်ႈၸႂ်ဢမူႉသင်။ ၶဝ်ၶဝ်ႈၸႂ်ငိုၼ်းၵူၺ်း။ ၶဝ်ဢဝ်ၵူၼ်းၸိူဝ်းတိတ်းပၢင်တေႃႇလွင်းႁႄ မႃးလၵ်ႉမႃးၸူၼ်ယူႇၼႂ်းဝဵင်းၼႆႉ ႁဵတ်း ၵူၼ်းပၼ်သတၢင်းၶဝ်ၼၼ်ႉၼႃႇ။ ပေႃးၵူၼ်းမိူင်းၼႂ်းပွၵ်ႉၺွပ်းႁႄၵႂႃႇသူင်ႇပၼ်ၶဝ် ၶဝ်သမ်ႉဝႃႈၼႆႉပဵၼ်ၵူၼ်းႁဝ်းဢိူဝ်ႈၼႆႁႄ ပွႆႇဢွၵ်ႇမႃးပၼ်ၶိုၼ်း။ မိူဝ်ႈလဵဝ်ၼႆႉ ၶဝ်ပၼ်ၶေႃႈၸီႉ သင်ႇဝႆႉတီႈၵူၼ်းမိူင်းဝႃႈ ပေႃးၺွပ်းၺႃးၵူၼ်းၽူႈလၵ်ႉၸၵ်ႉၶုတ်ႈၸိူဝ်းၼႆႉၼႆ ယႃႇပေပေႃႉထုပ်ႉ၊ ယႃႇႁႅမ်၊ ယႃႇပေတၢင်ႇၼိူဝ်ဢွၼ်ႊလၢႆႊၼႆၵွၼ်ႇ။ ၵွပ်ႈၼၼ်ၽူႈလၵ်ႉၸိူဝ်းၼႆႉ ၺႃးၺွပ်းၺႃးတီႉမိူဝ်ႈလႂ်ၵေႃႈ ၶဝ်ဢမ်ႇတွၼ်ႉဢဝ်ဢယေးမၼ်းလီလီႁႄပွၵ်ႈ” ဝႃႈၼႆ။

ႁိမ်းသၢပ်ႇဝဵင်းလႃႈသဵဝ်ႈ ၼႂ်းၼႃႈတီႈသိုၵ်းၶႄႇၵဝ်ႈၵၢင်ႉၵုမ်းၵမ် ပၼ်ႇၵၢၼ်ၽွင်းငမ်းယူႇၼၼ်ႉ မီးပၢင်တေႃႇ လွင်းၵူႈသႅၼ်းသႅၼ်းဝႆႉဢမ်ႇထၢတ်ႇလႄႈ ႁဵတ်းႁႂ်ႈၵူၼ်းမိူင်းၸိူဝ်းၸပ်းယိၼ်ႉပၢင်တေႃႇလွင်းၶဝ်ႈမႃး ယုင်ႈၵဝ်း လၵ်ႉၶူဝ်းၶွင် ၸူၼ်ဢဝ်ငိုၼ်းၶမ်းၵူၼ်းမိူင်းၸိူဝ်းယူႇၼႂ်းဝဵင်းၼႆ ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈ လၢတ်ႈၼင်ႇၼႆ။

ၸၢႆးၼုမ်ႇၵေႃႉယူႇသဝ်းဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၾၢႆႇၼွၵ်ႈဝဵင်းၼႆႉ သိုၵ်းၵဝ်ႈၵၢင်ႉၶဝ်ပိုတ်ႇပၢင်တေႃႇလွင်းဝႆႉ မီးပဵၼ်သၢမ်တီႈ။ ၼိုင်ႈတီႈသမ်ႉမီးယူႇ မွၵ်ႈ 30 ၽိူၼ်။ ၵူၼ်းၸိူဝ်းၵႂႃႇသုမ်းၵၢၼ်တေႃႇလွင်းႁႄ တိတ်းယိၼ်ႉတေႃႇလွင်း။ ၸပ်းၵၢၼ်သူႇယႃႈသမ်းၾိၼ်ႇၸိူဝ်းၼွၵ်ႈ ဝဵင်းၼၼ်ႉသမ်ႉ ၶဝ်ႈမႃးလၵ်ႉၶူဝ်းၶွင် ၵဝ်းယူႇ ၼႂ်းဝဵင်း ၼၼ်ႉၼႃႇ” ဝႃႈၼႆ။

လႆႈႁူႉဝႃႈ ပၢင်တေႃႇလွင်းဢၼ်သိုၵ်းၶႄႇၵဝ်ႈၵၢင်ႉၶဝ်ပိုတ်ႇဝႆႉ ၼႂ်းၸႄႈဝဵင်းလႃႈသဵဝ်ႈၼႆႉ ပဵၼ်တၢင်း ဝၢၼ်ႈႁၢတ်ႇၵႃ၊ မၢၼ်ႈၼႃး၊ မႄႈႁၢၼ်ႇ လႄႈ ႁိမ်းၵဵတ်ႉလၢၼ်ႇၵူတ်ႇထတ်းႁိုဝ် ဢေးသျႃႊဝေႃး တၢင်းဢွၵ်ႇဝဵင်းလႃႈသဵဝ်ႈၵႂႃႇ ႁူဝ်ပိုၵ်ႉ လႄႈ ၼမ်ႉတူႈၸိူဝ်းၼၼ်ႉ ၼႆယဝ်ႉ။

ဝၢႆးလင်သိုၵ်းမၢၼ်ႈယိုတ်းမိူင်းၶဝ်ႈမႃးၵုမ်းၵမ်ပၼ်ႇၵၢၼ်ၽွင်းငမ်းဝဵင်းလႃႈသဵဝ်ႈယူႇၼၼ်ႉ ၽူႈလၵ်ႉၸၵ်ႉၶုတ်ႈလိူင်ႇၼမ်မႃးႁႅင်းတေႉတေႉသေတႃႉ ၾၢႆႇၸဝ်ႈၼႃႈတီႈပလိၵ်ႈ တင်း သိုၵ်းမၢၼ်ႈၶဝ် ဢမ်ႇသႂ်ႇၸႂ်ဢဝ်လိူင်ႈပၼ်တူတ်ႈတၢမ်ႇၵူၼ်းႁဵတ်းၽိတ်းတေႉတေႉလႄႈ ၵူၼ်းမိူင်းၸိူဝ်းယူႇၼႂ်းပွၵ်ႉၼႂ်းယွမ်ႇ ပေႃးလႆႈႁူမ်ႈၵၼ်တီႉၺွပ်းႁင်းၵူၺ်း ၼႆယဝ်ႉ။